Ke Mang yo o Tla Bolokang Lefatshe?

Batho ba le bantsi ba tshwenyegile ka tshenyo e ba akanyang gore e dirwa mo lefatsheng le mo dilong tse di ikaegileng ka lone. Go ya ka baitse bangwe ba tikologo, tsela e batho ba senyang tikologo ka yone, e tla feleletsa e dirile gore ditshedi dingwe tse di teng gompieno, di se ka tsa tlhola di nna teng gape.

A batho ba tla senya lefatshe? Kgotsa ba tla kgona go tshela ba sa senye tikologo?

A maiteko a batho a tla atlega?

Baitsenape ba le bantsi ba dumela gore batho ba ka sireletsa lefatshe le go tshela ba sa senye tikologo. Ka fa letlhakoreng le lengwe, babatlisisi ba re gore maiteko a batho a kgone go atlega, go tshwanetse ga dirwa diphetogo mo dikarolong di le mmalwa ka nako e le nngwe. Diphetogo tseno di akaretsa:

Go tokafatsa tsela e go tlhokomelwang dikgwa, tikologo le mawatle ka yone.
Go dirisa ditsela tse disha tsa temothuo le tsa go dira motlakase.
Go fetola tsela e re jang ka yone mme re je merogo le go fokotsa go ja nama le tlhapi, go apaya dijo tse di lekaneng gore re se ka ra senya ka dijo.
Go amogela gore go tshela botshelo jo bo siameng ga go a ikaega ka go nna le dithoto tse dintsi.

O akanya eng? A go a utlwala go dumela gore dipuso, dikgwebo le batho ba ka dirisana mmogo go rarabolola bothata ka selekanyo se segolwane? Kgotsa a o akanya gore ga go kgonege ka gore batho ba pelotshetlha, ba ikakanyetsa ba le bosi e bile ga ba na sepe ka bokamoso?—2 Timotheo 3:1-5.

Lebaka la go nna le tsholofelo

Baebele e re netefaletsa gore polanete ya rona ga e kitla e senyediwa ruri. E tlhalosa lebaka la go bo batho ba sa kgone go sireletsa lefatshe e bile e tlhalosa phetogo e e tshwanetseng go diragala. Gape e re tlhalosetsa gore phetogo eno e tla dirwa jang.

Lebaka la go bo batho ba se kitla ba kgona go boloka lefatshe. Jehofaa Modimo o bopile lefatshe a bo a neela batho maikarabelo a go le tlhokomela. (Genesise 1:28; 2:15) Ba ne ba ka atlega fa fela ba ne ba ka batla kaelo mo Mmoping le go reetsa ditaelo tsa gagwe. (Diane 20:24) Ka maswabi, ga ba a ka ba reetsa Jehofa mme ba ile ba ikaega ka ditlhaloganyo tsa bone. (Moreri 7:29) Batho ka bobone fela ga ba kgone go tlhokomela lefatshe mme maiteko ape a ba a dirang a nna le katlego e e lekanyeditsweng.—Diane 21:30; Jeremia 10:23.

Phetogo e e tshwanetseng go dirwa. Modimo o ikemiseditse go thibela batho go senya lefatshe. (Tshenolo 11:18) Ga a kitla a tokafatsa dipuso le mekgatlho e e senyang lefatshe mme o tla e emisetsa ka e nngwe. (Tshenolo 21:1) Ka lebaka leno, Jehofa a re: “Ke dira dilo tsotlhe disha.”—Tshenolo 21:5.

Phetogo e tla dirwa jang? Jehofa o tla emisetsa dipuso tsa batho ka puso e e kwa legodimong e leng Bogosi Jwa Modimo. Puso eo e e eteletsweng pele ke Jesu Keresete e tla busa lefatshe.—Daniele 2:44; Mathaio 6:10.

