SĒNESI

1 ʻI he kamataʻangá naʻe fakatupu ʻe he ʻOtuá ʻa e langí mo e māmaní.+

2 Pea naʻe maomaonganoa mo lala* ʻa e māmaní, pea naʻe fakapoʻuli ʻa e fukahi vai lahí,+ pea naʻe ngaue holo ʻa e ivi ngāue*+ ʻo e ʻOtuá ʻi he fukahi vaí.+

3 Pea naʻe folofola ʻa e ʻOtuá: “Ke ʻi ai ha maama.” Pea naʻe maama+ leva. 4 Hili iá, naʻe ʻafio ʻa e ʻOtuá ki he māmá kuo lelei, pea naʻe kamata ke vaheʻi ʻe he ʻOtuá ʻa e māmá mei he poʻulí. 5 Naʻe ui ʻe he ʻOtuá ʻa e māmá ko e ʻAho, ka ko e poʻulí naʻá ne ui ia ko e Pō.+ Pea naʻe efiafi pea naʻe pongipongi, ko e ʻuluaki ʻahó ia.

6 Naʻe folofola leva ʻa e ʻOtuá: “Ke ʻi ai ha ʻatā+ ʻi he vahaʻa ʻo e ngaahi vaí, pea ke fakamavahevaheʻi ʻa e ngaahi vai mei he ngaahi vai.”+ 7 Naʻe hoko atu leva ʻa e ʻOtuá ʻo ne ngaohi ʻa e ʻataá pea fakamavaheʻi ʻa e ngaahi vai ʻi lalo ʻi he ʻataá mei he ngaahi vai ʻi ʻolunga ʻi he ʻataá.+ Pea naʻe hoko ʻo pehē. 8 Naʻe ui ʻe he ʻOtuá ʻa e ʻataá ko e Langi. Pea naʻe efiafi pea naʻe pongipongi, ko e ʻaho hono uá ia.

9 Naʻe folofola leva ʻa e ʻOtuá: “Ke fakatahataha ʻa e ngaahi vai ʻi he lalo langí ki he feituʻu pē ʻe taha, pea ke hā mai ʻa e fonua mōmoá.”+ Pea naʻe hoko ʻo pehē. 10 Naʻe ui ʻe he ʻOtuá ʻa e fonua mōmoá ko e Māmani,+ ka ko e fakatahataha ʻo e ngaahi vaí, naʻá ne ui ia ko e Tahi.+ Pea naʻe ʻafio ki ai ʻa e ʻOtuá kuo lelei.+ 11 Naʻe folofola leva ʻa e ʻOtuá: “Ke tupu mai ʻa e mohuku ʻi he māmaní, ngaahi ʻakau ʻoku ʻi ai hono tenga mo e ʻuluʻakau fua ʻo fakatatau ki honau faʻahinga, ʻa ia ʻoku ʻi ai honau fua fakataha mo e tenga.” Pea naʻe hoko ʻo pehē. 12 Pea naʻe kamata ke tupu mai ʻi he māmaní ʻa e mohuku, ngaahi ʻakau ʻoku ʻi ai hono tenga,+ mo e ʻuluʻakau fua fakataha mo hono tenga, ʻo fakatatau ki honau faʻahinga. Naʻe ʻafio leva ki ai ʻa e ʻOtuá kuo lelei. 13 Pea naʻe efiafi pea naʻe pongipongi, ko e ʻaho hono tolú ia.

14 Naʻe folofola leva ʻa e ʻOtuá: “Ke ʻi ai ha ngaahi maamaʻanga*+ ʻi he ʻatā ʻo e langí ke ne vaheʻi ʻa e ʻahó mei he poó,+ pea te nau hoko ko ha ngaahi fakaʻilonga ki he ngaahi faʻahitaʻú, mo e ngaahi ʻahó, pea mo e ngaahi taʻú.+ 15 Te nau hoko ko e ngaahi maamaʻanga ʻi he ʻatā ʻo e langí ke ulo mai ki he māmaní.” Pea naʻe hoko ʻo pehē. 16 Pea naʻe hoko atu ʻa e ʻOtuá ʻo ne ngaohi* ʻa e ongo maamaʻanga lalahi ʻe ua, ko e maamaʻanga naʻe ulo lahi angé ke ne puleʻi ʻa e ʻahó+ pea ko e maamaʻanga naʻe ulo siʻi angé ke ne puleʻi ʻa e poó, peá ne ngaohi mo e ngaahi fetuʻú+ foki. 17 Ko ia naʻe fokotuʻu kinautolu ʻe he ʻOtuá ʻi he ʻatā ʻo e langí ke ulo mai ki he funga ʻo māmaní 18 pea ke nau pule ki he ʻahó pea mo e poó pea ke fakamavaheʻi ʻa e māmá mei he poʻulí.+ Naʻe ʻafio leva ki ai ʻa e ʻOtuá kuo lelei. 19 Pea naʻe efiafi pea naʻe pongipongi, ko e ʻaho hono faá ia.

20 Naʻe folofola leva ʻa e ʻOtuá: “Ke ngaeve ʻa e ngaahi meʻamoʻui* ʻi he ngaahi vaí, pea ko e ngaahi meʻamoʻui ʻoku puná ke nau puna ʻi ʻolunga he māmaní ʻi he ʻatā ʻo e langí.”+ 21 Pea naʻe fakatupu ʻe he ʻOtuá ʻa e ngaahi meʻamoʻui lalahi ʻo e tahí mo e meʻamoʻui kotoa pē ʻoku ngaue mo ngaeve ʻi he ngaahi vaí ʻo fakatatau ki honau faʻahinga, pea mo e meʻamoʻui kapakau kotoa pē ʻoku puna ʻo fakatatau ki honau faʻahinga. Pea naʻe ʻafio ʻa e ʻOtuá ki ai kuo lelei. 22 ʻI he meʻa ko iá naʻe tāpuakiʻi kinautolu ʻe he ʻOtuá, ʻo ne pehē: “Fanafanau pea fakatokolahi pea fakafonu ʻa e ngaahi vai ʻo e tahí,+ pea ke hoko ʻo lahi ʻi he māmaní ʻa e ngaahi meʻamoʻui ʻoku puná.” 23 Pea naʻe efiafi pea naʻe pongipongi, ko e ʻaho hono nimá ia.

24 Naʻe folofola leva ʻa e ʻOtuá: “Ke tupu mai ʻi he māmaní ʻa e ngaahi meʻamoʻui ʻo fakatatau ki honau faʻahinga, ko e fanga manu lalata mo e fanga manu totolo mo ngaolo mo e fanga manu kaivao ʻo e māmaní ʻo fakatatau ki honau faʻahinga.”+ Pea naʻe hoko ʻo pehē. 25 Pea naʻe hoko atu ʻa e ʻOtuá ʻo ne ngaohi ʻa e fanga manu kaivao ʻo e māmaní ʻo fakatatau ki honau faʻahinga pea mo e fanga manu lalatá ʻo fakatatau ki honau faʻahinga pea mo e fanga manu kotoa pē ʻo e kelekelé ʻoku totolo mo ngaolo, ʻo fakatatau ki honau faʻahinga. Pea naʻe ʻafio ʻa e ʻOtuá ki ai kuo lelei.

26 Naʻe folofola leva ʻa e ʻOtuá: “Ta+ ngaohi* tangata ʻi hota ʻīmisí,+ ʻo hangē ko hota tataú,+ pea ke nau pule ki he ika ʻo e tahí mo e ngaahi meʻamoʻui ʻoku puna ʻo e langí mo e fanga manu lalatá pea ki he māmaní kotoa pea mo e manu totolo mo ngaolo kotoa pē ʻoku ngaue ʻi he funga ʻo māmaní.”+ 27 Pea naʻe hoko atu ʻa e ʻOtuá ʻo ne fakatupu ʻa e tangatá ʻi hono ʻīmisí, ʻi he ʻīmisi ʻo e ʻOtuá naʻá ne fakatupu ai ia; naʻá ne fakatupu kinaua ko e tangata mo e fefine.+ 28 ʻIkai ko ia pē, naʻe tāpuakiʻi ʻe he ʻOtuá kinaua, pea naʻe folofola ʻa e ʻOtuá kiate kinaua: “Mo fanafanau mo fakatokolahi pea fakafonu ʻa e māmaní+ pea mo pule ki ai,+ pea pule+ ki he ika ʻo e tahí mo e ngaahi meʻamoʻui ʻoku puna ʻo e langí mo e meʻamoʻui kotoa pē ʻoku ngaue ʻi he funga ʻo māmaní.”

29 Naʻe folofola leva ʻa e ʻOtuá: “Ko eni kuó u ʻoatu kiate kimoua ʻa e ʻakau kotoa pē ʻoku ʻi ai hono tenga ʻa ia ʻoku ʻi he funga ʻo māmaní kotoa mo e ʻuluʻakau fua kotoa pē ʻoku ʻi ai hono tenga. Ke hoko ia ko hoʻomo meʻakai.+ 30 Pea ki he fanga manu kaivao kotoa pē ʻo e māmaní, pea ki he meʻamoʻui kotoa pē ʻoku puna ʻo e langí, pea ki he meʻa kotoa pē ʻoku ngaue ʻi he funga ʻo māmaní ʻa ia ʻoku moʻuí, kuó u ʻoatu maʻanautolu ʻa e mohuku lanu mata kotoa pē ko ʻenau meʻakai.”+ Pea naʻe hoko ʻo pehē.

31 ʻI he hili iá, naʻe ʻafio ʻa e ʻOtuá ki he meʻa kotoa pē naʻá ne ngaohí, pea vakai, kuo lelei ʻaupito.+ Pea naʻe efiafi pea naʻe pongipongi, ko e ʻaho hono onó ia.

2 Ko ia ko e langí mo e māmaní mo e meʻa kotoa ʻi aí naʻe kakato.+ 2 Pea ʻi he aʻu ki he ʻaho hono fitú, naʻe ʻosi fakakakato ʻe he ʻOtuá ia ʻa e ngāue naʻá ne faí, pea naʻe kamata ke ne mālōlō ʻi he ʻaho hono fitú mei heʻene ngāue kotoa naʻá ne faí.+ 3 Pea naʻe hoko atu ʻa e ʻOtuá ʻo ne tāpuakiʻi ʻa e ʻaho hono fitú pea fakahaaʻi ia ʻoku toputapu, he naʻe mālōlō ai ʻa e ʻOtuá mei he ngaahi ngāue kotoa ʻa ia naʻá ne fakatupú, ʻa e meʻa kotoa naʻá ne taumuʻa ke ngaohí.

4 Ko ha hisitōlia eni ʻo e langí mo e māmaní ʻi he taimi naʻe fakatupu ai kinauá, ʻi he ʻaho naʻe ngaohi ai ʻe Sihova* ko e ʻOtuá ʻa e māmaní mo e langí.+

5 Naʻe teʻeki ai ʻi ai ha ʻakau iiki ʻo e ngoué ʻi he māmaní pea naʻe teʻeki ai ʻi ai ha ʻakau kehe ʻo e ngoué ʻe kamata tupu, koeʻuhí naʻe teʻeki ai ke ʻai ʻe Sihova ko e ʻOtuá ha ʻuha ki he funga ʻo māmaní pea naʻe ʻikai ha tangata ke ne ngoueʻi ʻa e kelekelé. 6 Ka naʻe ʻalu hake ha kakapu mei he māmaní ʻo ne fakaviviku ʻa e funga kelekelé kotoa.

7 Pea naʻe hoko atu ʻa Sihova ko e ʻOtuá ʻo ne ngaohi ʻa e tangatá mei he efu+ ʻo e kelekelé peá ne puhiʻi ki hono avaʻi ihú ʻa e mānava moʻuí,+ pea naʻe hoko ʻa e tangatá ko ha tokotaha moʻui.*+ 8 ʻIkai ko ia pē, naʻe tō ʻe Sihova ko e ʻOtuá ha ngoue ʻi ʻĪteni,+ ʻi he hahaké; pea naʻá ne tuku ki ai ʻa e tangata naʻá ne ngaohí.+ 9 Ko ia naʻe ʻai ʻe Sihova ko e ʻOtuá ke tupu mei he kelekelé ʻa e ʻakau kotoa pē naʻe matamatalelei ki he sió pea lelei ki he kaí pea pehē foki ki he ʻakau ʻo e moʻuí+ ʻi he loto ngoué mo e ʻakau ʻo e ʻilo ʻo e leleí mo e koví.+

10 Pea naʻe ʻi ai ha vaitafe naʻe tafe mai mei ʻĪteni ke ne fakaviviku ʻa e ngoué, pea mei aí naʻe māvahevahe ai ki he ngaahi vaitafe ʻe fā. 11 Ko e hingoa ʻo e ʻuluakí ko Pīsoni; ko ia ē ʻoku takatakai ʻi he fonua kotoa ko Havilá, ʻa ia ʻoku ʻi ai ʻa e koulá. 12 Ko e koula ʻo e fonua ko iá ʻoku lelei. ʻOku toe ʻi he fonua foki ko iá ʻa e toiʻi ʻakau namu-kakala mo e maka ʻōnike. 13 Ko e hingoa ʻo e vaitafe hono uá ko Kīhoni; ko ia ē ʻoku takatakai ʻi he fonua kotoa ko Kusá. 14 Ko e hingoa ʻo e vaitafe hono tolú ko Hitikeli;*+ ko ia ē ʻoku ʻalu ki he fakahahake ʻo ʻAsīliá.+ Pea ko e vaitafe hono faá ko ʻIufaletesi.+

15 Naʻe ʻave ʻe Sihova ko e ʻOtuá ʻa e tangatá ʻo ne tuku ia ʻi he ngoue ʻo ʻĪtení ke ne ngoueʻi ia pea mo tokangaʻi ia.+ 16 Naʻe toe ʻoange ʻe Sihova ko e ʻOtuá ʻa e fekau ko ení ki he tangatá: “ʻE lava ke ke kai+ mei he ʻakau kotoa pē ʻo e ngoué ʻa ia ʻokú ke saiʻia aí. 17 Ka ko e ʻakau ʻo e ʻilo ʻo e leleí mo e koví, kuo pau ke ʻoua te ke kai mei ai, he ʻi he ʻaho te ke kai ai mei aí ko e moʻoni te ke mate.”+

18 Naʻe folofola leva ʻa Sihova ko e ʻOtuá: “ʻOku ʻikai lelei ki he tangatá ke hokohoko atu ʻene nofo toko tahá. Te u ngaohi ha tokoni kiate ia, ko ha fakakakato ʻo ia.”+ 19 Pea naʻe ngaohi ʻe Sihova ko e ʻOtuá mei he kelekelé ʻa e manu kaivao kotoa pē mo e meʻamoʻui kotoa pē ʻoku puna ʻo e langí, pea naʻá ne kamata ʻomai kinautolu ki he tangatá ke sio pe ko e hā te ne ui ʻaki kinautolú taki taha; pea ko e hā pē ha meʻa naʻe uiʻaki ʻe he tangatá ʻa e meʻamoʻui taki taha, naʻe hoko ia ko hono hingoa.+ 20 Ko ia naʻe fakahingoa ʻe he tangatá ʻa e fanga manu lalata kotoa pē mo e ngaahi meʻamoʻui kotoa pē ʻoku puna ʻo e langí mo e manu kaivao kotoa pē, ka ki he tangatá naʻe ʻikai hano tokoni ke hoko ko ha fakakakato kiate ia. 21 Ko ia naʻe ʻai ʻe Sihova ko e ʻOtuá ʻa e tangatá ke ne mohe maʻu, pea ʻi he lolotonga ʻene mohé, naʻá ne toʻo ʻa e taha ʻo hono ngaahi hui-vakavaká peá ne ʻai leva ke mapuni ʻa e kakanó. 22 Pea naʻe ngaohiʻaki ʻe Sihova ko e ʻOtuá ʻa e hui-vakavaka naʻá ne toʻo mei he tangatá ha fefine, peá ne ʻomai ia ki he tangatá.+

23 Naʻe pehē leva ʻe he tangatá:

24 Ko e ʻuhinga ia ʻe tuku ange ai ʻe ha tangata ʻene tamaí mo ʻene faʻeé pea te ne pīkitai ki* hono uaifí, pea te na hoko ko e kakano pē taha.+ 25 Pea ko kinaua fakatouʻosi naʻe hokohoko atu ʻena telefuá,+ ʻa e tangatá mo hono uaifí; ka neongo ia naʻe ʻikai te na mā.

3 Pea ko e ngatá+ ʻa e manu mata-ʻiloʻilo taha* ʻi he fanga manu kaivao kotoa pē ʻa ia naʻe ngaohi ʻe Sihova ko e ʻOtuá. Ko ia naʻá ne pehē ki he fefiné: “Ko e moʻoni koā naʻe folofola ʻa e ʻOtuá ʻo pehē kuo pau ke ʻoua te mo kai mei he ʻakau kotoa pē ʻo e ngoué?”+ 2 ʻI he meʻá ni naʻe pehē ʻe he fefiné ki he ngatá: “ʻE lava ke ma kai ʻa e fua ʻo e ʻuluʻakau ʻo e ngoué.+ 3 Ka kuo folofola ʻa e ʻOtuá ʻo fekauʻaki mo e fua ʻo e fuʻu ʻakau ʻoku ʻi he loto ngoué:+ ‘Kuo pau ke ʻoua te mo kai mei ai, ʻio, kuo pau ke ʻoua te mo ala ki ai; he ka pehē, te mo mate.’” 4 ʻI he meʻá ni naʻe pehē ʻe he ngatá ki he fefiné: “ʻE ʻikai moʻoni te mo mate.+ 5 He ʻoku ʻafioʻi ʻe he ʻOtuá ko e ʻaho pē ko ia te mo kai ai mei aí, ʻe ʻā homo matá pea te mo hangē ko e ʻOtuá, ʻo ʻilo ʻa e leleí mo e koví.”+

6 Ko ia ai, naʻe sio ʻa e fefiné ko e fuʻu ʻakaú naʻe lelei ki he kaí pea ko ha meʻa naʻe fakamānako ki he matá, ʻio, ko e fuʻu ʻakaú naʻe matamatalelei ki he sió. Ko ia naʻe kamata ke ne toʻo ʻa hono fuá ʻo ne kai.+ Hili iá, naʻá ne ʻoange foki ha meʻa ki hono husepānití ʻi heʻene ʻiate iá, pea naʻe kamata ke ne kai ia.+ 7 Naʻe ʻā leva ʻa hona matá fakatouʻosi, peá na fakatokangaʻi hifo naʻá na telefua. Ko ia naʻá na tui ʻa e lou fiki ʻo na haʻi+ ʻi hona kongalotó.

8 Ki mui ai, naʻá na fanongo ki he leʻo ʻo Sihova ko e ʻOtuá ʻi heʻene hāʻele ʻi he ngoué ʻi he havilivili efiafi ʻo e ʻahó, pea naʻe toitoi ʻa e tangatá mo hono uaifí mei he fofonga ʻo Sihova ko e ʻOtuá ʻi he loto ʻuluʻakau ʻo e ngoué. 9 Pea naʻe toutou ui ʻa Sihova ko e ʻOtuá ki he tangatá ʻo ne pehē kiate ia: “Ko fē koe?” 10 Faifai atu pē naʻá ne pehē: “Naʻá ku fanongo ki ho leʻó ʻi he ngoué, ka naʻá ku ilifia koeʻuhí naʻá ku telefua, ko ia ai naʻá ku toitoi.” 11 ʻI he meʻa ko iá naʻá ne folofola: “Ko hai naʻá ne tala atu kiate koe ʻokú ke telefuá?+ Kuó ke kai koā koe mei he fuʻu ʻakau ko ia naʻá ku fekau kiate koe ke ʻoua te ke kaí?”+ 12 Naʻe pehē ange ʻe he tangatá: “Ko e fefine ko ia naʻá ke ʻomai ke ma feʻaó, naʻá ne ʻomai kiate au ha foʻi fua mei he fuʻu ʻakaú, ko ia ai naʻá ku kai.” 13 Naʻe folofola leva ʻa Sihova ko e ʻOtuá ki he fefiné: “Ko e hā eni kuó ke faí?” Naʻe tali ange ʻe he fefiné: “Ko e ngatá naʻá ne kākaaʻi au, ko ia ai naʻá ku kai.”+

14 Naʻe folofola leva ʻa Sihova ko e ʻOtuá ki he ngatá:+ “Koeʻuhí kuó ke fai ʻa e meʻá ni, ko e malaʻia koe ʻi he fanga manu lalata kotoa pē pea ʻi he fanga manu kaivao kotoa pē. Te ke ngaolo ʻaki ho keté, pea te ke kai efu ʻi he kotoa ʻo e ngaahi ʻaho ʻo hoʻo moʻuí. 15 Pea te u ʻai ha fetāufehiʻaʻaki*+ ʻi he vahaʻa ʻoʻou+ mo e fefiné+ pea ʻi he vahaʻa ʻo ho hakó+ mo hono hakó.+ Te ne* laiki ho ʻulú,+ pea te ke taaʻi* ia ʻi hono muivaʻé.”+

16 Naʻá ne folofola ki he fefiné: “Te u mātuʻaki fakalahi ʻa e mamahi ʻo hoʻo feitamá; te ke fāʻeleʻi hoʻo fānaú ʻi he mamahi, pea ko hoʻo holí ʻe tō ia ki ho husepānití, pea te ne pule kiate koe.”

17 Pea kia ʻĀtama* naʻá ne folofola ki ai: “Koeʻuhi naʻá ke fakafanongo ki he leʻo ʻo ho uaifí peá ke kai mei he fuʻu ʻakau ʻa ia naʻá ku ʻoatu ai kiate koe ʻa e fekaú ni,+ ‘Kuo pau ke ʻoua te ke kai mei ai,’ ke malaʻia ʻa e kelekelé koeʻuhi ko koe.+ Te ke kai ʻa hono fuá ʻi he mamahi ʻi he kotoa ʻo e ngaahi ʻaho ʻo hoʻo moʻuí.+ 18 ʻE tupu mei ai ʻa e ʻakau talatala mo e talatalaʻāmoa maʻau, pea kuo pau ke ke kai ʻa e mohuku ʻo e kelekelé. 19 Te ke kai ʻa e maá* ʻi he kakava ʻo ho matá kae ʻoua ke ke foki ki he kelekelé, he naʻe toʻo koe mei ai.+ He ko e efu koe pea ko e efu te ke foki ki aí.”+

20 ʻI he hili ʻa e meʻá ni naʻe fakahingoa ʻe ʻĀtama hono uaifí ko ʻIvi,* koeʻuhí te ne hoko ko e faʻē ʻa e tokotaha kotoa pē ʻoku moʻuí.+ 21 Pea naʻe ngaohi ʻe Sihova ko e ʻOtuá ha ongo kofu lōloa mei he kiliʻimanú moʻo ʻĀtama mo hono uaifí, ke fakavalaʻi ʻaki kinaua.+ 22 Naʻe folofola leva ʻa Sihova ko e ʻOtuá: “Ko eni kuo hoko ʻa e tangatá ʻo hangē ko ha taha ʻo kitauá* ʻi hono ʻilo ʻa e leleí mo e koví.+ Pea koeʻuhí ke ʻoua naʻa ala atu foki hono nimá ʻo toʻo mai ha foʻi fua mei he fuʻu ʻakau ʻo e moʻuí+ ʻo ne kai pea moʻui taʻengata,—” 23 ʻI he meʻa ko iá naʻe kapusi ai ia ʻe Sihova ko e ʻOtuá mei he ngoue ʻo ʻĪtení+ ke ne ngoueʻi ʻa e kelekelé ʻa ia naʻe toʻo ia mei aí.+ 24 Ko ia ai, naʻá ne kapusi ʻa e tangatá ki tuʻa, pea naʻá ne fokotuʻu ʻi he hahake ʻo e ngoue ʻo ʻĪtení ʻa e ongo* selupimi,+ mo e heletā naʻe uloulo hono matá ʻa ia naʻe vilovilo hokohoko ke leʻohi ʻa e hala ki he fuʻu ʻakau ʻo e moʻuí.

4 Pea naʻe mohe* ʻa ʻĀtama mo ʻIvi ko hono uaifí, pea naʻá ne hoko ʻo feitama.+ ʻI heʻene fāʻeleʻi ʻa Keiní,+ naʻá ne pehē: “Kuó u fāʻeleʻi ha tama tangata ʻi he tokoni ʻa Sihová.” 2 Ki mui ai, naʻá ne toe fāʻele, ʻo maʻu ai ʻa hono tokoua ko ʻĒpeli.+

Naʻe hoko ʻa ʻĒpeli ko e tokotaha naʻá ne tauhi ha fanga sipi, ka naʻe hoko ʻa Keini ko e tokotaha naʻá ne ngoueʻi ʻa e kelekelé. 3 ʻI he hili atu ha taimi, naʻe ʻomi ai ʻe Keini ha ngaahi fua ʻo e kelekelé ko haʻane foaki ia kia Sihova. 4 Ka naʻe ʻomi ʻe ʻĒpeli ʻa e ʻuluaki ngaahi ʻuhiki tangata ʻo ʻene tākangá,+ ʻo kau ai ʻa honau ngakó. Lolotonga naʻe hōifua hifo ʻa Sihova kia ʻĒpeli pea ki heʻene foakí,+ 5 naʻe ʻikai te ne teitei hōifua hifo kia Keini pea ki heʻene foakí. Ko ia naʻe ʻita lahi ʻaupito ʻa Keini peá ne loto-mamahi.* 6 Naʻe folofola leva ʻa Sihova kia Keini: “Ko e hā ʻokú ke ʻita lahi ai mo loto-mamahí? 7 Kapau te ke tafoki ʻo failelei, ʻikai te ke toe maʻu ai ʻa e hōifuá?* Ka ʻo kapau ʻe ʻikai te ke tafoki ʻo failelei, ʻoku toitoi mai ʻa angahala ʻi he matapaá, pea ko ʻene holí ke pule kiate koe; ka te ke lava ʻo puleʻi ia?”

8 ʻI he hili iá, naʻe pehē ʻe Keini kia ʻĒpeli ko hono tokouá: “Ta ō ki he ngoué.” Ko ia lolotonga ʻena ʻi he ngoué, naʻe ʻohofi ʻe Keini ʻa ʻĒpeli ko hono tokouá ʻo ne tāmateʻi ia.+ 9 Ki mui ai, naʻe folofola ʻa Sihova kia Keini: “Ko fē ʻa ʻĒpeli ko ho tokouá?” Pea naʻá ne pehē: “ʻOku ʻikai te u ʻilo. He ko e tauhi koā au ʻo hoku tokouá?” 10 ʻI he meʻá ni naʻá Ne folofola: “Ko e hā kuó ke faí? Fanongo angé! Ko e toto ē ʻo ho tokouá ʻoku tangi hake kiate au mei he kelekelé.+ 11 Pea ko eni ko e malaʻia koe pea kuo kapusi koe mei he kelekelé ʻa ia kuo fakamanga hake hono ngutú ke tali ʻa e toto ʻo ho tokouá mei ho nimá.+ 12 ʻI hoʻo ngoueʻi ʻa e kelekelé, ʻe ʻikai te ne ʻoatu kiate koe hono fuá.* Te ke hoko ko ha tokotaha hikihiki holo mo ha tokotaha hola holo ʻi he māmaní.” 13 ʻI he meʻá ni naʻe pehē ʻe Keini kia Sihova: “Ko e tautea ki heʻeku faihalá ʻoku fuʻu lahi ia ke u fua. 14 ʻI he ʻahó ni kuó ke kapusi au mei he kelekelé, pea te u puli mei ho fofongá; pea te u hoko ko ha tokotaha hikihiki holo mo ha tokotaha hola holo ʻi he māmaní, pea ʻilonga ha taha te ne maʻu au ko e moʻoni te ne tāmateʻi au.” 15 Ko ia naʻe folofola ʻa Sihova kiate ia: “ʻI he ʻuhinga ko iá, ʻilonga ha taha te ne tāmateʻi ʻa Keini te ne fuesia ha sāuni ʻo liunga fitu.”

Ko ia naʻe tuʻutuʻuni* ʻe Sihova ha fakaʻilonga moʻo Keini koeʻuhi ke ʻoua naʻa taaʻi ia ʻe ha taha ʻi haʻane maʻu ia. 16 Naʻe ʻalu atu leva ʻa Keini mei he ʻao ʻo Sihová ʻo ne nofo ʻi he fonua ko Notí* ki he hahake ʻo ʻĪtení.+

17 ʻI he hili iá, naʻe mohe ʻa Keini mo hono uaifí,+ pea naʻá ne hoko ʻo feitama ʻo ne fāʻeleʻi ʻa ʻĪnoke. Naʻe langa leva ʻe Keini ha kolo peá ne fakahingoa ʻa e koló ki hono foha ko ʻĪnoké. 18 Ki mui ai, naʻe fanauʻi kia ʻĪnoke ʻa ʻĪlati. Pea naʻe hoko ʻa ʻĪlati ko e tamai ia ʻa Mehusaeli, pea naʻe hoko ʻa Mehusaeli ko e tamai ia ʻa Mētuisaeli, pea naʻe hoko ʻa Mētuisaeli ko e tamai ia ʻa Lēmeki.

19 Naʻe maʻu ʻe Lēmeki ha ongo uaifi moʻona. Ko e hingoa ʻo e ʻuluakí ko Ata, pea ko e hingoa ʻo hono uá ko Silā. 20 Naʻe fāʻeleʻi ʻe Ata ʻa Siapale. Ko ia ʻa e tupuʻanga ʻo e kau nofo tēnití mo hono tauhi ʻo e fanga manú. 21 Ko e hingoa ʻo hono tokouá ko Siupale. Ko ia ʻa e tupuʻanga ʻo kinautolu kotoa ʻoku tā haʻape mo ifi paipá.* 22 Pehē foki, naʻe fāʻeleʻi ʻe Silā ʻa Tupale-keini, ʻa ia naʻá ne tuki ʻa e faʻahinga kotoa pē ʻo e meʻangāue kopá mo e ukameá. Pea ko e tuofefine ʻo Tupale-keiní ko Naama. 23 Naʻe faʻu leva ʻe Lēmeki ʻa e ngaahi lea ko ení ki hono ongo uaifi ko Ata mo Silaá:

25 Naʻe toe mohe ʻa ʻĀtama mo hono uaifí, pea naʻá ne fāʻeleʻi ha tama tangata. Naʻe fakahingoa ia ʻe ʻIvi ko Seti,*+ koeʻuhí hangē ko ia naʻá ne leaʻakí, “Kuo ʻomai ʻe he ʻOtuá kiate au ha hako ʻe taha ko e fetongi ʻo ʻĒpeli, koeʻuhi naʻe tāmateʻi ia+ ʻe Keini.” 26 Naʻe fanauʻi foki kia Seti ha foha, pea naʻá ne fakahingoa ia ko ʻĪnosi.+ ʻI he taimi ko iá naʻe kamata ke ui ai ʻa e kakaí ki he huafa ʻo Sihová.

5 Ko e tohi eni ʻo e hisitōlia ʻo ʻĀtamá. ʻI he ʻaho naʻe fakatupu ai ʻe he ʻOtuá ʻa ʻĀtamá, naʻá ne ngaohi ia ʻi hono tataú.+ 2 Naʻá ne fakatupu kinaua ko e tangata mo e fefine.+ ʻI he ʻaho naʻe fakatupu ai kinauá,+ naʻá ne tāpuakiʻi kinaua peá ne fakahingoa kinaua ko e Tangata.*

3 Naʻe moʻui ʻa ʻĀtama ʻi he taʻu ʻe 130 pea naʻá ne hoko ko e tamai ʻa ha foha ʻi hono tataú, ʻi hono ʻīmisí, pea naʻá ne fakahingoa ia ko Seti.+ 4 Hili ʻa e hoko ʻa ʻĀtama ko e tamai ʻa Setí, naʻá ne moʻui ʻi he taʻu ʻe 800. Pea naʻá ne hoko ko e tamai ʻa ha ngaahi foha mo ha ngaahi ʻofefine. 5 Ko ia ko e ngaahi ʻaho kotoa ʻo e moʻui ʻa ʻĀtamá naʻe feʻunga mo e taʻu ʻe 930, pea naʻá ne toki mate+ leva.

6 Naʻe moʻui ʻa Seti ʻi he taʻu ʻe 105 pea naʻá ne hoko ko e tamai ʻa ʻĪnosi.+ 7 Hili ʻa e hoko ʻa Seti ko e tamai ʻa ʻĪnosí, naʻá ne moʻui ʻi he taʻu ʻe 807. Pea naʻá ne hoko ko e tamai ʻa ha ngaahi foha mo ha ngaahi ʻofefine. 8 Ko ia ko e ngaahi ʻaho kotoa ʻo Setí naʻe feʻunga mo e taʻu ʻe 912, pea naʻá ne toki mate leva.

9 Naʻe moʻui ʻa ʻĪnosi ʻi he taʻu ʻe 90 pea naʻá ne hoko ko e tamai ʻa Keinani. 10 Hili ʻa e hoko ʻa ʻĪnosi ko e tamai ʻa Keinaní, naʻá ne moʻui ʻi he taʻu ʻe 815. Pea naʻá ne hoko ko e tamai ʻa ha ngaahi foha mo ha ngaahi ʻofefine. 11 Ko ia ko e ngaahi ʻaho kotoa ʻo ʻĪnosí naʻe feʻunga mo e taʻu ʻe 905, pea naʻá ne toki mate leva.

12 Naʻe moʻui ʻa Keinani ʻi he taʻu ʻe 70 pea naʻá ne hoko ko e tamai ʻa Mahalaleli.+ 13 Hili ʻa e hoko ʻa Keinani ko e tamai ʻa Mahalalelí, naʻá ne moʻui ʻi he taʻu ʻe 840. Pea naʻá ne hoko ko e tamai ʻa ha ngaahi foha mo ha ngaahi ʻofefine. 14 Ko ia ko e ngaahi ʻaho kotoa ʻo Keinaní naʻe feʻunga mo e taʻu ʻe 910, pea naʻá ne toki mate leva.

15 Naʻe moʻui ʻa Mahalaleli ʻi he taʻu ʻe 65 pea naʻá ne hoko ko e tamai ʻa Sēleti.+ 16 Hili ʻa e hoko ʻa Mahalaleli ko e tamai ʻa Sēletí, naʻá ne moʻui ʻi he taʻu ʻe 830. Pea naʻá ne hoko ko e tamai ʻa ha ngaahi foha mo ha ngaahi ʻofefine. 17 Ko ia ko e ngaahi ʻaho kotoa ʻo Mahalalelí naʻe feʻunga mo e taʻu ʻe 895, pea naʻá ne toki mate leva.

