“Bogale Jwa me jo Bogolo bo Tla Tuka”

1-3. (a) Go tlile go direga eng fa Jehofa a galefa thata? (b) Re tlile go tlotla ka potso efe?

BANNA, basadi le bana ba eme, ba opela pina ya Bogosi. Go tswa foo mogolwane o rapela go tswa pelong, a kopa Jehofa gore a ba sireletse. Bakaulengwe le bokgaitsadi ba phuthego eno ba a itse gore Jehofa o tla ba tlhokomela, le fa go ntse jalo, ba sa ntse ba tlhoka go gomodiwa le go kgothadiwa. Kwa ntle go tsogile tlhakatlhakano, batho ba a lwa. Ntwa ya Aramagedona e simolotse.​—Tshen. 16:14, 16.

² Ka nako ya ntwa ya Aramagedona, Jehofa o tlile go fedisa batho a galefile thata. (Bala Esekiele 38:18.) Ka nako eo, o tla bo a sa lwe le mophato o le mongwe fela wa masole, e bile o tla bo a sa lwe le setšhaba se le sengwe fela. Go na le moo, o tla bo a lwa le batho ba le bantsintsi ba ba nnang mo dinageng tse di farologaneng. Mo letsatsing leo, batho ba Jehofa a ba bolaileng “ba tla bo ba rapaletse fa fatshe go tloga kwa ntlheng e nngwe ya lefatshe go fitlha kwa ntlheng e nngwe ya lefatshe.”​—Jer. 25:29, 33.

³ Baebele ya re Jehofa ke Modimo yo o lorato, ‘yo o kutlwelobotlhoko, yo o pelotlhomogi,’ le “yo o sa galefeng ka bonako.” (Ekes. 34:6; 1 Joh. 4:16) Ka jalo, ke eng se se tla dirang gore a tuke bogale? Karabo ya potso eno e tla re gomotsa, e tla dira gore re nne pelokgale e bile e tla re thusa gore re dire ka natla mo tirong ya rona ya go rera.

Ke Eng se se Dirang Gore Jehofa a Tuke Bogale?

4, 5. Bogale jwa ga Jehofa bo farologana jang le jwa batho ba ba nang le boleo?

⁴ Re tshwanetse go nna re gopotse gore bogale jwa ga Jehofa ga bo tshwane le jwa batho ba ba nang le boleo. Go le gantsi fa motho a galefile, o dira dilo a sa akanye mme seo se felela ka matlhotlhapelo fela. Ka sekai, ngwana wa ntlha wa ga Adame e bong Kaine o ne a “galefa fela thata” fa Jehofa a ne a sa amogele setlhabelo sa gagwe a bo a amogela sa ga Abele. Go ile ga direga eng? Bogale jwa ga Kaine bo ile jwa dira gore a bolaye Abele. (Gen. 4:3-8; Baheb. 11:4) Gape akanya ka Dafide, yo Baebele e reng e ne e le monna yo o amogelwang ke pelo ya ga Jehofa. (Dit. 13:22) Le fa gone Dafide e ne e le motho yo o siameng, o ile a tuka bogale fa a ne bolelelwa gore Nabale o ile a tlhapatsa ene le batlhanka ba gagwe. E re ka Dafide le masole a gagwe ba ne ba galefile, ba ile ba “gatlha ditšhaka tsa bone” ba ikaeletse go ya go bolaya Nabale le banna botlhe ba ba mo ntlong ya gagwe. Se se itumedisang ke gore mosadi wa ga Nabale e bong Abigaile, o ile a thusa Dafide le masole a gagwe gore ba lemoge gore se ba ikaeletseng go se dira ga se a siama. (1 Sam. 25:9-14, 32, 33) Ke gone ka moo Jehofa a ileng a tlhotlheletsa Jakobe gore a kwale a re: “Fa motho a galefile ga a dire se se siameng fa pele ga Modimo.”​—Jak. 1:20.

