Maemo a Bosa a a Fetofetogang le Bokamoso Jwa Rona​—Baebele e a Reng ka Kgang Eno

“Go fetofetoga ga maemo a bosa ke mathata a magolo mme seo se dira gore lefatshe le senyegele go ya pele.”​—The Guardian.

Batho ba lebana le mathata a magolo a ba itiretseng one. Baitsesaense ba le bantsi ba dumalana gore dilo tse batho ba di dirang di baka mogote o feteletseng (global warming). Mogote ono o setse o amile tlelaemete ya rona mme seno se nnile le diphelelo tse di botlhoko. Diphelelo tseno di akaretsa:

• Maemo a bosa a a feteletseng, jaaka mogote le komelelo tse di bakang melelo ya naga le dipula tse di maatla tse di bakang merwalela.

• Go nyerologa ga aese e e mo dithabeng le aese e e mo lewatleng la Arctic.

• Go tlhatloga ga bogodimo jwa lewatle.

Go fetofetoga ga tlelaemete go amile boemo jwa polanete ya rona fela thata. Morago ga go tlhalosa boemo jwa dinaga di ka nna 193, New York Times e begile gore: “Polanete e kopa thuso.” Go fetofetoga ga tlelaemete go dirile gore batho bangwe ba boge le go swa ka jalo, World Health Organization e bontshitse seo ele “selo se se kotsi mo boitekanelong jwa batho.”

Le fa go ntse jalo, re na le lebaka la go nna le tsholofelo ka bokamoso. Baebele e sa le e boleletsepele ka ditiragalo tse re di bonang di direga gompieno, gape e ile ya bontsha gore goreng re ka lebelela gore Modimo o tla dira sengwe ka dilo tseno le gore o tla dira eng go sireletsa bokamoso jwa rona.

A go fetofetoga ga maemo a tlelaemete go diragatsa boporofeti jwa Baebele?

Ee. Mathata a tlelaemete a a bakiwang ke mogote o o feteletseng (global warming) a dumalana le se Baebele e se boleletseng pele ka motlha wa rona.

Boporofeti: “Mme itse gore mo malatsing a bofelo, go tla nna le dinako tse di thata e bile di le kotsi. Gonne batho ba tla ikakanyetsa ba le bosi, ba rata madi, . . . ba sa ikanyege, . . . ba sa batle go dumalana le ba bangwe ka sepe, . . . ba tsietsa ba bangwe, ba le tlhogoethata.”​—2 Timotheo 3:1-4.

Baebele e ile ya bolelela pele ka mekgwa ya batho le maitshwaro a a dirileng gore go nne le mathata a tlelaemete. Dipuso le dikgwebo di tshwenyegile fela ka go dira madi mme e seng ka bokamoso jwa batho. Le fa ba ka leka go dirisana mmogo, ga ba kgone go dumalana ka dikgato tse ba tshwanetseng go di tsaya go emisa mogote o o feteletseng (global warming).

Boporofeti jono bo bontsha gore ga re a tshwanela go solofela gore batho ba tla fetola tsela e ba itshwarang ka yone le go sireletsa lefatshe. Go na le moo, batho “ba tla tswelela ba sulafalela pele” ka gonne Baebele e sale e boleletse pele gore batho ba tla ikakanyetsa ba le bosi.​—2 Timotheo 3:13.

Ke eng fa re ka tlhomamisega gore Modimo o tla tsaya kgato

Baebele e bontsha gore Mmopi wa rona Jehofaa, o amega thata ka lefatshe le banni ba ba mo go lone. Bona ditemana di le tharo tse di bontshang gore Modimo o tla tsaya kgato.

1. 1. Modimo “Yo o sa bopelang [lefatshe] lefela, mme a le bopetse gore le nniwe.”​—Isaia 45:18.

   Modimo o tla diragatsa boikaelelo jwa gagwe ka lefatshe. (Isaia 55:11) Ga a kitla a letlelela gore le sengwe kgotsa le seka la nniwa.

2. 2. “Ba ba pelonolo ba tla rua lefatshe, Mme ba tla tshela ka boitumelo go rena kagiso. Basiami ba tla rua lefatshe, Mme ba tla nna mo go lone ka bosakhutleng.”​—Pesalema 37:11, 29.

   Modimo o solofetsa gore batho ba tla tshelela ruri mo lefatsheng le le nang le kagiso.

3. 3. “Mme badirabosula bone ba tla kgaolwa mo lefatsheng.”​—Diane 2:22.

   Modimo o tla fedisa botlhe ba ba tswelelang ba dira dilo tse di bosula, go akaretsa le ba ba senyang lefatshe.

Modimo o tla re direla eng

Modimo o tla diragatsa jang boikaelelo jwa gagwe ka lefatshe? O tla dira seo a dirisa puso ya lefatshe lotlhe, e leng Bogosi jwa Modimo. (Mathaio 6:10) Bogosi joo bo tla busa bo le kwa legodimong. Ga bo na go tlhoka go dira ditumalano dipe le dipuso tsa batho mabapi le mathata a a amang lefatshe le tikologo. Go na le moo Bogosi Jwa Modimo bo tla busa mo boemong jwa dipuso tsa batho.​—Daniele 2:44.

Bogosi Jwa Modimo bo tla tlisetsa batho le tikologo dilo tse di molemo. (Pesalema 96:10-13) Bona se Jehofa Modimo a tla se dirang ka Bogosi jwa gagwe.

• O tla baakanya tikologo

  Baebele e a re: “Naga le lefatshe le le omeletseng di tla itumela, E bile sekaka se tla itumela se bo se ntsha malômô jaaka saferone.”​—Isaia 35:1.

  Se e se kayang ka bokamoso jwa rona: Jehofa o tla baakanya lefatshe le mafelo a batho ba a sentseng thata.

• O tla laola maemo a bosa

  Baebele e a re: “[Jehofa] o sisibatsa setsuatsue; makhubu a lewatle a a didimala.”​—Pesalema 107:29.

  Se e se kayang ka bokamoso jwa rona: Jehofa o na le maatla a go laola maemo a bosa. Maemo a bosa a a utlwisang batho botlhoko a tla bo a sa tlhole a le teng.

• Batho ba tla rutiwa go tlhokomela lefatshe

  Baebele e a re “Ke tla go naya temogo ke bo ke go ruta tsela e o tshwanetseng go tsamaya mo go yone.”​—Pesalema 32:8.

  Se e se kayang ka bokamoso jwa rona: Jehofa o neile batho maikarabelo a go tlhokomela lefatshe. (Genesise 1:28; 2:15) O tla re ruta go diragatsa maikarabelo a rona a go tlhokomela popo ya gagwe le tikologo.