ʻIsikeli
28 Naʻe toe hoko mai ʻa e folofola ʻa Sihová kiate au, ʻo pehē: 2 “Foha ʻo e tangata, tala ki he taki ʻo Tāiá, ‘Ko e meʻa eni ʻoku folofolaʻaki ʻe he ʻEiki Hau ko Sihová:
“Koeʻuhi kuo hoko ʻo hīkisia ho lotó,+ ʻokú ke hanganaki pehē ai, ‘Ko ha ʻotua au.
ʻOku ou nofo ʻi he taloni ʻo ha ʻotua ʻi he loto moaná.’+
Ka ko ha tangata pē koe, ʻo ʻikai ko ha ʻotua,
Neongo ia, ʻi ho lotó, ʻokú ke ongoʻi ko ha ʻotua koe.
3 Vakai! ʻOkú ke poto ange koe ʻia Taniela.+
Kuo ʻikai ha ngaahi meʻa fakapulipuli ʻe fufū meiate koe.
4 Kuó ke ʻai koe ke ke koloaʻia ʻaki ho potó mo hoʻo ʻiloʻiló,
Pea ʻokú ke hanganaki tānaki koula mo siliva ʻi hoʻo ngaahi tukuʻanga koloá.+
5 Ko hoʻo pōtoʻi ʻi he fefakatauʻakí kuó ne ʻomi kiate koe ha koloa lahi,+
Pea kuo hoko ʻo hīkisia ho lotó koeʻuhi ko hoʻo koloá.”’
6 “‘Ko ia ai, ko e meʻa eni ʻoku folofolaʻaki ʻe he ʻEiki Hau ko Sihová:
“Koeʻuhi ko hoʻo ongoʻi ʻi ho lotó ko ha ʻotua koé,
7 ʻOku ou ʻomi kiate koe ha kau muli, ʻa e kau anga-fakamamahi taha ʻi he ngaahi puleʻangá,+
Pea te nau unuhi hake ʻenau heletaá ki he meʻa fakaʻofoʻofa kotoa kuo maʻu mai ʻi ho potó
Pea ʻuliʻi ʻa ho fakaʻofoʻofa lāngilangiʻiá.+
9 Te ke pehē ai pē, ‘Ko ha ʻotua au,’ ki he tokotaha te ne tāmateʻi koé?
Te ke hoko ko ha tangata pē, ʻo ʻikai ko ha ʻotua, ʻi he nima ʻo e faʻahinga ʻoku nau ʻuliʻi koé.”’
10 ‘ʻI he nima ʻo e kau mulí, te ke mate ai ʻi he mateʻanga ʻo e kau taʻekamú,
He ko au kuó u leá,’ ko e fakahaaʻi ia ʻe he ʻEiki Hau ko Sihová.”
11 Pea naʻe toe hoko mai kiate au ʻa e folofola ʻa Sihová, ʻo pehē: 12 “Foha ʻo e tangata, hivaʻaki ha taʻanga tangi* ʻo fekauʻaki mo e tuʻi ʻo Tāiá, pea tala kiate ia, ‘Ko e meʻa eni ʻoku folofolaʻaki ʻe he ʻEiki Hau ko Sihová:
13 Naʻá ke ʻi ʻĪteni, ko e ngoue ʻa e ʻOtuá.
Naʻe teuteuʻaki koe ʻa e maka mahuʻinga kotoa pē
—ʻA e lupi, tōpasi, mo e siasipa; kalisolaite, ʻōnike, mo e seiti; sāfaia, toakase,+ mo e ʻemalata;
Pea ko honau tuʻuʻangá mo e meʻa naʻe kofuʻakí naʻe ngaohi mei he koula.
Naʻe teuteuʻi kinautolu ʻi he ʻaho naʻe fakatupu ai koé.
14 Naʻá ku vaheʻi koe ko e selupimi maluʻi kuo pani.
Naʻá ke ʻi he moʻunga toputapu ʻo e ʻOtuá,+ pea naʻá ke ʻaʻeva holo ʻi he lotolotonga ʻo e ngaahi maka uloulo.