18 Naʻe moʻui ʻa Sēleti ʻi he taʻu ʻe 162 pea naʻá ne hoko ko e tamai ʻa ʻĪnoke.+ 19 Hili ʻa e hoko ʻa Sēleti ko e tamai ʻa ʻĪnoké, naʻá ne moʻui ʻi he taʻu ʻe 800. Pea naʻá ne hoko ko e tamai ʻa ha ngaahi foha mo ha ngaahi ʻofefine. 20 Ko ia ko e ngaahi ʻaho kotoa ʻo Sēletí naʻe feʻunga mo e taʻu ʻe 962, pea naʻá ne toki mate leva.

21 Naʻe moʻui ʻa ʻĪnoke ʻi he taʻu ʻe 65 pea naʻá ne hoko ko e tamai ʻa Mētuisela.+ 22 Hili ʻa e hoko ʻa ʻĪnoke ko e tamai ʻa Mētuiselá, naʻe hokohoko atu ʻa ʻene ʻaʻeva mo e ʻOtua moʻoní* ʻi he taʻu ʻe 300. Pea naʻá ne hoko ko e tamai ʻa ha ngaahi foha mo ha ngaahi ʻofefine. 23 Ko ia ko e ngaahi ʻaho kotoa ʻo ʻĪnoké naʻe feʻunga mo e taʻu ʻe 365. 24 Naʻe hanganaki ʻaʻeva ʻa ʻĪnoke mo e ʻOtua moʻoní.+ Pea naʻe ʻikai te ne toe ʻi ai, he naʻe ʻave ia+ ʻe he ʻOtuá.

25 Naʻe moʻui ʻa Mētuisela ʻi he taʻu ʻe 187 pea naʻá ne hoko ko e tamai ʻa Lēmeki.+ 26 Hili ʻa e hoko ʻa Mētuisela ko e tamai ʻa Lēmekí, naʻá ne moʻui ʻi he taʻu ʻe 782. Pea naʻá ne hoko ko e tamai ʻa ha ngaahi foha mo ha ngaahi ʻofefine. 27 Ko ia ko e ngaahi ʻaho kotoa ʻo Mētuiselá naʻe feʻunga mo e taʻu ʻe 969, pea naʻá ne toki mate leva.

28 Naʻe moʻui ʻa Lēmeki ʻi he taʻu ʻe 182 pea naʻá ne hoko ko e tamai ʻa ha foha. 29 Naʻá ne fakahingoa ia ko Noa,*+ ʻo ne pehē: “Ko e tokotahá ni te ne ʻomai kiate kitautolu ʻa e fakafiemālie* mei heʻetau ngāué pea mei he fakaongosia mamahi ʻa hotau nimá koeʻuhí ko e kelekele kuo fakamalaʻiaʻi+ ʻe Sihová.” 30 Hili ʻa e hoko ʻa Lēmeki ko e tamai ʻa Noá, naʻá ne moʻui ʻi he taʻu ʻe 595. Pea naʻá ne hoko ko e tamai ʻa ha ngaahi foha mo ha ngaahi ʻofefine. 31 Ko ia ko e ngaahi ʻaho kotoa ʻo Lēmekí naʻe feʻunga mo e taʻu ʻe 777, pea naʻá ne toki mate leva.

32 ʻI he hili ʻa e aʻu ʻa Noa ʻo taʻu 500, naʻá ne hoko ai ko e tamai ʻa Semi,+ Hami,+ pea mo Sēfeti.+

6 Pea ʻi he kamata ke tupu ʻo tokolahi ʻa e tangatá ʻi he funga kelekelé pea fanauʻi ha ngaahi ʻofefine kiate kinautolú, 2 naʻe kamata ke fakatokangaʻi ʻe he ngaahi foha ʻo e ʻOtua moʻoní*+ ʻoku hoihoifua ʻa e ngaahi ʻofefine ʻo e tangatá. Ko ia naʻe kamata ke nau maʻu ko honau ngaahi uaifi ʻa e faʻahinga kotoa ʻa ia naʻa nau filí. 3 Naʻe folofola leva ʻa Sihova: “ʻE ʻikai ke kātakiʻi ʻe hoku laumālié ʻa e tangatá ʻo taʻengata,+ koeʻuhí he ko e kakano pē ia. Ko ia ai, ko hono ngaahi ʻahó ʻe feʻunga mo e taʻu ʻe 120.”+

4 Naʻe ʻi he māmaní ʻa e kau Nefilimi* ʻi he ngaahi ʻaho ko iá pea mo e hili iá. ʻI he lolotonga ʻa e taimi ko iá naʻe hokohoko atu ʻa e ngaahi foha ʻo e ʻOtua moʻoní ke mohe* mo e ngaahi ʻofefine ʻo e tangatá, pea naʻe fanauʻi ʻe he faʻahingá ni ha ngaahi foha kiate kinautolu. Ko kinautolu ia ʻa e kau toʻa ʻo onoʻahó, ko e kau tangata ʻiloa.

5 Ko ia ai, naʻe ʻafio ʻa Sihova ki he lahi fau ʻa e fulikivanu ʻa e tangatá ʻi he māmaní pea ko e hehema kotoa ʻo e ngaahi fakakaukau ʻo hono lotó naʻe kovi pē ʻi he taimi kotoa pē.+ 6 Naʻe fakaʻiseʻisa* ʻa Sihova ʻi heʻene ngaohi ʻa e tangatá ʻi he māmaní, pea naʻe mamahi+ hono lotó. 7 Ko ia naʻe folofola ʻa Sihova: “Te u tafiʻi mei he funga kelekelé ʻa e tangata ʻa ia kuó u fakatupú, ʻa e tangatá fakataha mo e fanga manu lalatá, ʻa e fanga manu totolo mo ngaoló, pea mo e ngaahi meʻamoʻui ʻoku puna ʻo e langí, he ʻoku ou fakaʻiseʻisa ʻi heʻeku ngaohi kinautolú.” 8 Ka naʻe maʻu ʻe Noa ʻa e hōifua ʻi he fofonga ʻo Sihová.

9 Ko e hisitōlia eni ʻo Noá.

Ko Noá ko ha tangata naʻe māʻoniʻoni.+ Naʻá ne fakamoʻoniʻi ʻa ʻene taʻemele ʻi he haʻohaʻonga ʻo hono ngaahi toʻumeʻá.* Naʻe ʻaʻeva ʻa Noa mo e ʻOtua moʻoní.+ 10 ʻI he faai mai ʻa e taimí naʻe hoko ʻa Noa ko e tamai ʻa ha ngaahi foha ʻe toko tolu, ko Semi, Hami, mo Sēfeti.+ 11 Ka naʻe hoko ʻa e māmaní ko e koto maumau ʻi he vakai ʻa e ʻOtua moʻoní, pea naʻe fonu ʻa e māmaní ʻi he fakamālohí. 12 ʻIo, naʻe ʻafio hifo ʻa e ʻOtuá ki he māmaní, pea ko ha koto maumau+ ia; naʻe maumauʻi ʻe he kakano* kotoa pē ʻa hono ʻalungá ʻi he māmaní.+

13 ʻI he hili iá, naʻe folofola ʻa e ʻOtuá kia Noa: “Kuó u fili ke fokotuʻu ha ngataʻanga ki he kakano kotoa pē, he ʻoku fonu ʻa e māmaní ʻi he fakamālohí koeʻuhí ko kinautolu, ko ia te u fakaʻauha ʻa e kakaí pea fakalala ʻa e māmaní.+ 14 Faʻu moʻou ha ʻaʻake* mei he ʻakau ko e kofa.*+ Te ke faʻu ha ngaahi loki ʻi he ʻaʻaké pea valiʻaki ia ha meʻa hangē ha valitaá+ ʻi loto mo tuʻa. 15 Ko e founga eni te ke faʻu ai iá: Ko e ʻaʻaké ʻe kiupite* ʻe 300 hono lōloá, kiupite ʻe 50 hono fālahí, pea kiupite ʻe 30 hono māʻolungá. 16 Te ke ngaohi ha foʻi ava ke maama* ki he ʻaʻaké, ʻo kiupite ʻe taha mei ʻolunga. Te ke ʻai ʻa e hūʻanga ʻo e ʻaʻaké ʻi hono tafaʻakí+ pea faʻu ia mo hano konga taupotu ki lalo, mo ha fungavaka ʻuluaki, pea mo ha fungavaka hono ua.

17 “Ko e meʻa kiate aú, te u ʻomai ha lōmaki vai+ ki he māmaní ke fakaʻauha mei he lalo langí ʻa e kakano kotoa pē ʻoku ʻi ai ʻa e mānava moʻuí.* Ko e meʻa kotoa pē ʻi he māmaní ʻe ʻauha.+ 18 Pea ʻoku ou fokotuʻu ʻeku fuakava mo koe, pea kuo pau ke ke hū ki he ʻaʻaké, ʻa koe, ko ho ngaahi fohá, ko ho uaifí, pea mo e ngaahi uaifi ʻo ho ngaahi fohá fakataha mo koe.+ 19 Pea fakahū ki he ʻaʻaké ʻa e meʻamoʻui+ ʻe ua ʻo e faʻahinga kotoa pē ko ha monumanu tangata mo ha monumanu fefine,+ koeʻuhi ke fakahaofi moʻui kinautolu fakataha mo koe; 20 ʻa e meʻamoʻui ʻoku puná ʻo fakatatau ki honau ngaahi faʻahinga, ʻa e fanga manu lalatá ʻo fakatatau ki honau ngaahi faʻahinga, pea mo e manu totolo mo ngaolo kotoa pē ʻo e kelekelé ʻo fakatatau ki honau ngaahi faʻahinga, ko e ua mei he faʻahinga taki taha te nau hū atu ki ai kiate koe ke fakahaofi moʻui+ kinautolu. 21 Pea ko koe, te ke tānaki pea ʻave fakataha mo koe ʻa e faʻahinga meʻakai kotoa pē ke kai,+ ke hoko ko e meʻakai maʻau pea mo e fanga manú.”

22 Pea naʻe fai ʻe Noa ʻo fakatatau ki he meʻa kotoa pē naʻe tuʻutuʻuni ʻe he ʻOtuá kiate iá. Naʻá ne fai ʻa e meʻa tofu pē ko iá.+

7 ʻI he hili iá, naʻe folofola ʻa Sihova kia Noa: “Hū ki he ʻaʻaké, ʻa koe pea mo e kotoa ho fāmilí, koeʻuhi ko koe ʻa e tokotaha kuó u ʻiloʻi ʻoku māʻoniʻoni ʻi hoku ʻaó ʻi he lotolotonga ʻo e toʻutangatá ni.+ 2 Kuo pau ke ke ʻave fakataha mo koe ʻa e faʻahinga monumanu maʻa kotoa pē ʻo taki fitu,*+ ʻa e monumanu tangata mo hono hoa; pea toko ua pē ʻi he monumanu taʻemaʻa kotoa pē, ʻa e monumanu tangata mo hono hoa; 3 pehē foki ki he ngaahi meʻamoʻui ʻoku puna ʻi he langí ʻo taki fitu,* ʻa e tangata mo e fefine, ke fakahaofi moʻui honau faʻahingá ʻi he māmaní+ kotoa. 4 He ʻi he ʻaho pē ʻe fitu mei heni, te u ʻai ha ʻuha+ ki he māmaní ʻi he ʻaho ʻe 40 mo e pō ʻe 40,+ pea te u tafiʻi mei he funga kelekelé ʻa e meʻamoʻui kotoa pē kuó u ngaohí.”+ 5 Pea naʻe fai ʻe Noa ʻa e meʻa kotoa pē naʻe tuʻutuʻuni ʻe Sihova kiate iá.

6 Naʻe taʻu 600 ʻa Noa ʻi he taimi naʻe hoko mai ai ʻa e lōmaki vaí ki he māmaní.+ 7 Ko ia ko Noa, fakataha mo hono ngaahi fohá, ko hono uaifí, mo e ngaahi uaifi ʻo hono ngaahi fohá, naʻa nau hū ki he ʻaʻaké ki muʻa ʻi he lōmaki vaí.+ 8 Ko e monumanu maʻa kotoa pē mo e monumanu taʻemaʻa kotoa pē pea mo e ngaahi meʻamoʻui ʻoku puná pea mo e meʻa kotoa pē ʻoku ngaue ʻi he kelekelé,+ 9 naʻa nau hū ki he ʻaʻaké kia Noa ʻo tautau toko ua, ʻa e tangata mo e fefine, ʻo hangē tofu pē ko ia naʻe tuʻutuʻuni ʻe he ʻOtuá kia Noá. 10 Pea ʻi he ʻaho ʻe fitu mei ai naʻe tō hifo ʻa e lōmaki vaí ki he māmaní.

11 ʻI he taʻu hono 600 ʻo e moʻui ʻa Noá, ʻi he māhina hono uá, ʻi he ʻaho hono 17 ʻo e māhiná, ʻi he ʻaho ko iá naʻe ava ai ʻa e ngaahi matavai kotoa pē ʻo e ngaahi vai lahi ʻi he ʻataá pea naʻe ava ai mo e ngaahi matapā ʻokú ne taʻofi ʻa e vai ʻo e langí.+ 12 Pea naʻe tō ʻa e ʻuha lōvai ki he māmaní ʻi he ʻaho ʻe 40 mo e pō ʻe 40. 13 ʻI he ʻaho pē ko iá, naʻe hū ai ʻa Noa ki he ʻaʻaké fakataha mo hono ngaahi fohá, ʻa Semi, Hami, mo Sēfeti,+ pea mo hono uaifí pea mo e ngaahi uaifi ʻe toko tolu ʻo hono ngaahi fohá.+ 14 Naʻa nau hū ki loto fakataha mo e manu kaivao kotoa pē ʻo fakatatau ki honau faʻahinga, mo e manu lalata kotoa pē ʻo fakatatau ki honau faʻahinga, mo e manu totolo mo ngaolo kotoa pē ʻo e māmaní ʻo fakatatau ki honau faʻahinga, mo e meʻamoʻui kotoa pē ʻoku puna ʻo fakatatau ki honau faʻahinga, ʻa e manupuna kotoa pē, ʻa e meʻamoʻui kapakau kotoa pē. 15 Naʻa nau ʻalu ai pē kia Noa ki he loto ʻaʻaké, ʻo tautau toko ua, ʻa e faʻahinga kakano kotoa pē ʻoku ʻi ai ʻa e mānava moʻuí.* 16 Ko ia naʻa nau hū ki loto, ʻa e tangata mo e fefine ʻo e faʻahinga kakano kotoa pē, ʻo hangē tofu pē ko ia naʻe tuʻutuʻuni ʻe he ʻOtuá kiate iá. ʻI he hili iá, naʻe tāpuni ʻe Sihova ʻa e matapaá.

17 Naʻe hokohoko atu ʻa e lōmakí ʻi he ʻaho ʻe 40 ʻi he funga ʻo māmaní, pea naʻe lahi fakautuutu ai pē ʻa e vaí pea kamata ke ne hiki hake ʻa e ʻaʻaké, pea naʻe tētē ia ʻi ʻolunga ʻi he funga ʻo māmaní. 18 Naʻe hoko ʻo hulu fau ʻa e vaí pea fakautuutu ai pē ʻene lahí ʻi he māmaní, pea naʻe tētē ʻa e ʻaʻaké ʻi he fukahi vaí. 19 Naʻe mātuʻaki lōmekina ʻe he vaí ʻa e māmaní ʻo ʻufiʻufi+ ai ʻa e ngaahi moʻunga māʻolunga kotoa pē ʻi he lalo langí kotoa. 20 Naʻe ʻalu hake ʻa e vaí ʻo māʻolunga ʻaki ʻa e kiupite* ʻe 15 ʻi he ngaahi moʻungá.

21 Ko ia naʻe ʻauha+ ʻa e ngaahi meʻamoʻui* kotoa pē naʻe ngaue ʻi he māmaní—ʻa e ngaahi meʻamoʻui ʻoku puná, ko e fanga manu lalatá, ko e fanga manu kaivaó, ko e fanga kiʻi meʻamoʻui iiki fakapupungá, pea mo e faʻahinga kotoa pē ʻo e tangatá.+ 22 Ko e meʻa kotoa pē ʻi he fonua mōmoá naʻá ne maʻu ʻa e mānava moʻuí* ʻi hono avaʻi ihú naʻe mate+ ia. 23 Ko ia naʻá Ne tafiʻi ʻa e meʻamoʻui kotoa pē mei he funga ʻo māmaní, ʻo kau ai ʻa e tangatá, fanga manú, fanga manu totolo mo ngaoló, pea mo e ngaahi meʻamoʻui ʻoku puna ʻo e ʻataá. Naʻe tafiʻi kotoa atu kinautolu mei he māmaní;+ ko Noa pē mo e faʻahinga naʻe ʻiate ia ʻi he ʻaʻaké naʻe hao moʻuí.+ 24 Pea naʻe hokohoko atu hono lōmekina ʻe he vaí ʻa e māmaní ʻi he ʻaho ʻe 150.+

8 Ka naʻe fakahanga ʻa e tokanga* ʻa e ʻOtuá kia Noa pea ki he fanga manu kaivao mo e fanga manu lalata kotoa pē naʻe ʻiate ia ʻi he ʻaʻaké,+ pea naʻe ʻai ʻe he ʻOtuá ha matangi ke angi mai ki he māmaní, pea naʻe kamata ke holo hifo ai ʻa e vaí. 2 Ko e ngaahi matavai ʻo e vai lahí mo e ngaahi matapā ʻokú ne taʻofi ʻa e vai ʻo e langí naʻe taʻofituʻu, ko ia naʻe tuʻu+ ai ʻa e tō* ʻa e ʻuha mei he langí. 3 Naʻe kamata leva ke matuku māmālie atu ʻa e vaí mei he māmaní. ʻI he ʻosi ʻa e ʻaho ʻe 150, naʻe ʻosi holo hifo ʻa e vaí. 4 ʻI he māhina hono fitú, ʻi he ʻaho hono 17 ʻo e māhiná, naʻe hoko ai ʻo toka ʻa e ʻaʻaké ʻi he ngaahi moʻunga ʻo ʻAlalaté. 5 Pea naʻe holo ai pē ʻa e vaí ʻo aʻu ki he māhina hono hongofulú. ʻI he māhina hono hongofulú, ʻi he ʻuluaki ʻaho ʻo e māhiná, naʻe ʻasi mai ai ʻa e tumutumu ʻo e ngaahi moʻungá.+

6 Ko ia ʻi he ʻosi ʻa e ʻaho ʻe 40, naʻe fakaava ai ʻe Noa ʻa e matapā-teke+ naʻá ne faʻu ʻi he ʻaʻaké 7 pea naʻá ne tuku atu ha foʻi lēveni; pea naʻe toutou puna takai ia ʻi tuʻa mo foki mai, kae ʻoua ke maha atu ʻa e vaí ʻi he māmaní.

8 Ki mui ai, naʻá ne tuku atu ha foʻi lupe ke sio pe kuo matuku atu ʻa e vaí mei he fukahi kelekelé. 9 Naʻe ʻikai ke maʻu ʻe he foʻi lupé ha feituʻu mālōlōʻanga ke tuʻu ai, ko ia naʻe foki mai ia kiate ia ki he ʻaʻaké koeʻuhí naʻe kei ʻufiʻufi ʻe he vaí ʻa e funga māmaní kotoa.+ Ko ia naʻe mafao atu hono nimá ʻo ʻomai ia ki loto ki he ʻaʻaké. 10 Naʻá ne tatali ʻi ha toe ʻaho ʻe fitu, pea naʻá ne toe tuku atu ʻa e foʻi lupé mei he ʻaʻaké. 11 ʻI he haʻu kiate ia ʻa e foʻi lupé ʻi he ʻalu ke efiafí, naʻá ne sio tā ʻoku ʻi ai ha lauʻiʻōlive mata ʻi hono ngutú! Ko ia naʻe ʻilo ai ʻe Noa kuo matuku atu ʻa e vaí mei he māmaní.+ 12 Naʻá ne tatali ʻi ha toe ʻaho ʻe fitu. Pea naʻá ne tuku atu leva ʻa e foʻi lupé, ka naʻe ʻikai ke toe foki mai ia kiate ia.

13 Pea ʻi he taʻu hono 601,+ ʻi he ʻuluaki māhiná, ʻi he ʻuluaki ʻaho ʻo e māhiná, naʻe maha hifo ai ʻa e vaí mei he māmaní; pea naʻe toʻo ʻe Noa ʻa e ʻufiʻufi ʻo e ʻaʻaké ʻo ne sio naʻe mātuʻu ʻa e fukahi kelekelé. 14 ʻI he māhina hono uá, ʻi he ʻaho hono 27 ʻo e māhiná, naʻe mātuʻu ai ʻa e māmaní.

15 Naʻe folofola leva ʻa e ʻOtuá kia Noa: 16 “Hū ki tuʻa mei he ʻaʻaké, ʻa koe, ko ho uaifí, ko ho ngaahi fohá, pea mo e ngaahi uaifi ʻo ho ngaahi fohá.+ 17 Hū mo koe ki tuʻa ʻa e meʻamoʻui kotoa pē ʻo e faʻahinga kakano kotoa pē,+ ʻa e ngaahi meʻamoʻui ʻoku puná pea mo e fanga manú pea mo e fanga manu totolo mo ngaolo kotoa pē ʻo e māmaní, ke nau fakatokolahi* ʻi he māmaní pea ke nau fanafanau pea hoko ʻo tokolahi ʻi he māmaní.”+

18 Ko ia naʻe hū ʻa Noa ki tuʻa, fakataha mo hono ngaahi fohá,+ mo hono uaifí, pea mo e ngaahi uaifi ʻo hono ngaahi fohá. 19 Ko e meʻamoʻui kotoa pē, ʻa e manu totolo mo ngaolo kotoa pē mo e meʻamoʻui kotoa pē ʻoku puna, ʻa e meʻa kotoa pē ʻoku ngaue ʻi he māmaní, naʻa nau hū ki tuʻa mei he ʻaʻaké ʻi honau ngaahi fāmilí.+ 20 Naʻe fokotuʻu leva ʻe Noa ha ʻōlita+ kia Sihova pea naʻá ne toʻo ʻa e niʻihi ʻo e fanga manu maʻa kotoa pē pea mo e niʻihi ʻo e ngaahi meʻamoʻui maʻa kotoa pē ʻoku puná+ ʻo ne fai ha ngaahi feilaulau tutu ʻi he ʻōlitá.+ 21 Pea naʻe kamata ke nāmuʻi ʻe Sihova ha ngangatu fakahōifua.* Ko ia naʻe pehē ʻe Sihova ʻi hono lotó: “Heʻikai ʻaupito te u toe fakamalaʻiaʻi* ʻa e kelekelé+ koeʻuhi ko e tangatá, he ko e hehema ʻo e loto ʻo e tangatá ʻoku kovi mei heʻene kei siʻí ʻo faai hake;+ pea heʻikai ʻaupito te u toe taaʻi ʻa e meʻamoʻui kotoa pē ʻo hangē ko ia kuó u faí.+ 22 Mei he taimí ni ʻo faai atu, ko e māmaní ʻe ʻikai ʻaupito ngata ai ʻa e tō tengá mo e utu-taʻú, momokó mo e velá, faʻahitaʻu māfaná mo e faʻahitaʻu momokó, mo e ʻahó mo e poó.”+

9 Naʻe tāpuakiʻi ʻe he ʻOtuá ʻa Noa mo hono ngaahi fohá peá ne folofola kiate kinautolu: “Mou fanafanau mo fakatokolahi pea fakafonu ʻa e māmaní.+ 2 ʻE hokohoko atu ʻa e manavahē kiate kimoutolu mo ha ilifia kiate kimoutolu ʻa e meʻamoʻui kotoa pē ʻo e māmaní pea mo e meʻamoʻui kotoa pē ʻoku puna ʻo e langí, ʻa e meʻa kotoa pē ʻoku ngaue ʻi he kelekelé, pea mo e ika kotoa pē ʻo e tahí. Kuo tuku atu kinautolu ki homou nimá*+ he taimí ni. 3 Ko e manu kotoa pē ʻoku ngaue ʻa ia ʻoku moʻuí te nau hoko ko hoʻomou meʻakai.+ Hangē tofu pē ko ʻeku tuku atu kiate kimoutolu ʻa e mohuku lau matá, ʻoku ou tuku atu kinautolu kotoa pē kiate kimoutolu.+ 4 Ko e kakano pē ʻoku ʻi ai ʻene moʻuí—ʻa hono totó+—kuo pau ke ʻoua te mou kai+ ia. 5 Tuku kehe ia, te u kounaʻi ha fakamatala ki he toto ʻo hoʻomou moʻuí. Te u kounaʻi ha fakamatala mei he meʻamoʻui kotoa pē; pea mei he tangata taki taha te u kounaʻi ha fakamatala mei ai ki he moʻui ʻa hono tokouá.+ 6 ʻIlonga ha taha te ne lilingi ha toto ʻo ha tangata, ʻe lilingi hono toto+ ʻoʻoná ʻe ha tangata, he ko e ʻīmisi ʻo e ʻOtuá naʻá Ne ngaohi ai ʻa e tangatá.+ 7 Ko e meʻa kiate kimoutolú, mou fanafanau mo fakatokolahi, pea ke mou tupulaki ʻi he māmaní pea hoko ʻo tokolahi.”+

8 Naʻe folofola leva ʻa e ʻOtuá kia Noa pea ki hono ngaahi foha naʻe ʻiate iá: 9 “ʻOku ou fokotuʻu he taimí ni ʻeku fuakava mo kimoutolu+ pea mo homou hako ʻi he hili kimoutolú, 10 pea mo e meʻamoʻui kotoa pē ʻa ia ʻoku ʻiate kimoutolú, ʻa e fanga manupuná, ʻa e fanga manú, pea mo e meʻamoʻui kotoa pē ʻo e māmaní ʻoku ʻiate kimoutolú, ʻa kinautolu kotoa pē naʻe hū ki tuʻa mei he ʻaʻaké—ʻa e meʻamoʻui kotoa pē ʻo e māmaní.+ 11 ʻIo, ʻoku ou fokotuʻu ʻeku fuakavá mo kimoutolu: ʻE ʻikai ʻaupito ke toe fakaʻauha ʻe ha lōmaki vai ʻa e kakano* kotoa pē, pea ʻe ʻikai ʻaupito ke toe maumauʻi+ ʻe ha lōmaki ʻa e māmaní.”

12 Pea naʻe toe folofola ʻa e ʻOtuá: “Ko eni ia ʻa e fakaʻilonga ʻo e fuakava ʻoku ou fai ʻi he vahaʻa ʻoʻoku pea mo kimoutolu pea mo e meʻamoʻui kotoa pē ʻoku ʻiate kimoutolú, ki he ngaahi toʻutangata kotoa pē ʻi he kahaʻú. 13 ʻOku ou fokotuʻu ʻeku ʻumatá ʻi he ʻaó, pea ʻe hoko ia ko ha fakaʻilonga ʻo e fuakava ʻi he vahaʻa ʻoʻoku pea mo e māmaní. 14 ʻI ha taimi pē ʻoku ou ʻomi ai ha ʻao ki ʻolunga ʻi he māmaní, ʻe pau leva ke ʻasi ʻa e ʻumatá ʻi he ʻaó. 15 Pea kuo pau ke u manatu ki heʻeku fuakava naʻá ku fai ʻi he vahaʻa ʻoʻoku mo kimoutolú pea mo e kotoa ʻo e meʻamoʻui ʻo e faʻahinga kotoa pē; pea ʻe ʻikai ʻaupito ke toe hoko ʻa e ngaahi vaí ko ha lōmaki ke ne fakaʻauha ʻa e kakano kotoa pē.+ 16 Pea ʻe ʻasi ʻa e ʻumatá ʻi he ʻaó, pea kuo pau ke u mamata ki ai pea manatuʻi ʻa e fuakava taʻengata ʻi he vahaʻa ʻo e ʻOtuá mo e meʻamoʻui kotoa pē ʻo e faʻahinga kotoa pē ʻi he māmaní.”

17 Naʻe toe folofolaʻaki ʻe he ʻOtuá kia Noa: “Ko eni ia ʻa e fakaʻilonga ʻo e fuakava ʻoku ou fokotuʻu ʻi he vahaʻa ʻoʻoku pea mo e kakano kotoa pē ʻa ia ʻoku ʻi he māmaní.”+

18 Ko e ngaahi foha ʻo Noa ʻa ia naʻe hū ki tuʻa mei he ʻaʻaké ko Semi, Hami, mo Sēfeti.+ Naʻe hoko ʻa Hami ki mui ai ko e tamai ia ʻa Kēnaní.+ 19 Ko e toko tolú ni ko e ngaahi foha ia ʻo Noá, pea naʻe haʻu kotoa ʻa e kakai ʻo e māmaní meiate kinautolu ʻo nau mafola atu+ ai.

20 Pea naʻe kamata ke ngoueʻi ʻe Noa ʻa e kelekelé, pea naʻá ne tō ha ngoue kālepi. 21 ʻI he taimi naʻá ne inu ai mei he uainé, naʻá ne hoko ʻo konā, pea naʻá ne fakatelefuaʻi ʻa ia tonu ʻi hono loto tēnití. 22 Naʻe sio ʻa Hami ko e tamai ʻa Kēnaní ki he telefua ʻa ʻene tamaí, pea naʻá ne tala ia ki hono ongo tokouá ʻi tuʻa. 23 Ko ia naʻe toʻo ʻe Semi mo Sēfeti ha kofu ʻo na ʻai ia ʻi hona umá fakatouʻosi peá na hū fakaholomui ki loto. Ko ia naʻá na ʻufiʻufi ai ʻa e telefua ʻa ʻena tamaí lolotonga ia naʻe hanga kehe hona matá, pea naʻe ʻikai te na sio ki he telefua ʻa ʻena tamaí.

24 ʻI he ʻā hake ʻa Noa mei heʻene uaineʻiá ʻo ne ʻilo ʻa e meʻa naʻe fai kiate ia ʻe hono foha siʻisiʻi tahá, 25 naʻá ne pehē:

“Ke malaʻia ʻa Kēnani.+

Tuku ke ne hoko ko e tamaioʻeiki māʻulalo taha ki hono ongo tokouá.”+

26 Pea naʻá ne hoko atu ʻo pehē:

Tuku ke hoko ʻa Kēnani ko ha tamaioʻeiki kiate ia foki.”

28 Naʻe hokohoko atu ʻa e moʻui ʻa Noá ʻi he taʻu ʻe 350 ʻi he hili ʻa e Lōmakí.+ 29 Ko ia ko e ngaahi ʻaho kotoa ʻo Noá naʻe feʻunga mo e taʻu ʻe 950, peá ne mate.

10 Ko e hisitōlia eni ʻo e ngaahi foha ʻo Noá, ʻa Semi,+ Hami, mo Sēfeti.

Naʻe fanauʻi ha ngaahi foha kiate kinautolu ʻi he hili ʻa e Lōmakí.+ 2 Ko e ngaahi foha ʻo Sēfetí ko Kōmela,+ Mēkoki,+ Matai, Savani, Tūpale,+ Mēseke,+ pea mo Tilasa.+

3 Ko e ngaahi foha ʻo Kōmelá ko ʻAsikinasa,+ Lifata, pea mo Tokaama.+

4 Ko e ngaahi foha ʻo Savaní ko ʻElisa,+ Tāsisi,+ Kītimi,+ pea mo Totanimi.

5 Mei he faʻahingá ni naʻe mafola mei ai ʻa e kakai ʻo e ngaahi motú ki honau ngaahi fonuá, ʻo fakatatau ki heʻenau ngaahi leá mo honau ngaahi fāmilí, pea ki honau ngaahi puleʻangá.

6 Ko e ngaahi foha ʻo Hamí ko Kusa, Misilemi,+ Puti,+ pea mo Kēnani.+

7 Ko e ngaahi foha ʻo Kusá ko Sapa,+ Havila, Sāpeta, Laʻama,+ pea mo Sapeteka.

Ko e ongo foha ʻo Laʻamá ko Sipa mo Titani.

8 Naʻe hoko ʻa Kusa ko e tamai ia ʻa Nimiloté. Ko ia ʻa e fuofua tokotaha naʻe hoko ko ha toʻa ʻi he māmaní. 9 Naʻá ne hoko ko ha toʻa tulimanu ʻo fakafepaki kia Sihova. Ko e ʻuhinga ia ʻoku ʻi ai ai ha lea ʻoku pehē: “Hangē tofu pē ko Nimiloté, ko ha toʻa tulimanu ʻo fakafepaki kia Sihova.” 10 Ko e kamataʻanga ʻo hono puleʻangá* ko Pēpeli,+ ʻEleki,+ ʻĀkata, mo Kaline, ʻi he fonua ko Sainá.+ 11 Naʻá ne ʻalu atu mei he fonua ko iá ki ʻAsīlia+ ʻo ne langa ʻa Ninive,+ Leopote-ʻIli, Kala, 12 mo Leseni, ʻi he vahaʻa ʻo Ninive mo Kalá: Ko e kolo lahí eni.*

13 Naʻe hoko ʻa Misilemi ko e tamai ia ʻa Luti,+ ʻAnamemi, Lehapimi, Nafituhemi,+ 14 Patelusi,+ Kaseluhi (ʻa ia naʻe tupu mei ai ʻa e kau Filisitiá),+ pea mo Kafitoli.+

15 Naʻe hoko ʻa Kēnani ko e tamai ia ʻa Saitoní,+ ko hono ʻuluaki fohá ia, pea mo Heti,+ 16 pea pehē ki he kau Siepusí,+ ko e kau ʻĀmolí,+ ko e kau Keakasá, 17 ko e kau Heví,+ ko e kau ʻAlaká, ko e kau Sinaí, 18 ko e kau ʻĀvatí,+ ko e kau Simalí, mo e kau Hēmatí.+ Hili iá, naʻe movetevete atu ʻa e ngaahi fāmili ʻo e kau Kēnaní. 19 Ko ia ko e ngatangataʻanga ʻo e kau Kēnaní naʻe mei Saitoni ʻo aʻu ki Kilai,+ ʻo ofi ki Kesa,+ ʻo aʻu ki Sōtoma, Komola,+ ʻĀtima mo Sipoimi,+ ʻo ofi ki Lasa. 20 Ko e ngaahi foha eni ʻo Hamí ʻo fakatatau ki honau ngaahi fāmilí mo ʻenau ngaahi leá, ko honau ngaahi fonuá mo honau ngaahi puleʻangá.

