Siope

 2 He ko e ʻitá te ne tāmateʻi ʻa e tokotaha valé,

Pea ko e mānumanú te ne tāmateʻi ʻa e tokotaha hehemangofuá.

 3 Kuó u sio ki he faiaka ʻa e tokotaha valé,

Kae fakafokifā pē kuo hoko ha mala ki hono nofoʻangá.

 4 Ko hono ngaahi fohá ʻoku nau mamaʻo mei he nofo malú,

Pea ʻoku laiki kinautolu ʻi he matapā ʻo e koló,+ ʻo ʻikai ha taha ke ne fakahaofi kinautolu.

 5 Ko ʻene utu-taʻú ʻoku kai ia ʻe he tokotaha fiekaiá,

ʻOku aʻu ʻo ne toʻo ia mei he lotolotonga ʻo e ʻakau talatalá,

Pea ʻoku maʻu ʻe he tauhelé ʻa ʻenau koloá.

 6 He ko e ngaahi meʻa fakatupu maumaú ʻoku ʻikai te nau tupu mai mei he efú,

Pea ʻoku ʻikai tupu ʻa e faingataʻá mei he kelekelé.

 7 He ko e tangatá ʻoku fanauʻi mai ki he faingataʻá,

ʻO hangē tofu pē ko e mofisi hake ʻa e afí ki ʻolungá.

 8 Ka te u tangi ki he ʻOtuá,

Pea ko e ʻOtuá te u ʻave ki ai ʻeku meʻa ke fakamāuʻí,

 9 Ki he Tokotaha ʻokú ne fai ʻa e ngaahi meʻa lalahi mo ʻikai lava ke fakatotoloá,

ʻA e ngaahi meʻa fakaofo ʻoku taʻefaʻalauá.

10 ʻOkú ne foaki ʻa e ʻuhá ki he māmaní

Pea tuku atu ʻa e vaí ki he fonuá.

11 ʻOkú ne hiki hake ʻa e māʻulaló ke māʻolunga,

Pea ʻokú ne hakeakiʻi ʻa e tokotaha loto-mafasiá ke fakamoʻui.

12 ʻOkú ne veuki ʻa e ngaahi faʻufaʻu ʻa e kākaá,

Ke ʻoua naʻa lavameʻa ʻa e ngāue ʻa honau nimá.

13 ʻOkú ne maʻungamālie ʻa e kau potó ʻi heʻenau filioʻi kākā pē ʻa kinautolú,+

Ke fakafehālaakiʻi ai ʻa e ngaahi palani ʻa e kau olopotó.

14 ʻOku nau fetaulaki mo e fakapoʻulí lolotonga ia ʻa e ʻahó,

Pea ʻoku nau taufā holo ʻi he hoʻatā mālié ʻo hangē ia ʻoku poʻulí.

15 ʻOkú ne fai ʻa e fakahaofi mei he heletā ʻo honau ngutú,

ʻO fakahaofi ʻa e masivá mei he nima ʻo e mālohí,

16 Ko ia ʻoku maʻu ai ʻe he māʻulaló ha ʻamanaki,

Ka ʻoku tāpuni ʻa e ngutu ʻo e taʻemāʻoniʻoní.

17 Vakai! He fiefia ē ka ko e tangata ʻoku valokiʻi ʻe he ʻOtuá;

Ko ia ʻoua ʻe talitekeʻi ʻa e akonekina ʻoku fai ʻe he Māfimafi-Aoniú!

18 He ʻokú ne fakatupunga ʻa e mamahi, ka ʻokú ne haʻihaʻi ʻa e laveá;

ʻOkú ne motuhi, ka ʻokú ne fakamoʻui ʻaki ʻa hono ongo nimá.

19 Te ne fakahaofi koe mei he faingataʻa ʻe ono,

Naʻa mo hono fitú ʻe ʻikai te ne fai ha maumau kiate koe.

20 Lolotonga ʻa e hongé te ne huhuʻi koe mei he maté,

Pea mei he mālohi ʻo ha heletā lolotonga ʻa e taú.

21 ʻE maluʻi koe mei he tā ʻoku fai ʻe he ʻeleló,+

Pea ʻe ʻikai te ke ilifia ki he ʻauhá ʻi heʻene hoko maí.

22 Te ke kata ki he fakaʻauhá mo e fiekaiá,

Pea ʻe ʻikai te ke ilifia ki he fanga manu fekai ʻo e māmaní.

23 He ko e ngaahi maka ʻo e vaó ʻe ʻikai te ne fai ha kovi kiate koe,*

Pea ko e fanga manu fekai ʻo e vaó ʻe melino mo koe.

24 Te ke ʻilo ʻoku malu* pē ho tēnití,

Pea ʻi hoʻo vakaiʻi ʻa hoʻo kaikaiʻangá ʻe ʻikai ke mole ha meʻa.

25 Te ke maʻu ha fānau tokolahi,

Pea ko ho hakó ʻe hangē hono lahí ko e mohuku ʻo e māmaní.

26 Te ke kei mālohi pē ʻi hoʻo ʻalu ki faʻitoká,

Hangē ko e ngaahi haʻinga uité ʻi hono tānaki ʻi honau faʻahitaʻú.