RONA bareki re faraferwe ke dipapatso tse dintsi. Boikaelelo jwa babapatsi ke bofe? Ke go dira gore re akanye gore re tlhoka dilo tse tota re sa di tlhokeng. Babapatsi ba itse gore gantsi bareki ba laolwa thata ke maikutlo. Ka jalo, dipapatso le mafelo a borekisetso a rulagantswe ka tsela e e ngokang bareki.

Buka ya Why People Buy Things They Don’t Need (Lebaka La go Bo Batho ba Reka Dilo Tse Ba sa Di Tlhokeng) ya re: “Fa motho a rulaganyetsa go reka sengwe se sesha, gantsi o nnela go ipona ka leitlho la mogopolo a se senka, a se bona a bo a se reka.” Baitse bangwe ba akanya gore fa bareki ba ntse ba reka, ba ka itumela thata mo ba feleletsang ba tseega maikutlo. Moitse wa dipapatso e bong Jim Pooler a re: “Fa morekisi a lemoga tsela eno e moreki a ikutlwang ka yone le gore ga a kgone go laola maikutlo a gagwe, a ka dirisa tshono eo go mo rekisetsa dilwana.”

O ka itshireletsa jang gore o se ka wa tsiediwa ke matlhajana a babapatsi? Tlogela go tseega maikutlo mme o bapise se barekisi ba se solofetsang le se tota se leng boammaaruri.

TSHOLOFETSO: “Tokafatsa Botshelo Jwa Gago”

Ke ga tlholego gore re batle botshelo jo bo botoka. Babapatsi ba nnela go re bolelela gore re ka nna le dilo tsotlhe tse re di eletsang—botsogo jo bo botoka, pabalesego, go sa gatelelwe mo maikutlong le go nna le kamano e e gaufi le ba bangwe—fa fela re reka dilo tse di tshwanetseng.

BOAMMAARURI:

Fa dithoto tse re nang le tsone di oketsega, tota boleng jwa botshelo jwa rona bo ka fokotsega. Re tlhoka nako le madi a a oketsegileng go tlhokomela dithoto tse di oketsegileng. Batho ba ngomoga pelo thata ka ntlha ya dikoloto tse dintsi e bile ga ba nne le nako e e lekaneng go nna le ba lelapa le ditsala.

Molaomotheo: “Le e leng fa motho a na le letlotlo botshelo jwa gagwe ga bo nne gone ka ntlha ya dilo tse a di ruileng.”—Luke 12:15.

TSHOLOFETSO: “Tlhagelela”

Ga se batho ba bantsi ba ba ka dumelang gore fa ba reka ba a bo ba batla go kgatlha batho ba bangwe. Le fa go ntse jalo, Jim Pooler a re: “Fa batho ba reka, selo se tota se ba tlhotlheletsang go reka ke go gaisana le ditsala, baagelani, badirimmogo le ba losika.” Ka lebaka leo, gantsi dipapatso di bontsha batho ba ba atlegileng, ba ba humileng ba itumelela go dirisa dilwana tse di rekisiwang. Dipapatso tseno di naya bareki molaetsa ono: “Le wena o ka tshwana le batho bano!”

BOAMMAARURI:

Fa re leka go itshwantsha le ba bangwe ka boikaelelo jwa gore re ipone re le botlhokwa, re tla nna re sa kgotsofala. Fa re fitlhelela sengwe se re neng re eletsa go nna le sone, ka bonako fela re batla se sengwe gape.

Molaomotheo: “Morati wa selefera ga a kitla a kgotsofadiwa ke selefera.”—Moreri 5:10.

TSHOLOFETSO: “Itirele Leina Ka se O Nang le Sone”

Buka ya Shiny Objects ya re: “Tsela e e tlwaelegileng e re bontshang batho se re leng sone ka yone (kgotsa se re batlang go nna sone) ke ka go dirisa dilwana tse di rileng le go dira mponeng ka tsone.” Babapatsi ba itse seno mme ba leka go amanya dilwana tsa maina a a rileng—segolobogolo tse di tsewang e le tsa maemo a a kwa godimo—le go tshela ka tsela e e rileng.

O itsaya o le motho yo o ntseng jang mme o batla gore batho ba bangwe ba go tseye o ntse jang? O le motho yo o tsamaisanang le feshene? O le motho yo o ikatisang mmele? Go sa kgathalesege gore o batla go tsewa o le motho yo o ntseng jang, babapatsi ba solofetsa gore fela fa o reka dilo tsa leina le le rileng, o tla nna se o batlang go nna sone.