⁵ Jehofa ene ga a tshwane le batho ka gonne o kgona go laola bogale jwa gagwe. Fa a galefile, re a itse gore o galefetse eng e bile fa a galefile ga nke a dira sepe se se sa siamang. Mo godimo ga moo, fa Jehofa a lwa le baba ba gagwe, ga nke a “nyeletsa basiami le batho ba ba bosula.” (Gen. 18:22-25) Ntlha e nngwe ke gore Jehofa o galefa fela ka mabaka a a utlwalang. Mma re tlotle ka dilo di le pedi tse di dirang gore Jehofa a galefe, mme re bone gore re ka ithuta eng.

6. Jehofa o ikutlwa jang fa leina la gagwe le gogwa mo seretseng?

⁶ Lebaka la go bo Jehofa a galefa: Leina la gagwe le gogwa mo seretseng. Batho ba ba reng ba direla Jehofa mme ba dira dilo tse di maswe, ba goga leina la gagwe mo seretseng mme seno se dira gore a galefe. (Esek. 36:23) Jaaka re ithutile mo dikgaolong tse di fetileng, setšhaba sa Iseraele se ile sa goga leina la Modimo mo seretseng. Dilo tse ba neng ba di dira di ile tsa galefisa Jehofa fela thata. Mme gone, Jehofa o ne a kgona go laola tsela e a galefileng ka yone. Ga a ka a galefa ka tsela e e feteletseng, go na le moo, o ile a otlhaya batho ba gagwe ka selekanyo se se tshwanetseng. (Jer. 30:11) Mo godimo ga moo, fa Jehofa a sena go otlhaya batho ba gagwe, ga a a ka a ba tshwarela sekgopi.​—Pes. 103:9.

7, 8. Re ithuta eng mo tseleng e Jehofa a ileng a tshwara Baiseraele ka yone?

⁷ Se re se ithutang: Tsela e Jehofa a ileng a tshwara Baiseraele ka yone ke tlhagiso mo go rona. Le rona re bidiwa ka leina la Modimo fela jaaka Baiseraele. Re Basupi ba ga Jehofa. (Isa. 43:10) Dilo tse re di buang le tsela e re itshwarang ka yone e ka dira gore batho ba tlotlomatse Jehofa kgotsa e ka goga leina la gagwe mo seretseng. Re tshwanetse go ikela tlhoko gore re se ka ra dira dilo tse di maswe tse di ka dirang gore batho ba tlhapatse Jehofa. Fa re ka dira dilo tse di maswe, Jehofa o tla galefa mme go ise go ye kae, o tla sireletsa leina la gagwe gore le se ka la gogwa mo seretseng.​—Baheb. 3:13, 15; 2 Pet. 2:1, 2.

⁸ A go itse gore Jehofa o kgona go galefa thata go tshwanetse ga dira gore re tshabe go mo atamela? Nnyaa. Re a itse gore Jehofa o pelotelele e bile o a itshwarela. (Isa. 55:7; Bar. 2:4) Mme gape re a itse gore o otlhaya batho ba gagwe fa go tlhokega. Tota e bile, seno se dira gore re mo tlotle le go feta ka gonne re a itse gore ga a kitla a didimala fela fa a bona batho ba dira dilo tse di bosula e bile ba sa batle go fetoga. Ga a kitla a letla batho ba ba ntseng jalo gore ba tswelele ba le mo phuthegong ya gagwe. (1 Bakor. 5:11-13) Jehofa o re boleletse gore ke eng se se dirang gore a galefe. Ka jalo, re tshwanetse go tsamaela kgakala le dilo tse di dirang gore a galefe.​—Joh. 3:36; Bar. 1:26-32; Jak. 4:8.

9, 10. Jehofa o dira eng fa batlhanka ba gagwe ba ba ikanyegang ba tshosediwa? Ntsha dikai.

