Kafa Molaetsa wa Bogosi o Fitlhileng ka Gone Kwa Portugal

FA MAKHUBU a ntse a itaya sekepe se se neng se ya kwa Yuropa, mongwe wa bapalami ba sone e bong George Young o ne a akantse ka tiro ya go rera molaetsa wa Bogosi e a neng a sa tswa go e dira kwa Brazil.a Le fa go ntse jalo, fa a ntse a tsweletse ka loeto, o ne a simolola go akanya ka kabelo ya gagwe e ntšha, e leng go rera kwa nageng ya Spain le Portugal. O ne a ikaeletse gore fa a fitlha kwa dinageng tseo, o tla rulaganya dipuo tsa Baebele tse di neng di tla neelwa ke Mokaulengwe J. F. Rutherford le go tsamaisa dipampitshana di le 300 000.

Fa Mokaulengwe Young a fitlha kwa Lisbon ka 1925, maemo a ne a sa jese diwelang. Mokgatlho mongwe wa dipolotiki o ile wa menola puso ka 1910 mme seno sa dira gore Kereke ya Katoliki e se ka ya tlhola e nna le tlhotlheletso e e kalo. Baagi ba ile ba newa ditshwanelo tse di oketsegileng, le fa go ntse jalo, go ne ga tswelela go na le dintwa tsa selegae.

Fa Mokaulengwe Young a ntse a dira dithulaganyo tsa puo ya ga Mokaulengwe Rutherford, puso e ile ya romela masole ka gonne mekgatlho mengwe e ne e leka go menola puso. Mokwaledi wa Lekgotla la Baebele la Boritane le Dipuo Tsa Dinaga Tse Dingwe o ile a bolelela Mokaulengwe Young gore seno se ne se tla dira gore ba bogisiwe. Mme gone, Mokaulengwe Young o ile a kopa go dirisa jimi ya sekolo sa Camões, mme kopo ya gagwe e ne ya atlega.

Mokaulengwe Rutherford o ne a neela puo ya gagwe ka May 13. Pele ga puo eo, batho ba ne ba swegaswega pelo. Dipolakate tse di neng di beilwe mo meagong le makwalodikgang a ne a itsise batho ka puo ya ga Mokaulengwe Rutherford e e neng e bua ka go tshelela ruri mo lefatsheng. Baganetsi ba ile ba gatisa setlhogo sengwe se se neng se bolelela babadi gore ba se ka ba ikamanya ka gope le baithuti ba Baebele. Mo godimo ga moo, ba ile ba ya kwa puo e neng e tshwaretswe gone mme ba naya batho ba le bantsi diboroutšhara tse di neng di kgala dithuto tsa ga Mokaulengwe Rutherford.

Go ne ga tla batho ba le bantsi, mme go ne ga tsena fela ba le 2 000, ba bangwe ba ne ba tshwanelwa ke go boela gae ka gonne jimi e ne e tletse. Batho bangwe ba ne ba dutse mo dillereng tsa thapo mme ba bangwe ba ne ba dutse mo dilong tse di dirisediwang go ikatisa.

Dilo ga di a ka tsa tsamaya sentle. Baganetsi ba ne ba goa e bile ba baka tlhakatlhakano. Le fa go ntse jalo, Mokaulengwe Rutherford o ne a tswelela a ritibetse. O ile a palama tafole gore batho ba kgone go mo utlwa sentle. Fa puo ya gagwe e sena go fela mo e ka nnang bosigogare, batho ba feta 1 200 ba ile ba kwala maina le diaterese tsa bone gore ba romelelwe dikgatiso tse di theilweng mo Baebeleng. Mo letsatsing le le latelang, lekwalodikgang la O Século le ne la gatisa setlhogo se se buang ka puo ya ga Mokaulengwe Rutherford.

