Tumelo

Tlhaloso: “Tumèlō ke go ikanya kaga dilō tse di sholohèlwañ, ke tlhōmamishō kaga dilō tse di sa bonweñ.” (Baheb. 11:1) Tumelo ya boammaaruri ga se go nna madumela-gotlhe, ke gore, go nna o ipaakanyeditse go dumela sengwe kwa ntle ga bosupi jo bo utlwalang kana ka gonne mongwe a batla gore se nne jalo. Tumelo ya sebele e tlhoka kitso ya konokono kana ya motheo, go itlwaelanya le bosupi, ga mmogo le pelo e e supang kanaanelo ya se bosupi bo se kayang. Ka gone, lemororo go sa kgonege go nna le tumelo ya mmatota kwa ntle ga kitso e e tlhomameng, Bibela e re ke “ka pelo” mongwe a ka bontshang tumelo.—Bar. 10:10.

Ke ka ntlha yang fa batho ba le bantsi ba se na tumelo?

Tumelo ke loungo lwa moya wa Modimo, mme Modimo ka boipelo o fa moya wa gagwe bao ba o batlang. (Bagal. 5:22; Luke 11:13) Ka jalo he batho ba ba se nang tumelo ga ba batle moya oo, kana ba dira seo ka boikaelelo jo bo phoso kana ba thibela go dira ga one mo matshelong a bone. Dilo di le dintsi di tlhotlheletsa seno:

Tlhaelo ya kitso e e tlhomameng ya Bibela: Bibela e nnile gone ka moya wa Modimo, e tlhotlheleditswe ke Modimo. (2 Tim. 3:16, 17; 2 Sam. 23:2) Go palelwa ke go e ithuta go ka kgoreletsa tswelopele lefa e ka nna efe ya tumelo ya boammaaruri. Lemororo maloko a dikereke a ka nna le Dibibela, fa ba ile ba rutwa megopolo ya batho go na le Lefoko la Modimo, ba tla tlhaela tumelo ya mmatota mo Modimong le boikaelelo jwa gagwe. Go rarabolola mathata a botshelo, ba tla sekamela mo go ikaegeng ka megopolo ya bone le ya batho ba bangwe.—Bapisa Mathaio 15:3-9.

Go tlhobogana le bodumedi: Bontsi bo ile jwa tlhoboga ka ntlha ya boitimokanyi jwa dikereke tsa La-Bodumedi, tseo di iphakang go ruta Lefoko la Modimo mme di palelwa ke go tshela tumalanong le se le se buang. Bangwe e ne e le bakgomaredi ba bodumedi jo e seng jwa Bokeresete, mme ba bona maungo a a bosula go tswa ditlwaelong tsa jone kana ba bona gore ditumelo tsa bone di ne di sa ba thuse tota go emelana le mathata a botshelo. Ka ntlha ya go tlhaela kitso e e tlhomameng ya Modimo wa boammaaruri, batho ba ba ntseng jalo ba katogela kgakala go sengwe le sengwe se se amanang le bodumedi.—Bapisa Baroma 3:3, 4; Mathaio 7:21-23.

Ga ba tlhaloganye gore ke eng fa Modimo o dumeletse boikepo: Batho ba le bantsi ga ba tlhaloganye gore ke eng Modimo o dumeletse boikepo mme he ba mo tshwaela phoso dilo tsotlhe tse di bosula tse di diragalang. Ga ba itse gore tshekamelo ya motho mo bosuleng ga e ka ntlha ya go rata ga Modimo mme ka ntlha ya sebe sa ga Adame. (Bar. 5:12) Ba ka nna ba bo ba sa lemoge go nna gone ga ga Satane Diabolo le ga tlhotlheletso ya gagwe mo dikgannyeng tsa lefatshe, ka jalo ba supa Modimo ka monwana mo dilong tse di nyatsegang tse di dirwang ke Satane. (1 Yoh. 5:19; Tshen. 12:12) Fa ka selekanyo se se rileng ba ka ne ba lemoga dilo tseno ba ka nna ba ikutlwa gore Modimo o bonya ka go tsaya kgato, ka gonne ga ba bone ka phepafalo kgang ya bolaodi jwa lobopo lotlhe mme ga ba tlhaloganye lebaka la gore bopelotelele jwa Modimo go fitlhelela nako eno ke tlhomogelo-pelo ya gore ba bone poloko. (Bar. 2:4; 2 Pet. 3:9) Gape, ga ba itse sentle-ntle gore Modimo o na le nako e a e beileng eo a tla nyeleletsang ruri botlhe ba ba dirang boikepo.—Tshen. 22:10-12; 11:18; Hab. 2:3.

Matshelo a a fentsweng ke dikeletso le dipono tsa nama: Ka kakaretso, batho bao ba tlhaelang tumelo ya mmatota ba ineetse mo telekisong ya dikgatlhego di sele. Bangwe ba ka nna ba re ba dumela Bibela mme ntswa ba sa e ithuta thata-thata kana ba ile ba palelwa ke go tlhatlhanya ka tlhoafalo ka seo ba se badileng, ka mabaka a sone le ka moo se dirang ka gone mo botshelong jwa letsatsi le letsatsi. (Bapisa 1 Ditihalō 28:9.) Mo mabakeng a mangwe, ba ile ba palelwa ke go otla tumelo e ba neng ba na le yone mme, go na le moo, ba dumelela keletso ya dilo tse di sa siamang go fenya tshekamelo ya dipelo tsa bone jalo ba katogela kgakala le Modimo le ditsela tsa gagwe.—Baheb. 3:12.