⁹ Lebaka la go bo Jehofa a galefa: Batlhanka ba gagwe ba ba ikanyegang ba a tshosediwa. Jehofa o a galefa fa baba ba gagwe ba tlhasela batho ba gagwe ba ba ikanyegang. Ka sekai, fa Baiseraele ba sena go tswa kwa Egepeto, ba ne ba feleletsa ba kampile fa thoko ga Lewatle le Lehibidu. E re ka go ne go lebega ba sa sireletsega, Faro le masole a gagwe ba ne ba leka go ba tlhasela. E rile Faro le masole a gagwe ba lelekisa Baiseraele, Jehofa o ile a somola maotwana mo dikareng tsa bone a bo a dira gore lewatle le ba khurumetse. “Ga go na ope wa bone yo o neng a falola.” (Ekes. 14:25-28) Jehofa o ile a galefela Baegepeto ka gonne o ne a rata batho ba gagwe.​—Bala Ekesodo 15:9-13.

¹⁰ Gape Jehofa o ile a sireletsa batho ba gagwe ka nako ya ga Kgosi Hesekia ka gonne a ne a ba rata. Masole a Asiria a a neng a nonofile thata e bile a le setlhogo, a ne a ya kwa motseng wa Jerusalema go ya go o tlhasela. Baasiria ba ne ba tshosetsa batho ba ga Jehofa ka gore ba tla kampa go dikologa motse wa bone le gore batho ba motse oo ba ne ba tlile go swa setlhogo. (2 Dikg. 18:27) Jehofa o ile a dira eng? O ne a romela moengele wa gagwe, mme moengele yoo o ne a bolaya masole a Asiria a ka nna 185 000 mo bosigong bo le bongwe fela! (2 Dikg. 19:34, 35) Akanya fela gore go ne go ntse jang mo kampeng ya Baasiria mo mosong o o latelang. Go ne go se na ope yo o letsang terompeta go tsosa masole, go se na ope yo o ba nayang ditaelo tsa gore ba dire eng. Go na le moo, go ne go didimetse go rile tuu! Masole a ne a lalaane mo fatshe le dibetsa tsa bone tsa ntwa.

11. Se Jehofa a ileng a se dira fa batho ba gagwe ba ne ba tshosediwa mo nakong e e fetileng se re thusa jang?

¹¹ Se re se ithutang: Tsela e Jehofa a ileng a otlhaya batho ba ba neng ba tshosetsa batho ba gagwe ka yone ke tlhagiso mo babeng ba rona, ya go re, “Ke selo se se boifisang go wela mo diatleng tsa Modimo yo o tshelang.” (Baheb. 10:31) Mme rona dipego tseno di a re gomotsa e bile di re thusa gore re nne pelokgale. Re gomodiwa ke go itse gore mmaba wa rona yo mogolo e bong Satane ga a na go atlega. Go ise go ye kae, nako ya gagwe e khutshwane ya gore a buse e tlile go fela. (Tshen. 12:12) Fa seo se ise se direge, re tla direla Jehofa re le pelokgale, re tlhatswegile pelo gore ga go na motho ope, mokgatlho ope kgotsa puso epe e e ka re thibelang go dira thato ya Modimo. (Bala Dipesalema 118:6-9.) Re dumalana le mafoko ano a ga moaposetoloi Paulo: “Fa e le gore Modimo o mo letlhakoreng la rona, ke mang yo o tla nnang kgatlhanong le rona?”​—Bar. 8:31.

12. Ke eng se se tlileng go dira gore Jehofa a galefe ka nako ya pitlagano e kgolo?

¹² Ka nako ya pitlagano e kgolo, Jehofa o tla re sireletsa, fela jaaka a ile a sireletsa Baiseraele fa Baegepeto ba ne ba ba tlhasela, le jaaka a ile a sireletsa Bajuda fa Baasiria ba ne ba dikologile Jerusalema. Fa baba ba rona ba leka go re nyeletsa, Jehofa o tlile go galefa fela thata ka gonne o a re rata. Tota re ka re fa ba re tlhasela, ba tla bo ba ama thaka ya leitlho la ga Jehofa. Ka jalo, Jehofa o tlile go tsaya kgato ka bonako go re sireletsa. (Seka. 2:8, 9) O tlile go fedisa batho ba le bantsi thata go feta ka fa a ileng a dira ka gone mo nakong e e fetileng. Mme gone, baba ba ga Jehofa ga ba a tshwanela go gakgamala fa a ba tlhasela ka nako ya pitlagano e kgolo. Ka ntlha yang?