21 Naʻe fanauʻi foki ha fānau kia Semi, ko e kui ʻa e ngaahi foha kotoa ʻo ʻEpá+ pea ko e tokoua ʻo Sēfeti ko e lahi tahá.* 22 Ko e ngaahi foha ʻo Semí ko ʻĪlami,+ ʻĀsuli,+ ʻAfakisate,+ Luti, mo ʻĒlami.+

23 Ko e ngaahi foha ʻo ʻĒlamí ko ʻŪsai, Hule, Kēteli, pea mo Masi.

24 Naʻe hoko ʻa ʻAfakisate ko e tamai ia ʻa Sila,+ pea naʻe hoko ʻa Sila ko e tamai ia ʻa ʻEpa.

25 Naʻe fanauʻi ʻa e ongo foha ʻe toko ua kia ʻEpa. Ko e hingoa ʻo e toko taha ko Pēleki,*+ koeʻuhí ʻi he lolotonga ʻene moʻuí naʻe māvahevahe ai ʻa e māmaní.* Ko e hingoa ʻo hono tokouá ko Siokitani.+

26 Naʻe hoko ʻa Siokitani ko e tamai ia ʻa ʻAlimotate, Salefi, Hesamevete, Seala,+ 27 Hatolami, ʻUsali, Tikela, 28 ʻŌpale, ʻApimaeli, Sipa, 29 ʻŌfeli,+ Havila, pea mo Siopapi; ko e ngaahi foha kotoa eni ʻo Siokitaní.

30 Ko e feituʻu naʻa nau nofo aí naʻe lele ia mei Mesa ʻo aʻu ki Sefala, ko e feituʻu moʻungaʻia ʻo e Hahaké.

31 Ko e faʻahingá ni ko e ngaahi foha ia ʻo Semí ʻo fakatatau ki honau ngaahi fāmilí mo ʻenau ngaahi leá, ko honau ngaahi fonuá mo honau ngaahi puleʻangá.+

32 Ko e ngaahi fāmili eni ʻo e ngaahi foha ʻo Noá ʻo fakatatau ki honau ngaahi laine fakafāmilí mo honau ngaahi puleʻangá. Naʻe mafola atu ʻi he māmaní mei he faʻahingá ni ʻa e ngaahi puleʻangá ʻi he hili ʻa e Lōmakí.+

11 Pea ko e kotoa ʻo e māmaní naʻe hokohoko atu ʻenau lea tahá pea naʻa nau ngāueʻaki ʻa e ngaahi foʻi lea tatau. 2 ʻI heʻenau fononga fakahahaké, naʻa nau ʻiloʻi ha teleʻa lautoka ʻi he fonua ko Sainá,+ pea naʻa nau kamata nofo ai. 3 Naʻa nau fepehēʻaki leva: “Haʻu! Tau ngaohi piliki ʻo taʻo ʻi he afí.” Ko ia naʻa nau ngāueʻaki ʻa e pilikí kae ʻikai ko e maká, pea sima ʻaki ʻa e meʻa hangē ha valitaá. 4 Naʻa nau pehē leva: “Haʻu! Tau langa ha kolo moʻotautolu mo ha taua ke aʻu hono tumutumú ki he langí, pea tau ʻai ke ongoongoa ʻa hotau hingoá, koeʻuhi ke ʻoua te tau movetevete holo ʻi he funga ʻo māmaní+ kotoa.”

5 Pea naʻe hāʻele hifo* ʻa Sihova ke sio ki he kolo pea mo e taua ʻa ia naʻe langa ʻe he ngaahi foha ʻo e tangatá. 6 Naʻe folofola leva ʻa Sihova: “Vakai! Ko e kakai kinautolu ʻe taha mo e lea pē ʻe taha,+ pea ko e meʻa eni kuo nau kamata ke faí. Pea ʻoku ʻikai ha meʻa ʻoku nau fakakaukau nai ke fai te nau taʻemalava. 7 Haʻu! Ta*+ ʻalu hifo* ki ai ʻo ʻai ke puputuʻu ʻenau leá koeʻuhi ke ʻoua ʻe lava ʻo nau femahinoʻaki ʻi heʻenau leá.” 8 Ko ia naʻe fakamovetevete kinautolu ʻe Sihova mei ai ki he funga ʻo māmaní kotoa,+ pea naʻe faifai pē ʻo nau tuku ʻa hono langa ʻo e koló. 9 Ko e ʻuhinga ia naʻe ui ai ia ko Pēpelí,*+ koeʻuhi naʻe ʻai ai ʻe Sihova ke puputuʻu ʻa e lea ʻa e māmaní kotoa, pea naʻe fakamovetevete kinautolu ʻe Sihova mei ai ki he funga ʻo māmaní kotoa.

10 Ko e hisitōlia eni ʻo Semí.+

Naʻe taʻu 100 ʻa Semi ʻi he taimi naʻá ne hoko ai ko e tamai ʻa ʻAfakisaté+ ʻi he hili ʻa e taʻu ʻe ua mei he Lōmakí. 11 Hili ʻa e hoko ʻa Semi ko e tamai ʻa ʻAfakisaté, naʻe hokohoko atu ʻene moʻuí ʻi he taʻu ʻe 500. Pea naʻá ne hoko ko e tamai ʻa ha ngaahi foha mo ha ngaahi ʻofefine.+

12 Naʻe moʻui ʻa ʻAfakisate ʻi he taʻu ʻe 35 pea naʻá ne hoko ko e tamai ʻa Sila.+ 13 Hili ʻa e hoko ʻa ʻAfakisate ko e tamai ʻa Silá, naʻe hokohoko atu ʻene moʻuí ʻi he taʻu ʻe 403. Pea naʻá ne hoko ko e tamai ʻa ha ngaahi foha mo ha ngaahi ʻofefine.

14 Naʻe moʻui ʻa Sila ʻi he taʻu ʻe 30 pea naʻá ne hoko ko e tamai ʻa ʻEpa.+ 15 Hili ʻa e hoko ʻa Sila ko e tamai ʻa ʻEpá, naʻe hokohoko atu ʻene moʻuí ʻi he taʻu ʻe 403. Pea naʻá ne hoko ko e tamai ʻa ha ngaahi foha mo ha ngaahi ʻofefine.

16 Naʻe moʻui ʻa ʻEpa ʻi he taʻu ʻe 34 pea naʻá ne hoko ko e tamai ʻa Pēleki.+ 17 Hili ʻa e hoko ʻa ʻEpa ko e tamai ʻa Pēlekí, naʻe hokohoko atu ʻene moʻuí ʻi he taʻu ʻe 430. Pea naʻá ne hoko ko e tamai ʻa ha ngaahi foha mo ha ngaahi ʻofefine.

18 Naʻe moʻui ʻa Pēleki ʻi he taʻu ʻe 30 pea naʻá ne hoko ko e tamai ʻa Leʻu.+ 19 Hili ʻa e hoko ʻa Pēleki ko e tamai ʻa Leʻú, naʻe hokohoko atu ʻene moʻuí ʻi he taʻu ʻe 209. Pea naʻá ne hoko ko e tamai ʻa ha ngaahi foha mo ha ngaahi ʻofefine.

20 Naʻe moʻui ʻa Leʻu ʻi he taʻu ʻe 32 pea naʻá ne hoko ko e tamai ʻa Sēluki. 21 Hili ʻa e hoko ʻa Leʻu ko e tamai ʻa Sēlukí, naʻe hokohoko atu ʻene moʻuí ʻi he taʻu ʻe 207. Pea naʻá ne hoko ko e tamai ʻa ha ngaahi foha mo ha ngaahi ʻofefine.

22 Naʻe moʻui ʻa Sēluki ʻi he taʻu ʻe 30 pea naʻá ne hoko ko e tamai ʻa Nēhoa. 23 Hili ʻa e hoko ʻa Sēluki ko e tamai ʻa Nēhoá, naʻe hokohoko atu ʻene moʻuí ʻi he taʻu ʻe 200. Pea naʻá ne hoko ko e tamai ʻa ha ngaahi foha mo ha ngaahi ʻofefine.

24 Naʻe moʻui ʻa Nēhoa ʻi he taʻu ʻe 29 pea naʻá ne hoko ko e tamai ʻa Tela.+ 25 Hili ʻa e hoko ʻa Nēhoa ko e tamai ʻa Telá, naʻe hokohoko atu ʻene moʻuí ʻi he taʻu ʻe 119. Pea naʻá ne hoko ko e tamai ʻa ha ngaahi foha mo ha ngaahi ʻofefine.

26 Naʻe moʻui ʻa Tela ʻi he taʻu ʻe 70, hili iá naʻá ne hoko ko e tamai ʻa ʻEpalame,+ Nēhoa,+ mo Hālani.

27 Ko e hisitōlia eni ʻo Telá.

Naʻe hoko ʻa Tela ko e tamai ia ʻa ʻEpalame, Nēhoa, mo Hālani; pea naʻe hoko ʻa Hālani ko e tamai ia ʻa Loté.+ 28 Naʻe mate ʻa Hālani ʻi he fonua naʻe fanauʻi ai iá, ʻi ʻUa+ ʻo e kau Kalitiá,+ lolotonga ʻa e kei moʻui ʻa Tela ko ʻene tamaí. 29 Naʻe maʻu uaifi ʻa ʻEpalame mo Nēhoa. Ko e hingoa ʻo e uaifi ʻo ʻEpalamé ko Sēlai,+ pea ko e hingoa ʻo e uaifi ʻo Nēhoá ko Milika,+ ʻa ia ko e ʻofefine ʻo Hālaní, ko e tamai ia ʻa Milika mo ʻĪsiká. 30 Pea naʻe paʻa+ ʻa Sēlai; naʻe ʻikai haʻane tama.

31 Naʻe ʻave leva ʻe Tela ʻa ʻEpalame ko hono fohá mo Lote ko hono mokopuná,+ ko e foha ʻo Hālaní, mo Sēlai ko hono ʻofefine-ʻi-he-fonó, ko e uaifi ʻo ʻEpalame ko hono fohá, pea naʻa nau ō mo ia mei ʻUa ʻo e kau Kalitiá ko ʻenau ʻalu ki he fonua ko Kēnaní.+ Naʻe faifai pē ʻo nau aʻu ki Hālani+ ʻo kamata nofo ai. 32 Ko e ngaahi ʻaho ʻo Telá ko e taʻu ʻe 205. Pea naʻe mate ʻa Tela ʻi Hālani.

12 Pea naʻe folofola ʻa Sihova kia ʻEpalame: “ʻAlu atu mei ho fonuá pea mavahe mei ho ngaahi kāingá pea mei he fale ʻo hoʻo tamaí ki he fonua ʻa ia te u fakahā atu kiate koé.+ 2 Te u ngaohi koe ko ha puleʻanga lahi pea te u tāpuakiʻi koe pea te u ʻai ho hingoá ke lahi pea te ke hoko ko ha tāpuaki.+ 3 Te u tāpuakiʻi ʻa e faʻahinga ʻoku nau tāpuakiʻi koé, pea te u fakamalaʻiaʻi ʻa ia ʻokú ne talatukiʻi koé,+ pea ko e ngaahi fāmili kotoa pē ʻo e māmaní ko e moʻoni ʻe tāpuakiʻi kinautolu* fakafou ʻiate koe.”+

4 Ko ia naʻe ʻalu ʻa ʻEpalame ʻo hangē tofu pē ko ia naʻe tala ʻe Sihova kiate iá, pea naʻe ʻalu ʻa Lote mo ia. Naʻe taʻu 75 ʻa ʻEpalame ʻi he taimi naʻá ne mavahe ai mei Hālaní.+ 5 Naʻe ʻave ʻe ʻEpalame ʻa Sēlai+ ko hono uaifí pea mo Lote ko e foha ʻo hono tokouá+ pea mo e ngaahi koloa kotoa naʻa nau tānakí+ pea mo e kakai naʻa nau maʻu ʻi Hālaní, ʻo nau fononga ki he fonua ko Kēnaní.+ ʻI heʻenau aʻu ki he fonua ko Kēnaní, 6 naʻe fononga atu ʻa ʻEpalame ʻi he fonuá ʻo aʻu ki he feituʻu ko Sīkemi,+ ofi ki he ʻuluʻakau lalahi ʻo Molé.+ ʻI he taimi ko iá naʻe ʻi he fonuá ai ʻa e kau Kēnaní. 7 Naʻe hā leva ʻa Sihova kia ʻEpalame ʻo ne folofola: “Te u ʻoatu ʻa e fonuá ni+ ki ho hakó.”+ Ko ia naʻá ne fokotuʻu ʻi ai ha ʻōlita kia Sihova, ʻa ia naʻá ne hā ange kiate iá. 8 Ki mui ai, naʻá ne hiki mei ai ki he feituʻu moʻungaʻia ʻi he hahake ʻo Pētelí+ ʻo ne fokotuʻu ai hono tēnití ʻo tuʻu ʻa Pēteli ʻi he hihifó pea ko ʻAi+ ʻi he hahaké. Naʻá ne fokotuʻu ʻi ai ha ʻōlita kia Sihova+ pea naʻe kamata ke ne ui ki he huafa ʻo Sihová.+ 9 ʻI he hili iá, naʻe hiki ʻa ʻEpalame ʻo ne fononga ki he feituʻu Nīkepí,+ ʻo hiki ʻa hono ʻapitangá mei he feituʻu ki he feituʻu.

10 Pea naʻe malanga hake ʻi he fonuá ha honge, pea naʻe ʻalu hifo ʻa ʻEpalame ki ʻIsipite ke nofo ai ʻi ha taimi,*+ koeʻuhi naʻe mafatukituki ʻa e honge+ ʻi he fonuá. 11 ʻI he teu ke ne hū ki ʻIsipité, naʻá ne pehē kia Sēlai ko hono uaifí: “Kātaki muʻa ʻo fanongo mai! ʻOku ou ʻilo ko ha fefine hoihoifua koe.+ 12 Ko ia ʻi he taimi ʻe sio atu ai ʻa e kau ʻIsipité kiate koé, ko e moʻoni te nau pehē, ‘Ko hono uaifí eni.’ Pea te nau tāmateʻi leva au ka nau tuku koe ke ke moʻui. 13 Kātaki muʻa ʻo pehē ange ko koé ko hoku tuofefine, ke u lakalakaimonū ai koeʻuhí ko koe, pea ʻe fakahaofi ai ʻa ʻeku moʻuí.”+

14 ʻI he hū pē ʻa ʻEpalame ki ʻIsipité, naʻe fakatokangaʻi ʻe he kau ʻIsipité ko e fefiné naʻá ne hoihoifua ʻaupito. 15 Pea ko e kau māʻolunga ʻa Feló naʻa nau sio foki kiate ia, pea naʻe kamata ke nau vikiʻi ia kia Felo, ko ia naʻe ʻave ai ʻa e fefiné ki he fale ʻo Feló. 16 Naʻá ne failelei kia ʻEpalame koeʻuhí ko ia, pea naʻe maʻu ai ʻe ʻEpalame ha fanga sipi, fanga pulu, fanga ʻasi tangata mo e fefine, kau tamaioʻeiki mo e kau kaunanga, mo e fanga kāmeli.+ 17 Pea naʻe taaʻi leva ʻe Sihova ʻa Felo mo hono falé ʻaki ʻa e ngaahi fuʻu mala lahi koeʻuhi ko Sēlai, ʻa e uaifi ʻo ʻEpalamé.+ 18 Ko ia naʻe ui ʻe Felo ʻa ʻEpalame ʻo ne pehē: “Ko e hā ʻa e meʻa ko eni kuó ke fai mai kiate aú? Ko e hā naʻe ʻikai te ke tala mai ai ko ho uaifi iá? 19 Ko e hā naʻá ke pehē ai, ‘Ko hoku tuofefine iá,’+ ʻo u mei ʻave ai ia ke hoko ko hoku uaifí? Ko ena ho uaifí. ʻAve ia peá ke ʻalu!” 20 Ko ia naʻe ʻoange ʻe Felo ha tuʻutuʻuni ki heʻene kau tangatá fekauʻaki mo ia, pea naʻa nau fekauʻi atu ia mo hono uaifí ke na ō pea mo e meʻa kotoa naʻá ne maʻú.+

13 Naʻe ʻalu hake leva ʻa ʻEpalame mei ʻIsipite ki he feituʻu Nīkepí,+ ko ia mo hono uaifí mo e meʻa kotoa naʻá ne maʻú, fakataha mo Lote. 2 Naʻe lahi ʻaupito ʻa e fanga manu mo e siliva mo e koula+ ʻa ʻEpalamé. 3 Naʻá ne hiki mei he feituʻu ki he feituʻu ʻi heʻene fononga mei he feituʻu Nīkepí ki Pētelí, kae ʻoua kuó ne aʻu ki he feituʻu naʻe ʻi ai ʻa hono tēnití ʻi he vahaʻa ʻo Pēteli mo ʻAí,+ 4 ki he feituʻu naʻá ne fokotuʻu ai ki muʻa atu ha ʻōlitá. Naʻe ui ʻi ai ʻa ʻEpalame ki he huafa ʻo Sihová.

5 Pea ko Lote, ʻa ia naʻe fononga mo ʻEpalamé, naʻá ne maʻu foki ʻa e fanga sipi, fanga pulu mo e ngaahi tēniti. 6 Ko ia naʻe ʻikai ʻatā ʻa e fonuá kiate kinautolu kotoa ke nau nofo ʻi he feituʻu pē taha; naʻe hoko ʻo fuʻu lahi ʻaupito ʻena ngaahi koloá ʻo ʻikai ai kei malava ke na nofo fakataha. 7 Ko hono olá, naʻe hoko ai ha kē ʻi he vahaʻa ʻo e kau tauhi-manu ʻa ʻEpalamé mo e kau tauhi-manu ʻa Loté. (ʻI he taimi ko iá naʻe nofo ai ʻa e kau Kēnaní mo e kau Pēlisí ʻi he fonuá.)+ 8 Ko ia naʻe pehē ai ʻe ʻEpalame kia Lote:+ “Kātaki muʻa, ʻoku ʻikai totonu ke hoko ha kē ʻi he vahaʻa ʻoʻoku mo koé pea ʻi he vahaʻa ʻo ʻeku kau tangata tauhi-manú mo hoʻo kau tangata tauhi-manú, he ko kitauá ʻokú ta kāinga. 9 ʻIkai ʻoku ʻatā atu ʻa e fonuá kotoa kiate koe? Kātaki muʻa ʻo mavahe meiate au. Kapau te ke ʻalu ki he toʻohemá, te u ʻalu leva au ki he toʻomataʻú; ka ʻo kapau te ke ʻalu ki he toʻomataʻú, te u ʻalu leva au ki he toʻohemá.” 10 Ko ia naʻe hanga hake ai ʻa Lote ʻo ne sio tā ko e vahefonua kotoa ʻo Sioataní+ ʻo aʻu atu ki Soa+ ko ha feituʻu naʻe lahi ai ʻa e vaí (ki muʻa ke fakaʻauha ʻe Sihova ʻa Sōtoma mo Komolá), ʻo hangē ko e ngoue ʻa Sihová,+ pea hangē ko e fonua ko ʻIsipité. 11 Naʻe fili leva ʻe Lote maʻana ʻa e vahefonua kotoa ʻo Sioataní, pea naʻe hiki ʻa Lote ki he hahaké. Ko ia naʻá na māvae ai. 12 Naʻe nofo ʻa ʻEpalame ʻi he fonua ko Kēnaní, kae nofo ʻa Lote ʻi he haʻohaʻonga ʻo e ngaahi kolo ʻo e vahefonuá.+ Faifai atu pē naʻá ne fokotuʻu ʻa hono tēnití ʻo ofi ki Sōtoma. 13 Pea ko e kakai ʻo Sōtomá ko e kau faiangahala mamafa fulikivanu kia Sihova.+

14 Naʻe folofola ʻa Sihova kia ʻEpalame, hili ia ʻa e mavahe ʻa Lote meiate iá: “Kātaki muʻa ʻo hanga hake ʻo ke sio mei he feituʻu ʻokú ke ʻi aí, ki he tokelaú mo e tongá, ki he hahaké mo e hihifó, 15 he ko e fonua kotoa ʻokú ke sio ki aí, te u ʻoatu ia kiate koe pea mo ho hakó ko ha tofiʻa taʻengata.+ 16 Pea te u ʻai ho hakó ke hangē ko e efu ʻo e māmaní, ko ia ʻo ka lava ʻe ha taha ke ne lau ʻa e efu ʻo e māmaní, ʻe toki lava leva ke lau ho hakó.+ 17 Tuʻu hake, ʻalu atu ʻi he lōloa mo e māukupu ʻo e fonuá, he te u foaki ia kiate koe.” 18 Ko ia naʻe hokohoko atu ai pē ʻa e nofo tēniti ʻa ʻEpalamé. Ki mui ai, naʻá ne haʻu ʻo ne nofo ʻi he ngaahi ʻuluʻakau lalahi ʻo Māmilí,+ ʻa ia ʻoku ʻi Hepeloní,+ pea naʻá ne fokotuʻu ai ha ʻōlita kia Sihova.+

14 Pea ʻi he ngaahi ʻaho ʻo ʻAmilafeli ko e tuʻi ʻo Sainá,+ ʻAlioke ko e tuʻi ʻo ʻĒlasá, Kitaleoma+ ko e tuʻi ʻo ʻĪlamí,+ mo Tītale ko e tuʻi ʻo Koimí, 2 naʻe faitau ai ʻa e faʻahingá ni mo Pila ko e tuʻi ʻo Sōtomá,+ Pilesa ko e tuʻi ʻo Komolá,+ Sinape ko e tuʻi ʻo ʻĀtimá, Semepa ko e tuʻi ʻo Sipoimí,+ pea mo e tuʻi ʻo Pelá, ʻa ia, ko Soa. 3 Naʻe kau fakataha ʻa kinautolú ni* kotoa ʻi he Teleʻa* ko Sitimí,+ ʻa ia, ko e Tahi Māsimá.*+

4 Ko e ngaahi tuʻi ko iá naʻa nau ngāue kia Kitaleoma ʻi he taʻu ʻe 12, ka naʻa nau angatuʻu ʻi he taʻu hono 13. 5 Ko ia ʻi he taʻu hono 14, naʻe haʻu ai ʻa Kitaleoma pea mo e ngaahi tuʻi naʻe ʻiate iá ʻo nau ikunaʻi ʻa e kau Lifaimí ʻi ʻAsiteloti-kaʻanaimi, mo e kau Susimí ʻi Hami, mo e kau ʻĪmimé+ ʻi Save-kiliataimi, 6 pea mo e kau Holí+ ʻi honau moʻunga ko Seiá+ ʻo aʻu hifo ki ʻEla-pelana, ʻa ia ʻoku ʻi he ngatangataʻanga ʻo e toafá. 7 Hili iá, naʻa nau foki ʻo nau haʻu ki ʻEni-misipate, ʻa ia, ko Kētesi,+ ʻo nau ikunaʻi ʻa e feituʻu kātoa ʻo e kau ʻAmalekí+ pea pehē foki ki he kau ʻĀmolí+ ʻa ia naʻa nau nofo ʻi Hasasoni-tamali.+

8 ʻI he taimi ko ení, naʻe laka atu ai ʻa e tuʻi ʻo Sōtomá, pea pehē foki ki he tuʻi ʻo Komolá, ko e tuʻi ʻo ʻĀtimá, ko e tuʻi ʻo Sipoimí, pea mo e tuʻi ʻo Pelá, ʻa ia ko Soa, pea naʻa nau fakatē tau kiate kinautolu ʻi he Teleʻa* ko Sitimí, 9 kia Kitaleoma ko e tuʻi ʻo ʻĪlamí, Tītale ko e tuʻi ʻo Koimí, ʻAmilafeli ko e tuʻi ʻo Sainá, mo ʻAlioke ko e tuʻi ʻo ʻĒlasá+—ko e tuʻi ʻe toko fā ki he toko nima. 10 Pea ko e Teleʻa* ko Sitimí naʻe fonu ʻi he ngaahi luo ʻo e meʻa hangē ha valitaá, pea naʻe feinga ʻa e tuʻi ʻo Sōtomá mo e tuʻi ʻo Komolá ke na hola ʻo na tō ai ʻi he luó, pea ko e faʻahinga naʻe toé naʻa nau hola ki he feituʻu moʻungaʻiá. 11 Naʻe ʻave leva ʻe he kau ikuná ʻa e koloa kotoa ʻo Sōtoma mo Komolá pea mo ʻenau meʻakaí kotoa pea naʻa nau ʻalu atu.+ 12 Naʻa nau ʻave foki ʻa Lote, ko e foha ʻo e tokoua ʻo ʻEpalamé ʻa ia naʻá ne nofo ʻi Sōtomá,+ pea pehē ki heʻene ngaahi koloá, pea naʻe hoko atu ʻenau fonongá.

13 ʻI he hili ʻa e meʻa ko iá, naʻe haʻu ha tangata ʻa ia naʻe hola ʻo ne fakahā ia kia ʻEpalame ko e Hepeluú. Naʻá ne nofo ʻi he taimi ko ení ʻi he ngaahi ʻuluʻakau lalahi ʻa Māmili ko e ʻĀmolí,+ ʻa ia ko e tokoua ʻo ʻEsikoli pea mo ʻĀneli.+ Ko e kau tangatá ni naʻa nau kau mo ʻEpalame. 14 Ko ia naʻe fanongo ai ʻa ʻEpalame kuo ʻave pōpula hono kāingá.*+ ʻI he meʻa ko iá naʻá ne fakatahatahaʻi ʻa ʻene kau tangata kuo akoʻi ki he taú, ko e kau sevāniti ʻe toko 318 ʻa ia naʻe fanauʻi ʻi hono falé, pea naʻa nau tuli atu ʻo aʻu ki Tani.+ 15 Lolotonga ʻa e poó, naʻá ne vahevahe ʻene kau taú, pea naʻá ne ʻohofi ai mo ʻene kau sevānití ʻo ikunaʻi kinautolu. Pea naʻá ne tuli kinautolu ʻo aʻu ki Hopa, ʻa ia ʻoku ʻi he tokelau ʻo Tāmasikusí. 16 Naʻá ne toe fakafoki mai ʻa e ngaahi koloá kotoa, kaeʻumaʻā foki ʻa Lote ko hono kāingá, ko ʻene ngaahi koloá, ko e kakai fefiné, pea mo e kakai kehé.

17 Hili ʻa e foki ʻa ʻEpalame mei hono ikunaʻi ʻa Kitaleoma mo e ngaahi tuʻi naʻe ʻiate iá, naʻe ʻalu atu ʻa e tuʻi ʻo Sōtomá ke fakafetaulaki kia ʻEpalame ʻi he Teleʻa* ʻo Savé, ʻa ia, ko e Teleʻa ʻo e Tuʻí.+ 18 Pea naʻe ʻomi ʻe Melekisēteki+ ko e tuʻi ʻo Sālemá+ ha mā mo e uaine; ko e taulaʻeiki ia ʻa e ʻOtua Fungani Māʻolungá.+

19 Naʻá ne tāpuakiʻi leva ia ʻo ne pehē:

Pea naʻe ʻoange ʻe ʻEpalame kiate ia ha vahe hongofulu ʻo e meʻa kotoa pē.+

21 ʻI he hili iá, naʻe pehē ʻe he tuʻi ʻo Sōtomá kia ʻEpalame: “ʻOmi kiate au ʻa e kakaí, ka ke ʻave ʻe koe ʻa e koloá maʻau.” 22 Ka naʻe pehē ange ʻe ʻEpalame ki he tuʻi ʻo Sōtomá: “ʻOku ou hiki hoku nimá ʻi ha fuakava kia Sihova ko e ʻOtua Fungani Māʻolungá, ʻa e Tokotaha-Ngaohi ʻo e langí mo māmaní, 23 ʻe ʻikai te u toʻo ha meʻa ʻoku ʻaʻau, mei ha tuʻoni filo ki ha nonoʻo ʻo ha senitolo, koeʻuhí ke ʻoua naʻá ke pehē, ‘Naʻá ku ʻai ke koloaʻia ʻa ʻEpalame.’ 24 ʻE ʻikai te u toʻo ha meʻa ʻe taha tuku kehe pē ʻa e meʻa kuo ʻosi kai ʻe he kau talavoú. Ka ki he ʻinasi ʻo e kau tangata naʻe ō mo aú, ʻa ʻĀneli, ʻEsikoli, mo Māmilí+—tuku ke nau toʻo ʻa honau ʻinasí.”

15 ʻI he hili ʻa e meʻá ni naʻe hoko ʻa e folofola ʻa Sihová kia ʻEpalame ʻi ha vīsone, ʻo pehē: “ʻOua te ke manavahē,+ ʻEpalame. Ko ha pā au kiate koe.+ Ko hoʻo totongí ʻe lahi ʻaupito.”+ 2 Naʻe tali ange ʻe ʻEpalame: “ʻEiki Hau Sihova, ko e hā te ke foaki mai kiate aú, ʻi he sio ʻoku hokohoko atu ʻa e ʻikai haʻaku fānaú pea ko e tokotaha te ne maʻu ʻa hoku ʻapí ko ha tangata Tāmasikusi, ko ʻEliese?”+ 3 Naʻe hoko atu ʻa ʻEpalame: “Kuo ʻikai te ke ʻomai kiate au ha hako,+ pea ko ha mēmipa* ʻi hoku falé te ne fetongi au ʻi he tuʻunga ko e ʻeá.” 4 Kae vakai, ko e folofola eni ʻa Sihova ʻi he tali kiate iá, “Ko e tangatá ni ʻe ʻikai te ne fetongi koe ʻi he tuʻunga ko e ʻeá, ka ko hao foha tonu te ne fetongi koe ʻi he tuʻunga ko e ʻeá.”+

5 Pea naʻá ne ʻomi ia ki tuʻa ʻo ne folofola: “Kātaki muʻa ʻo hanga hake ki he langí pea lau ʻa e ngaahi fetuʻú, kapau ʻoku malava ke ke fai pehē.” Naʻá ne folofola leva kiate ia: “ʻE hoko ʻo pehē ho hakó.”+ 6 Pea naʻá ne tui kia Sihova,+ pea naʻá Ne lau ia ʻokú ne māʻoniʻoni.+ 7 Naʻá ne hoko atu leva: “Ko Sihova au, ʻa ia naʻá ku ʻomi koe mei ʻUa ʻo e kau Kalitiá ke ʻoatu kiate koe ʻa e fonuá ni ko ho tofiʻa.”+ 8 ʻI he meʻá ni naʻá ne pehē: “ʻEiki Hau Sihova, te u ʻiloʻi fēfē te u maʻu iá?” 9 Naʻá ne tali ange kiate ia: “Toʻo maʻaku ha kiʻi pulu fefine taʻu tolu, ko ha kosi fefine taʻu tolu, ko ha sipi tangata taʻu tolu, ko ha foʻi kulukulu, mo ha lupe mui.” 10 Ko ia naʻá ne toʻo kotoa eni ʻo fahi ua ia pea tuku fehangahangai ʻa e konga taki taha, ka naʻe ʻikai te ne fahi ʻa e ongo foʻi manupuná. 11 Naʻe kamata leva ke ʻalu hifo ʻa e fanga manupuna fekaí ki he ngaahi ʻangaʻangá, ka naʻe hanganaki seʻe kinautolu ʻe ʻEpalame.

12 ʻI he meimei tō ʻa e laʻaá, naʻe hoko ha mohe maʻu kia ʻEpalame pea naʻe ʻalu hifo kiate ia ha fuʻu fakapoʻuli lahi mo fakamanavahē. 13 Naʻá ne folofola leva kia ʻEpalame: “Ke ke ʻiloʻi fakapapau ʻe hoko ho hakó ko e kau muli ʻi ha fonua ʻoku ʻikai ʻonautolu pea ko e kakai ʻi aí te nau fakapōpulaʻi mo fakamamahiʻi kinautolu ʻi he taʻu ʻe 400.+ 14 Ka te u fakamāuʻi ʻa e puleʻanga te nau ngāue ki aí,+ pea ʻi he hili iá te nau ʻalu atu mo e ngaahi koloa lahi.+ 15 Ka kiate koe, te ke ʻalu ki hoʻo fanga kuí ʻi he fiemālie; ʻe tanu koe kuó ke toulekeleka ʻaupito.+ 16 Ka te nau toe foki mai ki heni+ ʻi he toʻutangata hono faá, koeʻuhí ko e faihala ʻa e kau ʻĀmolí kuo teʻeki ai ke kakato.”+

17 ʻI he tō ʻa e laʻaá pea hoko ʻo fakapoʻuli ʻaupitó, naʻe hā ha fōnise kohu, pea naʻe ʻalu atu ha tūhulu ʻoku ulo ʻi he vahaʻa ʻo e ngaahi kongokonga ʻo e monumanú. 18 ʻI he ʻaho ko iá naʻe fai ai ʻe Sihova ha fuakava mo ʻEpalame,+ ʻo pehē: “Te u foaki ki ho hakó ʻa e fonuá ni,+ mei he vaitafe ʻo ʻIsipité ki he vaitafe lahí, ʻa e vaitafe ʻIufaletesí:+ 19 Ko e fonua ʻo e kau Kēnaí,+ ko e kau Kenisaí, ko e kau Katimoná, 20 ko e kau Hetí,+ ko e kau Pēlisí,+ ko e kau Lifaimí,+ 21 ko e kau ʻĀmolí, ko e kau Kēnaní, ko e kau Keakasá, mo e kau Siepusí.”+

16 Pea ko Sēlai, ʻa e uaifi ʻo ʻEpalamé, naʻe ʻikai te ne fanau kiate ia,+ ka naʻe ʻi ai haʻane kaunanga ʻIsipite ʻa ia ko hono hingoá ko Hekaʻā.+ 2 Ko ia naʻe pehē ʻe Sēlai kia ʻEpalame: “Kātaki muʻa! Kuo taʻofi ʻe Sihova au mei haʻaku fanau. Kātaki ka ke mohe* muʻa mo ʻeku kaunangá. ʻE malava nai ai ke u maʻu ha fānau fakafou ʻiate ia.”+ Ko ia naʻe fanongo ʻa ʻEpalame ki he meʻa naʻe leaʻaki ʻe Sēlaí. 3 ʻI he hili ʻa e nofo ʻa ʻEpalame ʻi he taʻu ʻe hongofulu ʻi he fonua ko Kēnaní, naʻe ʻave ʻe Sēlai ko e uaifi ʻo ʻEpalamé ʻa Hekaʻā ko ʻene kaunanga ʻIsipité, ʻo ne ʻoange ia ki hono husepāniti ko ʻEpalamé ke hoko ko hono uaifi. 4 Ko ia naʻá ne mohe mo Hekaʻā, pea naʻá ne hoko ʻo feitama. ʻI heʻene ʻiloʻi kuó ne feitamá, naʻe kamata ke ne taʻetokaʻi ʻa hono pulé.

5 ʻI he meʻá ni naʻe pehē ʻe Sēlai kia ʻEpalame: “Ko e kovi kuo fai kiate aú ko e foʻui ia ʻoʻou. Ko au ʻa e tokotaha naʻá ku tuku atu ʻa ʻeku kaunangá ki ho nimá,* ka ʻi heʻene ʻiloʻi kuó ne feitamá, naʻe kamata ke ne taʻetokaʻi au. Fakatauange ke fakamaau ʻa Sihova ʻi he vahaʻa ʻoʻoku mo koé.” 6 Ko ia naʻe pehē ʻe ʻEpalame kia Sēlai: “Vakai! Ko hoʻo kaunangá ʻoku ʻi ho mafaí ia. Fai kiate ia ha meʻa pē ʻokú ke fakakaukau ʻoku lelei tahá.” Naʻe fakamoʻulaloaʻi leva ia ʻe Sēlai, pea naʻá ne hola meiate ia.

