THUTO 12
Ke Eng se se Tla go Thusang Gore o Tswelele o Ithuta Baebele?
Go bala Baebele go botlhokwa, mme gone ga go motlhofo go e bala ka metlha. Ka dinako tse dingwe, o ka tswa o ipotsa gore a o tla kgona go tswelela o ithuta Baebele. Ke eng fa o tshwanetse go tsaya matsapa a go tswelela o ithuta? Ke eng se se tla go thusang gore o tswelele o ithuta le fa o na le mathata?
1. Goreng go ithuta Baebele go le botlhokwa?
“Lefoko la Modimo le a tshela e bile le naya maatla.” (Bahebera 4:12) Baebele e botlhokwa ka gonne e senola dikakanyo tsa Modimo le tsela e a ikutlwang ka yone ka wena. E tla go thusa gore o itse boammaaruri, o nne botlhale o bo o nne le tsholofelo. Mme se se botlhokwa le go feta, Baebele e tla go thusa gore o nne tsala ya ga Jehofa. Fa o ithuta Baebele, o a bo o letla gore maatla a yone a tokafatse botshelo jwa gago.
2. Ke eng fa re tlhoka go lemoga gore go itse boammaaruri jo bo mo Baebeleng go botlhokwa?
Boammaaruri jo bo mo Baebeleng bo tshwana le matlotlo a a tlhwatlhwakgolo. Ke gone ka moo Baebele e re kgothaletsang gore re ‘reke boammaaruri mme le ka motlha re se ka ra bo rekisa.’ (Diane 23:23) Fa re nna re gopotse gore boammaaruri jo bo mo Baebeleng bo botlhokwa, re tla dira ka natla go tswelela re ithuta le fa re nna le mathata.—Bala Diane 2:4, 5.
3. Jehofa a ka go thusa jang gore o tswelele o ithuta?
E re ka Jehofa e le Mmopi yo o maatla otlhe e bile e le tsala ya gago, o batla go go thusa gore o ithute ka ene. O tla go naya ‘keletso le maatla a gore o dire jalo.’ (Bala Bafilipi 2:13.) Ka jalo, fa ka dinako tse dingwe o tlhoka mongwe yo o ka go kgothaletsang go ithuta kgotsa go dirisa se o se ithutang, Jehofa a ka kgona go go thusa. Gape fa o tlhoka maatla a go fenya mathata le dikganetso tse o kopanang le tsone, o tla go a naya. Rapela Jehofa ka metlha o mo kope gore a go thuse go tswelela o ithuta Baebele.—1 Bathesalonika 5:17.
ITHUTE MO GO OKETSEGILENG
Ithute gore ke eng se se ka go thusang gore o tswelele o ithuta Baebele le fa gone o nna o tshwaregile kgotsa bangwe ba go ganetsa. Go tswa foo, ithute gore Jehofa a ka go thusa jang gore o tswelele o ithuta.
4. Dira gore thuto ya Baebele e nne selo sa botlhokwa thata
Ka dinako tse dingwe re tshwanelwa ke go dira ditiro di le dintsi mo re ka se boneng nako ya go ithuta Baebele. Ke eng se se tla re thusang? Bala Bafilipi 1:10, lo bo lo tlotla ka dipotso tseno:
O akanya gore “dilo tsa botlhokwa thata ke dife” mo botshelong?
O ka dira jang gore thuto ya Baebele e nne selo sa botlhokwa thata?
Fa o tlatsa emere ka mmu o bo o leka go tsenya maje, maje ao ga a kitla a kgona go tsena
Fa o tsenya maje pele o tla kgona go tshela le mmu. Ka tsela e e tshwanang fa o dira “dilo tse di botlhokwa thata” pele, o tla kgona go nna le nako ya go dira dilo tse dingwe
Go ithuta Baebele go kgotsofatsa keletso ya rona ya go batla go itse Modimo le go mo obamela. Bala Mathaio 5:3, lo bo lo tlotla ka potso eno:
Re solegelwa molemo jang fa re dira gore go ithuta Baebele e nne selo sa botlhokwa thata?
5. Itshoke le fa o ganediwa
Ka dinako tse dingwe, batho ba bangwe ba ka go kgoba marapo gore o se ka wa tlhola o ithuta Baebele. Bona sekai sa ga Francesco. Tshameka BIDIO eno, lo bo lo tlotla ka dipotso tse di latelang.
Mo bidiong eno, ditsala tsa ga Francesco le ba lelapa la gagwe ba ile ba dira eng fa a ba bolelela se a se ithutang?
O ile a bona maduo afe ka gonne a itshokile?
Bala 2 Timotheo 2:24, 25, lo bo lo tlotla ka dipotso tseno:
Ba lelapa la gago le ditsala tsa gago ba ikutlwa jang ka se o se ithutang?
Go ya ka ditemana tseno, o tshwanetse go dira eng fa mongwe a sa batle o ithuta Baebele? Goreng?
6. Ikanye Jehofa mme o tla go thusa
Fa botsala jwa rona le Jehofa bo ntse bo gola, re batla go mo itumedisa le go feta. Mme gone, re ka bona go le thata go fetola dilo dingwe mo matshelong a rona gore re kgone go tshela ka tsela e Jehofa a e batlang. Fa o ikutlwa jalo, o se ka wa ineela. Jehofa o tla go thusa. Tshameka BIDIO eno, lo bo lo tlotla ka dipotso tse di latelang.
Mo bidiong eno, Jim o dirile diphetogo dife gore a itumedise Jehofa?
Ke eng se se go kgatlhang thata ka sekao sa ga Jim?
Bala Bahebera 11:6, lo bo lo tlotla ka dipotso tseno:
Ke eng se Jehofa a tla se direlang batho ba ba lekang ka natla go mo itse le go mo itumedisa?
Seno se go bolelela eng ka tsela e Jehofa a ikutlwang ka yone fa a go bona o tsaya matsapa a go ithuta Baebele?
MONGWE A KA BOTSA A RE: “Goreng o ithuta Baebele?”
O ka araba o reng?
O ITHUTILE ENG?
Le fa gone go ithuta Baebele go se motlhofo, go ka go thusa gore o tshelele ruri o itumetse. Tswelela o ikaega ka Jehofa, mme o tla go duela.
Poeletso
Goreng boammaaruri jwa Baebele bo le botlhokwa mo go wena?
O ka dira eng go bontsha gore o lemoga gore “dilo tse di botlhokwa thata ke dife”?
Goreng o tshwanetse go kopa Jehofa gore a go thuse go tswelela o ithuta Baebele?
DINTLHA TSE DINGWE
Bona ditsela tse nnê tse di thusitseng batho ba le bantsi go dirisa nako ya bone ka botlhale.
“Ka fa O ka Dirisang Nako ya Gago ka Botlhale ka Teng” (Tsogang! February 2014)
Bona gore Jehofa o ile a thusa jang mosadi mongwe yo monna wa gagwe a neng a sa tlhaloganye maiteko a gagwe a go itumedisa Modimo.
Bona gore monna mongwe o ile a solegelwa molemo jang ke go itshoka ga mosadi wa gagwe.
Ka dinako tse dingwe, Basupi ba ga Jehofa ba latofadiwa ka gore ba thuba malapa. A seo se boammaaruri?
“A Basupi ba ga Jehofa ba Thuba Malapa Kgotsa ba a Aga?” (Setlhogo se se mo website)