Motho o ka bapala tumelo jang?

Bar. 10:17: “Tumèlō e cwa mo go utlweñ.” (Bapisa Ditihō 17:11, 12; Yohane 4:39-42; 2 Ditihalō 9:5-8. Lantlha motho o tshwanetse go bona gore Bibela e reng, mme o tla tiisa tlhatswego-pelo ya gagwe fa a e tlhatlhoba ka kelotlhoko gore a tle a tlhatswiwe pelo ke go ikanyega ga yone.)

Bar. 10:10: “Motho o dumèla ka pelo.” (Ka go tlhatlhanya ka dilo tsa bomodimo go godisa kanaanelo mo go tsone, motho o di gatisa mo pelong ya gagwe ya tshwantshetso.)

Tumelo e tiisiwa fa motho a dira go ya ka ditsholofetso tsa Modimo mme jalo a bona bosupi jwa tshegofatso ya Modimo mo go seo a se dirileng.—Bona Pesalema 106:9-12.

Tshwantshetso: Gongwe o na le tsala eo o ka reng ka yone: ‘Ke tshepa monna yole. Ke dumela gore ke motho yo o diragatsang lefoko la gagwe, mme ke a itse gore fa ke na le bothata, o ka ntswa thuso.’ Mongwe le mongwe yo o ka buang seo ka ene e ka se ke e nne motho yo o letseng o kopane le ene maabane, a go ka nna jalo? E ka nna mongwe yo o sa bolong go kopana le ene, mongwe yo o supileng go ikanyega ga gagwe nako le nako. Ke se se tshwanang ka tumelo ya bodumedi. Go nna le tumelo, o tlhoka go ipha nako go itse Jehofa le tsela ya gagwe ya go dira dilo.

Tumelo ya gore go na le Modimo

Bona ditsebe 287-294, tlase ga setlhogo se segolo “Modimo.”

Tumelo mo tebelelong ya tsamaiso e ntšha ya dilo e e tshiamo

Fa motho a tla go tlwaelana sentle le pego ya go dirisana ga ga Jehofa le batlhanka ba gagwe, o nna le pono e e tshwanang le ya ga Joshua, yo o rileng: “Me loa itse mo peduñ tsa lona lotlhe, lo mo meoeeñ ea lona lotlhe, ha go sena sepè se se tlhaetseñ sa dilō cotlhe tse di molemō, tse Yehofa Modimo oa lona o di buileñ kaga lona; di lo dihahaletse cotlhe, ga goa tlhaèla sepè sa cōna.”—Yosh. 23:14.

Ditsholofetso tsa Bibela kaga botsogo jo bo tokafaditsweng, tsogo ya baswi, jalo jalo, di tshegediwa ke pego ya dikgakgamatso tse di dirilweng ke Jesu Keresete. Tseno ga se mainane fela. Bala dipolelo tsa Diefangele mme o bone kafa di itshupang tota fa e le ditiragalo tsa mmannete. Mafelo a a mo lefatsheng a a umakiwa; maina a babusi ba mafelo ba nako eo a a bolelwa; go bolokilwe dipolelo di ka feta e le nngwe tsa ba ba bonyeng ka matlho. Go tlhatlhanya ka bosupi jono go ka nonotsha tumelo ya gago mo ditsholofetsong tsa Bibela.

Ya kwa Diholong tsa Bogosi tsa Basupi ba ga Jehofa le kwa dikopanong tsa bone tsa kakaretso, mme ke gone o tla iponelang bosupi jwa gore tiriso ya kgakololo ya Bibela e fetola matshelo, gore e ka dira gore batho ba ikanyege le go siama mo boitsholong, gore e ka kgonisa batho botlhe ba ditso le merafe go tshela le go dira mmogo ka moya wa bokaulengwe jwa sebele.

A tota ditiro di a tlhokafala fa motho a na le tumelo?

Yak. 2:17, 18, 21, 22, 26: “Tumèlō, ha e sena ditihō, e be e shule ka eosi. E, motho moñwe oa ba a tla re, Wèna u na le tumèlō, me nna ke na le ditihō: mpontsha tumèlō ea gago kwa ntlè ga ditihō tsa gago, me nna ke tla gu bontsha tumèlō ea me ka ditihō tsa me. Ana Aberahame rra echo, a ga aa siamisiwa ka ditihō, ka a isitse Isake morwawè chupèlō mo sebeshoñ? Ua bōna ha tumèlō e pataganye le ditihō tsa gagwè, me tumèlō ea dihwa boitekanèlō ka ditihō. Gonne yaka mmele ha o sena mōea o shule, go nntse hèla yalo, tumèlō ha e tlhalanye le ditihō e shule.”

Tshwantshetso: Lekau le ka ferea lekgarebe, a mmolelela gore o a mo rata. Mme fa a sa mo kope gore ba nyalane, a tota o supa gore lerato la gagwe le legolo? Ka mo go tshwanang, ditiro ke go supa bommatota jwa tumelo ya rona le lorato. Fa re sa utlwe Modimo tota ga re mo rate kana gore re na le tumelo mo ditseleng tsa gagwe tse di tshiamo. (1 Yoh. 5:3, 4) Mme re ka se ka ra bapala poloko go sa kgathalege ditiro tse re di dirang. Botshelo jo bo sa khutleng ke mpho go tswa Modimong ka Jesu Keresete, eseng tuelo ya ditiro tsa rona.—Baef. 2:8, 9.