THUTO 05
Baebele ke Molaetsa o o Tswang Kwa Modimong
Jehofa o re file Baebele. Ke mpho e e molemolemo e e nang le dibukana di le 66. Mme o ka tswa o ipotsa gore: Go tlile jang gore Baebele e nne teng? Mme gone e tswa kae? Go araba dipotso tseno, mma re bone gore go tlile jang gore re nne le molaetsa wa Modimo o o mo Baebeleng.
1. Fa e le gore Baebele e kwadilwe ke batho, goreng re re e tswa kwa Modimong?
Baebele e ne ya kwalwa ke banna ba ka nna 40 ka lobaka lwa dingwaga di ka nna 1 600. Buka ya ntlha e ne ya kwalwa dingwaga di ka nna 3 500 tse di fetileng, mme buka ya bofelo e ne ya kwalwa dingwaga di ka nna 1900 tse di fetileng. Mme bakwadi ba yone ba ne ba farologane. Le fa go ntse jalo, Baebele yotlhe e a dumalana. Seno se kgonega jang? Ka gonne Baebele ke lefoko la Modimo. (Bala 1 Bathesalonika 2:13.) Batho ba ba neng ba e kwala, ba ne ba sa kwale megopolo ya bone. Go na le moo, “ba ne ba bua se se tswang kwa Modimong ka gonne ba ne ba tlhotlhelediwa ke moya o o boitshepo.”a (2 Petere 1:21) Modimo o ne a dirisa moya wa gagwe o o boitshepo go tlhotlheletsa banna bao gore ba kwale megopolo ya gagwe.—2 Timotheo 3:16.
2. Ke bomang ba ba ka solegelwang molemo ke Baebele?
“Batho ba ditšhaba tsotlhe le ba ditso tsotlhe le ba dipuo tsotlhe le ba merafe yotlhe” ba ka solegelwa molemo ke dikgang tse di molemo tse di mo Baebeleng. (Bala Tshenolo 14:6.) Modimo o ne a tlhomamisa gore Baebele e nna teng ka dipuo tse di farologaneng go gaisa buka epe fela. Mo e ka nnang mongwe le mongwe gompieno a ka kgona go bala molaetsa o o tswang kwa Modimong. Batho ba ka kgona go dira jalo go sa kgathalesege gore ba nna kae kgotsa ba bua puo efe.
3. Jehofa o ne a sireletsa Baebele jang?
Baebele e ne e kwaletswe mo dilong tse di senyegang motlhofo. Go ne go dirisiwa memeno e e dirilweng ka matlalo a diphologolo kgotsa ka lotlhaka lwa semela se se bidiwang papirase. Le fa go ntse jalo, batho ba ba ratang Baebele ba ne ba e kwalolola ka kelotlhoko. Balaodi bangwe le baeteledipele ba bodumedi ba ne ba leka go nyeletsa Baebele, mme go ne go na le batho bangwe ba ba neng ba ikemiseditse go tsenya matshelo a bone mo kotsing gore ba e sireletse. Jehofa ga a ka a letla ope kgotsa sepe se mo thibela go bua le rona. Baebele e a re: “Lefoko la Modimo wa rona le nna ka bosakhutleng.”—Isaia 40:8.
ITHUTE MO GO OKETSEGILENG
Ithute gore Modimo o ne a tlhotlheletsa banna bangwe jang gore ba kwale Baebele, o ne a e sireletsa jang le gore o ne a dira jang gore batho ba nne le yone.
4. Baebele e tlhalosa gore e tswa kae
Tshameka BIDIO eno. Go tswa foo bala 2 Timotheo 3:16, lo bo lo tlotla ka dipotso tse di latelang.
Fa e le gore Baebele e kwadilwe ke batho, goreng e bidiwa Lefoko la Modimo?
A kgang ya gore Modimo o ne a fetisetsa megopolo ya gagwe mo bathong gore ba e kwale, e a utlwala?