BOAMMAARURI:

Ga go sepe se re se rekang se se ka fetolang se re leng sone kgotsa sa dira gore re nne le dinonofo tse di rategang tse di jaaka boikanyegi.

Molaomotheo: “A mokgabo wa lona e se ka ya nna wa . . . go rwala mekgabiso ya gouta kgotsa wa go apara diaparo tsa kafa ntle, mme a e nne motho wa sephiri wa pelo.”—1 Petere 3:3, 4.

Mo godimo ga kgatelelo e re lebanang le yone ya babapatsi, maikutlo a rona le mekgwa ya rona le yone e ka dira gore re dirise madi botlhaswa. Dikakantsho tse thataro tse di latelang di ka go thusa go laola tsela e o dirisang madi ka yone.

1. Tila go reka ka go phamoga fela. A go tsamaya mo mabenkeleng le go fitlhela dilo e le sesolo go dira gore o itumele thata? Fa go le jalo o ka tswa o na le mokgwa wa go reka o phamoga fela. O ka tila mokgwa ono ka go akanya sentle ka ditlamorago tsa go reka se o ikaeletseng go se reka le gore o tla se tlhokomela jang. Ema go se nene mme o akanye ka dilo tse o kileng wa di reka ka go phamoga mme moragonyana o bo o ikwatlhaya. Iphe nako ya go akanya pele o dira tshwetso ya bofelo.

2. Tila go ikgomotsa ka go reka. Go reka go ka go itumedisa ka nakwana fa o go dira ka gonne mowa wa gago o le kwa tlase. Mme fa o wa mowa gape, o ka ikutlwa o tlhotlheletsega thata gore o senke boitumelo ka go reka. Mo boemong jwa go reka ka go bo o batla go ikgomotsa fela, batla ditsala tse di ka go gomotsang kgotsa o dire ditiro dingwe tse di jaaka go iphutholola maoto.

3. O se ka wa itlosa bodutu ka go reka. Dimmolo tsa maemo a a kwa godimo di dirile gore go reka e nne mokgwa wa go itlosa bodutu. Le fa o ka ya mmolong kgotsa wa fenyenkolola Internet e le go itlosa bodutu fela, bontsi jwa dilo tse o tla di bonang di diretswe go go tlhotlheletsa gore o di reke. Ya mabenkeleng fela fa go na le sengwe se o ikaeletseng go se reka, mme o reke selo seo fela.

4. Tlhopha ditsala tsa gago sentle. Tsela e ditsala tsa gago di tshelang ka yone le se di buang ka sone se ka tlhotlheletsa se o se eletsang. Fa e le gore o reka thata fela ka gonne o batla go tshwana le ditsala tsa gago, tlhopha ditsala tse di sa tseyeng madi le dilo tse di bonalang e le dilo tsa botlhokwa thata.

5. Dirisa dikarata tsa sekoloto ka botlhale. Dikarata tsa sekoloto di dira gore o kgone go reka mme o sa akanye sepe ka ditlamorago tsa gone. Leka go duela madi otlhe a o a kolotang mo karateng kgwedi le kgwedi. Batlisisa gore merokotso le dituelo tsa karata ya gago ya sekoloto di tsamaya jang mme o e bapise le mefuta ya dikarata tse dingwe tsa sekoloto go bona gore ke dife tse o ka kgonang go di duelela. Itise mo dikarateng tsa maemo a a kwa godimo (premium cards) tse di ka go letlang go dira sekoloto se segolo mme di na le melemo e o sa e tlhokeng. Mo boemong jwa go reka dilo tse di jang madi a mantsi ka sekoloto, boloka madi gore o kgone go di duelela ka nako e o di rekang ka yone.

6. Itse maemo a gago a tsa madi. Go ka nna motlhofo go dirisa madi botlhaswa fa o sa tlhomamisega gore o na le bokae. Boloka direkoto tse di mo nakong mme o itse gore madi otlhe a gago ke bokae. Dira thulaganyo ya kgwedi le kgwedi e o ka e latelang ya go dirisa madi e e dirilweng go ya ka lotseno lwa gago le ditshenyegelo tsa mo nakong e e fetileng. Dira lenaane la kafa o dirisang madi ka teng mme o le bapise le thulaganyo ya gago. Kopa tsala e o e ikanyang gore e go thusa go tlhaloganya dikgang tsa madi tse o sa di tlhaloganyeng.