Jehofa o Ile a Tlhagisa Batho ka Eng?

13. Jehofa o ntshitse tlhagiso efe?

¹³ Jehofa ga a “galefe ka bonako” e bile ga a bolo go ntsha tlhagiso ya gore o tlile go nyeletsa batho botlhe ba ba kgatlhanong le ene le ba ba tshosetsang batho ba gagwe. (Ekes. 34:6, 7) O ile a dirisa baporofeti ba ba jaaka Jeremia, Esekiele, Daniele, Jesu Keresete le baaposetoloi ba ba jaaka Petere, Paulo le Johane go tlhagisa batho ka ntwa ya gagwe ya makgaolakgang.​—Bona lebokose le le reng “Jehofa o Tlhagisa Batho ka Ntwa ya Gagwe ya Makgaolakgang.”

14, 15. Jehofa o ile a dira eng mme ka ntlha yang?

¹⁴ Jehofa o ile a dira gore tlhagiso eno e kwalwe mo Baebeleng. Gape o ile a netefatsa gore Baebele e ranolelwa mo dipuong di le dintsi le gore batho ba le bantsi ba nna le yone. O dirile gore go nne le baithaopi mo lefatsheng lotlhe ba ba thusang batho gore ba atamalane le ene. Gape baithaopi bano ba tlhagisa batho ka “letsatsi le legolo la ga Jehofa” le le tlang. (Sefa. 1:14; Pes. 2:10-12; 110:3) Mo godimo ga moo, o ile a dira gore batho ba gagwe ba ranolele dikgatiso tse di theilweng mo Baebeleng, mo dipuong di le dintsi tota. Gape batho bano ba dirisa diura di le dintsintsi ngwaga le ngwaga ba bolelela batho dikgang tse di molemo e bile ba ba tlhagisa ka letsatsi la gagwe.

¹⁵ Jehofa o ile a dira dilo tseno tsotlhe ka gonne “ga a eletse gore motho ope a senngwe mme o eletsa gore botlhe ba ikwatlhaye.” (2 Pet. 3:9) Eleruri ke tshiamelo go direla Modimo yo o lorato le yo o pelotelele, le go bolelela batho molaetsa wa gagwe. Mme gone, go ise go ye kae, ba ba sa tseyeng tlhagiso eno tsia, ga ba kitla ba tlhola ba nna le tshono ya go fetoga.

Bogale Jwa ga Jehofa bo Tlile go Tuka Leng?

16, 17. Jehofa o itse jang gore batho ba gagwe ba tlile go tlhaselwa leng?

¹⁶ Jehofa o setse a beile letsatsi le a tlileng go tlisa ntwa ya gagwe ya makgaolakgang ka lone. O a itse gore batho ba gagwe ba tlile go tlhaselwa leng. (Math. 24:36) O itse jang?

¹⁷ Jaaka re bone mo kgaolong e e fetileng ya buka eno, Jehofa o raya Gogo a re: “Ke tla tsenya dihuku mo ditlhaeng tsa gago.” Jehofa o tlile go dira gore ditšhaba di ye ntweng.(Esek. 38:4) Seno ga se reye gore Jehofa ke ene a tla simololang ntwa eno, e bile ga se reye gore o tla dira gore baba ba gagwe ba ye ntweng ba sa batle. Jehofa o itse se se mo dipelong tsa bone, e bile o a itse gore ba tlile go dira eng fa ba ka nna le tshono ya go tlhasela batho ba gagwe.​—Pes. 94:11; Isa. 46:9, 10; Jer. 17:10.

