ʻIsikeli

42 Naʻá ne taki leva au ki he lotoʻā ʻi tuʻá ki he tafaʻaki fakatokelaú.+ Pea naʻá ne ʻomi au ki he feituʻu ʻo e loki kaí ʻa ia naʻe hoko atu ki he foʻi ʻēlia ʻataʻataá,+ ʻi he fakatokelau ʻo e fale* naʻe hoko atu aí.+ 2 Ko hono lōloá naʻe kiupite* ʻe 100, ʻi he feituʻu hūʻanga ʻi he tokelaú, pea naʻe kiupite ʻe 50 ʻa hono fālahí. 3 Naʻe tuʻu ia ʻi he vahaʻa ʻo e lotoʻā ʻi lotó pea mo e faliki ʻo e lotoʻā ʻi tuʻá pea naʻe kiupite ʻe 20 ʻa hono fālahí.+ Naʻe fungavaka ua ia pea ko hono ngaahi fakafaletoló naʻe tuʻu fehāngaaki. 4 Naʻe ʻi muʻa ʻi he ngaahi loki kaí* ha ʻaluʻanga ʻi loto+ naʻe kiupite ʻe 10 ʻa hono fālahí pea kiupite ʻe 100 ʻa hono lōloá,* pea ko honau ngaahi hūʻangá naʻe ʻi he tokelaú. 5 Ko e ngaahi loki kai ʻo e falé ʻi ʻolungá naʻe fāsiʻi ange ia ʻi he ngaahi loki kai ʻi laló mo e fungavaka ʻuluakí, koeʻuhí naʻe toʻo ʻe he ngaahi fakafaletoló ha ʻēlia lahi ange. 6 He naʻe fungavaka ua, ka naʻe ʻikai hanau ngaahi pou ʻo hangē ko e ngaahi pou ʻo e ongo lotoʻaá. Ko e ʻuhinga ia naʻe fāsiʻi ange ai ʻa e faliki ʻi he fungavaka ʻi ʻolungá ʻi he faliki ʻo e fungavaka ʻuluakí mo ia ʻi laló.

7 Ko e ʻā maka ʻi tuʻa naʻe ofi ki he ngaahi loki kai naʻe tuʻu ki he tafaʻaki ʻo e lotoʻā ʻi tuʻá ʻa ia naʻe hanga ki he ngaahi loki kai kehé naʻe kiupite ʻe 50 ʻa hono lōloá. 8 He ko e lōloa ʻo e ngaahi loki kai ʻa ia naʻe tuʻu ki he tafaʻaki ʻo e lotoʻā ʻi tuʻá naʻe kiupite ʻe 50, ka ko e ngaahi loki kai naʻe hanga ki he feituʻu toputapú, naʻe kiupite ia ʻe 100. 9 Ko e ngaahi loki kaí naʻe ʻi ai honau hūʻanga ʻi he tafaʻaki fakahahaké ʻo hū atu ki ai mei he lotoʻā ʻi tuʻá.

10 Naʻe ʻi ai foki mo e ngaahi loki kai ʻi loto ʻi he* ʻā maka ʻo e lotoʻaá ki he hahaké, ofi ki he foʻi ʻēlia ʻataʻataá pea mo e falé.+ 11 Naʻe ʻi ai ha ʻaluʻanga ʻi muʻa ai ʻo hangē ko ia ʻi he ngaahi loki kai+ ki he tafaʻaki fakatokelaú. Naʻe lōloa tatau mo fālahi tatau ʻa e ngaahi loki kaí, pea naʻe tatau ʻa honau ngaahi hūʻanga ki tuʻá mo honau ngaahi palaní. Ko honau ngaahi hūʻangá 12 naʻe hangē ko e ngaahi hūʻanga ʻo e ngaahi loki kai ki he tafaʻaki fakatongá. Naʻe ʻi ai ha hūʻanga ʻi he kamataʻanga ʻo e ʻaluʻangá, ʻi muʻa ʻi he ʻā maka ki he tafaʻaki fakahahaké, ʻa ia naʻe lava ke hū atu ai ha taha.+

13 Naʻá ne pehē mai leva kiate au: “Ko e ngaahi loki kai ʻi he tokelaú mo e ngaahi loki kai ʻi he tongá ʻa ia ʻoku hoko atu ki he foʻi ʻēlia ʻataʻataá+ ko e ngaahi loki kai toputapu ia ʻa ia ʻoku kai ai ʻe he kau taulaʻeiki ʻoku nau fakaofiofi atu kia Sihová ʻa e ngaahi feilaulau mātuʻaki toputapú.+ ʻOku nau tuku ai ʻa e ngaahi feilaulau mātuʻaki toputapú, ko e feilaulau meʻakaí,* ko e feilaulau angahalá, mo e feilaulau halaiá, koeʻuhí ʻoku toputapu ʻa e feituʻú.+ 14 ʻI he hū ʻa e kau taulaʻeikí ki he feituʻu toputapú, heʻikai te nau hū ki tuʻa mei ai ki he lotoʻā ʻi tuʻá ʻo ʻikai tomuʻa vete ʻa e ngaahi kofu ʻa ia ʻoku nau fakahoko fatongia ʻakí,+ he ʻoku toputapu ʻa e ngaahi meʻá ni. Te nau tui ʻa e ngaahi kofu kehe koeʻuhí ke nau fakaofiofi ai ki he ngaahi feituʻu ʻoku fakaʻatā ki he kakaí.”

15 ʻI he ʻosi ʻa ʻene fua ʻa e loto ʻēlia ʻoku tuʻu ai ʻa e temipalé,* naʻá ne taki au ki tuʻa ʻi he matapā ʻoku hanga ki he hahaké,+ pea naʻá ne fua ʻa e ʻēliá fakakātoa.

16 Naʻá ne fua ʻa e tafaʻaki fakahahaké ʻaki ʻa e kaho* fuá. Fakatatau ki he kaho fuá, ko hono lōloá ko e kaho ʻe 500 mei he tafaʻaki ʻe tahá ki he tafaʻaki ʻe tahá.

17 Naʻá ne fua ʻa e tafaʻaki fakatokelaú, pea fakatatau ki he kaho fuá, ko hono lōloá ko e kaho ʻe 500.

18 Naʻá ne fua ʻa e tafaʻaki fakatongá, pea fakatatau ki he kaho fuá, ko hono lōloá ko e kaho ʻe 500.

19 Naʻá ne ʻalu takai ki he tafaʻaki fakahihifó. Naʻá ne fua ʻa hono lōloá ʻaki ʻa e kaho fuá ko e kaho ʻe 500.

20 Naʻá ne fua ʻa hono ngaahi tafaʻakí ʻe fā. Naʻe ʻi ai hono ʻā takatakai+ ʻa ia ko hono lōloá ko e kaho ʻe 500 pea ko hono fālahí ko e kaho ʻe 500,+ ke vaheʻi ʻa e meʻa ʻoku toputapú mei he meʻa ʻoku ngāueʻaki anga-mahení.+