LEFATSHE LE TLHAKATLHAKANE

2 | Tlhokomela se o Itshedisang ka Sone

GORENG GO LE BOTLHOKWA?

Letsatsi le letsatsi batho ba le bantsi ba a sokola ka gonne ga ba na dilo tse ba di tlhokang. Se se utlwisang botlhoko ke gore mathata a a mo lefa-tsheng a ka dira gore botshelo bo nne bokete le go feta. Goreng re rialo?

Fa go na le mathata mangwe mo lefelong lengwe dijo le rente di tura thata.
Mathata a ka dira gore batho ba senyegelwe ke ditiro le gore go nne thata go bona tiro kana a dira gore ba se ka ba amogela madi a ba neng ba a amogela pele.
Masetlapelo a ka senya dikhampani tsa batho, matlo a bone kgotsa dilo tse dingwe tse ba nang le tsone. Seno se ka dira gore ba humanege.

Se o Tlhokang go se Itse

Fa o dirisa madi a gago sentle a ka go thusa ka nako ya fa o na le mathata.
O se ka wa lebala gore madi a o a amogelang, madi a o a bayang le dilo tse o nang le tsone ga di nnele ruri.
Madi ga a ka ke a dira gore motho a itumele kgotsa a dira gore go nne le kutlwano mo lelapeng.

Se o Ka se Dirang Gone Jaanong

Se Baebele e se buang: “E re ka re na le dijo le diaparo, re tla kgotsofalela dilo tseno.”—1 Timotheo 6:8.

Fa re kgotsofalela se re nang le sone re tla itumela. Seno se botlhokwa le go feta fa re sa tlhole re na le madi a re neng re na le one pele.

Gore o kgone go kgotsofala mo botshelong, o tshwanetse go ithuta go se dirise madi a mantsi. Fa o nnela go reka dilo tse o se nang madi a tsone, o a go nna le mathata a mantsi le go feta.

SE SE KA GO THUSANG—Dikakantsho

Ka dinako tsa mathata, tlhokomela se o itshedisang ka sone

FOKOTSA DITSHENYEGELO

Dira bajete

O se ka wa reka dilo tse o sa di tlhokeng. Ipotse gore: ‘A ke tlhoka go reka koloi? A nka lema merogo go na le gore ke e reke?’
Pele o reka sengwe ipotse jaana: ‘A ke a se tlhoka? A ke na le madi a go se reka?’
Fa go kgonega, tsenya kopo ya gore puso kgotsa mekgatlho mengwe e e thusang batho e go thuse ka madi.

“Re ne ra nna fa fatshe re le lelapa gore re bue ka tsela e re tshelang ka yone. Re ne ra fokotsa madi a re a dirisang go itlosa bodutu. Gape re ne ra simolola go reka dijo tse di sa jeng madi a mantsi.”—Gift.

DIRA BAJETE

Fokotsa ditshenyegelo

Se Baebele e se buang: “Dithulaganyo tsa motho yo o dirang ka natla di dira gore a atlege, mme botlhe ba ba dirang dilo ka mafega ba feleletsa ba humanegile.” (Diane 21:5) Bajete e tla go thusa gore o se ka wa dirisa madi a a fetang a o a amogelang.

Simolola ka go kwala madi a o tla bong o na le one mo kgweding eo.
Go tswa foo, kwala dilo tse o tlhokang go di duelela kgwedi le kgwedi o bo o sekaseka gore o ntse o dirisa madi jang.
Lebelela gore a madi a o a amogelang a tla kgona go duelela ditshenyegelo tsa gago. Fa e le gore seo ga se kgonege fokotsa dilo tse o sa di tlhokeng.

“Kgwedi le kgwedi re lebelela gore re amogela bokae le gore ditshenyegelo tsa rona ke bokae. Re leka go baya madi a a tla re thusang fa re ka kopana le mathata a re neng re sa a lebelela le a gape a tla re thusang go reka dilo tse re tla di tlhokang mo nakong e e tlang. Fa re dira jaana go re thusa gore re se ka ra tlhobaela thata ka gore re setse re itse gore re a go dirisa madi a rona jang.”—Carlos.

BAYA MADI

Se tsene mo dikolotong

Fokotsa dikoloto. Fa go kgonega leka gore o se ka wa kolota sepe. Fa o batla go reka sengwe baya madi a sone.
Kgwedi le kgwedi leka go baya madi a dilo tse o tla di rekang mo nakong e e tlang le a mathata a a ka nnang a tlhaga.

DIRA KA NATLA

Se Baebele e se buang: “Tiro nngwe le nngwe ya bonatla e solegela molemo.”—Diane 14:23.

Dira ka natla

Rata tiro ya gago tota le fa e le gore ga se tiro e o ka bong o itlhophetse yone, ka gonne e go naya madi a o a tlhokang.
Dira ka natla gore o nne motho yo o ka ikanngwang. Go tla go thusa gore o nne o na le tiro mme fa o ka senyegelwa ke tiro go tla go thusa gore o kgone go bona e nngwe motlhofo.

“Ke amogela tiro nngwe le nngwe fela, tota le fa ke sa rate tiro ya teng kgotsa madi a teng a le kwa tlase ga se ke neng ke se lebeletse. Ke leka go ikanyega ka metlha le go dira tiro e ntle jaaka e kete ke a itirela.”—Dmitriy.

Se o ka se dirang fa o batla tiro . . .

Leletsa dikhampani o di bolelele gore o batla tiro, tota le fa di sa kwala gore di batla motho. Bolelela ba masika le ditsala gore o batla tiro.
Amogela tiro nngwe le nngwe fela e o e bonang.