15 Naʻe taʻemele ʻa ho ngaahi ʻalungá mei he ʻaho naʻe fakatupu ai koé
ʻO aʻu ki he taimi naʻá ke kamata fai ai ʻa e tōʻonga taʻemāʻoniʻoní.+
16 Koeʻuhi ko e lahi hoʻo fefakatauʻakí,+
Naʻá ke hoko ʻo fonu ʻi he fakamālohí, pea naʻe kamata ke ke faiangahala.+
Ko ia ʻe ʻikai te u kei lau koe ʻokú ke māʻoniʻoni pea te u lī koe mei he moʻunga ʻo e ʻOtuá pea fakaʻauha koe,+
ʻA koe selupimi maluʻi, ʻo ke mamaʻo mei he ngaahi maka ulouló.
17 Naʻe hoko ʻo hīkisia ho lotó koeʻuhi ko ho fakaʻofoʻofá.+
Naʻá ke maumauʻi ho potó koeʻuhi ko ho fakaʻofoʻofa lāngilangiʻiá.+
Te u lī hifo koe ki he kelekelé.+
Te u ʻai koe ko ha meʻa ke mātā ʻi he ʻao ʻo e ngaahi tuʻí.
18 Koeʻuhi ko e lahi hoʻo hiá mo hoʻo fefakatauʻaki taʻefaitotonú, kuó ke taʻefakaʻapaʻapaʻi ai ho ngaahi feituʻu toputapú.
Te u ʻai ha afi ke puna hake ʻi ho lotolotongá, pea te ne keina koe.+
Te u ʻai koe ko e efu ʻi he kelekelé ʻi he ʻao ʻo e faʻahinga kotoa pē ʻoku sio atu kiate koé.
19 Ko kinautolu kotoa naʻa nau ʻiloʻi koe ʻi he lotolotonga ʻo e ngaahi kakaí te nau sio fakamamaʻu kiate koe ʻi he ofoofo.+
ʻE hoko fakafokifā mai mo fakamamahi ʻa ho ngataʻangá,
Pea heʻikai te ke toe ʻi ai ʻo taʻengata.”’”+
20 Pea naʻe toe hoko mai kiate au ʻa e folofola ʻa Sihová, ʻo pehē: 21 “Foha ʻo e tangata, hanga atu ki Saitoni,+ pea fai ha kikite kiate ia. 22 Te ke pehē ki ai, ‘Ko e meʻa eni ʻoku folofolaʻaki ʻe he ʻEiki Hau ko Sihová:
“Ko eni kuó u hoko ko ho fili, ʻe Saitoni, pea ʻe fakalāngilangiʻi au ʻi ho lotolotongá;
Pea kuo pau ke ʻilo ʻe he kakaí ko Sihova au ʻi heʻeku fakahoko ha fakamaau kiate koe pea fakamāʻoniʻoniʻi au ʻiate koé.
23 Te u tuku atu kiate ia ha mahaki fakaʻauha pea ʻe tafe ʻa e totó ʻi hono ngaahi halá.
ʻE tō ʻa e faʻahinga naʻe tāmateʻí ʻi hono lotolotongá ʻi he taimi ʻe hoko mai ai ʻa e heletaá kiate ia mei he tapa kotoa pē;
Pea kuo pau ke nau ʻilo ko Sihova au.+
24 “‘“Pea heʻikai ke toe takatakaiʻi ʻa e fale ʻo ʻIsilelí ʻe he talatalaʻāmoa fakatupu laveá mo e ʻakau talatala fakatupu mamahiʻiá,+ ʻe he faʻahinga ʻoku nau manukiʻi kinautolú; pea kuo pau ke ʻilo ʻe he kakaí ko au ʻa e ʻEiki Hau ko Sihová.”’
25 “‘Ko e meʻa eni ʻoku folofolaʻaki ʻe he ʻEiki Hau ko Sihová: “ʻI heʻeku toe fakatahatahaʻi ʻa e fale ʻo ʻIsilelí mei he lotolotonga ʻo e ngaahi kakai naʻe fakamovetevete kinautolu ki aí,+ ʻe fakamāʻoniʻoniʻi au ʻi honau lotolotongá ʻi he ʻao ʻo e ngaahi puleʻangá.+ Pea te nau nofo ʻi honau fonua+ naʻá ku ʻoange ki heʻeku sevāniti ko Sēkopé.+ 26 Te nau nofo malu+ ai mo langa ʻa e ngaahi fale pea tō ʻa e ngaahi ngoue kālepi,+ pea te nau nofo malu ʻi he taimi te u fakahoko ai ha fakamaau ki he faʻahinga kotoa ʻoku takatakai kiate kinautolú ʻa ia ʻoku nau manukiʻi kinautolú;+ pea kuo pau ke nau ʻilo ko Sihova au ko honau ʻOtuá.”’”