THUTO 34
Re ka Dira Eng go Bontsha Jehofa Gore Re a Mo Rata?
A gone jaanong o rata Modimo go feta kafa o neng o mo rata ka gone fa o simolola go ithuta Baebele? A o ka rata go tswelela o tiisa botsala jwa gago le ene? Fa go le jalo, gopola gore fa Jehofa a ntse a bona tsela e o mo ratang ka yone e gola, le ene o tla go rata e bile o tla go tlhokomela. O ka dira eng go mmontsha gore o a mo rata?
1. Re ka dira eng go bontsha Jehofa gore re a mo rata?
Re bontsha Jehofa gore re a mo rata ka go mo ikobela. (Bala 1 Johane 5:3.) Ga a pateletse ope gore a mo ikobele. Go na le moo, o naya mongwe le mongwe tshono ya gore a itlhophele gore a o tla mo ikobela kgotsa ga a kitla a mo ikobela. Goreng? Jehofa o batla gore re nne “kutlo ka pelo yotlhe.” (Baroma 6:17) Seo se raya gore o batla gore o mo ikobele ka gonne o mo rata, e seng ka gonne o patelesega go dira jalo. Karolo 3 le 4 tsa buka eno, di diretswe gore o bontshe Jehofa gore o a mo rata ka go dira dilo tse di mo itumedisang le ka go tila dilo tse di sa mo itumediseng.
2. Goreng go ka nna thata go bontsha Jehofa gore re a mo rata?
“Mathata a mosiami a mantsi.” (Pesalema 34:19) Rotlhe re lwantshana le makoa a rona. Gape re ka nna ra nna le mathata a ikonomi, go sa tshwarwe sentle le mathata a mangwe. Fa re na le mathata, re ka nna ra thatafalelwa ke go dira se Jehofa a se batlang. Seno ke ka gonne go dira se se sa siamang go ka tswa go le motlhofo. Mme gone, fa o dira se Jehofa a batlang gore o se dire, o a bo o bontsha gore o mo rata go gaisa sepe fela. Gape o a bo o bontsha gore o ikanyega mo go ene. Mme le ene o tla ikanyega mo go wena. Ga a kitla a go tlogela.—Bala Pesalema 4:3.
ITHUTE MO GO OKETSEGILENG
Ithute gore ke eng fa Jehofa a itumela fa o mo ikobela, le gore ke eng se se ka go thusang go dira jalo.
3. Kgang e e go amang
Buka ya Baebele ya Jobe e tlhalosa gore Satane o ne a latofatsa Jobe le batho ba bangwe botlhe ba ba batlang go direla Jehofa. Bala Jobe 1:1, 6–2:10, lo bo lo tlotla ka dipotso tseno:
Go ya ka Satane, ke eng fa Jobe a ne a ikobela Jehofa?—Bona Jobe 1:9-11.
Satane o latofatsa batho botlhe ka eng, go akaretsa le wena?—Bona Jobe 2:4.
Bala Jobe 27:5b, lo bo lo tlotla ka potso eno:
Jobe o ile a bontsha jang gore ruri o rata Jehofa?
Jobe o ile a bontsha gore o rata Jehofa ka go tswelela a ikanyega mo go ene
Re bontsha gore re rata Jehofa ka go tswelela re ikanyega mo go ene
4. Itumedise pelo ya ga Jehofa
Bala Diane 27:11, lo bo lo tlotla ka dipotso tseno:
Jehofa o ikutlwa jang fa o bontsha gore o botlhale ka go mo ikobela? Goreng o rialo?
5. O ka kgona go ikanyega mo go Jehofa
Fa re rata Jehofa, re tla tlhotlheletsega go bolelela ba bangwe ka ene. Fa re ikanyega mo go ene, re tla tlhotlheletsega go bua ka ene le fa go dira jalo go se motlhofo. Tshameka BIDIO eno, lo bo lo tlotla ka dipotso tse di latelang.
A o bona go le thata go bolelela batho ba bangwe ka Jehofa?
Mo bidiong eno, ke eng se se thusitseng Goitseone gore a kgone go fenya letshogo?
Go motlhofo go ikanyega mo go Jehofa fa re rata se a se ratang e bile re tlhoile se a se tlhoileng. Bala Pesalema 97:10, lo bo lo tlotla ka dipotso tseno:
Go ya ka se o se ithutileng, dingwe tsa dilo tse Jehofa a di ratang ke dife? Dilo dingwe tse a di tlhoileng ke dife?
Ke eng se se ka go thusang gore o rate se se siameng mme o tlhoe se se bosula?
6. Fa re ikobela Jehofa re solegelwa molemo
Go ikobela Jehofa go re solegela molemo ka dinako tsotlhe. Bala Isaia 48:17, 18, lo bo lo tlotla ka dipotso tseno:
A o akanya gore re ka tshepa gore Jehofa o itse se se re siametseng ka dinako tsotlhe? Goreng o rialo?
Go ithuta Baebele le go ithuta ka Modimo wa boammaaruri Jehofa, go go solegetse molemo jang go tla go fitlha jaana?
BATHO BANGWE BA RE: “Se ke se dirang ga se ame Modimo ka tsela epe.”
O ka dirisa temana efe go mmontsha gore se re se dirang se ka itumedisa Jehofa kgotsa se ka mo utlwisa botlhoko?
O ITHUTILE ENG?
Re bontsha Jehofa gore re a mo rata ka go mo ikobela, le ka go tswelela re ikanyega mo go ene le fa go dira jalo go le thata.
Poeletso
O ithutile eng mo sekaong sa ga Jobe?
O ka dira eng go bontsha Jehofa gore o a mo rata?
Ke eng se se ka go thusang gore o tswelele o ikanyega mo go Jehofa?
DINTLHA TSE DINGWE
Bona gore o ka dira eng gore o ikanyege mo go Jehofa le mo phuthegong.
Utlwa dintlha tse di oketsegileng tsa kafa Satane a latofatsang batho ka gone.
“Jobe o Boloka Bothokgami” (Baebele—E na Le Molaetsa Ofe? karolo 6)
Bona gore bana le bone ba ka bontsha jang gore ba rata Jehofa.
Mosha a ka dira eng gore a tswelele a ikanyega mo Modimong fa balekane ba gagwe ba leka go mo pateletsa go dira selo se se sa siamang?