SE O KA SE DIRANG FA DILO DI NTSE DI TURA LE GO FETA
Amogela Maemo Jaaka a Ntse
Fa ditlhwatlhwa di tlhatloga ka iketlo, re ka nna ra se ka ra lemoga seo, segolobogolo fa lotseno lwa rona le lone lo oketsega. Le fa go ntse jalo, fa ditlhwatlhwa di tlhatloga ka bonako, mme lotseno lwa rona lone lo sa oketsege, re ka nna ra simolola go tlhobaela kgotsa go nna le seterese, segolobogolo fa re na le lelapa le re tshwanetseng go le tlhokomela.
Ga re ka ke ra kgona go thibela dilo gore di se ka tsa tura. Mme gone, fa re amogela gore eo ke tsela e maemo a leng ka yone, seo se tla re solegela molemo.
BOTLHOKWA JWA GO AMOGELA MAEMO JAAKA A NTSE
Batho ba ba amogelang maemo ano a go oketsega ga ditlhwatlhwa jaaka a ntse, go nna motlhofo mo go bone gore . . .
ba nne ba ritibetse. Fa re ritibetse, re kgona go akanya sentle le go dira ditshwetso tse di siameng.
ba tile mekgwa e e sa siamang. Ka sekai, go tla bo go se botlhale gore re itlhokomolose go duela dibili e bile go tla bo go se botlhale go reka dilo tse re sa di tlhokeng.
ba tile go ngangisana le ba malapa a bone ka madi.
ba batle ditsela tsa go lepalepana le maemo, tse di ka akaretsang go reka dilo tse tota ba di tlhokang le go sa dirise madi a mantsi go sa tlhokege.
SE O KA SE DIRANG
Ikemisetse go fetofetoga le maemo. Ka dinako tsa fa ditlhwatlhwa di tlhatloga thata, go tla bo go le botlhale gore re leke go fokotsa tsela e re dirisang madi ka yone, fa go kgonega. Batho bangwe ba leka go tshela botshelo jo ba sa bo kgoneng, mme seo se dira gore maemo a bone a nne thata le go feta. Ka ntlha ya seo, ba feleletsa ba ikimetsa. Fa e le gore o na le lelapa o ka tswa o tshwenyega ka go ba tlamela, mme go a utlwala gore o tshwenyege ka seo. Le fa go ntse jalo, nna o gopotse gore go feta sepe fela, ba lelapa la gago ba tlhoka gore o ba bontshe lorato, o iphe nako le bone e bile o ba bontshe gore o a ba kgatlhegela.
Go leka go tshela botshelo jo o sa bo kgoneng, go dira gore maemo a nne thata le go feta