Ua Sāmiuela
10 Ki mui ai, naʻe mate ʻa e tuʻi ʻo e kau ʻĀmoní,+ pea naʻe hoko ʻa hono foha ko Hanuní ko e tuʻi ʻo fetongi ia.+ 2 Ko ia naʻe pehē ai ʻe Tēvita: “Te u fakahaaʻi ʻa e ʻofa mateaki kia Hanuni ko e foha ʻo Nāsí ʻo hangē ko e fakahaaʻi mai ʻe heʻene tamaí ʻa e ʻofa mateaki kiate aú.” Ko ia naʻe fekauʻi atu ai ʻe Tēvita ʻene kau sevānití ke nau fai ha fakafiemālie kiate ia ʻi he mole atu ʻene tamaí. Ka ʻi he taimi naʻe aʻu atu ai ʻa e kau sevāniti ʻa Tēvitá ki he fonua ʻo e kau ʻĀmoní, 3 naʻe pehē ʻe he houʻeiki ʻo e kau ʻĀmoní kia Hanuni ko honau ʻeikí: “ʻOkú ke fakakaukau ʻoku fakalāngilangiʻi ʻe Tēvita ʻa hoʻo tamaí ʻi heʻene fekauʻi mai kiate koe ha kau fakafiemālié? ʻIkai kuo fekauʻi mai ʻe Tēvita ʻa ʻene kau sevānití kiate koé ke nau fakatotoloʻi ʻa e kotoa ʻo e koló pea fai hano asiasi pea ke liua ia?” 4 Ko ia naʻe puke ʻe Hanuni ʻa e kau sevāniti ʻa Tēvitá ʻo tele vaeua honau kavá+ pea tuʻusi vaeua honau ngaahi kofú ʻi lalo hifo ʻi honau kongalotó pea fekau ke nau ʻalu. 5 ʻI hono fakahā eni kia Tēvitá, naʻá ne fekauʻi atu leva ha kau tangata ke fakafetaulaki kiate kinautolu, koeʻuhí naʻe mātuʻaki fakamaaʻi ʻa e kau tangatá; pea naʻe tala ʻe he tuʻí kiate kinautolu: “Mou nofo ʻi Sielikō+ kae ʻoua kuo tupu homou kavá, pea mou toki foki mai leva.”
6 ʻI he faai mai ʻa e taimí naʻe sio ʻa e kau ʻĀmoní kuo nau hoko ʻo namukū kia Tēvita, ko ia naʻe fai atu ʻe he kau ʻĀmoní ha fekau ʻo nooʻi mai ʻa e kau Sīlia ʻo Pete-lehopí+ mo e kau Sīlia ʻo Sopá,+ ko e kau sōtia ʻalu lalo ʻe toko 20,000; pea mo e tuʻi ʻo Māká,+ mo e kau tangata ʻe toko 1,000; pea mei ʻIsitopi,* ko ha kau tangata ʻe toko 12,000.+ 7 ʻI he fanongo ʻa Tēvita ʻo fekauʻaki mo iá, naʻá ne fekauʻi atu ʻa Sioape pea mo e kau taú fakakātoa, ʻo kau ai ʻene kau tangata tau mālohi tahá.+ 8 Pea naʻe ʻalu atu ʻa e kau ʻĀmoní ʻo fakatē tau ʻi he hūʻanga ʻo e matapā ʻo e koló lolotonga ia ko e kau Sīlia ʻo Sopá pea mo Pete-lehopí, fakataha mo ʻIsitopi* mo Maaka, ko kinautolu pē naʻe ʻi he loto ʻataʻataá.
9 ʻI he sio ʻa Sioape kuo ʻoho mai kiate ia mei muʻa mo mui ʻa e kau taú, naʻá ne fili ʻa e niʻihi ʻo e kau tau lelei taha ʻi ʻIsilelí ʻo nau fakatē tau atu ke fetaulaki mo e kau Sīliá.+ 10 Naʻá ne tuku ʻa e toenga ʻo e kau tangatá ke nau ʻi he malumalu ʻo e tuʻutuʻuni ʻa* hono tokoua ko ʻApisaí,+ koeʻuhí ke nau fakatē tau atu ke fetaulaki mo e kau ʻĀmoní.+ 11 Naʻá ne pehē ange leva: “Kapau ʻe hoko ʻo fuʻu mālohi kiate au ʻa e kau Sīliá, kuo pau leva ke ke haʻu ʻo fakahaofi au; ka ʻo kapau ʻe hoko ʻo fuʻu mālohi kiate koe ʻa e kau ʻĀmoní, te u ʻalu atu ʻo fakahaofi koe. 12 Kuo pau ke tau mālohi mo loto-toʻa+ maʻa hotau kakaí mo e ngaahi kolo ʻa hotau ʻOtuá, pea ʻe fai ʻe Sihova ʻa e meʻa ʻoku lelei ʻi heʻene vakaí.”+
13 Naʻe laka atu leva ʻa Sioape mo ʻene kau tangatá ke fetaulaki mo e kau Sīliá ʻi he taú, pea naʻa nau hola mei hono ʻaó.+ 14 ʻI he sio ʻa e kau ʻĀmoní kuo hola ʻa e kau Sīliá, naʻa nau hola meia ʻApisai ʻo nau hū ki he koló. ʻI he hili iá, naʻe foki ʻa Sioape mei he kau ʻĀmoní ʻo ne ʻalu ki Selusalema.
15 ʻI he sio ʻa e kau Sīliá kuo ikunaʻi kinautolu ʻe ʻIsilelí, naʻa nau toe fai ha fokotuʻutuʻu.+ 16 Ko ia naʻe fai atu ʻe Hetatesa+ ha fekau ki he kau Sīliá ʻi he feituʻu ʻo e Vaitafé,*+ pea naʻa nau ʻalu leva ki Hēlame, ʻo taki kinautolu ʻe Sōpaki ko e ʻeikitau ʻa Hetatesá.
17 ʻI hono fakahaaʻi atu kia Tēvita ʻa e ongoongó, naʻá ne fakatahatahaʻi ʻi he taimi pē ko iá ʻa ʻIsileli kotoa pea nau kolosi ʻi Sioatani ʻo ʻalu ki Hēlame. Naʻe fakatē tau leva ʻa e kau Sīliá ke fakafetaulaki kia Tēvita ʻo tauʻi ia.+ 18 Ka naʻe hola ʻa e kau Sīliá mei ʻIsileli; pea naʻe tāmateʻi ʻe Tēvita ʻa e kau heka saliote ʻe toko 700 mo e kau tangata heka hoosi ʻa e kau Sīliá ʻe toko 40,000, pea naʻá ne taaʻi ʻa Sōpaki ko honau ʻeikitaú, ʻa ia naʻá ne mate ai.+ 19 ʻI he sio ʻa e ngaahi tuʻí kotoa, mo e kau sevāniti ʻa Hetatesá kuo ikunaʻi kinautolu ʻe ʻIsilelí, naʻa nau fakamelino leva mo ʻIsileli pea hoko ko ʻenau kau sevāniti;+ pea naʻe ilifia ʻa e kau Sīliá ke toe tokoniʻi ʻa e kau ʻĀmoní.