7 Ki mui ai, naʻe ʻilo ia ʻe he ʻāngelo ʻa Sihová ʻi ha matavai ʻi he toafá, ʻa e matavai ʻi he hala ki Sulá.+ 8 Pea naʻá ne pehē: “Hekaʻā, ko e kaunanga ʻa Sēlaí, ko hoʻo haʻú mei fē pea ko hoʻo ʻalú ki fē?” ʻI he meʻá ni naʻá ne pehē: “Ko ʻeku hola meia Sēlai ko hoku pulé.” 9 Naʻe pehē ange leva ʻe he ʻāngelo ʻa Sihová kiate ia: “Foki ki ho pulé pea fakamoʻulaloaʻi koe kiate ia.” 10 Naʻe pehē ange leva ʻe he ʻāngelo ʻa Sihová: “Te u mātuʻaki fakatokolahi ho hakó, koeʻuhi ke nau hoko ʻo fuʻu tokolahi ke lau.”+ 11 Naʻe toe pehē ange ʻe he ʻāngelo ʻa Sihová: “Ko eni ʻokú ke feitama, pea te ke fāʻeleʻi ha tama tangata, pea kuo pau ke ke fakahingoa ia ko ʻIsimeʻeli,* he kuo ongoʻi ʻe Sihova ʻa hoʻo mamahí. 12 Te ne hoko ko ha tangata hangē ha ʻasi kaivaó.* Te ne fakafepakiʻi ʻa e tokotaha kotoa pē, pea ʻe fakafepakiʻi ia ʻe he tokotaha kotoa pē, pea te ne nofo ʻo fehangahangai mo hono* fanga tokouá kotoa.”

13 Naʻá ne ui leva ki he huafa ʻo Sihová, ʻa ia naʻe folofola kiate iá: “Ko ha ʻOtua koe ʻo e mamata,”+ he naʻá ne pehē: “Kuó u sio moʻoni ki he tokotaha ʻokú ne mamata kiate aú?” 14 Ko e ʻuhinga ia naʻe ui ai ʻa e vaitupú ko Pea-lehai-loʻaí.* (ʻOku ʻi he vahaʻa ia ʻo Kētesi mo Peletí.) 15 Ko ia naʻe fanauʻi ʻe Hekaʻā kia ʻEpalame ha foha, pea naʻe fakahingoa ʻe ʻEpalame ʻa hono foha naʻe fanauʻi ʻe Hekaʻaá, ko ʻIsimeʻeli.+ 16 Naʻe taʻu 86 ʻa ʻEpalame ʻi he taimi naʻe fanauʻi ai ʻe Hekaʻā ʻa ʻIsimeʻeli kiate iá.

17 ʻI he taimi naʻe taʻu 99 ai ʻa ʻEpalamé, naʻe hā ʻa Sihova kia ʻEpalame ʻo ne folofola kiate ia: “Ko au ko e ʻOtua Māfimafi-Aoniú. Ke ke ʻaʻeva ʻi hoku ʻaó pea fakamoʻoniʻi ʻokú ke taʻemele. 2 Te u fokotuʻu ʻeku fuakava ʻi he vahaʻa ʻoʻoku mo koé,+ pea te u fakatokolahi koe ke ke hoko ʻo mātuʻaki tokolahi ʻaupito.”+

3 ʻI he meʻá ni naʻe tō foʻohifo ʻa ʻEpalame, pea naʻe hoko atu ʻa e folofola ʻa e ʻOtuá kiate ia, ʻo ne pehē: 4 “Ko e meʻa kiate aú, vakai, ko ʻeku fuakavá ʻoku fai ia mo koe,+ pea ko e moʻoni te ke hoko ko ha tamai ʻa e ngaahi puleʻanga lahi.+ 5 ʻE ʻikai ke kei ui ho hingoá ko ʻEpalame;* ʻe ui ho hingoá ko ʻĒpalahame,* he te u ngaohi koe ko ha tamai ʻa e ngaahi puleʻanga lahi. 6 Te u ngaohi koe ke ke fanafanau ʻo mātuʻaki tokolahi ʻaupito pea te u ngaohi koe ke ke hoko ko e ngaahi puleʻanga, pea ʻe hoko mai meiate koe ʻa e ngaahi tuʻi.+

7 “Pea te u tauhi ʻeku fuakava ʻi he vahaʻa ʻoʻoku mo koé+ pea mo ho hako ʻi he hili koé ʻi he kotoa ʻo honau ngaahi toʻutangatá ko ha fuakava taʻengata, ke u ʻOtua kiate koe pea ki ho hako ʻi he hili koé. 8 Pea te u foaki kiate koe pea ki ho hako ʻi he hili koé ʻa e fonua ʻa ia naʻá ke nofo ai ko ha mulí+—ʻa e fonua kātoa ʻo Kēnaní—ko ha tofiʻa taʻengata, pea te u hoko au ko honau ʻOtua.”+

9 Naʻe toe folofola ʻa e ʻOtuá kia ʻĒpalahame: “Ko e meʻa kiate koé, ke ke tauhi ʻeku fuakavá, ʻe koe pea mo ho hako ʻi he hili koé ʻi he kotoa ʻo honau ngaahi toʻutangatá. 10 Ko ʻeku fuakava eni ʻi he vahaʻa ʻoʻoku mo kimoutolú, ke tauhi ʻe koe pea mo ho hako ʻi he hili koé: Ko e tangata kotoa pē ʻi homou lotolotongá kuo pau ke kamu+ ia. 11 Kuo pau ke mou kamu ʻa e kakano ʻo e muʻa kili ʻo homou fakatangatá, pea ʻe hoko ia ko ha fakaʻilonga ʻo e fuakava ʻi he vahaʻa ʻoʻoku mo kimoutolú.+ 12 ʻI he kotoa homou ngaahi toʻutangatá, ko e tangata kotoa pē ʻi homou lotolotongá ʻoku ʻaho valu hono taʻumotuʻá kuo pau ke kamu+ ia, ha taha pē ʻoku fanauʻi ʻi he fāmilí mo ha taha pē ʻoku ʻikai ko ha taha ʻo ho hakó pea naʻe fakatau ʻaki ha paʻanga mei ha muli. 13 Ko e tangata kotoa pē kuo fanauʻi ʻi ho fāmilí mo e tangata kotoa pē kuo fakatau ʻaki hoʻo paʻangá kuo pau ke kamu+ ia, pea ko ʻeku fuakava ʻi homou kakanó kuo pau ke hoko ia ko ha fuakava taʻengata. 14 Kapau ʻe ʻi ai ha tangata taʻekamu ʻe ʻikai kamu ʻa e kakano ʻo e muʻa kili ʻo hono fakatangatá, ko e tokotaha ko iá kuo pau ke tuʻusi ia mei hono kakaí.* Kuó ne maumauʻi ʻeku fuakavá.”

15 Naʻe folofola leva ʻa e ʻOtuá kia ʻĒpalahame: “Ko e meʻa kia Sēlai*+ ko ho uaifí, kuo pau ke ʻoua te ke ui ia ko Sēlai, koeʻuhí ʻe ui ʻa hono hingoá ko Sela.* 16 Te u tāpuakiʻi ia pea te u foaki atu foki kiate koe ha foha ʻiate ia;+ te u tāpuakiʻi ʻa Sela pea te ne hoko ko ha ngaahi puleʻanga; ʻe hoko mai meiate ia ʻa e ngaahi tuʻi ʻo ha ngaahi kakai.” 17 ʻI he meʻá ni naʻe tō foʻohifo ʻa ʻĒpalahame pea kamata ke ne kata mo ne pehē loto pē:+ “ʻE fanauʻi koā ha tama ki ha tangata kuo taʻu 100, pea ko Sela, ko ha fefine kuo taʻu 90, te ne fāʻele+ koā?”

18 Ko ia naʻe pehē ange ʻe ʻĒpalahame ki he ʻOtua moʻoní: “Fakatauange ke moʻui ʻa ʻIsimeʻeli ʻi ho ʻaó!”+ 19 ʻI he meʻá ni naʻe folofola ai ʻa e ʻOtuá: “Ko Sela ko ho uaifí ʻe pau moʻoni ke ne fanauʻi kiate koe ha foha, pea kuo pau ke ke fakahingoa ia ko ʻAisake.*+ Pea te u fokotuʻu ʻeku fuakavá mo ia ko ha fuakava taʻengata ʻo aʻu ki hono hako ʻi he hili iá.+ 20 Ka ʻi he fekauʻaki mo ʻIsimeʻelí, kuó u fanongo kiate koe. Vakai! Te u tāpuakiʻi ia pea te u ngaohi ia ke fanafanau pea te u fakatokolahi ia ke hoko ʻo mātuʻaki tokolahi ʻaupito. Te ne fakatupu mai ʻa e ngaahi ʻeiki ʻe toko 12, pea te u ngaohi ia ke ne hoko ko ha puleʻanga lahi.+ 21 Kae kehe, te u fokotuʻu ʻeku fuakavá mo ʻAisake,+ ʻa ia ʻe fanauʻi ʻe Sela kiate koe ʻi he taimi kotofa ko ení ʻi he taʻu kahaʻú.”+

22 ʻI he ʻosi ʻa e folofola ʻa e ʻOtuá kiate iá, naʻá ne hāʻele hake meia ʻĒpalahame. 23 Naʻe ʻave leva ʻe ʻĒpalahame hono foha ko ʻIsimeʻelí pea mo e kakai tangata kotoa pē naʻe fanauʻi ʻi hono fāmilí pea mo e tokotaha kotoa pē naʻá ne fakatau ʻaki ha paʻanga, ʻa e tangata kotoa pē ʻi he fale ʻo ʻĒpalahamé, pea naʻá ne kamu ʻa e kakano ʻo e muʻa kili ʻo honau fakatangatá ʻi he ʻaho tofu pē ko iá, ʻo hangē tofu pē ko e folofola naʻe fai ʻe he ʻOtuá kiate iá.+ 24 Naʻe taʻu 99 ʻa ʻĒpalahame ʻi he taimi naʻe kamu+ ai ʻa e kakano ʻo e muʻa kili ʻo hono fakatangatá. 25 Pea ko hono foha ko ʻIsimeʻelí naʻe taʻu 13 ʻi he taimi naʻe kamu+ ai ʻa e kakano ʻo e muʻa kili ʻo hono fakatangatá. 26 ʻI he ʻaho tofu pē ko iá, naʻe kamu ai ʻa ʻĒpalahame pea pehē kia ʻIsimeʻeli ko hono fohá. 27 Ko e kakai tangata kotoa pē ʻi hono falé, ha taha pē naʻe fanauʻi ʻi he fāmilí, mo ha taha pē naʻe fakatau ʻaki ha paʻanga mei ha muli, naʻe kamu foki kinautolu fakataha mo ia.

18 ʻI he hili iá, naʻe hā ʻa Sihova+ kiate ia ʻi he ʻuluʻakau lalahi ʻo Māmilí,+ ʻi heʻene tangutu ʻi he hūʻanga ʻo e tēnití ʻi he lolotonga ʻo e taimi vela taha ʻo e ʻahó. 2 Naʻá ne hanga hake ʻo ne sio ki he kau tangata ʻe toko tolu ʻoku nau tuʻu ʻo kiʻi mamaʻo atu meiate ia.+ ʻI heʻene sio kiate kinautolú, naʻá ne lele mei he hūʻanga ʻo e tēnití ke fakafetaulaki kiate kinautolu, pea naʻá ne punou ki he kelekelé. 3 Naʻá ne pehē ange leva: “ʻE Sihova, kapau kuó u maʻu ʻa hoʻo hōifuá, kātaki muʻa ʻo ʻoua te ke fakalaka mei hoʻo sevānití. 4 Kātaki muʻa ʻo tuku ke ʻomai ha meʻi vai, pea ke fufulu homou vaʻé;+ pea mou toki mālōlō leva ʻi he lalo ʻakaú. 5 ʻI he vakai kuo mou haʻu ki heni ki hoʻomou sevānití, tuku ke u ʻomai ha konga mā ke mou maʻu mei ai ha mālohi.* ʻE lava ke hoko atu leva hoʻomou fonongá.” ʻI he meʻá ni naʻa nau pehē: “ʻOku lelei. ʻE lava ke ke fai ʻa e meʻa kuó ke leaʻakí.”

6 Ko ia naʻe fakavave ʻa ʻĒpalahame ki he tēnití kia Sela ʻo ne pehē: “Fakatoʻotoʻo! ʻOmai ha fua* mahoaʻa lelei ʻe tolu, natu ʻa e takaongá, pea ngaohi ha ngaahi foʻi mā.” 7 Naʻe hoko atu ʻa ʻĒpalahame ʻo ne lele ki he tākangá ʻo fili mai ha kiʻi pulu tangata molū mo lelei. Naʻá ne ʻoange ia ki he sevānití, ʻa ia naʻá ne fakavave ke teuteu ia. 8 Naʻá ne toʻo leva ʻa e pata mo e huʻakau mo e kiʻi pulu tangata kuó ne ʻosi teuteú pea tuku atu ʻa e meʻakaí ʻi honau ʻaó. Pea naʻá ne tuʻu leva ʻi honau tafaʻakí ʻi he lalo ʻakaú ʻi he lolotonga ʻenau kaí.+

9 Naʻa nau pehē ange kiate ia: “Ko fē ʻa Sela+ ko ho uaifí?” Naʻá ne tali ange: “Ko eni ʻi he tēnití.” 10 Ko ia naʻe hoko atu ʻa e taha ʻo kinautolu: “Te u foki moʻoni mai kiate koe ʻi he taʻu kahaʻú ʻi he taimi ko ení, pea vakai, ko Sela ko ho uaifí te ne maʻu ha tama tangata.”+ Pea ko Sela naʻá ne fanongo mai ki ai ʻi he hūʻanga ʻo e tēnití, ʻa ia naʻe tuʻu mei mui ʻi he tangatá. 11 Ko ʻĒpalahame mo Selá naʻá na motuʻa, kuo aʻuaʻu hona taʻú.+ Naʻe mahili atu ʻa Sela mei he taʻu ʻo e maʻu fānaú.*+ 12 Ko ia naʻe kamata ke kata ʻa Sela ʻiate ia, ʻo ne pehē: “Hili ia ʻeku vaivai pea kuo motuʻa mo hoku ʻeikí, te u maʻu moʻoni koā ʻa e fiefia+ ko ení?” 13 Naʻe folofola leva ʻa Sihova kia ʻĒpalahame: “Ko e hā naʻe kata ai ʻa Sela mo ne pehē, ‘Te u fanau moʻoni koā neongo ʻeku motuʻá?’ 14 ʻOku ʻi ai koā ha meʻa ʻe fuʻu lahi fau kia Sihova?+ Te u foki mai kiate koe ʻi he taʻu kahaʻú ʻi he taimi kotofa ko ení, pea ʻe maʻu ʻe Sela ha tama tangata.” 15 Ka naʻe fakaʻikaiʻi ia ʻe Sela, ʻo ne pehē, “Naʻe ʻikai te u kata,” he naʻá ne ilifia. ʻI he meʻá ni naʻá ne folofola: “ʻIo, naʻá ke kata.”

16 ʻI he tuʻu hake ʻa e kau tangatá ke nau mavahe pea nau sio hifo ki Sōtomá,+ naʻe luelue ʻa ʻĒpalahame mo kinautolu ke fakafeʻao kiate kinautolu. 17 Naʻe folofola ʻa Sihova: “ʻOku ou hanganaki fufū meia ʻĒpalahame ʻa e meʻa ʻoku ou teu ke faí?+ 18 Ko ē, ʻe hoko moʻoni ʻa ʻĒpalahame ko ha puleʻanga lahi mo mālohi, pea ko e ngaahi puleʻanga kotoa ʻo e māmaní ʻe faitāpuekina kinautolu* fakafou ʻiate ia.+ 19 He kuó u ʻunuʻunu kiate ia koeʻuhí ke ne fekauʻi ʻa hono ngaahi fohá mo hono fāmili ʻi he hili iá ke nau tauhi ʻa e founga ʻa Sihová ʻaki hono fai ʻa e meʻa ʻoku totonu mo māʻoniʻoní,+ koeʻuhi kae fakahoko ai ʻe Sihova ʻa e meʻa kuó ne talaʻofa fekauʻaki mo ʻĒpalahamé.”

20 Naʻe folofola leva ʻa Sihova: “Ko e kalanga ʻo kau ki Sōtoma mo Komolá ʻoku leʻo-lahi moʻoni,+ pea ko ʻenau angahalá ʻoku fuʻu mamafa.+ 21 Te u ʻalu hifo ke sio pe ko ʻenau tōʻongá ʻoku hangē ko e kalanga ʻa ia kuo aʻu mai kiate aú. Pea kapau ʻe ʻikai, ʻe lava ke u ʻiloʻi ia.”+

22 Naʻe mavahe leva ʻa e ongo tangatá mei ai ʻo ʻalu ki Sōtoma, ka naʻe nofo pē ʻa Sihova+ mo ʻĒpalahame. 23 Naʻe fakaofiofi atu leva ʻa ʻĒpalahame ʻo ne pehē: “Te ke tafiʻi moʻoni koā ʻa e māʻoniʻoní fakataha mo e fulikivanú?+ 24 Tau pehē pē ʻoku ʻi ai ha kau tangata māʻoniʻoni ʻe toko 50 ʻi he loto koló. Te ke tafiʻi leva kinautolu ʻo ʻikai fakamolemoleʻi ʻa e feituʻú koeʻuhi ko e toko 50 māʻoniʻoni ʻoku ʻi loto aí? 25 ʻOku taʻemalava ke fakakaukau atu te ke fai peheni ʻaki hono ʻai ke mate ʻa e tangata māʻoniʻoní fakataha mo e tokotaha fulikivanú ʻo tatau ai ʻa e ikuʻanga ki he tangata māʻoniʻoní mo e fulikivanú!+ ʻOku taʻemalava ke fakakaukau atu te ke fai pehē.+ ʻIkai ʻe fai ʻe he Fakamaau ʻo māmaní kotoa ʻa e meʻa ʻoku totonú?”+ 26 Naʻe folofola leva ʻa Sihova: “Kapau te u maʻu ʻi Sōtoma ha kau tangata māʻoniʻoni ʻe toko 50 ʻi he koló, te u fakamolemoleʻi ʻa e feituʻú kotoa koeʻuhi ko kinautolu.” 27 Ka naʻe toe tali ange ʻe ʻĒpalahame: “Kātaki muʻa, ko eni kuó u fiematamuʻa ke lea kia Sihova, lolotonga iá ko aú ko e efu mo e efuefu. 28 Pehē pē ko e kau māʻoniʻoni ʻe toko 50 ʻe nounou ʻaki ʻa e toko nima. Te ke fakaʻauha ʻa e koló kotoa koeʻuhi ko e toko nimá?” ʻI he meʻá ni naʻá ne folofola: “ʻE ʻikai te u fakaʻauha ia kapau te u maʻu ai ha toko 45.”+

29 Ka naʻá ne toe lea kiate ia ʻo pehē: “Pehē pē ʻoku maʻu ai ha toko 40.” Naʻá ne tali ange: “ʻE ʻikai te u fai ia koeʻuhi ko e toko 40.” 30 Ka naʻá ne hoko atu: “Kātaki muʻa ʻe Sihova, ʻoua ʻe hoko ʻo kakaha ʻa hoʻo houhaú,+ kae tuku muʻa ke hoko atu ʻeku leá: Pehē pē ʻoku maʻu ai ha toko 30 pē.” Naʻá ne tali ange: “ʻE ʻikai te u fai ia kapau te u maʻu ai ha toko 30.” 31 Ka naʻá ne hoko atu: “Kātaki muʻa, ko eni kuó u fiematamuʻa ke lea kia Sihova: Pehē pē ʻoku maʻu ai ha toko 20 pē.” Naʻá ne tali ange: “ʻE ʻikai te u fakaʻauha ia koeʻuhí ko e toko 20.” 32 Fakaʻosí, naʻá ne pehē: “Kātaki muʻa Sihova, ʻoua ʻe hoko ʻo kakaha hoʻo houhaú, kae tuku muʻa ke u toe lea tuʻo taha atu pē: Pehē pē ʻoku maʻu ai ha toko hongofulu pē.” Naʻá ne tali ange: “ʻE ʻikai te u fakaʻauha ia koeʻuhi ko e toko hongofulú.” 33 ʻI he ʻosi ʻa e folofola ʻa Sihova kia ʻĒpalahamé, naʻá ne hāʻele atu+ pea naʻe foki ʻa ʻĒpalahame ki hono feituʻú.

19 Naʻe aʻu ʻa e ongo ʻāngeló ki Sōtoma ʻi he efiafí, pea naʻe tangutu ʻa Lote ʻi he matapā ʻo Sōtomá. ʻI he sio ʻa Lote kiate kinauá, naʻá ne mālanga hake ke fakafetaulaki kiate kinaua ʻo ne punou ʻo hanga ki he kelekelé.+ 2 Pea naʻá ne pehē: “Kātaki muʻa, ʻe hoku ongo ʻeiki, ka mo afe mai muʻa, ʻo hū ki he fale ʻo hoʻomo sevānití pea nofo ai ʻi he poó ni pea tuku ke fufulu homo vaʻé. Peá mo toki tuʻu pongipongia hake leva ʻo hoko atu hoʻomo fonongá.” ʻI he meʻá ni naʻá na pehē: “ʻIkai, te ma nofo he poó ni ʻi he malaʻe fakakoló.”* 3 Ka naʻá ne mātuʻaki vilitaki pē kiate kinaua ke na ō mo ia ki hono falé. Naʻá ne fai leva ha kātoanga kai maʻanaua ʻo ne taʻo ha mā taʻelēvani, pea naʻá na kai.

4 Ki muʻa ke na lava ʻo tokoto hifo ke mohé, ko e kakai tangata ʻo e koló—ʻa e kakai tangata ʻo Sōtomá mei he tamasiʻi ki he vaivai, ʻa kinautolu hono kotoa—naʻa nau ʻātakaiʻi ʻa e falé ʻi ha fuʻu pupunga kakai fakamoveuveu pē ʻe taha. 5 Pea naʻa nau hanganaki kaila atu kia Lote ʻo pehē kiate ia: “Ko fē ʻa e ongo tangata naʻá na omi kiate koe ʻi he pō ní? ʻOmi kinaua ki tuʻa kiate kimautolu koeʻuhí ke mau mohe* mo kinaua.”+

6 Naʻe hū atu leva ʻa Lote ki tuʻa kiate kinautolu ki he hūʻangá, pea naʻá ne tāpuniʻi ʻa e matapaá mei hono tuʻá. 7 Naʻá ne pehē ange: “Fakamolemole muʻa, ʻe hoku fanga tokoua, ʻoua te mou fai ha tōʻonga fulikivanú. 8 Kātaki muʻa, ko eni ʻoku ʻi ai hoku ongo ʻofefine ʻa ia kuo teʻeki ai ʻaupito ke na mohe mo ha tangata. Tuku muʻa ke u ʻomi kinaua ki tuʻa kiate kimoutolu ke mou fai kiate kinaua ha meʻa pē ʻoku hā lelei kiate kimoutolú. Kae ʻoua te mou fai ha meʻa ki he ongo tangatá ni, he kuó na omi ki he malu* ʻo hoku falé.”+ 9 ʻI he meʻá ni naʻa nau pehē ange: “Tuʻu ki mui!” Pea nau hoko atu: “Ko e muli ʻoku ʻikai hano feʻao ko ení naʻe haʻu ke nofo heni, ka ko eni ʻoku fakatoʻotoʻa ia ke ne fakamāuʻi kitautolu! Sai te mau fai leva kiate koe ʻa e meʻa ʻoku kovi ange ia ʻi he meʻa te mau fai kiate kinauá.” Pea naʻa nau feʻohofi* atu kia Lote ʻo nau ʻunu atu ke haveki ʻa e matapaá. 10 Ko ia naʻe mafao atu ʻa e nima ʻo e ongo tangatá ʻo na ʻomai ʻa Lote ki fale, pea naʻá na tāpuniʻi ʻa e matapaá. 11 Ka naʻá na taaʻi ʻaki ʻa e kuí ʻa e kau tangata ʻa ia naʻe ʻi he hūʻanga ʻo e falé, mei he siʻi taha ki he lahi taha, ko ia naʻa nau fiu feinga ai ke ʻilo ʻa e hūʻangá.

12 Naʻe pehē ange leva ʻe he ongo tangatá kia Lote: “ʻOku toe ʻi ai ha taha kehe heni mo koe? Ko hao ngaahi foha-ʻi-he-fono, ko hao ngaahi foha, ko hao ngaahi ʻofefine, pea mo hoʻo kakai kotoa ʻi he koló, ʻave kinautolu ki tuʻa mei he feituʻú ni! 13 He te ma fakaʻauha ʻa e feituʻú ni, koeʻuhi kuo fakaʻau ke leʻo-lahi moʻoni ʻa e kalanga ʻo kau kiate kinautolú ʻi he ʻao ʻo Sihová,+ ko ia kuo fekau mai ai kimaua ʻe Sihova ke fakaʻauha ʻa e koló.” 14 Ko ia naʻe hū ʻa Lote ki tuʻa pea kamata ke ne lea ki hono ongo foha-ʻi-he-fonó* ʻa ia naʻe teu mali mo hono ongo ʻofefiné ʻo ne toutou pehē: “Tuʻu! Hū ki tuʻa mei he feituʻú ni, koeʻuhi ʻe fakaʻauha ʻe Sihova ʻa e koló!” Ka ki hono ongo foha-ʻi-he-fonó, naʻe hā ngali ʻo hangē ia ko haʻane fakakatá.+

15 ʻI he mafoa ʻa e atá, naʻe hoko ʻo fakavaveʻi ʻe he ongo ʻāngeló ʻa Lote ʻo na pehē: “Tuʻu! ʻAve ho uaifí mo ho ongo ʻofefiné ʻa ia ʻoku nau ʻi heni mo koé, koeʻuhi ke ʻoua naʻa tafiʻi koe ʻi he faihala ʻa e koló!”+ 16 ʻI heʻene kei fakatuotuaí, pea koeʻuhi ko e manavaʻofa ʻa Sihova kiate iá,+ naʻe puke ʻe he ongo tangatá ʻa hono nimá mo e nima ʻo hono uaifí pea mo e nima ʻo hono ongo ʻofefiné, pea naʻá na ʻomi kinautolu ʻo na tuku kinautolu ʻi tuʻa ʻi he koló.+ 17 ʻI heʻena ʻave pē kinautolu ki he tuʻa koló, naʻá ne pehē: “Hola telia hoʻo moʻuí! ʻOua te ke sio ki mui+ pea ʻoua naʻa tuʻu noaʻia ʻi ha feituʻu pē ʻo e vahefonuá!+ Hola ki he feituʻu moʻungaʻiá koeʻuhí ke ʻoua naʻa tafiʻi koe!”

18 Naʻe pehē ange leva ʻe Lote kiate kinaua: “ʻOua muʻa te u hola ki ai, ʻe Sihova! 19 Fakamolemole muʻa, ko eni, kuo maʻu ʻe hoʻo sevānití ʻa hoʻo hōifuá pea ʻokú ke fakahaaʻi ʻa e anga-ʻofa* lahi kiate au ʻaki hono fakahaofi aú,+ ka ʻoku ʻikai te u malava ke hola ki he feituʻu moʻungaʻiá he ʻoku ou ilifia naʻa hoko kiate au ha fakatamaki peá u mate ai.+ 20 Kātaki muʻa, ko eni, ko e kolo ko ení ʻoku ofi mai pea ʻe lava ke u hola ki ai; ko ha kiʻi feituʻu siʻisiʻi pē ia. Kātaki, ʻe lava nai ke u hola ki ai? Ko ha kiʻi feituʻu siʻisiʻi pē ia. Pea te u hao leva ai.” 21 Ko ia naʻá ne pehē kiate ia: “Lelei ʻaupito, te u toe fakahaaʻi atu kiate koe ʻa e fakaʻatuʻi+ ʻaki ʻa e ʻikai te u fakaʻauha ʻa e kolo ʻokú ke lea ʻo kau ki aí.+ 22 Fakatoʻotoʻo! Hola ki ai, koeʻuhi heʻikai lava ke u fai ha meʻa kae ʻoua kuó ke aʻu ki ai!”+ Ko e ʻuhinga ia naʻá ne ui ai ʻa e koló ko Soá.*+

23 Naʻe hopo ʻa e laʻaá ki he fonuá ʻi he taimi naʻe aʻu ai ʻa Lote ki Soá. 24 Naʻe ʻai leva ʻe Sihova ke ʻuha sūlifa mo e afi ki Sōtoma mo Komola—naʻe haʻu ia meia Sihova, mei he langí.+ 25 Ko ia naʻá ne fakaʻauha ʻa e ongo koló ni, ʻio, ʻa e vahefonuá kātoa, ʻo kau ai ʻa e kakai kotoa ʻo e ongo koló mo e ngaahi ʻakau ʻo e kelekelé.+ 26 Ka ko e uaifi ʻo Loté, ʻa ia naʻe muimui atu ʻiate iá, naʻe kamata ke ne sio ki mui, pea naʻá ne hoko ko ha pou māsima.+

27 Pea ko ʻĒpalahame naʻá ne tuʻu pongipongia hake ʻo ne ʻalu ki he feituʻu ʻa ia naʻá ne tuʻu ai ʻi he ʻao ʻo Sihová.+ 28 ʻI heʻene sio hifo ki Sōtoma mo Komola mo e fonua kotoa ʻo e vahefonuá, naʻá ne sio ai ki ha meʻa mātuʻaki anga-kehe. Tā ko e fuʻu kohu ena ʻoku ʻalu hake mei he fonuá ʻo hangē ko e fuʻu kohu ʻo ha fōnisé!+ 29 Ko ia ʻi he taimi naʻe fakaʻauha ai ʻe he ʻOtuá ʻa e ongo kolo ʻo e vahefonuá, naʻe manatuʻi ʻe he ʻOtuá ʻa ʻĒpalahame ʻaki ʻene ʻave ʻa Lote ki tuʻa mei he ongo kolo naʻá ne fakaʻauhá, ʻa e ongo kolo ʻa ia naʻe nofo ai ʻa Loté.+

30 Ki mui ai, naʻe ʻalu hake ʻa Lote mei Soa mo hono ongo ʻofefiné ʻo kamata nofo ʻi he feituʻu moʻungaʻiá,+ koeʻuhi naʻá ne ilifia ke nofo ʻi Soa.+ Ko ia naʻá ne kamata nofo ai ʻi ha ʻana mo hono ongo ʻofefiné. 31 Pea naʻe pehē ʻe he lahí ki he siʻí: “ʻOku motuʻa ʻeta tamaí, pea ʻoku ʻikai ha tangata ʻi he fonuá ke mohe mo kitaua ʻo hangē ko e anga ʻo e māmaní kotoa. 32 Haʻu, ta ʻoange ki heʻeta tamaí ha uaine ke ne inu, pea tuku ke ta mohe mo ia pea ke fakaili ai ha hako mei heʻeta tamaí.”

33 Ko ia ʻi he pō ko iá naʻá na hanganaki fakainu uaine ʻena tamaí; pea naʻe hū ki loto ʻa e lahí ʻo mohe mo ʻene tamaí, ka naʻe ʻikai te ne ʻiloʻi ʻa e taimi naʻe tokoto hifo ai hono ʻofefiné mo e taimi naʻá ne tuʻu hake aí. 34 ʻI he ʻaho leva hono hokó, naʻe pehē ʻe he lahí ki he siʻí: “Ko eni naʻá ku mohe mo ʻeku tamaí ʻanepō. Ta toe fakainu uaine ia he poó ni. Peá ke hū leva ki loto ʻo mohe mo ia, pea tuku ke ta fakaili ha hako mei heʻeta tamaí.” 35 Ko ia ʻi he pō foki ko iá, naʻá na toutou fakainu uaine ʻena tamaí; pea naʻe ʻalu atu leva ʻa e siʻí ʻo ne mohe mo ia, ka naʻe ʻikai te ne ʻiloʻi ʻa e taimi naʻe tokoto hifo ai hono ʻofefiné mo e taimi naʻá ne tuʻu hake aí. 36 Ko ia naʻe hoko ʻo feitama fakatouʻosi ʻa e ongo ʻofefine ʻo Loté ki heʻena tamaí. 37 Naʻe fanauʻi ʻe he lahí ha tama tangata peá ne fakahingoa ia ko Mōape.+ Ko e tamai ia ʻa e kau Mōape ʻo e ʻaho ní.+ 38 Naʻe toe fanauʻi foki ʻe he siʻí ha tama tangata, pea naʻá ne fakahingoa ia ko Peni-ami. Ko e tamai ia ʻa e kau ʻĀmoni+ ʻo e ʻaho ní.

20 Pea naʻe hiki ʻa ʻĒpalahame mei ai+ ki he feituʻu Nīkepí ʻo kamata ke ne nofo ʻi he vahaʻa ʻo Kētesi+ mo Sulá.+ Lolotonga ʻene nofo* ʻi Kilaí,+ 2 naʻe toutou lea ʻa ʻĒpalahame ʻo fekauʻaki mo Sela ko hono uaifí: “Ko hoku tuofefine ia.”+ Ko ia naʻe fekau atu ʻe ʻApimeleki ko e tuʻi ʻo Kilaí ke ʻomai ʻa Sela kiate ia.+ 3 ʻI he hili iá, naʻe hoko mai ʻa e ʻOtuá ʻi he poʻulí kia ʻApimeleki ʻi ha misi ʻo ne folofola kiate ia: “Ko eni te ke mate koeʻuhi ko e fefine kuó ke ʻavé,+ koeʻuhí ʻokú ne ʻosi mali pea ʻoku ʻa e tangata kehe ia.”+ 4 Kae kehe, naʻe teʻeki ai ke ofi kiate ia* ʻa ʻApimeleki. Ko ia naʻá ne pehē: “ʻE Sihova, te ke tāmateʻi koā ha puleʻanga ʻoku tonuhia moʻoni?* 5 ʻIkai naʻá ne pehē kiate au, ‘Ko hoku tuofefine ia,’ pea ʻikai naʻá ne pehē foki ʻe ia, ‘Ko hoku tuongaʻane ia’? Naʻá ku fai ʻa e meʻá ni ʻi ha loto-totonu mo ha nima taʻehalaia.” 6 Naʻe folofola ange leva ʻa e ʻOtua moʻoní kiate ia ʻi he misí: “ʻOku ou ʻiloʻi naʻá ke fai ʻa e meʻá ni ʻi ha loto-totonu, ko ia naʻá ku taʻofi ai koe mei he faiangahala kiate aú. Ko e ʻuhinga ia naʻe ʻikai ai te u fakaʻatā koe ke ke ala kiate iá. 7 Fakafoki leva ʻa e uaifi ʻo e tangatá, he ko ha palōfita+ ia, pea te ne fai ha hū tōtōaki maʻau+ pea ʻe hokohoko atu hoʻo moʻuí. Ka ʻo kapau ʻe ʻikai te ke fakafoki ia, ke ke ʻilo kuo pau ke ke mate, ʻa koe mo kinautolu kotoa ʻoku ʻaʻaú.”

