THUTO 18

Bua Dintlha Tse di Rutang Bareetsi

1 Bakorintha 9:19-23

KGANGKGOLO: Dira gore bareetsi ba akanyetse kwa teng ka setlhogo sa gago, ba ikutlwe ba ithutile sengwe sa botlhokwa.

Akanya ka se bareetsi ba setseng ba se itse. Go na le go bua fela dilo tse ba setseng ba di itse, ba thuse go lemoga dilo tse disha tse ba ka di ithutang.

Se fetse nako e ntsi o bua ka dilo tse bareetsi ba setseng ba di itse, go na le moo, e dirise go ba tlhalosetsa dilo tse disha.
Dira dipatlisiso o bo o tlhatlhanya. Fa go kgonega, dirisa dintlha tse bareetsi ba sa di itseng sentle kgotsa ditiragalo tsa bosheng go gatelela dintlha tsa gago tsa konokono. Akanya ka kgang ya gago mme o leke go bona gore e tsamaisana jang le dintlha tse o batlang gore bareetsi ba di ithute.

Fa o ntse o baakanyetsa, ipotse gore, ‘eng, goreng, leng, kae, mang le jang.’ Fa o ntse o tsweletse ka puo ya gago, tokafatsa tsela e o rutang ka yone ka go botsa le go araba dingwe tsa dipotso tseno.
Bontsha gore molaetsa wa gago o botlhokwa. Bontsha gore dikwalo di ka thusa jang bareetsi mo matshelong a bone. Bua ka maemo a a rileng, mekgwa mengwe le ditiro dingwe tse bareetsi ba kgonang go di tlhaloganya le tse di ba amang.