18. Ke eng se se tla dirang gore batho ba akanye gore ba ka kgona go lwantsha Modimo Mothatayotlhe?

¹⁸ Fa e le gore Jehofa ga se ene a tla simololang ntwa eno, e bile ga a kitla a pateletsa baba ba gagwe go ya ntweng, ke eng se se tla dirang gore batho ba akanye gore ba ka kgona go lwantsha Modimo Mothatayotlhe? Lebaka lengwe ke gore ka nako eo, gongwe ba tla bo ba ipoleletse gore Modimo ga a yo kgotsa ba tla bo ba ipoleletse gore fa e le gore o teng, ga a na sepe le dilo tse batho ba di dirang. Gongwe ba tla akanya jalo ka gonne ba tla bo ba setse ba fedisitse madumedi otlhe a maaka. Ka jalo, ba ka nna ba ipolelela gore fa nkabo Modimo a le teng, a ka bo a ile a sireletsa madumedi ao. Ba tla bo ba sa lemoge gore Modimo ke ene a ileng a tsenya kakanyo eo mo dipelong tsa bone ya gore ba fedise madumedi otlhe a a neng a goga leina la gagwe mo seretseng.​—Tshen. 17:16, 17.

19. Go ka nna ga direga eng fa bodumedi jwa maaka bo sena go senngwa?

¹⁹ Fa bodumedi jwa maaka bo sena go senngwa, Jehofa a ka nna a dira gore batho ba gagwe ba simolole go rera molaetsa o o botlhoko wa katlholo. Buka ya Tshenolo e tshwantsha molaetsa oo le sefako se se bokete jwa dikilogerama di ka nna 20. (Tshen. 16:21 ntlh.) Gongwe batho ba ga Jehofa ba tla bo ba rera molaetsa wa gore dipuso tsa batho le dikgwebo di tlile go senngwa. Molaetsa ono o tla utlwisa batho botlhoko thata mo e leng gore ba tla feleletsa ba tlhapatsa Modimo. Gongwe molaetsa ono ke one o tlileng go tlhotlheletsa dipuso gore di tlhasele batho ba Modimo. Ba tla akanya gore ga re a sireletsega le gore go tla nna motlhofo fela gore ba re nyeletse. Mme ba tla di gama ba sa di tlhapela!

Jehofa o Tla Bontsha Jang Bogale Jwa Gagwe?

20, 21. Gogo ke mang mme go tlile go direga eng ka ene?

²⁰ Jaaka re bone mo Kgaolo 17 ya buka eno, mo boporofeting jwa ga Esekiele, dipuso tse di kopaneng tse di tlileng go re tlhasela di bidiwa “Gogo wa lefatshe la Magogo.” (Esek. 38:2) Go tlile go lebega jaaka e kete batho ba ba re tlhaselang ba dirisana mmogo. Mme boammaaruri ke gore ba tla bo ba se seoposengwe ka gonne ba tla bo ba sa ntse ba gaisana, ba le boikgogomoso e bile ba akanya gore naga ya bone e botoka go gaisa dinaga tse dingwe. Go tla nna motlhofo fela gore Jehofa a dire gore ‘mongwe le mongwe wa bone a lwe le morwarraagwe ka tšhaka.’ (Esek. 38:21) Mme gone, Jehofa ke ene a tlileng go ba nyeletsa.