8 Naʻe tuʻu pongipongia hake ʻa ʻApimeleki ʻo ne ui ʻene kau sevānití kotoa pea tala ange kiate kinautolu ʻa e ngaahi meʻá ni kotoa pē, pea naʻa nau hoko ai ʻo mātuʻaki manavahē. 9 Naʻe ui leva ʻe ʻApimeleki ʻa ʻĒpalahame ʻo ne pehē kiate ia: “Ko e hā ʻa e meʻa kuó ke fai kiate kimautolú? Ko e hā ha angahala kuó u fai kiate koe ke ke hilifaki mai ai kiate au mo hoku puleʻangá ha fuʻu angahala pehē? Ko e meʻa kuó ke fai kiate aú naʻe ʻikai totonu.” 10 Pea naʻe hoko atu ʻa ʻApimeleki ʻo ne pehē kia ʻĒpalahame: “Ko e hā naʻá ke taumuʻa ki aí ʻi hoʻo fai ʻa e meʻa ko ení?”+ 11 Naʻe pehē ange ʻe ʻĒpalahame: “Koeʻuhi naʻá ku pehē hifo pē kiate au, ‘Ko e moʻoni ʻoku ʻikai ha manavahē ki he ʻOtuá ʻi he feituʻú ni, pea te nau tāmateʻi au koeʻuhi ko hoku uaifí.’+ 12 Pea tuku kehe ia, ko hoku tuofefine moʻoni ia, ko e ʻofefine ʻo ʻeku tamaí ka ʻoku ʻikai ko e tama ʻa ʻeku faʻeé, pea naʻá ne hoko ko hoku uaifi.+ 13 Ko ia ʻi he taimi naʻe ʻai ai au ʻe he ʻOtuá ke u ʻalu hē mei he fale ʻo ʻeku tamaí,+ naʻá ku pehē kiate ia: ‘Tuku ke hoko eni ko hoʻo fakahaaʻi mai ia ʻa hoʻo ʻofa mateaki kiate aú: ʻI he feituʻu kotoa pē te ta ʻalu ki ai, ke ke pehē ʻo fekauʻaki mo au, “Ko hoku tuongaʻane ia.”’”+

14 Naʻe toʻo leva ʻe ʻApimeleki ʻa e fanga sipi mo e fanga pulu mo e kau tamaioʻeiki mo e kau kaunanga ʻo ne ʻoange kinautolu kia ʻĒpalahame, pea naʻá ne fakafoki ʻa Sela ko hono uaifí kiate ia. 15 Naʻe toe pehē ʻe ʻApimeleki: “Ko hoku fonuá ena ʻoku ʻatā ia kiate koe. Ke ke nofo ʻi ha feituʻu pē ʻokú ke leleiʻia aí.” 16 Pea kia Sela naʻá ne pehē: “Ko eni ʻoku ou ʻoatu ʻa e konga siliva ʻe 1,000 ki ho tuongaʻané.+ Ko ha fakaʻilonga ia ʻo hoʻo tonuhiá* ki he faʻahinga kotoa ʻoku ʻiate koé pea ʻi he ʻao ʻo e tokotaha kotoa pē, pea fakaʻataʻatā ai koe mei ha luma.” 17 Pea naʻe kamata ke fai ʻe ʻĒpalahame ha hū tōtōaki ki he ʻOtua moʻoní, pea naʻe fakamoʻui ʻe he ʻOtuá ʻa ʻApimeleki mo hono uaifí mo ʻene kau kaunangá, pea naʻe kamata ke nau maʻu fānau; 18 he naʻe ʻai ʻe Sihova ʻa e kau fefine kotoa ʻo e fale ʻo ʻApimelekí ke nau paʻa* koeʻuhi ko Sela, ʻa e uaifi ʻo ʻĒpalahamé.+

21 Naʻe fakahanga ʻe Sihova ʻene tokangá kia Sela ʻo hangē tofu pē ko ia naʻá ne folofolaʻakí, pea naʻe fai ʻe Sihova kia Sela ʻa e meʻa naʻá ne talaʻofaʻakí.+ 2 Ko ia naʻe hoko ai ʻa Sela ʻo feitama+ peá ne fanauʻi leva ha tama tangata kia ʻĒpalahame ʻi he taʻumotuʻa ʻa ʻĒpalahamé ʻi he taimi kotofa naʻe talaʻofa ʻe he ʻOtuá kiate iá.+ 3 Naʻe fakahingoa ʻe ʻĒpalahame ʻa hono foha ne toki fanauʻi foʻoú, ʻa ia naʻe fanauʻi ʻe Sela kiate iá, ko ʻAisake.+ 4 Pea naʻe kamu ʻe ʻĒpalahame ʻa ʻAisake ko hono fohá ʻi he ʻaho valu ʻo hono taʻumotuʻá, ʻo hangē tofu pē ko ia naʻe fekauʻi ange ʻe he ʻOtuá kiate iá.+ 5 Naʻe taʻu 100 ʻa ʻĒpalahame ʻi he taimi naʻe fanauʻi ai kiate ia ʻa ʻAisake ko hono fohá. 6 Naʻe pehē leva ʻe Sela: “Kuo ʻai au ʻe he ʻOtuá ke u kata; ko e tokotaha kotoa pē ʻe fanongo ki aí te ne kata fakataha mo au.” 7 Pea naʻá ne hoko atu: “Ko hai ia naʻá ne mei pehē kia ʻĒpalahame, ‘Ko e moʻoni ʻe fakahuhu ʻe Sela ha fānau’? Neongo ia, kuó u fanauʻi ha tama tangata kiate ia ʻi heʻene taʻumotuʻá.”

8 Ko ia naʻe tupu hake ʻa e tamá pea naʻe mavaeʻi ia, pea naʻe teuteuʻi ʻe ʻĒpalahame ha fuʻu kātoanga kai ʻi he ʻaho ko ia naʻe mavaeʻi ai ʻa ʻAisaké. 9 Ka naʻe hanganaki fakatokangaʻi ʻe Sela ʻa e tama ʻa Hekaʻā+ ko e ʻIsipité, ʻa ia naʻá ne fanauʻi kia ʻĒpalahamé, naʻá ne manukiʻi ʻa ʻAisake.+ 10 Ko ia naʻá ne pehē ange ai kia ʻĒpalahame: “Kapusi ʻa e kaunanga ko ení mo ʻene tamá, he ko e tama ʻa e kaunanga ko ení heʻikai te ne hoko ko ha ʻea fakataha mo ʻeku tamá, ʻa ʻAisake!”+ 11 Ka ko e meʻa naʻá ne leaʻaki fekauʻaki mo e foha ʻo ʻĒpalahamé+ naʻe mātuʻaki taʻefakafiemālie ia kiate ia. 12 Naʻe folofola leva ʻa e ʻOtuá kia ʻĒpalahame: “ʻOua te ke taʻefiemālie ʻi he meʻa ʻoku leaʻaki ʻe Sela kiate koe fekauʻaki mo e tamasiʻí pea ʻi he fekauʻaki mo hoʻo kaunangá. Fanongo kiate ia,* he ko ia ʻe ui ko ho hakó ʻe fou mai ia ʻia ʻAisake.+ 13 ʻI he fekauʻaki mo e tama ʻa e kaunangá,+ te u ngaohi foki ia ko ha puleʻanga,+ koeʻuhí ko ho hako ia.”

14 Ko ia naʻe tuʻu pongipongia hake ai ʻa ʻĒpalahame ʻo ne toʻo ha mā mo ha hina vai kiliʻimanu ʻo ʻoange kia Hekaʻā. Naʻá ne hili eni ki hono umá peá ne fekauʻi atu leva ia mo e tamasiʻí+ ke na ō. Ko ia naʻá ne mavahe ai ʻo hē fano holo ʻi he toafa ʻo Pea-sipá.+ 15 Naʻe faifai pē ʻo maha ʻa e vai ʻi he hina kiliʻimanú, pea naʻá ne tuku atu ʻa e tamasiʻí ki he taha ʻo e ngaahi lalo ʻakaú. 16 Naʻá ne ʻalu atu leva ʻo ne tangutu toko taha pē, ʻi he mamaʻo nai ʻo hono fanaʻi ʻo ha foʻi ngahau, koeʻuhi naʻá ne pehē: “ʻOku ʻikai te u loto ke sio ki he mate ʻa e tamasiʻí.” Ko ia naʻá ne tangutu hifo ai ʻo mamaʻo atu pea kamata ke ne tangi leʻo-lahi mo tangi-ʻa-loʻimata.

17 ʻI he meʻa ko iá naʻe fanongo ʻa e ʻOtuá ki he leʻo ʻo e tamasiʻí,+ pea naʻe ui ʻa e ʻāngelo ʻa e ʻOtuá mei langi kia Hekaʻā ʻo ne pehē kiate ia:+ “Ko e hā ʻa e meʻa ʻoku hoko kiate koé, Hekaʻā? ʻOua ʻe ilifia, he kuo fanongo ʻa e ʻOtuá ki he leʻo ʻo e tamasiʻí ʻi he feituʻu ko ia ʻokú ne ʻi aí. 18 Tuʻu hake, hiki hake ʻa e tamasiʻí ʻo pukepuke ia, he te u ngaohi ia ko ha puleʻanga lahi.”+ 19 Naʻe fakaʻā leva ʻe he ʻOtuá ʻa hono matá ʻo ne sio ki ha vaitupu, pea naʻá ne ʻalu ʻo fakafonu ʻa e hina kiliʻimanú ʻaki ʻa e vai ʻo ne ʻoange ha inu ki he tamasiʻí. 20 Pea naʻe ʻi he tamasiʻí+ ʻa e ʻOtuá ʻi heʻene tupu haké. Naʻá ne nofo ʻi he toafá pea naʻá ne hoko ko ha tokotaha fana-ngahau. 21 Naʻá ne nofo ʻi he toafa Pēlaná,+ pea naʻe toʻo ʻe heʻene faʻeé ha uaifi moʻona mei he fonua ko ʻIsipité.

22 ʻI he taimi ko iá ko ʻApimeleki fakataha mo Fikoli ko e ʻeiki ʻo ʻene kau taú, naʻá ne pehē kia ʻĒpalahame: “ʻOku ʻiate koe ʻa e ʻOtuá ʻi he meʻa kotoa pē ʻokú ke faí.+ 23 Ko ia ke ke fai mai leva ha fakapapau ʻi he ʻOtuá kiate au ʻi heni, ʻe ʻikai te ke faihala kiate au mo ʻeku fānaú pea mo hoku hakó, pea te ke fakafeangai kiate au pea mo e fonua ʻa ia kuó ke nofo aí ʻaki ʻa e ʻofa mateaki tatau kuó u fakahaaʻi kiate koé.”+ 24 Ko ia naʻe pehē ʻe ʻĒpalahame: “ʻOku ou fai atu ha fakapapau ʻi he meʻá ni.”

25 Kae kehe, naʻe lāunga ʻa ʻĒpalahame kia ʻApimeleki ʻo fekauʻaki mo e vaitupu naʻe faʻao fakamālohi+ ʻe he kau sevāniti ʻa ʻApimelekí. 26 Naʻe tali ange ʻe ʻApimeleki: “ʻOku ʻikai te u ʻiloʻi pe ko hai naʻá ne fai ení; naʻe ʻikai te ke tala mai ia kiate au, pea naʻe ʻikai te u fanongo ʻi ha meʻa fekauʻaki mo ia ka ʻi he ʻahó ni.” 27 ʻI he meʻa ko iá, naʻe toʻo ʻe ʻĒpalahame ʻa e fanga sipi mo e fanga pulu ʻo ne ʻoange kia ʻApimeleki, pea naʻá na fai ha fuakava. 28 ʻI he taimi naʻe tuku mavahe ai ʻe ʻĒpalahame ha fanga lami fefine ʻe fitu mei he tākangá, 29 naʻe pehē ange ʻe ʻApimeleki kia ʻĒpalahame: “Ko e hā kuó ke tuku mavahe ai heni ʻa e fanga lami fefine ko eni ʻe fitú?” 30 Naʻá ne pehē leva: “Te ke tali ʻa e fanga lami fefine ʻe fitú mei hoku nimá ko ha fakamoʻoni ia naʻá ku keli ʻa e vaitupu ko ení.” 31 Ko e ʻuhinga ia naʻá ne ui ai ʻa e feituʻu ko iá ko Pea-sipá,*+ koeʻuhí naʻá na fakatou fai ai ha fuakava. 32 Ko ia naʻá na fai ai ha fuakava+ ʻi Pea-sipa, hili iá naʻe tuʻu hake ʻa ʻApimeleki fakataha mo Fikoli ko e ʻeiki ʻo ʻene kau taú, pea naʻá na foki ki he fonua ʻo e kau Filisitiá.+ 33 Hili iá naʻá ne tō ha fuʻu tamalisi ʻi Pea-sipa, pea naʻá ne ui ai ki he huafa ʻo Sihová,+ ʻa e ʻOtua taʻengatá.+ 34 Pea naʻe nofo* ʻa ʻĒpalahame ʻi he fonua ʻo e kau Filisitiá ʻi ha taimi fuoloa.*+

22 Pea ʻi he hili ʻa e meʻá ni naʻe siviʻi+ ʻe he ʻOtua moʻoní ʻa ʻĒpalahame, pea naʻá ne folofola kiate ia: “ʻĒpalahame,” ʻa ia naʻá ne tali ki ai ʻo pehē: “Ko au eni!” 2 Naʻá ne folofola ange leva: “Kātaki muʻa ʻo ʻave ho fohá, ʻa ho foha pē taha ʻokú ke ʻofa lahi aí,+ ʻa ʻAisake,+ peá ke fononga ki he fonua ko Molaiá+ ʻo foaki hake ai ia ko ha feilaulau tutu ʻi he taha ʻo e ngaahi moʻunga te u fakahaaʻi atu kiate koé.”

3 Ko ia naʻe tuʻu pongipongia hake ʻa ʻĒpalahame ʻo ne ʻai ʻa e nofoʻá ki heʻene ʻasí peá ne ʻave ha toko ua ʻo ʻene kau sevānití ʻo ne ʻalu mo ia pea mo hono foha ko ʻAisaké. Naʻá ne fahi ʻa e fefié ki he feilaulau tutú, peá ne mālanga hake leva ʻo ne fononga ki he feituʻu naʻe fakahaaʻi ange ʻe he ʻOtua moʻoní kiate iá. 4 ʻI he ʻaho hono tolú, naʻe hanga hake ʻa ʻĒpalahame ʻo ne sio atu ki he feituʻú mei he mamaʻó. 5 Naʻe pehē ange leva ʻe ʻĒpalahame ki heʻene ongo sevānití: “Mo nofo heni mo e ʻasí, ka te u ʻalu ki hē mo e tamasiʻí ʻo fai ha lotu pea toki foki mai kiate kimoua.”

6 Ko ia naʻe toʻo ʻe ʻĒpalahame ʻa e fefie ki he feilaulau tutú ʻo ne hilifaki ia ʻia ʻAisake ko hono fohá. Naʻá ne toʻo leva ʻi hono nimá ʻa e afi mo e hele,* pea naʻá na ō fakataha. 7 Naʻe pehē ange leva ʻe ʻAisake kia ʻĒpalahame ko ʻene tamaí: “ʻAlā tamai!” Naʻá ne tali ange: “ʻIo, ʻe hoku foha!” Ko ia naʻá ne hoko atu: “Ko eni ʻa e afí mo e fefié, ka ko fē ʻa e sipi ki he feilaulau tutú?” 8 ʻI he meʻá ni naʻe pehē ange ʻe ʻĒpalahame: “ʻE tokonaki mai ʻe he ʻOtuá tonu ʻa e sipi ki he feilaulau tutú,+ ʻe hoku foha.” Pea naʻá na fononga fakataha atu leva.

9 Faifai atu pē peá na aʻu ki he feituʻu naʻe fakahaaʻi ange ʻe he ʻOtua moʻoní kiate iá, pea naʻe fokotuʻu ʻe ʻĒpalahame ha ʻōlita ai ʻo ne fokotuʻutuʻu ʻa e fefié ki ai. Naʻá ne haʻi ʻa e nima mo e vaʻe ʻo hono foha ko ʻAisaké peá ne tuku ia ki he ʻōlitá ʻi ʻolunga ʻi he fefié.+ 10 Naʻe mafao atu leva ʻa e nima ʻo ʻĒpalahamé ʻo ne toʻo ʻa e helé* ke tāmateʻi ʻa hono fohá.+ 11 Ka naʻe ui kiate ia ʻa e ʻāngelo ʻa Sihová mei langi ʻo ne pehē: “ʻĒpalahame, ʻĒpalahame,” ʻa ia naʻá ne tali ki ai: “Ko au eni!” 12 Naʻá ne pehē mai leva: “ʻOua naʻá ke tāmateʻi ʻa e tamasiʻí, pea ʻoua naʻá ke teitei fai ha meʻa kiate ia, he ko eni ʻoku ou ʻiloʻi ʻokú ke manavahē-ʻOtua koeʻuhí kuo ʻikai te ke mamaeʻi ho fohá, ʻa ho foha pē tahá, meiate au.”+ 13 ʻI he meʻa ko iá naʻe hanga hake ʻa ʻĒpalahame, pea naʻe ʻi ai ha sipi tangata naʻe fihia mai ʻa hono meʻatuí ʻi ha pupunga ʻakau ʻo mahili siʻi atu pē meiate ia. Ko ia naʻe ʻalu atu ʻa ʻĒpalahame ʻo ne toʻo ʻa e sipi tangatá peá ne foaki hake ia ko ha feilaulau tutu ko e fetongi ʻo hono fohá. 14 Pea naʻe ui ʻe ʻĒpalahame ʻa e feituʻu ko iá ko Sihova-siaila.* Ko e ʻuhinga ia ʻoku kei leaʻaki ai he ʻahó ni ʻo pehē: “ʻI he moʻunga ʻo Sihová ʻe tokonaki+ mai ai.”

15 Pea naʻe ui mai ʻa e ʻāngelo ʻa Sihová mei langi kia ʻĒpalahame ko hono tuʻo uá ia, 16 ʻo pehē: “‘ʻOku ou fai ha fuakava ʻiate au pē,’ ko e fakahaaʻi ia ʻe Sihová,+ ‘koeʻuhi kuó ke fai ʻa e meʻá ni pea kuo ʻikai te ke mamaeʻi ho fohá, ʻa ho foha pē tahá,+ 17 te u tāpuakiʻi moʻoni koe pea te u fakatokolahi moʻoni ho hakó ke hangē ko e ngaahi fetuʻu ʻo e langí pea hangē ko e ʻoneʻone ʻi he matātahí,+ pea ʻe maʻu ʻe ho hakó ʻa e matapā* ʻo hono ngaahi filí.+ 18 Pea fakafou ʻi ho hakó+ ʻe maʻu ai ʻe he ngaahi puleʻanga kotoa pē ʻo e māmaní ha tāpuaki moʻonautolu koeʻuhí kuó ke fanongo ki hoku leʻó.’”+

19 ʻI he hili iá, naʻe foki ʻa ʻĒpalahame ki heʻene ongo sevānití, pea naʻa nau mālanga hake ʻo nau foki fakataha ki Pea-sipa;+ pea naʻe hokohoko atu ʻa e nofo ʻa ʻĒpalahamé ʻi Pea-sipa.

20 ʻI he hili ʻa e meʻá ni naʻe fakahaaʻi kia ʻĒpalahame: “Ko Milika eni kuó ne fanauʻi foki ha ngaahi foha kia Nēhoa ko ho tokouá:+ 21 Ko ʻŪsai ʻa hono ʻuluaki fohá, ko Pusa ko hono tokouá, ko Kemiueli ko e tamai ʻa ʻĒlamí, 22 ko Keseti, Haso, Pilitasi, Sitilafi, pea mo Petueli.”+ 23 Naʻe hoko ʻa Petueli ko e tamai ia ʻa Lepeká.+ Ko e toko valú ni naʻe fanauʻi kinautolu ʻe Milika kia Nēhoa ko e tokoua ʻo ʻĒpalahamé. 24 Ko ʻene sinifú, ʻa ia ko hono hingoá ko Leuma, naʻá ne fanauʻi foki ha fānau: Ko Tepa, Kahami, Tahasi, pea mo Maaka.

23 Pea naʻe moʻui ʻa Sela ʻi he taʻu ʻe 127; ko e ngaahi taʻu eni ʻo e moʻui ʻa Selá.+ 2 Ko ia naʻe mate ʻa Sela ʻi Kiliate-ʻaapa,+ ʻa ia ko Hepeloni+ ia, ʻi he fonua ko Kēnaní,+ pea naʻe kamata ke tengihia mo tangi ʻa ʻĒpalahame koeʻuhi ko Sela. 3 Naʻe tuʻu hake leva ʻa ʻĒpalahame mei he ʻao ʻo hono uaifi kuo maté pea naʻá ne pehē ki he ngaahi foha ʻo Hetí:+ 4 “Ko ha muli au mo e nofo hili mai ki homou haʻohaʻongá.+ ʻOmai kiate au ha konga ʻapi ke hoko ko ha tanuʻanga ʻi homou lotolotongá koeʻuhí kae lava ke u ʻave ʻa hoku uaifí ʻo tanu.” 5 ʻI he meʻá ni naʻe tali ange ʻe he ngaahi foha ʻo Hetí kia ʻĒpalahame: 6 “Fanongo mai kiate kimautolu, ʻe hoku ʻeiki. Ko ha ʻeiki koe ʻa e ʻOtuá* ʻi homau haʻohaʻongá.+ ʻE lava ke ke tanu ho uaifí ʻi he feituʻu lelei taha ʻo homau ngaahi faʻitoká. ʻE ʻikai ha taha ʻo kimautolu te ne taʻofi ʻa hono faʻitoká meiate koe ke taʻofi ai koe mei hono tanu ho uaifí.”

7 Ko ia naʻe tuʻu hake ʻa ʻĒpalahame ʻo punou ki he kakai ʻo e fonuá, ki he ngaahi foha ʻo Hetí,+ 8 ʻo ne pehē kiate kinautolu: “Kapau ʻoku mou loto ke tuku au ke u ʻave ʻa hoku uaifí ʻo tanu, peʻi fanongo mai leva kiate au pea kole kia ʻEfiloni ko e foha ʻo Sohaá 9 ke ne fakatau mai kiate au ʻa e ʻana ko Makipilá, ʻa ia ʻoku ʻaʻaná; ʻoku ʻi he ngataʻanga ia ʻo hono kelekelé. Tuku ke ne fakatau mai ia kiate au ʻi homou ʻaó ʻaki ʻa e lahi fakakātoa ʻo e siliva ʻa ia ko hono mahuʻingá,+ koeʻuhi ke u lava ai ʻo maʻu ha konga ʻapi ki ha tanuʻanga.”+

10 Pea naʻe tangutu ʻa ʻEfiloni ʻi he haʻohaʻonga ʻo e ngaahi foha ʻo Hetí. Ko ia ko ʻEfiloni ko e Hetí naʻá ne tali ange kia ʻĒpalahame ʻi he fanongo ki ai ʻa e ngaahi foha ʻo Hetí, pea ʻi he ʻao ʻo e faʻahinga kotoa naʻa nau hū ʻi he matapā ʻo hono koló,+ ʻo pehē: 11 “ʻIkai, ʻe hoku ʻeiki! Fanongo mai kiate au. ʻOku ou foaki atu kiate koe fakatouʻosi ʻa e kelekelé mo e ʻana ʻa ia ʻoku ʻi aí. ʻI he ʻao ʻo e ngaahi foha ʻo hoku kakaí, ʻoku ou foaki atu ia kiate koe. Tanu ai ho uaifí.” 12 ʻI he meʻa ko iá naʻe punou ʻa ʻĒpalahame ʻi he ʻao ʻo e kakai ʻo e fonuá 13 ʻo ne lea kia ʻEfiloni ʻi he fanongo ki ai ʻa e kakaí, ʻo pehē: “Fanongo mai kiate au, kapau te ke loto ki ai! Te u ʻoatu kiate koe ʻa e lahi fakakātoa ʻo e siliva ki he konga kelekelé. Toʻo ia meiate au, koeʻuhí kae lava ke u tanu ai ʻa hoku uaifí.”

14 Naʻe tali ange leva ʻe ʻEfiloni kia ʻĒpalahame: 15 “ʻE hoku ʻeiki, fanongo mai kiate au. Ko e konga kelekele ko ení ko hono mahuʻingá ko e sikeli* siliva ʻe 400, ka ko e hā hake ia ki he vahaʻa ʻoʻoku mo koé? Ko ia tanu ai ho uaifí.” 16 Naʻe fanongo ʻa ʻĒpalahame kia ʻEfiloni, pea naʻe fua ʻe ʻĒpalahame kia ʻEfiloni ʻa e lahi ʻo e siliva naʻá ne lave ki ai ʻi he fanongo ʻa e ngaahi foha ʻo Hetí, ko e sikeli* siliva ʻe 400 ʻo fakatatau ki he mamafa naʻe tali ʻe he kau mēsianití.+ 17 Ko ia ko e kelekele ʻo ʻEfiloni ʻi Makipilá, ʻa ia naʻe ofi ki Māmilí—ʻa e kelekelé mo e ʻana ʻi aí pea mo e ʻuluʻakau kotoa ʻi loto ʻi he ngaahi ngatangataʻanga ʻo e kelekelé—naʻe hoko ʻo fakapapauʻi ko e 18 konga ʻapi ia ʻo ʻĒpalahame kuo fakatau ʻi he ʻao ʻo e ngaahi foha ʻo Hetí, ʻi he ʻao ʻo e faʻahinga kotoa ko ia naʻe hū ʻi he matapā ʻo hono koló. 19 ʻI he hili iá naʻe tanu ʻe ʻĒpalahame ʻa Sela ko hono uaifí ʻi he ʻana ʻo e kelekele ko Makipilá ofi ki Māmili, ʻa ia ko Hepeloni ia, ʻi he fonua ko Kēnaní. 20 Ko ia ko e kelekelé mo e ʻana naʻe ʻi aí naʻe ʻoange ia ʻe he ngaahi foha ʻo Hetí kia ʻĒpalahame ko ha konga ʻapi ia ke hoko ko ha tanuʻanga.+

24 Naʻe toulekeleka ʻa ʻĒpalahame he taimi ko ení, pea kuo aʻuaʻu ʻa hono taʻú, pea naʻe tāpuakiʻi ʻe Sihova ʻa ʻĒpalahame ʻi he meʻa kotoa pē.+ 2 Naʻe pehē ange ʻe ʻĒpalahame ki heʻene sevānití, ʻa e tokotaha taʻumotuʻa taha ʻi hono falé, ʻa ia naʻá ne tokangaʻi ʻene meʻa kotoa pē:+ “Kātaki muʻa ʻo ʻai ho nimá ki hoku lalo alangá, 3 pea te u ʻai koe ke ke fai mai ha fakapapau ʻia Sihova, ʻa e ʻOtua ʻo e langí mo e ʻOtua ʻo e māmaní, ʻe ʻikai te ke toʻo ha uaifi maʻa hoku fohá mei he ngaahi ʻofefine ʻo e kau Kēnaní, ʻa ia ʻoku ou nofo ʻi honau haʻohaʻongá.+ 4 ʻI hono kehé, kuo pau ke ke ʻalu ki hoku fonuá pea ki hoku ngaahi kāingá+ ʻo toʻo mei ai ha uaifi maʻa hoku fohá, maʻa ʻAisake.”

5 Kae kehe, naʻe pehē ange ʻe he sevānití kiate ia: “Fēfē kapau heʻikai loto-lelei ʻa e fefiné ia ke haʻu mo au ki he fonuá ni? ʻE pau leva ai ke u fakafoki ʻe au ho fohá ki he fonua ʻa ia naʻá ke haʻu mei aí?”+ 6 ʻI he meʻá ni naʻe pehē ange ʻe ʻĒpalahame kiate ia: “Fakapapauʻi ke ʻoua naʻá ke ʻave ʻa hoku fohá ki ai.+ 7 Ko Sihova ʻa e ʻOtua ʻo e langí, ʻa ia naʻá ne toʻo au mei he fale ʻo ʻeku tamaí pea mei he fonua ʻo hoku ngaahi kāingá+ pea ko ia naʻá ne folofola mai kiate au mo fai mai ha fuakava kiate au:+ ‘Te u ʻoatu ʻa e fonuá ni+ ki ho hakó,’+ te ne fekauʻi mai ʻene ʻāngeló ke muʻomuʻa ʻiate koe,+ pea ko e moʻoni te ke toʻo ha uaifi maʻa hoku fohá mei ai.+ 8 Ka ʻo kapau ʻe ʻikai loto-lelei ʻa e fefiné ia ke haʻu mo koe, te ke ʻatā ai mei he fuakava ko ení. Ka kuo pau ke ʻoua naʻá ke ʻave ʻa hoku fohá ki ai.” 9 ʻI he meʻa ko iá naʻe ʻai ʻe he sevānití ʻa hono nimá ki he lalo alanga ʻo ʻĒpalahame ko hono ʻeikí peá ne fai ha fakapapau kiate ia ʻo fekauʻaki mo e meʻá ni.+

10 Ko ia naʻe toʻo ʻe he sevānití ʻa e kāmeli ʻe hongofulu mei he fanga kāmeli ʻa hono ʻeikí peá ne mavahe, ʻo ne ʻalu mo e ngaahi meʻa lelei kehekehe mei heʻene ʻeikí. Pea naʻá ne fononga leva ki Mesopotēmia, ki he kolo ʻo Nēhoá. 11 ʻI heʻene aʻu ki ha vaitupu ʻa ia naʻe ʻi tuʻa ʻi he koló, naʻá ne tuʻu ai ke mālōlō ʻa e fanga kāmelí. Ko e taimi efiafí nai ia, ʻa e taimi naʻe faʻa ʻalu atu ai ʻa e kau fefiné ke ʻutu vaí. 12 Naʻá ne pehē leva: “ʻE Sihova ko e ʻOtua ʻo hoku ʻeiki ko ʻĒpalahamé, kātaki ʻo tuku muʻa ke u lavameʻa ʻi he ʻahó ni, pea fakahaaʻi ʻa hoʻo ʻofa mateakí ki hoku ʻeiki ko ʻĒpalahamé. 13 Ko eni ʻoku ou tuʻu ʻi ha vaitupu, pea ʻoku haʻu ʻa e ngaahi ʻofefine ʻo e kau tangata ʻo e koló ke ʻutu vai. 14 ʻOfa ke hoko ko e finemui ʻa ia te u pehē ki ai, ‘Kātaki muʻa ʻo tuku hifo hoʻo siā vaí koeʻuhi ke u inu,’ pea te ne tali mai, ‘Inu, pea te u fakainu foki mo hoʻo fanga kāmelí,’ tuku ke hoko ko e tokotaha eni kuó ke fili maʻa hoʻo sevāniti ko ʻAisaké; pea ʻi he meʻá ni tuku ke u ʻilo ai kuó ke fakahā ʻa hoʻo ʻofa mateakí ki hoku ʻeikí.”

15 Naʻa mo e ki muʻa ke ʻosi ʻa ʻene leá, ko Lepeka, ʻa ia ko e ʻofefine ʻo Petueli+ ko e tama ʻa Milika+ ko e uaifi ʻo Nēhoá,+ ʻa e tokoua ʻo ʻĒpalahamé, naʻá ne haʻu mo ʻene siā vai ʻi hono umá. 16 Pea ko e finemuí naʻe hoihoifua ʻaupito, ko ha fefine kei nofo anga-maʻa; naʻe ʻikai ha tangata ne mohe* mo ia. Naʻá ne ʻalu hifo ki he vaitupú ʻo fakafonu ʻene siā vaí peá ne foki hake. 17 ʻI he taimi pē ko iá naʻe lele ʻa e sevānití ke fakafetaulaki kiate ia ʻo ne pehē: “Kātaki muʻa ʻo ʻomai ha meʻi vai mei hoʻo siaá ke u inu.” 18 Naʻá ne pehē ange leva: “Inu, ʻe hoku ʻeiki.” ʻI he meʻa ko iá naʻá ne tuku hifo fakavave ʻa ʻene siaá ʻo ne pukepuke peá ne ʻoange kiate ia ha inu. 19 ʻI he ʻosi ʻene ʻoange ha inu kiate iá, naʻá ne pehē: “Te u ʻutu foki ha vai maʻa hoʻo fanga kāmelí kae ʻoua kuo nau fiu he inú.” 20 Ko ia naʻá ne huaʻi fakavave ʻa ʻene siaá ki he meʻa ʻaiʻanga inú peá ne toutou lele ki he vaitupú ke ʻutu vai, pea naʻá ne hanganaki ʻutu vai ki heʻene fanga kāmelí kotoa. 21 ʻI he taimi kotoa ko iá naʻe sio fakamamaʻu fakalongolongo pē ʻa e tangatá kiate ia ʻi he ofoofo, ʻo ne fifili pe kuo ʻai nai ʻe Sihova ʻene fonongá ke lavameʻa pe ʻikai.

22 ʻI he ʻosi ʻa e inu ʻa e fanga kāmelí, naʻe toʻo hake ʻe he tangatá maʻana ha mama-ihu koula ko hono mamafá ko ha vaeuaʻi sikeli* mo e vesa koula ʻe ua ko hono mamafá ko e sikeli* ʻe hongofulu, 23 pea naʻá ne pehē: “Kātaki muʻa ʻo tala mai kiate au, ko e ʻofefine koe ʻo hai? ʻOku ʻataʻatā ʻa e fale ʻo hoʻo tamaí ke mau mohe ai?” 24 ʻI he meʻa ko iá naʻá ne pehē ange kiate ia: “Ko e ʻofefine au ʻo Petueli+ ko e tama ʻa Milika, ʻa ia naʻá ne fanauʻi kia Nēhoá.”+ 25 Pea naʻá ne hoko atu: “ʻOku mau maʻu fakatouʻosi ʻa e kauʻi uite mo e saafa lahi pea pehē ki ha feituʻu ke mou mohe ai.” 26 Naʻe punou leva ʻa e tangatá ʻo ne fakatōmapeʻe ʻi he ʻao ʻo Sihová 27 ʻo ne pehē: “Fakatauange ke fakahīkihikiʻi ʻa Sihova, ko e ʻOtua ʻo hoku ʻeiki ko ʻĒpalahamé, he kuo ʻikai te ne liʻaki ʻene ʻofa mateaki mo ʻene faitōnunga ki hoku ʻeikí. Kuo tataki au ʻe Sihova ki he fale ʻo e fanga tokoua ʻo hoku ʻeikí.”

