ʻIsikeli

8 Pea ʻi he taʻu hono onó,* ʻi hono ono ʻo e māhiná, ʻi he ʻaho hono nima ʻo e māhiná, lolotonga ʻeku tangutu ʻi hoku falé pea naʻe tangutu ai ʻa e kau mātuʻa ʻo Siutá ʻi hoku ʻaó, naʻe hoko mai heni kiate au ʻa e toʻukupu ʻo e ʻEiki Hau ko Sihová. 2 ʻI he lolotonga ʻeku sió, naʻá ku mamata ki ha fōtunga ʻoku meimei tatau mo e afí; naʻe ʻi ai ha afi ʻi lalo ʻi he meʻa naʻe hā mai ko hono kongalotó ia,+ pea mei hono kongalotó ki ʻolunga ko hono fōtungá naʻe ngingila, ʻo hangē ko e ulo ʻa ha mētale ngingilá.*+ 3 Naʻá ne ʻai leva ke mafao mai ha meʻa naʻe hangē mai ko ha nimá ʻo puke au ʻi hoku louʻulú, pea naʻe ʻave au ʻe he laumālié ki he vahaʻa ʻo māmani mo e langí peá ne ʻomi au ki Selusalema fakafou ʻi ha ngaahi vīsone mei he ʻOtuá, ki he hūʻanga ʻo e matapā ʻi lotó+ ʻa ia ʻoku hanga ki he tokelaú, ʻa e feituʻu naʻe tuʻu ai ʻa e ʻaitoli ko e fakaʻilonga* ʻo e fuaʻá ʻa ia ʻokú ne fakatupu ʻa e fuaʻá.+ 4 Pea vakai, naʻe ʻi ai ʻa e lāngilangi ʻo e ʻOtua ʻo ʻIsilelí,+ ʻo hangē ko ʻene hā mai ko ia naʻá ku mamata ai ʻi he teleʻa lautoká.+

5 Naʻá ne folofola mai leva kiate au: “Foha ʻo e tangata, hanga atu muʻa ki he tokelaú.” Ko ia naʻá ku hanga atu ki he tokelaú, pea vakai, ʻi he tokelau ʻo e matapā ʻo e ʻōlitá, naʻe ʻi ai ʻa e fakaʻilonga* ʻo e fuaʻá ʻoku tuʻu ʻi he hūʻangá. 6 Pea naʻá ne folofola mai kiate au: “Foha ʻo e tangata, ʻokú ke sio ki he ngaahi meʻa fakalilifu mo fakalielia ʻoku fai heni ʻe he fale ʻo ʻIsilelí,+ ʻa e ngaahi meʻa ko ia ʻokú ne ʻai au ke u fakamamaʻo mei hoku feituʻu toputapú?+ Ka te ke sio ki ha ngaahi meʻa fakalielia ʻa ia ʻoku toe fakalilifu ange ia.”

7 Naʻá ne ʻave leva au ki he hūʻanga ʻo e lotoʻaá, pea ʻi heʻeku vakai atú, naʻá ku sio ki ha ava ʻi he holisí. 8 Naʻá ne folofola mai kiate au: “Foha ʻo e tangata, ʻai muʻa ʻa e foʻi ava ʻi he holisí ke toe lahi ange.” Ko ia naʻá ku ʻai ʻa e foʻi ava ʻi he holisí ʻo toe lahi ange, pea naʻá ku sio ai ki ha hūʻanga. 9 Naʻá ne folofola mai kiate au: “Hū atu ai peá ke sio ki he ngaahi meʻa kovi mo fakalielia ʻoku nau fai ʻi aí.” 10 Ko ia naʻá ku hū atu ʻo vakai, pea naʻá ku sio ki he ngaahi ʻīmisi kehekehe ʻo e fanga manu ʻoku totolo mo ngaolo mo e fanga manu palakū+ pea mo e ngaahi ʻaitoli fakalielia* kotoa pē ʻo e fale ʻo ʻIsilelí;+ naʻe tā-tongitongi ia ʻo takatakai kotoa ʻi he holisí. 11 Pea naʻe tuʻu ʻi honau ʻaó ʻa e kau mātuʻa ʻe toko 70 ʻo e fale ʻo ʻIsilelí, pea naʻe tuʻu ʻi honau lotolotongá ʻa Siasanaia ko e foha ʻo Sāfaní.+ Ko e tokotaha taki taha naʻá ne toʻo ʻa ʻene tutuʻanga ʻinisēnisi, pea naʻe ʻalu hake ʻa e kohu namu-kakala ʻo e ʻinisēnisí.+ 12 Naʻá ne folofola mai kiate au: “Foha ʻo e tangata, ʻokú ke sio ki he meʻa ʻoku fai ʻe he kau mātuʻa ʻo e fale ʻo ʻIsilelí ʻi he fakapoʻulí, ʻe he tokotaha taki taha ʻi hono loki ʻi lotó ʻa ia ʻoku fakaʻaliʻali ai ʻene ngaahi ʻaitolí?* He ʻoku nau pehē, ‘ʻOku ʻikai ke sio mai ʻa Sihova kiate kitautolu. Kuo liʻaki ʻe Sihova ʻa e fonuá.’”+

13 Pea naʻá ne hoko atu ʻo ne folofola mai kiate au: “Te ke sio ki ha ngaahi meʻa fakalielia ʻoku toe fakalilifu ange ia ʻoku nau fai.” 14 Ko ia naʻá ne ʻomai au ki he hūʻanga ʻi he matapā ki he tokelau ʻo e fale ʻo Sihová, pea naʻá ku sio ai ki he kau fefine ʻoku nau tangutu ʻo tengihia ʻa e ʻotua ko Tāmusí.

15 Pea naʻá ne toe folofola mai kiate au: “ʻE foha ʻo e tangata, ʻokú ke sio ki he meʻá ni? Te ke sio ki ha ngaahi meʻa fakalielia ʻoku toe fakalilifu ange ia ʻi he ngaahi meʻá ni.”+ 16 Ko ia naʻá ne ʻomai au ki he lotoʻā ʻi loto ʻo e fale ʻo Sihová.+ ʻI he hūʻanga ʻo e temipale ʻo Sihová, ʻi he vahaʻa ʻo e fale-hūʻangá mo e ʻōlitá, naʻe ʻi ai ha kau tangata ʻe toko 25 nai naʻa nau sītuʻa ki he temipale ʻo Sihová pea nau hanga ki he hahaké; naʻa nau punou ki he hahaké ki he laʻaá.+

17 Naʻá ne folofola mai kiate au: “Foha ʻo e tangata, ʻokú ke sio ki he meʻá ni? Ko ha meʻa siʻi pē ia ki he fale ʻo Siutá ke fai ʻa e ngaahi meʻa fakalieliá ni, ke fakafonu ʻa e fonuá ʻaki ʻa e fakamālohí+ pea hanganaki fakalotomamahiʻi au? Ko eni ʻoku nau ʻai mai ʻa e vaʻakaú* ki hoku ihú. 18 Ko ia te u fai ha ngāue ʻi he ʻita lahi. ʻE ʻikai haʻaku mataʻi fakaʻofaʻia; pea heʻikai haʻaku ongoʻi manavaʻofa.+ Naʻa mo e leʻo-lahi mai ʻenau tangí ki hoku telingá, heʻikai haʻaku fanongo kiate kinautolu.”+