Bogosi Jwa Modimo bo tla ruta batho go tshela ka melaometheo ya Modimo. Fa batho ba itse Mmopi wa bone le go ikobela melao ya gagwe, ba tla kgona go tshela ba sa senye tikologo. (Isaia 11:9) Baebele e tlhalosa gore puso ya Modimo e tla thusa babusiwa ba yone jang go itumelela botshelo ba sa senye tikologo. E tla dira dilo tse di latelang:

E tla fepa batho botlhe.—Pesalema 72:16.
E tla busetsa maemo a a siameng.—Isaia 35:1, 2, 6, 7.
E tla netefatsa gore batho ba tla tlhokomela diphologolo le gore diphologolo ga di kitla di ba gobatsa.—Isaia 11:6-8; Hosea 2:18.
E tla thibela masetlapelo.—Mareko 4:37-41.

Itse gore Bogosi Jwa Modimo bo tla tloga bo dira diphetogo tseno. Go itse mo go oketsegileng, bala setlhogo se se reng “Bogosi Jwa Modimo bo Tla Busa Leng mo Lefatsheng?”

a Jehofa ke leina la Modimo.—Pesalema 83:18.

Re ka dira eng go bontsha gore re tlotla polanete ya rona?

Fa re ntse re letetse Bogosi Jwa Modimo gore bo rarabolole mathata a tikologo a a mo lefatsheng, go na le dilo tse re ka di dirang go bontsha gore re tlotla polanete. Ka sekai, re ka dira seo ka go sa senye sepe le go ikobela ditaelo tsa balaodi tsa gore re dire eng ka matlakala.—Johane 6:12, 13; Baroma 13:1, 5.

Brett e ne e le mogakolodi wa tsa tikologo. Kitso ya gagwe mo go tsa tikologo e mo thusitse go lemoga gore go na le Mmopi yo o tla tsayang kgato go sireletsa lefatshe. Bala pego ya gagwe.
Tsela nngwe e Basupi ba ga Jehofa ba bontshang gore ba tlotla Mmopi wa bone ka yone, ke ka go dirisa mekgwa e e sireletsang tikologo fa ba aga diporojeke tse dikgolo. Go bona se ba se fitlheletseng, leba bidio ya Eco-Friendly Design Brings Honor to Jehovah.

Ditemana tsa Baebele tse di buang ka lefatshe

Genesise 2:15: “Jehofa Modimo o ne a tsaya monna a mmaya mo tshingwaneng ya Edene gore a e leme a bo a e tlhokomele.”

Se e se kayang: Modimo o neile batho maikarabelo a go tlhokomela lefatshe.

Genesise 1:28: “Modimo o ne a ba segofatsa mme a ba raya a re: ‘Atang lo nne bantsi lo tlatse lefatshe lo bo lo nne beng ba lone, e bile lo laole ditlhapi tsa lewatle le ditshedi tse di fofang mo loaping le setshedi sengwe le sengwe se se tsamayang mo lefatsheng.’”

Se e se kayang: Batho ba ne ba neilwe maikarabelo a go tlhokomela diphologolo.

Isaia 45:18: “Seno ke se Jehofa a se buang, Mmopi wa magodimo, Modimo wa boammaaruri, Ene yo o bopileng lefatshe, Modiri wa lone yo o le diretseng gore le nnele ruri, yo o sa le bopelang lefela, mme a le bopetse gore le nniwe: ‘Ke nna Jehofa, mme ga go na ope o sele.’”

Se e se kayang: Maikaelelo a Modimo ka lefatshe ga a fetoga. Batho ba ba tla dirang se Modimo a neng a se ikaeletse ke bone ba tla nnang mo lefatsheng.

Pesalema 37:29: “Basiami ba tla rua lefatshe, mme ba tla nna mo go lone ka bosakhutleng.”

Se e se kayang: Batho ba ba ikobelang melao ya Modimo ba tla nna le tshono ya go tshelela ruri mo lefatsheng.

Pesalema 98:6-8: “Goang ka boitumelo fa pele ga Kgosi, e bong Jehofa, . . . A lewatle le goe ka boitumelo le tsotlhe tse di mo go lone, lefatshe le ba ba nnang mo go lone. A dinoka di ope diatla; a dithaba di goe mmogo ka boitumelo.”

Se e se kayang: Puso ya Modimo e tlile go tswela tikologo mosola.