28 Pea naʻe lele ʻa e finemuí ʻo tala ki he fale ʻo ʻene faʻeé ʻa e ngaahi meʻá ni. 29 Pea naʻe ʻi ai ha tuongaʻane ʻo Lepeka ko hono hingoá ko Lēpani.+ Ko ia naʻe lele ʻa Lēpani ki he tangatá, ʻa ia naʻe ʻi tuʻa ʻi he vaitupú. 30 ʻI heʻene sio ki he mama-ihú mo e ongo vesa ʻi he nima ʻo hono tuofefiné pea fanongo ki he ngaahi lea ʻa hono tuofefine ko Lepeká, ʻa ia naʻá ne pehē, “Naʻe peheni ʻa e lea ʻa e tangatá kiate aú,” naʻá ne ʻalu leva ke feʻiloaki mo e tangatá, ʻa ia naʻá ne kei tuʻu pē ai ʻi he tafaʻaki ʻo e fanga kāmelí ʻi he vaitupú. 31 Naʻá ne pehē ange leva: “Haʻu, ʻa koe ʻoku faitāpuekina ʻe Sihová. Ko e hā ʻokú ke kei tuʻu ai hení? Kuó u ʻosi ʻai ʻo maau ʻa e falé mo ha feituʻu ki he fanga kāmelí.” 32 ʻI he meʻa ko iá naʻe hū ʻa e tangatá ki he falé, pea naʻá ne* vete ʻa e teuteu ʻo e fanga kāmelí pea ʻoange ʻa e kauʻi uite mo e saafa ki he fanga kāmelí mo e vai ke fufuluʻaki ʻa hono vaʻé mo e vaʻe ʻo e kau tangata naʻe ʻiate iá. 33 Kae kehe, ʻi hono tuku atu ʻi hono ʻaó ha meʻa ke ne kaí, naʻá ne pehē: “ʻE ʻikai te u kai kae ʻoua kuó u fakahā atu ʻa e meʻa kuo pau ke u leaʻakí.” Ko ia naʻe pehē ange ʻe Lēpani: “Lea mai!”

34 Naʻá ne pehē ange leva: “Ko e sevāniti au ʻa ʻĒpalahame.+ 35 Pea kuo tāpuakiʻi ʻe Sihova ʻa hoku ʻeikí ʻo lahi ʻaupito, pea kuó ne ʻai ia ke ne koloaʻia ʻaupito ʻaki hono foaki ange kiate ia ʻa e fanga sipi mo e fanga pulu, siliva mo e koula, kau tamaioʻeiki mo e kau kaunanga, mo e fanga kāmeli mo e fanga ʻasi.+ 36 ʻIkai ko ia pē, ko Sela ʻa e uaifi ʻo hoku ʻeikí naʻá ne fanauʻi ha foha ki hoku ʻeikí hili ʻene hoko ʻo motuʻá,+ pea ʻe foaki ʻe hoku ʻeikí ki hono fohá ʻa e meʻa kotoa ʻoku ʻaʻaná.+ 37 Ko ia naʻe ʻai au ʻe hoku ʻeikí ke u fai ha fakapapau, ʻo ne pehē: ‘Kuo pau ke ʻoua naʻá ke toʻo ha uaifi maʻa hoku fohá mei he ngaahi ʻofefine ʻo e kau Kēnaní, ʻa ia ko honau fonuá ē ʻoku ou nofo aí.+ 38 ʻIkai, ka te ke ʻalu ki he fale ʻo ʻeku tamaí pea ki hoku fāmilí,+ pea kuo pau ke ke toʻo mei ai ha uaifi maʻa hoku fohá.’+ 39 Ka naʻá ku pehē ki hoku ʻeikí: ‘Fēfē kapau heʻikai loto-lelei ʻa e fefiné ia ke haʻu mo au?’+ 40 Naʻá ne pehē mai kiate au: ‘Ko Sihova, ʻa ia kuó u ʻaʻeva ʻi hono ʻaó,+ te ne fekauʻi mai ʻene ʻāngeló+ ke mo ō pea ko e moʻoni te ne ʻai ke lavameʻa ʻa hoʻo fonongá, pea kuo pau ke ke toʻo ha uaifi maʻa hoku fohá mei hoku fāmilí pea mei he fale ʻo ʻeku tamaí.+ 41 ʻE fakaʻatā koe mei hoʻo fuakava kiate aú kapau te ke ʻalu ki hoku fāmilí pea ʻikai te nau ʻoatu ia kiate koe. ʻE fakaʻatā koe ʻe he meʻá ni mei hoʻo fuakavá.’+

42 “ʻI heʻeku aʻu mai ki he vaitupú he ʻaho ní, naʻá ku pehē: ‘ʻE Sihova ko e ʻOtua ʻo hoku ʻeiki ko ʻĒpalahamé, kapau te ke ʻai ʻeku fonongá ke lavameʻa, 43 ko eni ʻoku ou tuʻu ʻi ha vaitupu. Ko e meʻa kuo pau ke hokó ʻa eni, ʻi he taimi ʻe haʻu ai ha finemui+ ke ʻutu vaí, te u pehē ange, “Kātaki muʻa, ʻo tuku ke u inu ha meʻi vai mei hoʻo siaá,” 44 pea te ne pehē mai kiate au, “Ke ke inu, pea te u toe ʻutu ʻa e vai maʻa hoʻo fanga kāmelí.” Tuku ke hoko ʻa e fefine ko iá ko e tokotaha ia kuo fili ʻe Sihova maʻá e foha ʻo hoku ʻeikí.’+

45 “Ki muʻa ke ʻosi ʻeku leá ʻi hoku lotó, ʻiloangé naʻe haʻu ʻa Lepeka mo ʻene siaá ʻi hono umá, pea naʻá ne ʻalu hifo ki he vaitupú ʻo kamata ke ʻutu vai. Naʻá ku pehē ange leva kiate ia: ‘Kātaki muʻa ʻo ʻomai haku inu.’+ 46 Ko ia naʻá ne tuku hifo fakavave ʻa ʻene siaá mei hono umá peá ne pehē: ‘Inu,+ pea te u fakainu foki mo hoʻo fanga kāmelí.’ Ko ia naʻá ku inu leva, pea naʻá ne fakainu foki mo e fanga kāmelí. 47 ʻI he hili iá, naʻá ku ʻeke ange kiate ia, ‘Ko e ʻofefine koe ʻo hai?’ Pea naʻá ne tali mai, ‘Ko e ʻofefine au ʻo Petueli ko e foha ʻo Nēhoa, ʻa ia naʻe fanauʻi ʻe Milika kiate iá.’ Ko ia naʻá ku ʻai ʻa e mamá ki hono ihú mo e ongo vesá ki hono nimá.+ 48 Pea naʻá ku punou ʻo fakatōmapeʻe ʻi he ʻao ʻo Sihová pea fakahīkihikiʻi ʻa Sihova ko e ʻOtua ʻo hoku ʻeiki ko ʻĒpalahamé,+ ʻa ia naʻá ne tataki au ʻi he hala totonú ke toʻo ʻa e ʻofefine ʻo e tokoua ʻo hoku ʻeikí maʻa hono fohá. 49 Pea ko eni tala mai kiate au pe ʻoku mou loto ke fakahaaʻi ʻa e ʻofa mateaki mo e faitōnunga ki hoku ʻeikí; ka ʻo kapau ʻe ʻikai, tala mai kiate au, koeʻuhí ke u fakahoko ai ʻa ē pe ko ē.”*+

50 Naʻe tali ange leva ʻe Lēpani mo Petueli: “Ko e meʻa eni meia Sihova. ʻOku ʻikai te ma lava ke ʻio pe ʻikai kiate koe.* 51 Ko Lepeka ena ʻi ho ʻaó. ʻAve ia pea mo ō, pea tuku ke ne hoko ko ha uaifi ʻo e foha ʻo ho ʻeikí, ʻo hangē tofu pē ko ia kuo folofolaʻaki ʻe Sihová.” 52 ʻI he fanongo ʻa e sevāniti ʻa ʻĒpalahamé ki heʻena leá, naʻá ne punou leva ki he kelekelé ʻi he ʻao ʻo Sihová. 53 Pea naʻe kamata ke toʻo hake ʻe he sevānití ʻa e ngaahi meʻa siliva mo e ngaahi meʻa koula mo e ngaahi teunga ʻo ʻoange ia kia Lepeka, pea naʻá ne foaki ha ngaahi meʻa mahuʻinga ki hono tuongaʻané pea ki heʻene faʻeé. 54 ʻI he hili iá ko ia mo e kau tangata ʻiate iá naʻa nau kai mo inu, pea naʻa nau mohe ai.

ʻI heʻene tuʻu hake ʻi he pongipongí, naʻá ne pehē ange: “Mou tuku au ke u ʻalu ki hoku ʻeikí.” 55 ʻI he meʻá ni naʻe pehē ange ʻe hono tuongaʻané mo ʻene faʻeé: “Tuku mai ʻa e taʻahiné ke ne nofo mo kimautolu ʻi ha ʻaho pē ʻe hongofulu. Peá ne toki ʻalu.” 56 Ka naʻá ne pehē ange kiate kinaua: “ʻOua ʻe taʻofi aú, he ko ē kuo ʻai ʻe Sihova ke lavameʻa ʻa hoku fonongá. Tuku mai au, koeʻuhí ke u ʻalu ki hoku ʻeikí.” 57 Ko ia naʻá na pehē ange: “Tuku ke ma ui mai ʻa e taʻahiné ʻo ʻeke kiate ia.” 58 Naʻá na ui mai ʻa Lepeka ʻo na pehē kiate ia: “Te ke ʻalu mo e tangatá ni?” Naʻá ne tali ange: “ʻOku ou loto-lelei ke u ʻalu.”

59 Ko ia naʻa nau tuku atu ʻa Lepeka+ ko honau tuofefiné mo hono tauhí+ mo e sevāniti ʻa ʻĒpalahamé mo ʻene kau tangatá. 60 Pea naʻa nau tāpuakiʻi ʻa Lepeka mo pehē kiate ia: “ʻA homau tuofefine, ʻofa ke ke hoko ko e faʻē ki he toko laui afe liunga taha mano, pea tuku ke maʻu ʻe ho hakó ʻa e matapā* ʻo e faʻahinga ʻoku fehiʻa kiate kinautolú.”+ 61 Ko Lepeka leva mo hono kau fefine tauhí naʻa nau tuʻu hake, ʻo heka ʻi he fanga kāmelí, pea nau muimui ʻi he tangatá. Ko ia naʻe ʻave ai ʻe he sevānití ʻa Lepeka peá ne fononga leva.

62 Pea naʻe haʻu ʻa ʻAisake mei he hala ʻoku ʻalu ki Pea-lehai-loʻaí,+ he naʻá ne nofo ʻi he feituʻu Nīkepí.+ 63 Pea naʻe luelue atu ʻa ʻAisake ʻi he loto ʻataʻataá ʻi he mamalu nai ʻa e poʻulí ke fai ʻene fakalaulauloto.+ ʻI heʻene hanga haké, ʻāua, naʻá ne vakai atu ki ha fanga kāmeli ʻoku haʻu! 64 ʻI he hanga hake ʻa Lepeká, naʻá ne fakatokangaʻi atu ʻa ʻAisake, pea naʻá ne ʻalu hifo fakavave mei he kāmelí. 65 Naʻá ne ʻeke ange leva ki he sevānití: “Ko hai ʻa e tangata ko ē ʻoku lue mai ʻi he loto ʻataʻataá ke fakafetaulaki mai kiate kitautolú?” Pea naʻe pehē ʻe he sevānití: “Ko hoku ʻeikí ia.” Ko ia naʻá ne toʻo ʻa hono pūloú ʻo ne pūlou ʻaki ia. 66 Pea naʻe tala ange ʻe he sevānití kia ʻAisake ʻa e ngaahi meʻa kotoa naʻá ne faí. 67 ʻI he hili iá naʻe ʻomai ʻe ʻAisake ʻa e fefiné ki he tēniti ʻo Sela ko ʻene faʻeé.+ Ko ia naʻá ne ʻave ai ʻa Lepeka ke hoko ko hono uaifi; pea naʻá ne ʻofa kiate ia,+ pea naʻe maʻu ʻe ʻAisake ʻa e fiemālie hili ʻa e mole atu ʻa ʻene faʻeé.+

25 Ko eni naʻe toe maʻu ʻe ʻĒpalahame ha uaifi, pea ko hono hingoá ko Kētula. 2 ʻI he faai mai ʻa e taimí naʻá ne fanauʻi kiate ia ʻa Similani, Siokasane, Mētani, Mitiani,+ ʻIsipaka, pea mo Suaʻa.+

3 Naʻe hoko ʻa Siokasane ko e tamai ia ʻa Sipa mo Titaní.

Ko e ngaahi foha ʻo Titaní ko ʻAsulimi, Letusi, mo Leumi.

4 Ko e ngaahi foha ʻo Mitianí ko ʻEfa, ʻĒfeli, Hēnoke, ʻApaita, mo ʻElitaʻa.

Ko e faʻahingá ni kotoa ko e fānau ia ʻa Kētulá.

5 Ki mui ai, naʻe foaki ʻe ʻĒpalahame ʻa e meʻa kotoa pē naʻá ne maʻú kia ʻAisake,+ 6 ka naʻe foaki ʻe ʻĒpalahame ki hono ngaahi foha mo ʻene kau sinifú ha ngaahi meʻaʻofa. Pea ʻi he lolotonga ʻene kei moʻuí, naʻá ne fekauʻi atu kinautolu ke nau ʻalu fakahahake, ke nau mamaʻo meia ʻAisake ko hono fohá,+ ki he fonua ʻo e Hahaké. 7 Ko e ngaahi taʻu ʻo e moʻui ʻa ʻĒpalahamé ko e taʻu ʻe 175. 8 Pea naʻe hokotaki ʻa ʻĒpalahame peá ne mate kuó ne toulekeleka ʻaupito, kuó ne motuʻa mo fiemālie, pea naʻe fakatahaʻi ia ki hono kakaí.* 9 Naʻe tanu ia ʻe hono ongo foha ko ʻAisake mo ʻIsimeʻelí ʻi he ʻana ko Makipilá ʻi he kelekele ʻo ʻEfiloni ko e foha ʻo Sohā ko e Hetí ʻa ia ʻoku ofi ki Māmilí,+ 10 ʻa e kelekele naʻe fakatau ʻe ʻĒpalahame mei he ngaahi foha ʻo Hetí. Naʻe tanu ai ʻa ʻĒpalahame, fakataha mo Sela ko hono uaifí.+ 11 ʻI he hili ʻa e mate ʻa ʻĒpalahamé, naʻe hokohoko atu ʻa hono tāpuakiʻi ʻe he ʻOtuá ʻa hono foha ko ʻAisaké,+ pea naʻe nofo ʻa ʻAisake ʻo ofi ki Pea-lehai-loʻai.+

12 Ko e hisitōlia eni ʻo ʻIsimeʻeli+ ko e foha ʻo ʻĒpalahame ʻa ia naʻe fanauʻi ʻe Hekaʻā+ ko e ʻIsipité, ʻa e kaunanga ʻa Selá, kia ʻĒpalahamé.

13 Ko e ngaahi hingoa leva eni ʻo e ngaahi foha ʻo ʻIsimeʻelí, ʻa honau ngaahi hingoá ʻo fakatatau ki he ngaahi tupuʻanga ʻo honau fāmilí: Ko e ʻuluaki foha ʻo ʻIsimeʻelí ko Nēpaiote,+ pea hoko ai ʻa Keta,+ ʻAtapeʻeli, Mipisami,+ 14 Mīsima, Tuma, Masā, 15 Hētati, Teima, Situa, Nāfisi, pea mo Kētema. 16 Ko e ngaahi foha eni ʻo ʻIsimeʻelí, pea ko honau ngaahi hingoá eni ʻo fakatatau ki honau ngaahi nofoʻangá pea fakatatau ki honau ngaahi ʻapitangá,* ko e ngaahi ʻeiki ʻe toko 12 ʻo fakatatau ki honau ngaahi haʻá.+ 17 Pea naʻe moʻui ʻa ʻIsimeʻeli ʻi he taʻu ʻe 137. Pea naʻá ne hokotaki peá ne mate pea naʻe fakatahaʻi ia ki hono kakaí.* 18 Pea naʻa nau nofo mei Havila+ ʻo ofi ki Sula,+ ʻa ia ʻoku ofi ki ʻIsipité, ʻo aʻu ki ʻAsīlia. Naʻá ne nofo ʻo ofi ki hono fanga tokouá kotoa.*+

19 Pea ko e hisitōlia eni ʻo ʻAisake ko e foha ʻo ʻĒpalahamé.+

Naʻe hoko ʻa ʻĒpalahame ko e tamai ia ʻa ʻAisaké. 20 Naʻe taʻu 40 ʻa ʻAisake ʻi heʻene mali mo Lepeka, ko e ʻofefine ʻo Petueli+ ko e tangata Alamea ʻo Petana-lamí, ko e tuofefine ʻo Lēpani ko e tangata Alameá. 21 Pea naʻe toutou kōlenga ʻa ʻAisake kia Sihova ʻo fekauʻaki mo hono uaifí, koeʻuhí he naʻá ne paʻa; ko ia naʻe tali ʻe Sihova ʻa ʻene kolé, pea naʻe hoko ʻa hono uaifi ko Lepeká ʻo feitama. 22 Pea naʻe kamata ke fefaʻuhi ʻa e ongo foha+ ʻi loto ʻiate iá, ko ia naʻá ne pehē ai: “Kapau ko hono ʻātungá eni, ko e hā ke kei hokohoko atu ai ʻeku moʻuí?” Ko ia naʻá ne fai ha fehuʻi kia Sihova. 23 Pea naʻe folofola ʻa Sihova kiate ia: “ʻOku ʻi ho manavá+ ha ongo puleʻanga, pea ʻi loto ʻiate koé+ ʻe māvahevahe mei ai ha ongo kakai; pea ʻe mālohi ange ʻa e puleʻanga ʻe tahá ʻi he puleʻanga ʻe tahá,+ pea ʻe tauhi ʻe he lahí ʻa e siʻí.”+

24 ʻI he hoko mai ʻa e taimi kiate ia ke ne fāʻele aí, vakai, naʻe ʻi hono manavá ha ongo māhanga. 25 Naʻe haʻu leva ki tuʻa ʻa e ʻuluakí ʻoku kulokula ʻatā pea naʻe hangē ha kofu fulufuluʻimanú,+ ko ia naʻá na fakahingoa ia ko ʻĪsoa.*+ 26 ʻI he hili iá, naʻe haʻu ki tuʻa ʻa hono tokouá pea naʻá ne piki ʻi he muivaʻe ʻo ʻĪsoá,+ ko ia naʻe fakahingoa ia ko Sēkope.*+ Naʻe taʻu 60 ʻa ʻAisake ʻi he taimi naʻe fāʻeleʻi ai kinaua ʻe Lepeká.

27 ʻI he lalahi ʻa e ongo tamaiki tangatá, naʻe hoko ʻa ʻĪsoa ko ha tokotaha pōtoʻi tulimanu,+ ko ha tangata taka vao, ka ko Sēkope ko ha tangata taʻemele ia, naʻe nofo tēniti.+ 28 Pea naʻe ʻofa ʻa ʻAisake ʻia ʻĪsoa koeʻuhí naʻá ne ʻomai kiate ia ha manu ke ne kai, lolotonga iá naʻe ʻofa ʻa Lepeka ʻia Sēkope.+ 29 ʻI he taimi ʻe taha naʻe haka ai ʻe Sēkope ha supo feʻunga mo e foki mai ʻa ʻĪsoa mei he vaó kuó ne ongosia. 30 Ko ia naʻe pehē ange ʻe ʻĪsoa kia Sēkope: “Kātaki ʻo fakatoʻotoʻo muʻa, ʻomi ha meʻi meʻa* mei he supo kulokula ʻokú ke maʻu hená,* he kuó u ongosia!”* Ko e ʻuhinga ia naʻe hoko ai hono hingoá ko ʻĪtomí.*+ 31 ʻI he meʻá ni naʻe pehē ange ʻe Sēkope: “ʻUluaki fakatau mai kiate au hoʻo totonu ko e ʻuluaki fohá!”+ 32 Pea naʻe hoko atu ʻa ʻĪsoa ʻo ne pehē: “Ko eni te u mate! Ko e hā hano ʻaonga kiate au ʻa e totonu ki he ʻuluaki fohá?” 33 Pea naʻe hoko atu ʻa Sēkope: “ʻUluaki fai mai ha fakapapau kiate au!” Ko ia naʻá ne fai ha fakapapau kiate ia ʻo ne fakatau ange ʻene totonu ko e ʻuluaki fohá kia Sēkope.+ 34 Naʻe ʻoange leva ʻe Sēkope kia ʻĪsoa ha mā mo e supo piini,* pea naʻá ne kai mo inu, peá ne mālanga hake ʻo ne ʻalu. Ko ia naʻe ʻikai fakamahuʻingaʻi ʻe ʻĪsoa ʻa e totonu ki he ʻuluaki fohá.

26 Pea naʻe ʻi ai ha honge ʻi he fonuá, tuku kehe ʻa e ʻuluaki honge naʻe hoko ʻi he ngaahi ʻaho ʻo ʻĒpalahamé,+ ko ia naʻe ʻalu ai ʻa ʻAisake kia ʻApimeleki ko e tuʻi ʻo e kau Filisitiá, ʻi Kilai. 2 Naʻe hā leva ʻa Sihova kiate ia ʻo ne folofola: “ʻOua te ke ʻalu hifo ki ʻIsipite. Nofo ʻi he fonua te u fakahaaʻi atu kiate koé. 3 Nofo ko ha muli ʻi he fonuá ni,+ pea ʻe hokohoko atu ʻeku ʻiate koé mo tāpuakiʻi koé koeʻuhi te u foaki kiate koe pea ki ho hakó ʻa e ngaahi fonuá ni+ kātoa, pea te u fakahoko ʻa e fuakava naʻá ku fuakavaʻaki kia ʻĒpalahame+ ko hoʻo tamaí: 4 ‘Te u fakatokolahi ho hakó ke hangē ko e ngaahi fetuʻu ʻo e langí;+ pea te u foaki ki ho hakó ʻa e ngaahi fonuá ni+ kātoa; pea fakafou ʻi ho hakó, ʻe maʻu ai ʻe he ngaahi puleʻanga kotoa pē ʻo e māmaní ha tāpuaki moʻonautolu,’+ 5 koeʻuhi ko e moʻoniʻi meʻa ko ia ʻo e fanongo ʻa ʻĒpalahame ki hoku leʻó pea hokohoko atu ʻene tauhi ʻeku ngaahi fiemaʻú, ʻeku ngaahi fekaú, ʻeku ngaahi tuʻutuʻuní, pea mo ʻeku ngaahi laó.”+ 6 Ko ia naʻe hokohoko atu ʻa e nofo ʻa ʻAisake ʻi Kilaí.+

7 ʻI he taimi naʻe toutou fehuʻi ai ʻa e kau tangata ʻo e feituʻú ʻo fekauʻaki mo hono uaifí, naʻá ne pehē: “Ko hoku tuofefine ia.”+ Naʻá ne ilifia ke pehē, “Ko hoku uaifi ia,” he naʻá ne pehē, “ʻE tāmateʻi nai au ʻe he kau tangata ʻo e feituʻú koeʻuhi ko Lepeka,” he naʻe hoihoifua ʻa hono fōtungá.+ 8 ʻI he hili atu ha taimi, ko ʻApimeleki ʻa e tuʻi ʻo e kau Filisitiá naʻá ne sio atu ki tuʻa ʻi he matapā-teké, ʻo ne mamata kia ʻAisake ʻokú ne fakahāhā ʻa e ʻofa kia* Lepeka ko hono uaifí.+ 9 Naʻe ui ʻi he taimi pē ko iá ʻe ʻApimeleki ʻa ʻAisake ʻo ne pehē: “Ko hono moʻoní ko ho uaifi ia! Ko e hā naʻá ke pehē ai, ‘Ko hoku tuofefine iá’?” ʻI he meʻá ni naʻe pehē ʻe ʻAisake kiate ia: “Naʻá ku leaʻaki iá ʻi heʻeku manavahē naʻá ku mate koeʻuhí ko ia.”+ 10 Ka naʻe hoko atu ʻa ʻApimeleki: “Ko e hā kuó ke fai kiate kimautolú?+ Naʻe mei lavangofua pē ha taha ʻo e kakaí ke ne mohe* mo ho uaifí, pea naʻá ke mei ʻai ai kimautolu ke mau halaia!”+ 11 Naʻe tuʻutuʻuni leva ʻa ʻApimeleki ki he kakaí kotoa, ʻo ne pehē: “Ko ha taha pē ʻe ala ki he tangatá ni mo hono uaifí ko e moʻoni te ne mate!”

12 Pea naʻe kamata ke tō ʻe ʻAisake ʻa e tenga ʻi he fonua ko iá, pea ʻi he taʻu ko iá naʻá ne utu ai ʻo liunga 100 ʻa e meʻa naʻá ne toó, he naʻe tāpuakiʻi ia ʻe Sihova.+ 13 Naʻe hoko ʻa e tangatá ni ʻo koloaʻia, pea naʻe hokohoko atu ʻene lakalakaimonuú ʻo aʻu ki heʻene hoko ʻo koloaʻia ʻaupito. 14 Naʻá ne maʻu ʻa e ngaahi tākanga sipi mo e ngaahi tākanga pulu pea mo ha fuʻu kau sevāniti tokolahi,+ pea naʻe kamata ai ke meheka ʻa e kau Filisitiá kiate ia.

15 Ko ia naʻe ʻave ʻe he kau Filisitiá ʻa e kelekele ʻo tanuʻaki ʻa e ngaahi vaitupu kotoa pē naʻe keli ʻe he kau sevāniti ʻa ʻene tamaí ʻi he ngaahi ʻaho ʻo ʻĒpalahamé.+ 16 Naʻe pehē ange leva ʻe ʻApimeleki kia ʻAisake: “Hiki mei homau feituʻú, he kuó ke tupu ʻo mālohi mamaʻo ange ʻiate kimautolu.” 17 Ko ia naʻe hiki ʻa ʻAisake mei ai ʻo ne fokotuʻu ʻapitanga ʻi he teleʻa* ko Kilaí+ pea kamata ke ne nofo ai. 18 Pea naʻe toe keli ʻe ʻAisake ʻa e ngaahi vaitupu ʻa ia naʻe keli ʻi he ngaahi ʻaho ʻo ʻĒpalahame ko ʻene tamaí ka naʻe tanu ʻe he kau Filisitiá ʻi he hili ʻa e mate ʻa ʻĒpalahamé,+ pea naʻá ne ui ia ʻaki ʻa e ngaahi hingoa naʻe ʻai ki ai ʻe heʻene tamaí.+

19 ʻI he taimi naʻe keli ai ʻa e kau sevāniti ʻa ʻAisaké ʻi he teleʻá* naʻa nau ʻilo ai ha vaitupu ko e vai melie. 20 Pea ko e kau tauhi-sipi ʻo Kilaí naʻe kamata ke nau kē mo e kau tauhi-sipi ʻa ʻAisaké, ʻo nau pehē: “Ko e vai ia ʻamautolu!” Ko ia naʻá ne fakahingoa ai ʻa e vaitupú ko ʻEseki,* koeʻuhí he naʻa nau kē mo ia. 21 Pea naʻa nau kamata keli ha vaitupu ʻe taha, pea naʻe kamata ke nau toe kē ai. Ko ia naʻá ne fakahingoa ia ko Sitina.* 22 Ki mui ai, naʻá ne hiki mei ai ʻo ne keli ha toe vaitupu ʻe taha, ka naʻe ʻikai te nau kē ai. Ko ia naʻá ne fakahingoa ia ko Leopote* peá ne pehē: “Koeʻuhi kuo foaki mai eni ʻe Sihova kiate kimautolu ha ʻatā feʻungaʻānoa pea kuó ne ʻai kimautolu ke mau fanafanau ʻi he fonuá.”+

23 Naʻá ne ʻalu hake leva mei ai ki Pea-sipa.+ 24 Naʻe hā ʻa Sihova kiate ia ʻi he pō ko iá ʻo ne folofola: “Ko e ʻOtua au ʻo ʻĒpalahame ko hoʻo tamaí.+ ʻOua te ke ilifia,+ he ʻoku ou ʻiate koe, pea te u tāpuakiʻi koe mo fakatokolahi ho hakó ko e meʻa ʻia ʻĒpalahame ko ʻeku sevānití.”+ 25 Ko ia naʻá ne fokotuʻu ai ha ʻōlita ʻo ne tautapa ki he huafa ʻo Sihová.+ Pea naʻe fokotuʻu ai ʻe ʻAisake ʻa hono tēnití,+ pea naʻe keli ai ha vaitupu ʻe heʻene kau sevānití.

26 Ki mui ai, naʻe haʻu kiate ia ʻa ʻApimeleki mei Kilai fakataha mo ʻAhusati ko ʻene tokotaha faleʻi ʻaʻaná mo Fikoli ko e ʻeiki ʻo ʻene kau taú.+ 27 ʻI he meʻá ni naʻe pehē ange ʻe ʻAisake kiate kinautolu: “Ko e hā kuo mou omi ai kiate aú, he vakai naʻa mou fehiʻa kiate au pea naʻa mou fekauʻi au ke u mavahe mei homou feituʻú?” 28 ʻI he meʻá ni, naʻa nau pehē: “Kuo hā mahino kiate kimautolu ʻa e kau ʻa Sihova mo koé.+ Ko ia naʻa mau pehē ai, ‘Tuku muʻa ke ʻi ai ha tukupā ʻi he vahaʻa ʻo kimautolu mo koé, pea tuku ke mau fai ha fuakava mo koe+ 29 ʻe ʻikai te ke fai ha kovi ʻe taha kiate kimautolu ʻo hangē pē ko e ʻikai te mau fai ha kovi kiate koé, ʻi he vakai ko e lelei pē kuo mau fai kiate koé ʻi heʻemau fekauʻi atu koe ke ke mavahe ʻi he fiemālie. Ko eni, ko koe ʻa e tokotaha ʻoku faitāpuekina ʻe Sihová.’” 30 Ko ia naʻá ne ʻai ha kātoanga kai maʻanautolu, pea naʻa nau kai mo inu. 31 ʻI he pongipongi haké naʻa nau tuʻu hengihengia pea nau fefuakavaʻaki.+ Hili iá, naʻe fekauʻi atu kinautolu ʻe ʻAisake ke nau ō, pea naʻa nau ʻalu atu meiate ia ʻi he fiemālie.

32 ʻI he ʻaho ko iá naʻe haʻu ʻa e kau sevāniti ʻa ʻAisaké ʻo nau fakamatala kiate ia ʻo fekauʻaki mo e vaitupu naʻa nau kelí,+ pea naʻa nau tala ange kiate ia: “Kuo mau maʻu ha vai!” 33 Ko ia naʻá ne fakahingoa ia ko Sipa. Ko e ʻuhinga ia ko Pea-sipa+ ai ʻa e hingoa ʻo e koló ʻo aʻu mai ki he ʻaho ní.

34 ʻI he taʻu 40 ʻa ʻĪsoá, naʻá ne maʻu ʻa Siutiti ke hoko ko hono uaifi ko e ʻofefine ʻo Peʻeli ko e Hetí pea mo Pasimati foki ko e ʻofefine ʻo ʻĒloni ko e Hetí.+ 35 Naʻá na hoko ko ha tupuʻanga ʻo e mamahi lahi* kia ʻAisake mo Lepeka.+

27 Pea ʻi he taimi naʻe motuʻa ai ʻa ʻAisake pea fuʻu vaivai ʻa ʻene sió, naʻá ne ui mai kiate ia ʻa ʻĪsoa+ ko hono foha lahí peá ne pehē: “ʻE hoku foha!” Naʻá ne tali mai: “Ko au eni!” 2 Pea naʻá ne hoko atu ʻo pehē: “Ko eni kuó u motuʻa. ʻOku ʻikai te u ʻiloʻi ʻa e ʻaho te u mate aí. 3 Ko ia ʻi he taimi ko ení, kātaki muʻa ʻo toʻo ʻa hoʻo naunau tulimanú, ʻa hoʻo faʻoʻanga ngahaú mo hoʻo kaufaná, peá ke ʻalu ki he vaó ʻo tuli mai ha manu kaivao maʻaku.+ 4 Pea ngaohi ʻa e meʻakai ifo ko ē ʻoku ou ifoʻia aí pea ʻomai ia kiate au. Pea te u kai ia koeʻuhi ke u tāpuakiʻi ai koe ki muʻa ke u maté.”

5 Kae kehe, naʻe fanongo mai ʻa Lepeka ʻi he lolotonga ʻa e lea ʻa ʻAisake kia ʻĪsoa ko hono fohá. Pea naʻe ʻalu atu ʻa ʻĪsoa ki he vaó ke tuli ha manu pea ke ʻomai ia.+ 6 Pea naʻe pehē ʻe Lepeka kia Sēkope ko ʻene tamá:+ “Ko e toki ʻosi eni ʻeku fanongo atu ki he lea ʻa hoʻo tamaí kia ʻĪsoa ko ho tokouá, ʻo pehē, 7 ‘ʻOmai kiate au ha manu pea ngaohi maʻaku ha meʻakai ifo. Pea tuku ke u kai ia koeʻuhi ke u tāpuakiʻi ai koe ʻi he ʻao ʻo Sihová ki muʻa ke u maté.’+ 8 Pea ko eni, ʻeku tama, fanongo lelei pea fai ʻa e meʻa te u fakahinohino atú.+ 9 Kātaki muʻa ʻo ʻalu ki he tākangá pea ʻomai kiate au ʻa e kiʻi kosi ʻe ua lelei tahá mei he fanga kosi aí koeʻuhí ke u teuteuʻi mei ai ha meʻakai ifo maʻa hoʻo tamaí, ʻo hangē tofu pē ko ia ʻokú ne ifoʻia aí. 10 Pea ʻave leva ia ki hoʻo tamaí ke ne kai, koeʻuhí ke ne tāpuakiʻi ai koe ki muʻa ke ne maté.”

11 Naʻe pehē ange ʻe Sēkope kia Lepeka ko ʻene faʻeé: “Ka ko ʻĪsoa ko hoku tokouá ko ha tangata fulufulua ia,+ pea ko hoku kili ʻoʻokú ʻoku molemole. 12 Fēfē kapau ʻe fāfā mai ʻa ʻeku tamaí kiate au?+ ʻE hā moʻoni leva ai ʻoku ou fakakataʻaki ia, pea te u ʻomai ai kiate au ha mala kae ʻikai ko ha tāpuaki.” 13 ʻI he meʻá ni naʻe pehē ange ʻe heʻene faʻeé kiate ia: “Ke tō kiate au ʻa e mala naʻe ʻuhinga kiate koé siʻeku tama. Fai pē ʻa e meʻa ʻoku ou tala atú peá ke ʻalu ʻo ʻomai ʻa e ongo kiʻi kosí kiate au.”+ 14 Ko ia naʻá ne ʻalu ʻo puke mai kinaua ʻo ʻomai ki heʻene faʻeé, pea naʻe ngaohi ʻe heʻene faʻeé ha meʻakai ifo, ʻo hangē tofu pē ko ia naʻe ifoʻia ai ʻa ʻene tamaí. 15 ʻI he hili iá, naʻe toʻo ʻe Lepeka ʻa e ngaahi teunga lelei taha ʻo ʻĪsoa ko ʻene tamasiʻi lahí, ʻa ia naʻá ne maʻu ʻi he falé, ʻo ʻai ia kia Sēkope+ ko ʻene tama siʻisiʻí. 16 Naʻá ne toe ʻai ʻa e kili ʻo e ongo kiʻi kosí ʻi hono ongo nimá pea ʻi he konga ʻikai fulufulua ʻo hono kiá.+ 17 Naʻá ne ʻoange leva ʻa e meʻakai ifó mo e mā naʻá ne ngaohí kia Sēkope ko hono fohá.+

18 Ko ia naʻá ne hū ki heʻene tamaí ʻo ne pehē: “ʻAlā tamai,” ʻa ia naʻá ne pehē mai: “Ko au eni! Ko hai koe, ʻe hoku foha?” 19 Naʻe pehē ange ʻe Sēkope ki heʻene tamaí: “Ko au ʻĪsoa ko ho ʻuluaki fohá.+ Kuó u fai ʻa e meʻa tofu pē ko ia naʻá ke tala maí. Kātaki muʻa ʻo tangutu hake ʻo kai ha meʻa mei he manu naʻá ku ʻomaí, koeʻuhí ke ke tāpuakiʻi ai au.”+ 20 ʻI he meʻa ko iá naʻe pehē ange ʻe ʻAisake ki hono fohá: “Naʻe anga-fēfē ʻa e fuʻu vave pehē hoʻo maʻu iá, ʻe hoku foha?” Naʻá ne tali ange: “Koeʻuhí ko Sihova ko ho ʻOtuá naʻá ne ʻomai ia kiate au.” 21 Naʻe pehē ange leva ʻe ʻAisake kia Sēkope: “Kātaki muʻa ʻo ʻunuʻunu mai ke ofi, ke u lava ʻo fāfā atu kiate koe, ʻe hoku foha, ke ʻiloʻi pe ko hoku foha moʻoni koe ko ʻĪsoá pe ʻikai.”+ 22 Ko ia naʻe ʻunuʻunu ofi atu ʻa Sēkope kia ʻAisake ko ʻene tamaí, pea naʻá ne fāfā kiate ia, ʻo ne pehē ʻi he hili iá: “Ko e leʻó ko e leʻo ʻo Sēkopé, ka ko e nimá ko e nima ʻo ʻĪsoá.”+ 23 Naʻe ʻikai te ne ʻiloʻi ia koeʻuhí ko hono nimá naʻe fulufulua ʻo hangē ko e nima ʻo ʻĪsoa ko hono tokouá. Ko ia naʻá ne tāpuakiʻi ia.+

24 ʻI he hili iá, naʻá ne ʻeke ange: “Ko hoku foha moʻoni koe ko ʻĪsoá?” Ko ia naʻá ne tali ange: “Ko au ia.” 25 Naʻá ne pehē ange leva: “ʻOmai kiate au ha meʻa mei he manu kaivaó ke u kai, ʻe hoku foha, pea te u tāpuakiʻi leva koe.” ʻI he meʻa ko iá naʻá ne ʻomai ia kiate ia pea naʻá ne kai, pea naʻá ne ʻomai kiate ia ʻa e uaine pea naʻá ne inu. 26 Naʻe pehē ange leva ʻe ʻAisake ko ʻene tamaí kiate ia: “Kātaki muʻa ʻo ʻunuʻunu mai ke ofi, pea ʻuma mai kiate au, ʻe hoku foha.”+ 27 Ko ia naʻá ne ʻunuʻunu ofi atu ʻo ʻuma kiate ia, pea naʻe lava ke ne nāmuʻi ʻa e nanamu ʻo hono ngaahi teungá.+ Pea naʻá ne tāpuakiʻi leva ia ʻo ne pehē:

“Vakai, ko e nanamu ʻo hoku fohá ʻoku hangē ko e nanamu ʻo e vao ʻa ia kuo tāpuakiʻi ʻe Sihová. 28 ʻOfa ke ʻoatu ʻe he ʻOtua moʻoní kiate koe ʻa e ngaahi hahau ʻo e langí+ mo e kelekele mahu ʻo e māmaní+ pea mo ha uite lahi mo e uaine foʻou.+ 29 Tuku ke tauhi kiate koe ʻa e ngaahi kakaí, pea tuku ke punou hifo ʻa e ngaahi puleʻangá kiate koe. Ke ke hoko ko e pule ki ho fanga tokouá, pea tuku ke punou hifo kiate koe+ ʻa e fānau ʻa hoʻo faʻeé. Ke malaʻia ʻa e tokotaha kotoa ʻokú ne fakamalaʻiaʻi koé, pea ke faitāpuekina ʻa e tokotaha kotoa ʻokú ne tāpuakiʻi koé.”+

30 Pea ʻi he toki ʻosi atu pē hono tāpuakiʻi ʻe ʻAisake ʻa Sēkopé, pea ko e toki mavahe atu pē ia ʻa Sēkope mei he ʻao ʻo ʻAisake ko ʻene tamaí mo e foki mai ʻa ʻĪsoa ko hono tokouá mei heʻene tulimanú.+ 31 Naʻá ne teuteu ʻe ia foki ha meʻakai ifo ʻo ʻomai ki heʻene tamaí, peá ne pehē ange ki heʻene tamaí: “Tuku ke tuʻu hake ʻa ʻeku tamaí ʻo kai ha meʻa mei he manu ʻa hono fohá, koeʻuhí ke ke tāpuakiʻi ai au.” 32 ʻI he meʻá ni naʻe pehē ange ʻe ʻAisake ko ʻene tamaí kiate ia: “Ko hai koe?” Pea naʻá ne pehē ki ai: “Ko au ʻa ho fohá, ʻa ho ʻuluaki foha ko ʻĪsoá.”+ 33 Pea naʻe kamata ke tete lahi ʻaupito ʻa ʻAisake, ko ia naʻá ne pehē: “Ko hai leva ia naʻá ne tuli ha manu ʻo ʻomai kiate aú? Kuó u ʻosi kai ia ki muʻa ke ke aʻu maí, pea naʻá ku tāpuakiʻi ia—pea ko e moʻoni ʻe faitāpuekina ia!”

34 ʻI he fanongo ki he ngaahi lea ʻa ʻene tamaí, naʻe kamata ke tangi leʻo-lahi ʻaupito ʻi he mamahi ʻa ʻĪsoa peá ne pehē ki heʻene tamaí: “Tāpuakiʻi au, ʻio, ʻa au foki, ʻalā tamai!”+ 35 Ka naʻá ne pehē ange: “Naʻe haʻu ʻi he kākā ʻa ho tokouá ke lava ai ʻo ne maʻu ʻa e tāpuaki naʻe ʻuhinga kiate koé.” 36 ʻI he meʻá ni naʻá ne pehē: “ʻIkai naʻe tonu ʻa hono fakahingoa ia ko Sēkopé,* ʻo tuʻo uá ni hake pē ai ʻa ʻene fetongi aú?+ Ko ʻeku totonu ki he ʻuluaki fohá kuó ne ʻosi toʻo,+ pea ko eni kuó ne toʻo ʻa hoku tāpuakí!”+ Pea naʻá ne hoko atu leva: “Kuo ʻikai koā te ke tuku mai ʻe koe ha tāpuaki maʻaku?” 37 Ka naʻe tali ange ʻe ʻAisake kia ʻĪsoa: “Ko eni kuó u fakanofo ia ke pule kiate koe,+ pea ko e kotoa ʻo hono fanga tokouá kuó u tuku kiate ia ke nau hoko ko ʻene kau sevāniti, pea kuó u tuku ʻa e uite mo e uaine foʻou ke tauhi ʻaki ia.+ Ko e hā ʻoku toe ʻa ia ʻe lava ke u fai maʻaú, ʻe hoku foha?”

38 Naʻe pehē ange ʻe ʻĪsoa ki heʻene tamaí: “ʻOku ʻi ai pē ā ha tāpuaki ʻe taha ʻokú ke maʻu, ʻalā tamai? Tāpuakiʻi au, ʻio, ʻa au foki, ʻalā tamai!” ʻI he meʻa ko iá naʻe tangi leʻo-lahi ʻa ʻĪsoa ʻo ne tangi-ʻa-loʻimata.+ 39 Ko ia naʻe tali ange ʻe ʻAisake ko ʻene tamaí kiate ia:

“Vakai, ko ho nofoʻangá ʻe mamaʻo mei he ngaahi kelekele mahu ʻo e māmaní, pea ʻe mamaʻo mei he hahau ʻo e langí ʻi ʻolungá.+ 40 Pea te ke moʻui ʻi hoʻo heletaá,+ pea te ke tauhi ʻa ho tokouá.+ Ka ʻi he taimi ʻe hoko ai ʻo ʻikai te ke maʻu ha nongá, te ke motuhi moʻoni ai ʻa ʻene ʻioké mei ho kiá.”+

41 Kae kehe, naʻe tukulotoa ʻe ʻĪsoa ʻa e tāufehiʻa kia Sēkope koeʻuhi ko e tāpuaki naʻe fai ʻe heʻene tamaí kiate iá,+ pea naʻe hanganaki pehē loto pē ʻe ʻĪsoa: “Ko e ngaahi ʻaho ʻo hono tengihia ʻa ʻeku tamaí ʻoku ofí ni mai.+ ʻI he hili iá, te u tāmateʻi ʻa Sēkope ko hoku tokouá.” 42 ʻI hono tala kia Lepeka ʻa e ngaahi lea ʻa ʻĪsoa ko ʻene tamasiʻi lahí, naʻá ne fekau leva ke haʻu ʻa Sēkope ko ʻene tama siʻisiʻí peá ne pehē kiate ia: “Vakai! Ko ʻĪsoa ko ho tokouá ʻokú ne palani ke fai ha sāuni ʻaki hano tāmateʻi koe.* 43 Pea ko eni, ʻeku tama, fai ʻa e meʻa ʻoku ou tala atú. Tuʻu hake ʻo hola kia Lēpani ko hoku tuongaʻané ki Hālani.+ 44 Nofo mo ia ʻi ha vahaʻa taimi kae ʻoua ke holo hifo ʻa e ʻita lahi ʻa ho tokouá, 45 kae ʻoua ke holo hifo ʻa e ʻita ʻa ho tokouá kiate koé pea ngalo ʻiate ia ʻa e meʻa kuó ke fai kiate iá. Pea te u fekau atu leva kiate koe ke ke haʻu mei ai. Ko e hā ke mo fakatou mole ai meiate au ʻi he ʻaho pē ʻe taha?”

46 ʻI he hili iá, naʻe hanganaki pehē ʻe Lepeka kia ʻAisake: “ʻOku ou kinaʻia ʻi heʻeku moʻuí koeʻuhi ko e ongo ʻofefine ʻo Hetí.+ Kapau ʻe faifai ange pea maʻu ʻe Sēkope hano uaifi mei he ngaahi ʻofefine ʻo Hetí, hangē ko e ongo ʻofefine ko eni ʻo e fonuá, ko e hā hano ʻaonga ʻo ʻeku moʻuí?”+

28 Ko ia naʻe ui mai ʻe ʻAisake ʻa Sēkope ʻo ne tāpuakiʻi ia peá ne tuʻutuʻuni kiate ia, ʻo pehē: “Kuo pau ke ʻoua naʻá ke maʻu ha uaifi mei he ngaahi ʻofefine ʻo Kēnaní.+ 2 Ke ke ʻalu ki Petana-lami ki he fale ʻo Petuelí, ko e tamai ʻa hoʻo faʻeé, pea ke maʻu mei ai hao uaifi mei he ngaahi ʻofefine ʻo Lēpani,+ ko e tuongaʻane ʻo hoʻo faʻeé. 3 Ko e ʻOtua Māfimafi-Aoniú te ne tāpuakiʻi koe pea ʻai koe ke ke fanafanau mo fakatokolahi, pea te ke hoko moʻoni ko ha fakatahaʻanga ʻo e ngaahi kakai.+ 4 Pea te ne foaki kiate koe ʻa e tāpuaki ʻo ʻĒpalahamé,+ kiate koe pea ki ho hako ʻoku ʻiate koé, koeʻuhi ke ke maʻu ʻa e fonua ʻa ia kuó ke nofo ai ko ha mulí, ʻa ia kuo foaki ʻe he ʻOtuá kia ʻĒpalahamé.”+

5 Ko ia naʻe fekau atu ʻe ʻAisake ʻa Sēkope ke ne ʻalu, pea naʻá ne mavahe ki Petana-lami, kia Lēpani ko e foha ʻo Petueli ko e tangata Alameá,+ ko e tuongaʻane ʻo Lepeka,+ ko e faʻē ʻa Sēkope mo ʻĪsoá.

6 Naʻe vakai ʻa ʻĪsoa kuo tāpuakiʻi ʻe ʻAisake ʻa Sēkope pea kuó ne fekauʻi ia ke ʻalu ki Petana-lami ke maʻu ha uaifi mei ai pea ʻi heʻene tāpuakiʻi iá, naʻá ne tuʻutuʻuni kiate ia, “ʻOua naʻá ke maʻu ha uaifi mei he ngaahi ʻofefine ʻo Kēnaní,”+ 7 pea naʻe talangofua ʻa Sēkope ki heʻene tamaí mo ʻene faʻeé peá ne mavahe ki Petana-lami.+ 8 Naʻe ʻiloʻi leva ai ʻe ʻĪsoa ko e ngaahi ʻofefine ʻo Kēnaní naʻe ʻikai leleiʻia ai ʻa ʻAisake+ ko ʻene tamaí, 9 ko ia naʻe ʻalu ai ʻa ʻĪsoa kia ʻIsimeʻeli ʻo ne maʻu ko hono uaifi ʻa Mahalati ko e ʻofefine ʻo e foha ʻo ʻĒpalahame ko ʻIsimeʻelí, ko e tuofefine ʻo Nēpaioté, ʻo tānaki atu ki hono ongo uaifi kehe naʻá ne ʻosi maʻú.+

10 Naʻe mavahe ʻa Sēkope mei Pea-sipa pea hokohoko atu ai pē ʻene ʻalú ki Hālani.+ 11 Faifai atu pē naʻá ne aʻu ki ha feituʻu peá ne teuteu ke mohe ai koeʻuhi kuo tō ʻa e laʻaá. Ko ia naʻá ne toʻo ha taha ʻo e ngaahi maka ʻo e feituʻu ko iá ʻo ne fokotuʻu ia ke ʻolunga ki ai hono ʻulú peá ne tokoto hifo ai.+ 12 Hili iá naʻá ne misi, pea vakai, tā naʻe ʻi ai ha kakaʻanga* naʻe fokotuʻu ʻi he māmaní, pea naʻe aʻu hake ki he langí; pea naʻe ʻalu hake mo ʻalu hifo ai ʻa e kau ʻāngelo ʻa e ʻOtuá.+ 13 Pea vakai, naʻe ʻafio ʻa Sihova ʻi ʻolunga ai, peá ne folofola mai:

“Ko au Sihova ko e ʻOtua ʻo ʻĒpalahame ko hoʻo tamaí pea ko e ʻOtua ʻo ʻAisake.+ Ko e fonua ʻa ia ʻokú ke tokoto aí, te u foaki ia kiate koe pea ki ho hakó.+ 14 Pea ko ho hakó te nau hoko moʻoni ʻo hangē ko e efu ʻo e māmaní,+ pea te ke mafola atu ki he hihifó pea ki he hahaké pea ki he tokelaú pea ki he tongá, pea fakafou ʻiate koe pea fakafou ʻi ho hakó, ko e ngaahi fāmili kotoa pē ʻo e māmaní ʻe tāpuakiʻi moʻoni ai kinautolu.*+ 15 ʻOku ou ʻiate koe, pea te u maluʻi koe ʻi ha feituʻu pē te ke ʻalu ki ai, pea te u fakafoki mai koe ki he fonuá ni.+ ʻE ʻikai te u liʻaki koe kae ʻoua kuó u fai ʻa e meʻa kuó u talaʻofaʻaki kiate koé.”+

16 Naʻe ʻā hake leva ʻa Sēkope mei heʻene mohé ʻo ne pehē: “Ko e moʻoni ʻoku ʻi he feituʻú ni ʻa Sihova, pea naʻe ʻikai te u ʻiloʻi ia.” 17 Pea naʻá ne hoko ʻo manavahē peá ne hoko atu: “He fakamanavahē moʻoni ē ko e feituʻú ni! Ko e fale pē eni ia ʻo e ʻOtuá,+ pea ko e matapā eni ʻo e langí.”+ 18 Ko ia naʻe tuʻu pongipongia hake ʻa Sēkope ʻo ne toʻo ʻa e maka ʻa ia naʻe ʻolunga ai hono ʻulú peá ne fokotuʻu ia ko ha pou ʻo ne lilingi ha lolo ʻi ʻolunga ai.+ 19 Ko ia naʻá ne ui ʻa e feituʻu ko iá ko Pēteli,* ka ko e hingoa ki muʻa ʻo e koló ko Lusa.+

20 Naʻe fai leva ʻe Sēkope ha fuakava, ʻo ne pehē: “Kapau ʻe hokohoko atu ʻa e kau ʻa e ʻOtuá mo aú ʻo ne maluʻi au ʻi heʻeku fonongá peá ne foaki mai kiate au ha mā ke u kai mo ha ngaahi kofu ke u tui 21 peá u foki ʻi he fiemālie ki he fale ʻo ʻeku tamaí, tā ʻe fakamoʻoniʻi moʻoni ai ʻe Sihova ʻa ʻene hoko ko hoku ʻOtuá. 22 Pea ko e maka ko eni ʻa ia kuó u fokotuʻu ko ha poú ʻe hoko ia ko ha fale ʻo e ʻOtuá,+ pea ko e moʻoni te u ʻoatu kiate koe ha vahe hongofulu ʻo e meʻa kotoa pē te ke foaki kiate aú.”

29 ʻI he hili iá, naʻe toe hoko atu ʻa e fononga ʻa Sēkopé ʻo ne ʻalu ki he fonua ʻo e kakai ʻo e Hahaké. 2 Pea naʻá ne sio ki ha vaitupu ʻi he feituʻu kaikaiʻangá pea mo ha tākanga sipi ʻe tolu ʻoku nau tākoto ʻo ofi atu ki ai, koeʻuhí he naʻa nau faʻa fakainu mei he vaitupu ko iá ʻa e ngaahi tākangá. Naʻe ʻi ai ha fuʻu maka ʻi he ngutu ʻo e vaitupú. 3 ʻI he fakatahataha kotoa ki ai ʻa e ngaahi tākangá, naʻa nau tekaʻi leva ʻa e maká mei he ngutu ʻo e vaitupú, pea naʻa nau fakainu ʻa e ngaahi tākangá, ʻi he hili iá naʻa nau fakafoki ʻa e maká ki hono tukuʻangá ʻi he ngutu ʻo e vaitupú.

4 Ko ia naʻe pehē ange ʻe Sēkope kiate kinautolu: “ʻE hoku fanga tokoua, ko hoʻomou omí mei fē?” Pea naʻa nau pehē ange: “Ko ʻemau omí mei Hālani.”+ 5 Naʻá ne pehē ange kiate kinautolu: “ʻOku mou ʻilo ʻa Lēpani+ ko e mokopuna ʻo Nēhoá?”+ Pea naʻa nau pehē ki ai: “ʻOku mau ʻilo ia.” 6 ʻI he meʻá ni naʻá ne pehē kiate kinautolu: “ʻOkú ne sai pē?” Naʻa nau tali ange: “ʻOkú ne sai pē. Pea ko Lesieli+ ena ko hono ʻofefiné ʻokú ne haʻu mo e fanga sipí!” 7 Naʻá ne pehē ange leva: “ʻOku kei hoʻatā mālie. ʻOku ʻikai ko e taimi eni ki hono fakatahatahaʻi ʻa e ngaahi tākangá. Fakainu ʻa e fanga sipí, pea mou ō leva ʻo fafanga kinautolu.” 8 ʻI he meʻá ni naʻa nau pehē ange: “ʻOku ʻikai ngofua ke mau fai ia kae ʻoua ke fakatahataha kotoa mai ʻa e ngaahi tākangá pea nau tekaʻi ʻa e maká mei he ngutu ʻo e vaitupú. Hili iá, pea mau fakainu leva ʻa e fanga sipí.”

9 Lolotonga ʻene kei talanoa mo kinautolú, naʻe haʻu ʻa Lesieli mo e fanga sipi ʻa ʻene tamaí, he ko ha taʻahine tauhi-sipi ia. 10 ʻI he sio ʻa Sēkope kia Lesieli ko e ʻofefine ʻo Lēpani ko e tuongaʻane ʻo ʻene faʻeé pea mo e fanga sipi ʻa Lēpaní, naʻe ʻunuʻunu atu leva ʻa Sēkope ʻo ne tekaʻi ʻa e maká mei he ngutu ʻo e vaitupú peá ne fakainu ʻa e fanga sipi ʻa Lēpani ko e tuongaʻane ʻo ʻene faʻeé. 11 Naʻe ʻuma leva ʻa Sēkope kia Lesieli pea hiki hake hono leʻó ʻo ne tangi leʻo-lahi. 12 Pea naʻe kamata ke fakahā ange ʻe Sēkope kia Lesieli ko e kāinga* ia ʻo ʻene tamaí pea ko e tama ia ʻa Lepeka. Pea naʻá ne lele leva ʻo tala ki heʻene tamaí.

13 ʻI he fanongo pē ʻa Lēpani+ ki he fakamatala fekauʻaki mo Sēkope ko e tama ʻa hono tuofefiné, naʻá ne lele atu ke fakafetaulaki kiate ia. Naʻá ne fāʻofua ʻiate ia ʻo ne ʻuma kiate ia pea ʻomai ia ki hono falé. Pea naʻe kamata ke ne tala kia Lēpani ʻa e ngaahi meʻa kotoa ko ení. 14 Naʻe pehē ange ʻe Lēpani kiate ia: “Ko hoku hui mo hoku kakano moʻoni koe.”* Ko ia naʻá ne nofo mo ia ʻi ha māhina kakato.

15 Naʻe pehē ange leva ʻe Lēpani kia Sēkope: “ʻOku totonu koā ke ke ngāue taʻetotongi mai kiate au, koeʻuhí pē ko hoku kāinga*+ koe? Tala mai, ko e hā ʻa e totongi+ ʻe ʻoatú?” 16 Pea naʻe ʻi ai ʻa e ongo ʻofefine ʻo Lēpani. Ko e hingoa ʻo e lahí ko Lia, pea ko e hingoa ʻo e siʻí ko Lesieli.+ 17 Ka naʻe ʻikai ke mata lelei ʻa Lia, lolotonga iá ko Lesielí naʻá ne hoko ko ha fefine hoihoifua ʻaupito mo fakaʻofoʻofa. 18 Naʻe ʻofa ʻa Sēkope ʻia Lesieli, ko ia naʻá ne pehē: “ʻOku ou loto-lelei ke ngāue kiate koe ʻi he taʻu ʻe fitu koeʻuhi ko Lesieli+ ko ho ʻofefine siʻisiʻí.” 19 ʻI he meʻá ni naʻe pehē ange ʻe Lēpani: “ʻOku lelei ange kiate au ke u foaki ia kiate koe ʻi haʻaku foaki ia ki ha tangata kehe. Hokohoko atu ai pē hoʻo nofo mo aú.” 20 Pea naʻe ngāue ʻa Sēkope ʻi he taʻu ʻe fitu koeʻuhi ko Lesieli,+ ka ʻi heʻene vakaí naʻe hangē pē ia ha ngaahi ʻaho siʻí koeʻuhi ko ʻene ʻofa ʻiate iá.

21 Naʻe pehē ange leva ʻe Sēkope kia Lēpani: “ʻOmi hoku uaifí koeʻuhí he kuo kakato hoku ngaahi ʻahó, pea tuku ke u mohe* mo ia.” 22 ʻI he meʻa ko iá naʻe fakatahatahaʻi ʻe Lēpani ʻa e kau tangata kotoa pē ʻo e feituʻú ʻo ne fai ha kātoanga kai. 23 Ka ʻi he lolotonga ʻa e efiafí, naʻe tafoki hake ia ʻo ne toʻo ʻa hono ʻofefine ko Liá ʻo ne ʻomi ia kiate ia koeʻuhí ke ne mohe mo ia. 24 Naʻe ʻoange foki ʻe Lēpani ʻa Silipa ko ʻene kaunangá kia Lia ko hono ʻofefiné ke hoko ko ʻene kaunanga.+ 25 ʻI he pongipongi haké naʻe vakai ʻa Sēkope tā ko Lia ia! Ko ia naʻá ne pehē ange kia Lēpani: “Ko e hā kuó ke fai kiate aú? ʻIkai ko Lesieli naʻá ku ngāue ai kiate koé? Ko e hā kuó ke kākaaʻi ai aú?”+ 26 ʻI he meʻá ni naʻe pehē ange ʻe Lēpani: “ʻOku ʻikai ko homau anga ia hení ke ʻoatu ʻa e siʻí ki muʻa ia ʻi he lahí. 27 Nofo ke kakato ʻa e uiké mo e fefiné ni. ʻI he hili iá, ʻe ʻoatu foki kiate koe ʻa e fefine ko eni ʻe tahá ka ke ngāue mai leva kiate au ʻi ha toe taʻu ʻe fitu.”+ 28 Naʻe fai pehē ʻa Sēkope ʻo ne nofo ke kakato ʻa e uiké mo e fefiné ni, ʻi he hili iá naʻá ne ʻoange kiate ia ʻa Lesieli ko hono ʻofefiné ke hoko ko hono uaifi. 29 ʻIkai ko ia pē, naʻe ʻoange ʻe Lēpani ʻa Pilā+ ko ʻene kaunangá kia Lesieli ko hono ʻofefiné ke hoko ko ʻene kaunanga.+

30 Pea naʻe toe mohe ʻa Sēkope mo Lesieli, pea naʻá ne ʻofa ʻia Lesieli ʻo lahi ange ia ʻi heʻene ʻofa ʻia Liá, pea naʻá ne ngāue kia Lēpani ʻi ha toe taʻu ʻe fitu.+ 31 ʻI he vakai ʻa Sihova naʻe ʻikai ke ʻofaʻi* ʻa Liá, naʻá ne ʻai leva ia ke ne malava ʻo feitama,*+ ka ko Lesielí naʻá ne paʻa.+ 32 Ko ia naʻe hoko ʻa Lia ʻo feitama peá ne fāʻeleʻi ha tama tangata ʻo ne fakahingoa ia ko Lūpeni,*+ he naʻá ne pehē: “Koeʻuhí kuo ʻafioʻi ʻe Sihova ʻa ʻeku mamahí,+ he ko eni ʻe kamata ke ʻofa ʻiate au ʻa hoku husepānití.” 33 Pea naʻá ne toe hoko ʻo feitama ʻo ne fāʻeleʻi ha tama tangata peá ne pehē leva: “Koeʻuhí kuo fanongo mai ʻa Sihova, he naʻe ʻikai ke ʻofaʻi au, ko ia kuó ne foaki mai foki kiate au ʻa e tokotahá ni.” Pea naʻá ne fakahingoa ia ko Simione.*+ 34 Pea naʻá ne toe feitama foki ʻo ne fāʻeleʻi ha tama tangata peá ne pehē leva: “Ko eni ʻi he taimi ní ʻe kau mai leva kiate au ʻa hoku husepānití, he kuó u fāʻeleʻi kiate ia ha fānau tangata ʻe toko tolu.” Ko ia ai, naʻe fakahingoa ia ko Līvai.*+ 35 Pea naʻá ne toe hoko ʻo feitama ʻo ne fāʻeleʻi ha tama tangata peá ne pehē leva: “ʻI he taimi ko ení te u fakahīkihikiʻi ʻa Sihova.” Ko ia naʻá ne fakahingoa ai ia ko Siuta.*+ ʻI he hili iá, naʻe kiʻi tuʻu ai ʻa ʻene fāʻelé.

30 ʻI he vakai ʻa Lesieli kuo ʻikai te ne fanau kia Sēkopé, naʻá ne hoko ʻo meheka ki hono tokouá pea kamata ke ne pehē kia Sēkope: “ʻOmai haʻaku fānau he ka ʻikai te u mate.” 2 ʻI he meʻa ko ení naʻe ʻita lahi ʻaupito ʻa Sēkope kia Lesieli, pea naʻá ne pehē: “He ʻoku ou ʻi he tuʻunga ʻo e ʻOtuá, ʻa ia kuó ne taʻofi koe mei hono maʻu ha fānaú?”* 3 Ko ia naʻá ne pehē ange: “Ko ena ʻa ʻeku kaunanga ko Pilaá.+ Mohe* mo ia koeʻuhí ke ne fanauʻi ha fānau maʻaku* pea fakafou ʻiate ia, ko au foki ʻe lava ke u maʻu ai ha fānau.” 4 ʻI he meʻa ko iá naʻá ne ʻoange kiate ia ʻa Pilā ko ʻene kaunangá ke hoko ko hono uaifi, pea naʻe mohe ʻa Sēkope mo ia.+ 5 Naʻe hoko ʻa Pilā ʻo feitama pea naʻe faifai pē ʻo ne fanauʻi kia Sēkope ha tama tangata. 6 Naʻe pehē leva ʻe Lesieli: “Kuo ngāue ʻa e ʻOtuá ko hoku fakamaau pea kuó ne fanongo foki ki hoku leʻó, ʻo ne foaki mai ai kiate au ha tama tangata.” Ko e ʻuhinga ia naʻá ne fakahingoa ai ia ko Taní.*+ 7 Ko Pilā, ʻa e kaunanga ʻa Lesielí, naʻá ne toe hoko ʻo feitama pea naʻe faifai pē ʻo ne fanauʻi ha tama hono ua kia Sēkope. 8 Naʻe pehē leva ʻe Lesieli: “Ko e fāinga mālohi kuó u fāinga ʻaki mo hoku tokouá. Kuó u toe hoko foki ko e ikuna!” Ko ia naʻá ne fakahingoa ai ia ko Nafitalai.*+

9 ʻI he vakai ʻa Lia kuo taʻofi ʻa ʻene fanaú, naʻá ne toʻo ʻa Silipa ko ʻene kaunangá ʻo ne ʻoange ia kia Sēkope ke hoko ko hono uaifi.+ 10 Pea ko Silipa ko e kaunanga ʻa Liá, naʻá ne fanauʻi ha tama tangata kia Sēkope. 11 Naʻe pehē leva ʻe Lia: “Ko ha monūʻia ē!” Ko ia naʻá ne fakahingoa ai ia ko Kata.*+ 12 ʻI he hili iá, ko Silipa ʻa e kaunanga ʻa Liá, naʻá ne fanauʻi ha tama hono ua kia Sēkope. 13 Naʻe pehē leva ʻe Lia: “He fiefia ē ko au! He ʻe fakahaaʻi moʻoni ʻe he ngaahi ʻofefiné ʻoku ou fiefia.”+ Ko ia naʻá ne fakahingoa ai ia ko ʻĀseli.*+

14 Pea naʻe luelue atu ʻa Lūpeni+ ʻi he ngaahi ʻaho ʻo e utu-taʻu uité, ʻo ne maʻu ha ʻakau fakafanau* ʻi he vaó. Ko ia naʻá ne ʻomai ia kia Lia ko ʻene faʻeé. Naʻe pehē ange leva ʻe Lesieli kia Lia: “ʻOmai muʻa kiate au ha meʻa mei he ʻakau fakafanau ʻa hoʻo tamasiʻí.” 15 ʻI he meʻá ni naʻá ne pehē kiate ia: “Ko ha meʻa siʻisiʻi ia ʻa hoʻo ʻave ʻa hoku husepānití?+ Pea ko eni te ke toe ʻave koā ʻa e ʻakau fakafanau ʻa ʻeku tamasiʻí?” Ko ia naʻe pehē ange ʻe Lesieli: “Lelei ʻaupito. Te ne mohe mo koe he poó ni ke fetongiʻaki ʻa e ʻakau fakafanau ʻa hoʻo tamasiʻí.”

16 ʻI he haʻu ʻa Sēkope mei he feituʻu kaikaiʻangá ʻi he efiafí, naʻe ʻalu atu ʻa Lia ke fakafetaulaki kiate ia ʻo ne pehē: “Te ke mohe mo au, he kuó u totongiʻi moʻoni koe ʻaki ʻa e ʻakau fakafanau ʻa ʻeku tamasiʻí.” Ko ia naʻá ne mohe mo ia ʻi he pō ko iá. 17 Pea naʻe fanongo ʻa e ʻOtuá ʻo ne fai ha tali kia Lia, pea naʻá ne hoko ʻo feitama pea naʻe faifai atu pē ʻo ne fanauʻi kia Sēkope ha tama hono nima. 18 Naʻe pehē leva ʻe Lia: “Kuo ʻomi ʻe he ʻOtuá kiate au ʻa ʻeku totongí* koeʻuhí kuó u foaki ʻa ʻeku kaunangá ki hoku husepānití.” Ko ia naʻá ne fakahingoa ai ia ko ʻĪsaka.*+ 19 Pea naʻe hoko ʻa Lia ʻo toe feitama pea naʻe faifai atu pē ʻo ne fanauʻi ha tama hono ono kia Sēkope.+ 20 Naʻe pehē leva ʻe Lia: “Kuo fakakoloa au ʻe he ʻOtuá, ʻio, ʻa au, ʻaki ha koloa lelei. Ko eni, ʻe kātakiʻi au+ ʻe hoku husepānití, he kuó u fanauʻi kiate ia ha fānau tangata ʻe toko ono.”+ Ko ia naʻá ne fakahingoa ai ia ko Sepuloni.*+ 21 ʻI he hili iá, naʻá ne fanauʻi ha taʻahine pea fakahingoa ia ko Taina.+

22 Faifai atu pē naʻe manatua ʻe he ʻOtuá ʻa Lesieli, pea naʻe fanongo ʻa e ʻOtuá mo ne fai ha tali kiate ia ʻaki ʻene ʻai ia ke malava ʻo ne feitama.*+ 23 Pea naʻá ne hoko ʻo feitama ʻo ne fanauʻi ha tama tangata. Naʻá ne pehē leva: “Kuo toʻo ʻe he ʻOtuá ʻa hoku fakamāʻangá!”+ 24 Ko ia naʻá ne fakahingoa ia ko Siosifa,*+ ʻo ne pehē: “ʻOku toe tānaki mai ʻe Sihova ha tama ʻe taha kiate au.”

25 ʻI he hili hono fanauʻi ʻe Lesieli ʻa Siosifá, naʻe pehē ange leva ʻe Sēkope kia Lēpani: “Tuku mai au ke u ʻalu ki hoku feituʻú pea ki hoku fonuá.+ 26 Tuku mai mo hoku ngaahi uaifí mo ʻeku fānaú, ʻa ia kuó u ngāue ai kiate koé, koeʻuhi ke u ʻalu, he ʻokú ke ʻiloʻi lelei ʻa e anga ʻo ʻeku ngāue kiate koé.”+ 27 Naʻe pehē ange leva ʻe Lēpani kiate ia: “Kapau kuó ke leleiʻia ʻiate au,—kuó u mahinoʻi mei he ngaahi fakaʻilongá* ʻoku tāpuakiʻi au ʻe Sihova koeʻuhí ko koe.” 28 Pea naʻá ne hoko atu: “Fakahaaʻi pau mai ʻa hoʻo totongí kiate au, pea te u ʻoatu ia.”+ 29 Ko ia naʻe pehē ange ʻe Sēkope kiate ia: “ʻOkú ke ʻiloʻi ʻa e anga ʻo ʻeku ngāue kiate koé mo e tuʻunga ne ʻi ai hoʻo tākangá ʻiate aú;+ 30 naʻe siʻi ʻa e meʻa naʻá ke maʻu ki muʻa ʻi heʻeku haʻú, ka kuo tupu mo tokolahi hoʻo tākangá, pea kuo tāpuakiʻi koe ʻe Sihova talu mei heʻeku aʻu maí. Ko ia ko ʻafē nai te u fai ai ha meʻa maʻa hoku falé tonu?”+

31 Naʻá ne pehē ange leva: “Ko e hā te u ʻoatu kiate koé?” Pea naʻe pehē ʻe Sēkope: “ʻE ʻikai te ke ʻomai ha meʻa kiate au tatau ai pē pe ko e hā! Kapau te ke fai kiate au ʻa e meʻa pē ko ení ʻe taha, ʻe toe hoko atu ʻeku tauhi ʻa hoʻo tākangá mo leʻohi iá.+ 32 Te u fou atu ʻi hoʻo tākangá kotoa he ʻahó ni. Ke ke vaheʻi mei ai ʻa e sipi ʻileʻila mo pulepule kotoa pē, mo e sipi lanu melomelo mālohi kotoa pē ʻi he lotolotonga ʻo e fanga kiʻi sipi tangatá pea mo ha kosi pulepule mo ʻileʻila pē ʻi he lotolotonga ʻo e fanga kosi fefiné. Ke hoko ʻa e ngaahi meʻá ni ko ʻeku totongí+ ia mei he taimí ni ʻo faai atu. 33 Pea kuo pau ke lea maʻaku ʻa ʻeku māʻoniʻoní* ʻi ha ʻaho he kahaʻú te ke haʻu ai ke vakaiʻi ʻa ʻeku totongí; ko ia kotoa pē ʻa ia ʻoku ʻikai ʻileʻila mo pulepule ʻi he lotolotonga ʻo e fanga kosi fefiné mo ʻikai lanu melomelo mālohi ʻi he lotolotonga ʻo e fanga kiʻi sipi tangatá ʻe lau ia kuo kaihaʻasi kapau ʻoku ʻiate au.”

34 ʻI he meʻá ni naʻe pehē ʻe Lēpani: “ʻOku lelei ia! Tuku ke fai ʻo fakatatau ki hoʻo leá.”+ 35 ʻI he ʻaho leva ko iá, naʻá ne fakamavaheʻi ʻa e fanga kosi tangata naʻe matohitohi mo pulepulé mo e fanga kosi fefine kotoa pē naʻe ʻileʻila mo pulepulé, ʻa ia kotoa pē naʻe ʻi ai ha lavatea mo ia kotoa pē naʻe lanu melomelo mālohi ʻi he lotolotonga ʻo e fanga kiʻi sipi tangatá, pea naʻá ne ʻoange ia ke tokangaʻi ʻe hono ngaahi fohá. 36 ʻI he hili iá, naʻá ne taki ʻa ʻene tākangá ki ha feituʻu ʻa ia ko hono mamaʻó ko ha fononga ʻaho ʻe tolu meia Sēkope, pea naʻe tauhi ʻe Sēkope ʻa e ngaahi tākanga ʻa Lēpani naʻe toé.

37 Naʻe toʻo leva ʻe Sēkope ʻa e ngaahi vaʻakau ne toki tuʻusi mei he ʻakau ko e sitolaki,* ʻalimoni, mo e paleiní, peá ne fohi ia ʻo ʻasi hake ʻa e fanga kiʻi konga hinehina mei he ngaahi vaʻakaú. 38 Naʻá ne tuku leva ʻa e ngaahi vaʻakau naʻá ne fohí ʻi muʻa ʻi he tākangá, ʻi he ngaahi meʻa fakatafenga vaí, ʻi he ngaahi ʻaiʻanga inú, ʻa ia ʻe haʻu ʻa e ngaahi tākangá ʻo inu ai, ke nau lava ʻo fakatouʻia ʻi muʻa he ngaahi vaʻakaú ʻi heʻenau haʻu ʻo inú.

39 Ko ia naʻe fakatouʻia ʻa e ngaahi tākangá ʻi muʻa ʻi he ngaahi vaʻakaú, pea naʻe fanauʻi ai ʻe he ngaahi tākangá ʻa e ʻuhiki matohitohi, ʻileʻila, mo pulepule. 40 Naʻe fakamavaheʻi leva ʻe Sēkope ʻa e fanga kiʻi sipi tangatá pea fakahanga ʻa e ngaahi tākangá ki he fanga manu matohitohí mo e fanga manu lanu melomelo mālohi kotoa pē ʻi he lotolotonga ʻo e ngaahi tākanga ʻa Lēpaní. Pea naʻá ne fakamavaheʻi leva ʻa ʻene ngaahi tākanga ʻaʻaná, ʻo ʻikai fio kinautolu mo e ngaahi tākanga ʻa Lēpaní. 41 Pea ko e taimi pē naʻe fakatouʻia ai ʻa e fanga manu mālohí, naʻe tuku ʻe Sēkope ʻa e ngaahi vaʻakaú ʻi he ngaahi meʻa fakatafenga vaí ke sio ki ai ʻa e ngaahi tākangá, ke nau lava ʻo fakatouʻia ofi ki he ngaahi vaʻakaú. 42 Ka ʻi he taimi naʻe vaivai ai ʻa e fanga manú, naʻe ʻikai te ne tuku ai ʻa e ngaahi vaʻakaú. Ko ia naʻe hoko maʻu pē ʻo maʻu ʻe Lēpani ʻa e fanga manu vaivaí, ka ko e fanga manu mālohí naʻe maʻu ia ʻe Sēkope.+

43 Pea naʻe hoko ʻa e tangatá ʻo lakalakaimonū ʻaupito, pea naʻá ne maʻu ʻa e ngaahi tākanga lahi mo e kau tamaioʻeiki mo e kau kaunanga mo e fanga kāmeli mo e fanga ʻasi.+

31 ʻI he faai atu ʻa e taimí naʻá ne fanongo ki he pehē ʻe he ngaahi foha ʻo Lēpaní: “Kuo ʻave ʻe Sēkope ʻa e meʻa kotoa pē ʻa ʻetau tamaí, pea ko e meʻa ʻa ʻetau tamaí, kuó ne tānaki mei ai ʻa e kotoa ʻo e fuʻu koloá ni.”+ 2 ʻI he sio ʻa Sēkope ki he mata ʻo Lēpaní, naʻá ne vakai ko ʻene fakafōtunga ange kiate iá naʻe ʻikai ke kei hangē ia ko e tuʻunga naʻe ʻi ai ki muʻá.+ 3 Faai atu pē, naʻe folofola ʻa Sihova kia Sēkope: “Foki ki he fonua ʻo hoʻo ngaahi tamaí pea ki ho ngaahi kāingá,+ pea ʻe hokohoko atu ʻeku ʻiate koé.” 4 Naʻe fai leva ʻe Sēkope ha fekau kia Lesieli mo Lia ke na omi ki he feituʻu kaikaiʻangá ki heʻene tākangá, 5 pea naʻá ne pehē kiate kinaua:

“Kuó u sio kuo mafuli+ ʻa e fakafōtunga ʻa hoʻomo tamaí kiate aú, ka ko e ʻOtua ʻo ʻeku tamaí kuó ne ʻiate au.+ 6 Ko kimoua tonu ʻokú mo ʻiloʻi lelei kuó u ngāue ki hoʻomo tamaí ʻaki ʻa e kotoa ʻo hoku iví.+ 7 Pea kuo feinga ʻa hoʻomo tamaí ke kākaaʻi au pea kuo tuʻo hongofulu ʻene liliu ʻa ʻeku totongí; ka kuo ʻikai ke fakaʻatā ia ʻe he ʻOtuá ke ne fai ha kovi kiate au. 8 Kapau naʻá ne pehē, ‘Ko e fanga manu ʻileʻilá ʻe hoko ia ko hoʻo totongí,’ naʻe fanauʻi leva ʻe he tākangá kotoa ʻa e fanga manu ʻileʻila; ka ʻi he tafaʻaki ʻe tahá, kapau naʻá ne pehē, ‘Ko e fanga manu matohitohí ʻe hoko ia ko hoʻo totongí,’ naʻe fanauʻi leva ʻe he tākangá kotoa ʻa e fanga manu matohitohi.+ 9 Ko ia naʻe hanganaki toʻo ʻe he ʻOtuá ʻa e fanga manu ʻa hoʻomo tamaí meiate ia ʻo ne foaki mai ia kiate au. 10 ʻI he taimi naʻe fakatouʻia ai ʻa e tākangá, naʻe hanga hake hoku matá pea naʻá ku sio ʻi ha misi ko e fanga kosi tangata ko ia naʻa nau fakatouʻiaʻi ʻa e tākangá naʻa nau matohitohi, ʻileʻila, mo pulepule.+ 11 Naʻe pehē mai leva ʻa e ʻāngelo ʻa e ʻOtua moʻoní kiate au ʻi he misí, ‘Sēkope,’ ʻa ia naʻá ku pehē ki ai, ‘Ko au eni.’ 12 Pea naʻá ne hoko atu, ‘Hanga hake muʻa ho matá ʻo vakai ko e kotoa ʻo e fanga kosi tangata ʻoku nau fakatouʻiaʻi ʻa e tākangá ʻoku nau matohitohi, ʻileʻila, mo pulepule, he kuó u mamata ki he meʻa kotoa ʻoku fai ʻe Lēpani kiate koé.+ 13 Ko au ʻa e ʻOtua moʻoni ʻo Pētelí,+ ʻa ia naʻá ke pani ai ha pou pea naʻá ke fai ai ha fuakava kiate aú.+ Tuʻu hake leva, ʻalu atu mei he fonuá ni, peá ke foki ki he fonua naʻe fanauʻi ai koé.’”+

14 ʻI he meʻá ni naʻe tali ange ʻe Lesieli mo Lia kiate ia: “ʻOku kei toe koā ha ʻinasi maʻamaua ke ma maʻu tukufakaholo ʻi he fale ʻo ʻema tamaí? 15 ʻIkai ʻokú ne lau kimaua ko e ongo muli, he kuó ne fakatau atu kimaua pea kuó ne ngāueʻaki ʻa e paʻanga naʻe foaki ange koeʻuhi ko kimauá?+ 16 Ko e ngaahi koloa kotoa kuo toʻo ʻe he ʻOtuá mei heʻema tamaí ʻoku ʻamaua ia mo ʻema fānaú.+ Ko ia leva, fai ʻa e meʻa kotoa pē kuo fakahā atu ʻe he ʻOtuá ke ke faí.”+

17 Naʻe tuʻu hake leva ʻa Sēkope ʻo ne fakaheka ʻa ʻene fānaú mo hono ngaahi uaifí ki he fanga kāmelí,+ 18 pea naʻe kamata ke ne taki atu ʻene tākangá kotoa pea ʻave mo e koloa kotoa naʻá ne tānakí,+ ʻa e fanga manu naʻá ne maʻu ʻa ia naʻá ne tānaki ʻi Petana-lamí, ke ʻalu kia ʻAisake ko ʻene tamaí ki he fonua ko Kēnaní.+

19 Pea naʻe ʻalu ʻa Lēpani ke kosi ʻene fanga sipí, pea naʻe kaihaʻasi ʻe Lesieli ʻa e ngaahi ʻīmisi telafimi*+ ʻa ʻene tamaí.+ 20 ʻIkai ngata aí, naʻe fakamatavaleaʻi ʻe Sēkope ʻa Lēpani ko e tangata Alameá, he naʻá ne hola ʻo ʻikai te ne tala ange. 21 Pea naʻá ne hola ʻo ne kolosi ʻi he Vaitafé,*+ ʻa ia mo e meʻa kotoa naʻá ne maʻú. Naʻá ne huʻu atu leva ki he feituʻu moʻungaʻia ko Kiliatí.+ 22 ʻI he ʻaho hono tolú, naʻe fakahā ai kia Lēpani kuo hola ʻa Sēkope. 23 Ko ia naʻá ne ʻave ʻa hono fanga tokouá* ʻo nau tuli atu kiate ia ʻi ha fononga ʻaho ʻe fitu pea nau maʻu atu ia ki he feituʻu moʻungaʻia ko Kiliatí. 24 Naʻe hoko mai leva ʻa e ʻOtuá kia Lēpani ko e tangata Alameá+ ʻi ha misi ʻi he poʻulí+ ʻo ne folofola kiate ia: “Tokanga ʻo fekauʻaki mo e meʻa te ke leaʻaki kia Sēkopé, ha lelei pe kovi.”*+

25 Ko ia naʻe ʻunuʻunu atu ʻa Lēpani kia Sēkope, ʻi he fokotuʻu ʻe Sēkope hono tēnití ʻi he moʻungá pea naʻe ʻapitanga ʻa Lēpani mo hono fanga tokouá ʻi he feituʻu moʻungaʻia ko Kiliatí. 26 Naʻe pehē ange leva ʻe Lēpani kia Sēkope: “Ko e hā kuó ke faí? Ko e hā kuó ke hanga ai ʻo fakamatavaleaʻi au pea ʻave ʻa hoku ongo ʻofefiné ʻo hangē ha ongo pōpula kuo taki ʻaki ʻa e heletaá? 27 Ko e hā naʻá ke hola fakafufū ai mo fakamatavaleaʻi au ʻo ʻikai te ke tala mai kiate aú? Kapau naʻá ke tala mai, naʻe mei lava ke u tuku atu koe ʻi he fakafiefia mo e ngaahi hiva, fakataha mo e nafa mo e haʻape. 28 Ka naʻe ʻikai te ke ʻomai haku faingamālie ke u ʻuma ki hoku fanga makapuná* pea ki hoku ongo ʻofefiné. Kuó ke fai vale. 29 ʻOku ʻi hoku mafaí ke u fai ha kovi kiate kimoutolu, ka ko e ʻOtua ʻo hoʻomou tamaí naʻá ne folofola mai kiate au ʻanepō, ʻo pehē, ‘Tokanga ʻo fekauʻaki mo e meʻa te ke leaʻaki kia Sēkopé, ha lelei pe kovi.’+ 30 Ko eni kuó ke ʻalu koeʻuhí kuó ke fakaʻamu ke foki ki he fale ʻo hoʻo tamaí, ka ko e hā naʻá ke kaihaʻasi ai ʻa hoku ngaahi ʻotuá?”+

31 Naʻe tali ange ʻe Sēkope kia Lēpani: “Koeʻuhí naʻá ku ilifia, he naʻá ku pehē hifo pē kiate au, ‘Te ke ʻave fakamālohiʻi nai ho ongo ʻofefiné meiate au.’ 32 ʻIlonga ha taha te ke maʻu ai ho ngaahi ʻotuá ʻe ʻikai te ne moʻui. Vakaiʻi ʻi he ʻao ʻo hota fanga tokouá ʻa e meʻa ʻoku ou maʻú, pea toʻo ʻa e meʻa ʻoku ʻaʻaú.” Ka naʻe ʻikai ke ʻiloʻi ʻe Sēkope naʻe kaihaʻasi ia ʻe Lesieli. 33 Ko ia naʻe hū ʻa Lēpani ki he tēniti ʻo Sēkopé pea ki he tēniti ʻo Liá pea ki he tēniti ʻo e ongo kaunangá,+ ka naʻe ʻikai te ne ʻilo ia. Naʻá ne hū leva ki tuʻa mei he tēniti ʻo Liá ʻo ne hū ki he tēniti ʻo Lesielí. 34 Lolotonga iá, naʻe toʻo ʻe Lesieli ʻa e ngaahi ʻīmisi telafimí ʻo ne tuku ia ʻi he kato nofoʻa ʻi he kāmelí naʻe ngāueʻaki ʻe he kakai fefiné, pea naʻá ne hekeheka ai. Ko ia naʻe kumi holo ʻa Lēpani ʻi he tēnití kotoa ka naʻe ʻikai te ne maʻu ia. 35 Naʻá ne pehē ange leva ki heʻene tamaí: “ʻOua te ke ʻitá, ʻe hoku ʻeiki, he ʻoku ʻikai lava ke u tuʻu hake ʻi ho ʻaó, he ʻoku hoko kiate au ʻa e meʻa anga-maheni ki he kakai fefiné.”+ Ko ia naʻe hokohoko atu ʻene kumi fakamākukangá ka naʻe ʻikai te ne maʻu ʻa e ngaahi ʻīmisi telafimí.+

36 ʻI he meʻa ko iá naʻe hoko ʻa Sēkope ʻo ʻita pea kamata ke ne fakaangaʻi ʻa Lēpani. Naʻe pehē ange leva ʻe Sēkope kia Lēpani: “Ko e hā haʻaku hia, pea ko e hā ha angahala kuó ke tuli mālohi mai ai kiate aú? 37 Ko eni kuó ke kumi ʻi he kotoa ʻo ʻeku ngaahi koloá, ko e hā kuó ke maʻu ʻa ia ko e meʻa ia mei ho falé? Tuku ia heni ʻi muʻa ʻi hoku fanga tokouá pea mo ho fanga tokouá, pea tuku ke nau fai ha fakamaau ʻi hota vahaʻá. 38 Lolotonga ʻa e taʻu ko eni ʻe 20 ʻo ʻeku ʻiate koé, naʻe ʻikai ʻaupito ke ʻuhi mate+ hoʻo fanga sipí mo hoʻo fanga kosí, pea naʻe ʻikai ʻaupito te u kai ʻa e fanga sipi tangata ʻi hoʻo tākangá. 39 Naʻe ʻikai te u ʻomai kiate koe ha manu pē naʻe fehalu ʻe ha fanga manu kaivao.+ Naʻá ku fua pē ʻe au ʻa e fakamolé. Tatau ai pē pe naʻe kaihaʻasi ʻa e monumanú ʻi he ʻahó pe naʻe kaihaʻasi ʻi he poʻulí, naʻá ke kounaʻi ha totongi meiate au. 40 ʻI he ʻahó naʻe maʻukovia au ʻe he velá, pea ʻi he poʻulí ko e momokó, pea naʻe mahuʻi ʻa e mohé mei hoku matá.+ 41 Naʻe feʻunga eni kiate au mo e taʻu ʻe 20 ʻi ho falé. Kuó u ngāue kiate koe ʻi he taʻu ʻe 14 ki ho ongo ʻofefiné pea taʻu ʻe 6 ki hoʻo tākangá, pea naʻá ke toutou liliu ʻa ʻeku totongí ʻo tuʻo hongofulu.+ 42 Kapau ko e ʻOtua ʻo ʻeku tamaí,+ ʻa e ʻOtua ʻo ʻĒpalahamé mo e Tokotaha ʻa ia ʻoku manavahē ki ai ʻa ʻAisaké,+ naʻe ʻikai te ne ʻi hoku tafaʻakí, naʻá ke mei fekauʻi mola mai eni au. Kuo vakai mai ʻa e ʻOtuá ki heʻeku mamahí mo e fakaongosia ʻa hoku nimá, pea ko e ʻuhinga ia naʻá ne valokiʻi ai koe ʻanepoó.”+

43 Naʻe tali ange leva ʻe Lēpani kia Sēkope: “Ko e kau fefiné ni ko hoku ngaahi ʻofefine pea ko e fānaú ko ʻeku fānau pea ko e tākangá ko ʻeku tākanga, mo e meʻa kotoa pē ʻokú ke sio ki aí ko ʻeku meʻa pea ko hoku ngaahi ʻofefine. Ko e hā ka u ka fai ai ha meʻa he ʻahó ni ki he faʻahingá ni pe ki heʻenau fānau kuo nau fanauʻí? 44 Ko eni haʻu, tuku ke ta fai ha fuakava, ʻa koe mo au, pea ʻe hoko ia ko ha fakamoʻoni ʻi hota vahaʻá.” 45 Ko ia naʻe toʻo ʻe Sēkope ha maka pea fokotuʻu ia ko ha pou.+ 46 Naʻe pehē ange leva ʻe Sēkope ki hono fanga tokouá: “Tufi ʻa e maká!” Pea naʻa nau tufi ʻa e maká ʻo ʻai ha fokotuʻunga. ʻI he hili iá, naʻa nau kai ai ʻi he fokotuʻunga maká. 47 Pea naʻe kamata ke ui ia ʻe Lēpani ko Seka-sahatuha,* ka naʻe ui ia ʻe Sēkope ko Kāleti.*

48 Naʻe pehē ange leva ʻe Lēpani: “Ko e fokotuʻunga maká ni ko ha fakamoʻoni ia ʻi hota vahaʻá ʻi he ʻahó ni.” Ko e ʻuhinga ia naʻe fakahingoa ai ia ko Kāleti,+ 49 mo e Taua Leʻó, he naʻá ne pehē: “Tuku ke hanganaki leʻo ʻa Sihova ʻi hota vahaʻá ʻi he taimi ʻe ʻikai te ta fesiofaki aí. 50 Kapau te ke ngaohikoviʻi hoku ongo ʻofefiné pea kapau ʻe kamata ke ke toe maʻu ha ngaahi uaifi ʻo tānaki atu ki hoku ongo ʻofefiné, neongo ʻoku ʻikai ha tangata ʻiate kitaua, manatuʻi ko e ʻOtuá ʻe hoko ko ha fakamoʻoni ʻi hota vahaʻá.” 51 Naʻe hoko atu leva ʻa Lēpani ʻo ne pehē kia Sēkope: “Ko eni ko e fokotuʻunga maká eni, pea ko eni ʻa e pou kuó u fokotuʻu ʻi hota vahaʻá. 52 Ko e fokotuʻunga maká ni ko ha fakamoʻoni ia,+ pea ko e poú ko ha meʻa faifakamoʻoni ia, ʻe ʻikai te u fakalaka ʻi he fokotuʻunga maká ni ke fai ha kovi kiate koe pea ʻe ʻikai te ke fakalaka ʻi he fokotuʻunga maká ni pea ʻi he poú ni ke fai ha kovi kiate au. 53 Tuku ki he ʻOtua ʻo ʻĒpalahamé+ pea ki he ʻOtua ʻo Nēhoá, ʻa e ʻOtua ʻo ʻena tamaí, ke ne fakamaau ʻi hota vahaʻá.” Pea naʻe fai ʻe Sēkope ha fakapapau ʻi he Tokotaha ʻa ia ʻoku manavahē ki ai ʻa ʻene tamai ko ʻAisaké.+

54 ʻI he hili iá, naʻe fai ʻe Sēkope ha feilaulau ʻi he moʻungá peá ne fakaafeʻi ʻa hono fanga tokouá ke nau kai mā. Ko ia naʻa nau kai pea nau mohe ai ʻi he moʻungá. 55 Kae kehe, naʻe tuʻu pongipongia hake ʻa Lēpani ʻo ne ʻuma ki hono fanga makapuná*+ pea ki hono ongo ʻofefiné peá ne tāpuakiʻi kinautolu.+ ʻI he hili iá, naʻe mavahe ʻa Lēpani ʻo ne foki ki ʻapi.+

32 Naʻe ʻalu atu leva ʻa Sēkope, pea naʻe fakafetaulaki kiate ia ʻa e kau ʻāngelo ʻa e ʻOtuá. 2 ʻI heʻene vakai atu pē kiate kinautolú, naʻe pehē ʻe Sēkope: “Ko e ʻapitanga eni ʻo e ʻOtuá!” Ko ia naʻá ne ui ai ʻa e feituʻu ko iá ko Mehanemi.*

3 Naʻe fekauʻi atu leva ʻe Sēkope ha kau talafekau ke muʻomuʻa ʻiate ia kia ʻĪsoa ko hono tokouá ki he fonua ko Seiá,+ ʻa e feituʻu* ʻo ʻĪtomí,+ 4 peá ne tuʻutuʻuni kiate kinautolu: “Ko e meʻa eni te mou leaʻaki ki hoku ʻeikí, kia ʻĪsoá, ‘Ko e lea eni ʻa hoʻo sevāniti ko Sēkopé: “Kuó u nofo fuoloa* mo Lēpani ʻo aʻu mai ki he taimí ni.+ 5 Pea kuó u maʻu ʻa e fanga pulu, fanga ʻasi, fanga sipi, mo e kau tamaioʻeiki mo e kau kaunanga,+ pea ʻoku ou ʻoatu ʻa e fekaú ni ke fakahā ki hoku ʻeikí, koeʻuhi ke ke leleiʻia ai ʻiate au.”’”

6 Faifai atu pē naʻe foki mai ʻa e kau talafekaú kia Sēkope, ʻo nau pehē: “Naʻa mau fetaulaki mo ho tokoua ko ʻĪsoá, pea ko eni ʻokú ne haʻu ke fakafetaulaki mai kiate koe, pea ʻoku ʻiate ia ha kau tangata ʻe toko 400.”+ 7 Pea naʻe hoko ʻa Sēkope ʻo ilifia ʻaupito peá ne hohaʻatuʻu.+ Ko ia naʻá ne vahevahe ʻa e kakai naʻe ʻiate iá, pea pehē ki he ngaahi tākangá, ʻa e fanga pulú mo e fanga kāmelí, ki he ʻapitanga ʻe ua. 8 Naʻá ne pehē: “Kapau ʻe ʻohofi ʻe ʻĪsoa ʻa e ʻapitanga ʻe tahá, ʻe lava leva ai ke hola ʻa e ʻapitanga ʻe tahá.”

9 ʻI he hili iá, naʻe pehē ʻe Sēkope: “ʻE ʻOtua ʻo ʻeku tamai ko ʻĒpalahamé mo e ʻOtua ʻo ʻeku tamai ko ʻAisaké, ʻE Sihova, ʻa e ʻAfioná ʻokú ke folofola mai kiate au, ‘Foki ki ho fonuá pea ki ho ngaahi kāingá, pea te u failelei kiate koe,’+ 10 ʻoku ʻikai te u taau mo e kotoa ʻo e ʻofa mateaki mo e kotoa ʻo e faitōnunga kuó ke fakahaaʻi ki hoʻo sevānití,+ he ko hoku tokotokó pē naʻá ku kolosi mo ia ʻi Sioataní pea ko eni kuó u hoko ko e ʻapitanga ʻe ua.+ 11 Fakahaofi au, ko ʻeku lotu ia ki he ʻAfioná,+ mei he nima ʻo hoku tokoua ko ʻĪsoá, he ʻoku ou ilifia ʻiate ia naʻa haʻu ʻo ne ʻohofi au,+ pea pehē ki he ngaahi faʻeé mo ʻenau fānaú. 12 Pea kuó ke folofola mai: ‘Te u failelei moʻoni kiate koe, pea te u ʻai ho hakó ke hangē ko e ʻoneʻone ʻo e tahí, ʻa ia ʻoku fuʻu lahi fau ke lau.’”+

13 Pea naʻá ne mohe ai. Hili iá, naʻá ne toʻo ʻa e niʻihi ʻo ʻene ngaahi koloá ko ha meʻaʻofa maʻa hono tokoua ko ʻĪsoá:+ 14 Ko e fanga kosi fefine ʻe 200, fanga kosi tangata ʻe 20, fanga sipi fefine ʻe 200, fanga sipi tangata ʻe 20, 15 fanga kāmeli ʻe 30 mo honau ʻuhikí, fanga pulu fefine ʻe 40, fanga pulu tangata ʻe 10, fanga ʻasi fefine ʻe 20 mo e fanga ʻasi tangata ʻe 10.+

16 Naʻá ne ʻoange ia ki heʻene kau sevānití, ʻo fakahokohoko ʻa e tākanga ki he tākanga, pea naʻá ne pehē ki heʻene kau sevānití: “Mou kolosi atu ʻo muʻomuʻa ʻiate au, pea ke mou fakavahavaha ʻa e tākanga ʻe tahá mo e tākanga hono hokó.” 17 Naʻá ne tuʻutuʻuni foki ki he tokotaha ʻuluakí: “Ka fakafetaulaki atu kiate koe ʻa ʻĪsoa ko hoku tokouá ʻo ne ʻeke, ‘Ko hai ʻoku ʻaʻana koé, pea ko hoʻo ʻalú ki fē, pea ko hai ʻoku ʻaʻana ʻa e fanga manu ko eni ʻoku muʻomuʻa ʻiate koé?’ 18 te ke pehē ange leva, ‘ʻOku ʻa hoʻo sevāniti ko Sēkopé. Ko ha meʻaʻofa ia kuo ʻomai ki hoku ʻeikí, kia ʻĪsoa,+ pea vakai, ko ia ē ʻokú ne muimui mai foki ʻiate kimautolu.’” 19 Pea naʻá ne tuʻutuʻuni foki ki hono uá, pea ki hono tolú, pea mo kinautolu kotoa naʻe muimui atu ʻi he ngaahi tākangá: “ʻE peheni hoʻomou lea kia ʻĪsoá ʻi he taimi te mou fetaulaki ai mo iá. 20 Pea te mou pehē foki, ‘Ko hoʻo sevāniti eni ko Sēkopé ʻoku muimui mai ʻiate kimautolu.’” He naʻá ne pehē hifo pē kiate ia: ‘Kapau te u fakalolou ia ʻaki hono fekauʻi ke fakamuʻomuʻa ha meʻaʻofa ʻiate au,+ ʻi he hili iá ʻi heʻeku sio leva kiate iá, ʻe malava nai ai ke ne talitali lelei au.’ 21 Ko ia naʻe kolosi atu ʻa ʻene kau sevānití mo e ngaahi meʻaʻofá ʻo muʻomuʻa ʻiate ia, ka ko ia tonu naʻá ne mohe ʻi he pō ko iá ʻi he ʻapitangá.

22 Ki mui ai ʻi he lolotonga ʻa e pō ko iá, naʻá ne mālanga hake ʻo ne ʻave hono ongo uaifí+ mo ʻene ongo kaunangá+ mo hono ngaahi foha kei iiki ʻe toko 11 ʻo nau kolosi atu ʻi he ʻāhanga ko Siapokí.+ 23 Ko ia naʻá ne ʻave kinautolu ki he tafaʻaki ʻe taha ʻo e vaitafé,* pea naʻá ne ʻave mo e meʻa kehe kotoa pē naʻá ne maʻú.

24 Naʻe faifai atu pē ʻo nofo toko taha pē ʻa Sēkope. Pea naʻe kamata ke fangatua mo ia ha tangata ʻo aʻu ki he mafoa ʻa e atá.+ 25 ʻI heʻene vakai naʻe ʻikai te ne mālohi ʻia Sēkopé, naʻá ne alasi ʻa hono hokotanga alangá; pea naʻe homo ʻa e hokotanga alanga ʻo Sēkopé ʻi he lolotonga ʻene fangatua mo iá.+ 26 ʻI he hili iá, naʻá ne pehē ange: “Tuku ange au ke u ʻalu, he kuo mafoa ʻa e atá.” ʻI he meʻa ko iá, naʻe pehē ange ʻe Sēkope: “ʻE ʻikai te u tuku ange koe ke ke ʻalu kae ʻoua kuó ke tāpuakiʻi au.”+ 27 Ko ia naʻá ne pehē ange kiate ia: “Ko hai ho hingoá?” Pea naʻá ne tali ange ki ai: “Ko Sēkope.” 28 Naʻá ne pehē ange leva: “ʻE ʻikai ke kei ui ho hingoá ko Sēkope ka ko ʻIsileli,*+ he kuó ke fefaʻuhi mo e ʻOtuá+ pea mo e tangatá pea kuo faifai pē ʻo ke mālohi.” 29 Naʻe ʻeke ange leva ʻe Sēkope: “Kātaki muʻa ʻo tala mai ho hingoá.” Kae kehe, naʻá ne pehē ange: “Ko e hā ʻokú ke ʻeke ai hoku hingoá?”+ ʻI he meʻa ko iá, naʻá ne tāpuakiʻi ia ʻi ai. 30 Ko ia naʻe ui ʻe Sēkope ʻa e feituʻú ko Penieli,*+ he naʻá ne pehē, “Kuó u mamata ki he ʻOtuá mata ki he mata, neongo ia naʻe fakahaofi ʻeku moʻuí.”+

31 Pea naʻe hopo ʻa e laʻaá ʻi heʻene fakalaka atu pē ko ia ʻi Penuelí,* ka naʻá ne toketu koeʻuhí ko hono alangá.+ 32 Ko e ʻuhinga ia ʻoku ʻikai tōʻongaʻaki ai ʻe he kau ʻIsilelí ʻa hono kai ʻa e uoua ʻo e alangá,* ʻa ia ʻoku ʻi he hokotanga alangá, ʻo aʻu mai ki he ʻaho ní, koeʻuhí he naʻá ne alasi ʻa e hokotanga alanga ʻo Sēkopé ʻi he uoua ʻo e alangá.

33 Pea naʻe hanga hake ʻa Sēkope ʻo ne vakai atu ʻoku haʻu ʻa ʻĪsoa, pea naʻe ʻiate ia ʻa e kau tangata ʻe toko 400.+ Ko ia naʻá ne vahevahe ʻa e fānaú ʻia Lia, Lesieli, mo e ongo kaunanga ʻe toko uá.+ 2 Naʻá ne fakamuʻomuʻa ʻa e ongo kaunangá mo ