Siope
23 Naʻe tali ʻe Siope ʻo pehē:
2 “Naʻa mo e ʻahó ni te u tuʻukāivi pē ʻi heʻeku lāungá;*+
Ko hoku iví kuo maha koeʻuhi ko ʻeku toʻé.
3 Taumaiā naʻá ku ʻilo ʻa e feituʻu ke u kumi ai ki he ʻOtuá!+
Te u ʻalu ki he feituʻu ʻokú ne ʻafio aí.+
4 Te u ʻoatu ʻeku meʻá ke fakamāuʻi ʻi hono ʻaó
Pea fakafonu hoku ngutú ʻaki ʻa e ngaahi fakaʻuhingá;
5 Te u ʻiloʻi ai ʻa e founga ʻo ʻene tali ʻe fai kiate aú
Pea tokanga ki he meʻa ʻokú ne folofola mai ʻaki kiate aú.
6 Te ne fakakikihi mo au ʻo ngāueʻaki hono fuʻu mālohí?
ʻIkai, ko e moʻoni te ne fanongo mai kiate au.+
7 ʻE lava ai ʻe he tokotaha faitotonú ʻo fakatonutonu ʻa e ngaahi meʻá mo ia,
Pea ʻe toki fakaʻatā fakaʻaufuli ai au ʻe hoku Fakamāú.
8 Ka ʻo kapau te u ʻalu ki he hahaké, ʻoku ʻikai te ne ʻi ai;
Pea ʻi heʻeku foki maí ʻoku ʻikai te u ʻilo ia.
9 ʻI heʻene ngāue ʻi he toʻohemá, ʻoku ʻikai lava ke u sio kiate ia;
Peá ne tafoki ki he toʻomataʻú, ka ʻoku ʻikai pē te u sio kiate ia.
10 Ka ʻokú ne ʻilo ʻa e hala naʻá ku fou aí.+
ʻI he hili ʻene siviʻi aú, te u hoko ʻo hangē ha koula haohaoá.+
11 Kuó u molomolo-muivaʻe ʻi heʻene ngaahi laká;
Kuó u pīkitai ki hono halá ʻo ʻikai te u afe.+
12 Kuo ʻikai te u mavahe mei he ngaahi fekau ʻa hono fofongá.
Kuó u koloaʻaki ʻene ngaahi leá+ ʻo mahulu atu ia ʻi he meʻa naʻe fiemaʻu meiate aú.*
13 ʻI heʻene fakapapauʻi ke fai ha meʻá, ko hai ʻe lava ke ne fakafepakiʻi ia?+
ʻI heʻene loto ke fai ha meʻá, ʻokú ne fai ia.+
14 He te ne fakahoko kakato ʻa e meʻa kuo fakapapauʻi* fekauʻaki mo aú,
Pea ʻoku lahi ʻa e ngaahi meʻa pehē ʻokú ne tuku tauhi mai.
15 Ko e ʻuhinga ia ʻoku ou hohaʻa aí koeʻuhí ko ia;
ʻI he taimi ʻoku ou fakakaukau ai kiate iá, ʻoku fakalalahi ʻeku ilifiá.
16 Kuo ʻai au ʻe he ʻOtuá ke u loto-siʻi,
Pea ko e Māfimafi-Aoniú kuó ne ʻai au ke u manavahē.
17 Ka kuo ʻikai ke fakasīlongoʻi au ʻe he fakapoʻulí
Pe ko e poʻuli kuó ne ʻufiʻufi ʻa hoku matá.