²¹ Pele ga baba ba rona ba nyelediwa, ba tlile go bona sesupo sa Morwa motho. Gongwe ba tlile go bona sengwe se se sa tlwaelegang, se se bontshang gore Jehofa le Jesu ba na le maatla. Ba tlile go bona dilo tse di tla dirang gore ba tlhobaele thata. Jesu o ne a re “batho ba tla idibala ka ntlha ya letshogo le ka ntlha ya dilo tse ba lebeletseng gore di tla diragala mo lefatsheng.” (Luke 21:25-27) Ba tlile go lemoga gore ba dirile phoso e e seng kana ka sepe fa ba ne ba tlhasela batho ba ga Jehofa. Ba tla patelesega go itse gore Jehofa wa masomosomo, ke molaodi wa masole. (Pes. 46:6-11; Esek. 38:23) Ga go pelaelo gore Jehofa o tlile go dirisa masole a gagwe a kwa legodimong le dilo tsa tlholego go nyeletsa baba ba gagwe, a bo a sireletsa batlhanka ba gagwe ba ba ikanyegang.​—Bala 2 Petere 2:9.

22, 23. Ke bomang ba ba tlileng go sireletsa batho ba Modimo mme ba tla ikutlwa jang ka seo?

²² Akanya fela gore Jesu o tla bo a ikutlwa jang fa a tla bo a eteletse pele masole a kwa legodimong, ba ya go tlhasela baba ba Modimo ba bo ba sireletsa batlhanka ba Gagwe. Gape akanya gore batlodiwa bone ba tla bo ba ikutlwa jang. Nako nngwe pele ga ntwa ya Aramagedona e simologa, batlodiwa ba ba tla bong ba sa ntse ba le mo lefatsheng ba tla isiwa kwa legodimong, gore e re fa Jesu a tlhasela baba ba ga Jehofa, a bo a na le batlodiwa botlhe ba ba 144 000. (Tshen. 17:12-14) Bontsi jwa batlodiwa bano e tla bo e le ditsala le ba boidiidi jo bogolo e re ka ba ile ba bereka mmogo le bone mo metlheng ya bofelo. Jaanong batlodiwa ba tla bo ba na le maatla le taolo ya go sireletsa ba boidiidi jo bogolo ba ba ileng ba ba ema nôkeng ka nako ya fa ba ne ba le mo lefatsheng.​—Math. 25:31-40.

²³ Baengele le bone ba tla bo ba le mo mophatong oo wa masole a kwa legodimong o o tla bong o eteletswe pele ke Jesu. (2 Bathes. 1:7; Tshen. 19:14) Ba setse ba ile ba thusa Jesu go ntsha Satane le madimona kwa legodimong. (Tshen. 12:7-9) Gape ba ile ba nna le seabe mo tirong ya go phutha batho ba ba batlang go obamela Jehofa. (Tshen. 14:6, 7) Ke gone ka moo Jehofa a tlileng go letla baengele gore ba sireletse batho ba gagwe ba ba ikanyegang. Botlhe ba ba mo mophatong wa masole wa ga Jehofa ba tlile go itumelela go fedisa baba ba Modimo, ka gonne seno se tla dira gore leina la Modimo le itshepisiwe le bo le tlotlomadiwe.​—Math. 6:9, 10.

24. Ba boidiidi jo bogolo ba tla dira eng?

²⁴ E re ka ba boidiidi jo bogolo ba tlile go sirelediwa ke mophato wa sesole o o nonofileng, ga ba kitla ba boifa sepe. Tota e bile, ba tla ema ba tlhamaletse ba tsholeditse ditlhogo ka gonne kgololo ya bone e tla bo e atametse. (Luke 21:28) Ka jalo go botlhokwa thata gore pele letsatsi la ga Jehofa le tla, re thuse batho ba le bantsi gore ba mo itse le gore ba mo rate.​—Bala Sefania 2:2, 3.

25. Re tla tlotla ka eng mo setlhogong se se latelang?

²⁵ Fa batho ba sena go lwa, go sala tlhakatlhakano le matlhotlhapelo fela. Mme morago ga ntwa ya Aramagedona, go tla bo go rena kagiso le boitumelo fela. Go tla nna jang fa Jehofa a sa tlhole a galefile, masole a gagwe a beile dibetsa fa fatshe e bile modumo wa ntwa ya Aramagedona o fedile? Re tla bona karabo mo setlhogong se se latelang.