Mokwaledi a ka nna a kwala lekwalo, mme gone molaetsa wa lone o tswa kwa mothong yo a mo laelang gore a le kwale. Ka tsela e e tshwanang, batho ba ne ba kwala Baebele, mme gone molaetsa wa yone o ne o tswa kwa Modimong
5. Maiteko a go fedisa Baebele ga a atlega
E re ka Baebele e tswa kwa Modimong, re ka solofela gore a e sireletse. Go ralala hisitori, batho ba ba nang le maatla ba ne ba leka go fedisa Baebele. Baeteledipele ba bodumedi ba ne ba leka go e fitlha. Le fa gone batho ba le bantsi ba ne ba ganediwa e bile ba tshosediwa ka gore ba tla bolawa, ba ne ba tsenya matshelo a bone mo kotsing gore ba sireletse Baebele. Fa o batla go ithuta ka mongwe wa banna bao, tshameka BIDIO eno, lo bo lo tlotla ka dipotso tse di latelang.
E re ka jaanong o itse gore batho ba ne ba tsaya matsapa a magolo go sireletsa Baebele, a o kgatlhegela go e bala? Ka ntlha ya eng?
Bala Pesalema 119:97, lo bo lo tlotla ka potso eno.
Ke eng se se neng sa tlhotlheletsa batho ba le bantsi go tsenya matshelo a bone mo kotsing gore ba ranole Baebele le go e anamisa?
6. Buka e e diretsweng batho botlhe
Baebele e ranoletswe mo dipuong tse dintsi go gaisa dibuka tse dingwe e bile e anamisitswe go di gaisa. Bala Ditiro 10:34, 35, lo bo lo tlotla ka dipotso tseno:
Ke eng fa Modimo a batla gore Lefoko la gagwe le ranolelwe mo dipuong tse dintsi le bo le anamisiwe?
Ke eng se o se ratang ka Baebele?
Batho ba ba ka nnang diperesente tse
100
mo lefatsheng
ba kgona go bala Baebele ka puo e ba e tlhaloganyang
E gone ka dipuo di feta
3 000
e feletse kgotsa dikarolo tsa yone
Go fopholediwa gore go anamisitswe dikhopi di le
5 000 000 000
go gaisa buka epe fela
BATHO BANGWE BA RE: “Baebele ke buka ya bogologolo e e kwadilweng ke batho.”
Wena o akanya eng?
Ke bosupi bofe jo bo bontshang gore Baebele ke Lefoko la Modimo?
O ITHUTILE ENG?
Baebele ke Lefoko la Modimo, e bile Modimo o ile a tlhomamisa gore batho ba nna le yone.
Poeletso
Go tewa jang fa go twe Modimo o ne a tlhotlheletsa banna bangwe gore ba kwale Baebele?
Ke eng se se go kgatlhang ka kgang ya go bo Baebele e sa kgona go fedisiwa, ka go anamisiwa ga yone le go ranolwa ga yone?
E re ka o itse gore Modimo o tsaya matsapa go bua le wena, o ikutlwa jang ka seo?
DINTLHA TSE DINGWE
Bala pego ya gore go tlile jang gore Baebele e nne gone go tswa mo mekwalong ya seatla ya bogologolo go fitlha mo dithanolong tsa gone jaanong.
“Kafa Baebele e Tlileng mo go Rona ka Teng” (Tsogang! November 2007)
Ithute gore Baebele e ne ya falola jang matshosetsi a mararo a magolo a gore e tswelele e le teng.
“Baebele—Kafa e Falotseng ka Gone” (Tora ya Tebelo No. 4 2016)
Bona gore batho ba bangwe ba ile ba tsenya matshelo a bone mo kotsing jang gore ba ranole Baebele.
Baebele e ne ya kwalololwa ya bo ya ranolwa gantsintsi. Re ka tlhatswega pelo jang gore molaetsa wa Modimo ga o a fetoga?