Ka September 1925, go ne ga simololwa go gatisiwa makasine wa Tora ya Tebelo ka puo ya Sepotokisi kwa Portugal. (Makasine ono o ne o setse o gatisiwa kwa Brazil.) Ka nako eo, moithuti mongwe wa Baebele wa kwa Brazil e bong Virgílio Ferguson o ne a dira dithulaganyo tsa go fudugela kwa Portugal go ya go thusa mo tirong ya go rera. Pelenyana ga moo, o ne a bereka le Mokaulengwe Young kwa ofising ya lekala ya Baithuti ba Baebele kwa Brazil. Kgabagare ene le mosadi wa gagwe e bong Lizzie ba ne ba fudugela kwa Portugal. Mokaulengwe Ferguson o ne a goroga ka nako e e siameng ka gonne nakonyana morago ga moo, Mokaulengwe Young o ne a ya go direla kwa mafelong a mangwe, go akaretsa le dinaga tse e neng e le karolo ya Soviet Union.

Fa go tlhongwa puso ya bobusaesi kwa Portugal, Baithuti ba Baebele ba ne ba ganediwa le go feta. Le fa go ntse jalo, Mokaulengwe Ferguson ga a ka a ineela, go na le moo, o ile a dira ka natla go sireletsa Baithuti ba Baebele le go ema tiro e ba neng ba e dira nokeng. O ne a kopa tetla ya gore ba tshwarele dipokano kwa legaeng la gagwe. Ka October 1927, kopo ya gagwe e ne ya atlega.

Ka ngwaga wa ntlha wa puso eo, batho ba ka nna 450 kwa Portugal ba ne ba kwadisitse maina a bone gore ba romelelwe makasine wa Tora ya Tebelo ka metlha. Mo godimo ga moo, dipampitshana le dibukana di ile tsa thusa gore molaetsa wa Bogosi o fitlhe kwa dinageng tse di kgakala tsa Mmusomogolo wa Portugal e leng Angola, Azores, Cape Verde, East Timor, Goa, Madeira le Mozambique.

Ka 1929, monna mongwe wa Mopotokisi yo o bidiwang Manuel da Silva Jordão o ne a fudugela kwa Lisbon. Fa a ne a nna kwa Brazil, o ile a utlwa Mokaulengwe Young a neela puo ya phatlalatsa. O ne a lemoga gore Mokaulengwe Young o ruta boammaaruri, ka jalo o ne a ikemiseditse go thusa Mokaulengwe Ferguson mo tirong ya go rera. Manuel o ne a nna morekisi wa dibuka, e leng tsela e babulatsela ba neng ba bidiwa ka yone. E re ka jaanong tiro ya go gatisa le go anamisa dikgatiso tsa Baebele e ne e rulagantswe sentle, phuthego e ntšha ya kwa Lisbon e ne ya gola fela thata.

Ka 1934, Mokaulengwe le Kgaitsadi Ferguson ba ne ba boela kwa Brazil. Mme gone, ba ne ba jetse peo ya boammaaruri kwa Portugal. Le fa go ile ga tsoga tlhakatlhakano kwa Yuropa ka nako ya Ntwa ya Selegae ya Spain le ka Ntwa ya Lefatshe II, batlhanka ba ga Jehofa ba ne ba tswelela ba ikanyega. Mme gone, go ne ga feta nakonyana ba goga dinao mo tirong ya Modimo. Le fa go ntse jalo, ka 1947 fa morongwa mongwe yo o tswang kwa Gileade e bong John Cooke a ne a ya go thusa koo, ba ile ba tlhagafala gape mo tirong ya ga Jehofa. Morago ga moo, palo ya baboledi ba Bogosi e ne ya gola. Tota le fa puso e ne e thibela tiro ya Basupi ba ga Jehofa ka 1962, phuthego e ne ya tswelela e ntse e gola. Fa Basupi ba ga Jehofa ba ne ba boa ba kwadisiwa semolao ka December 1974, go ne go na le baboledi ba feta 13 000 kwa nageng eo.

Gompieno go na le baboledi ba Bogosi ba feta 50 000 kwa Portugal le ditlhaketlhake di le mmalwa tse go buiwang Sepotokisi kwa go tsone go akaretsa setlhaketlhake sa Azores le Madeira. Bangwe ba bone ke ditlogolwana tsa bakaulengwe ba ba neng ba reeditse puo ya Baebele ya ga Mokaulengwe Rutherford ka 1925.

Ruri re leboga Jehofa le bakaulengwe le bokgaitsadi ba ba neng ba dira ka natla mo tirong ya go rera e le ‘batlhanka ba ga Keresete Jesu mo ditšhabeng.’—Bar. 15:15, 16.—Go tswa mo mabolokelong a rona kwa Portugal.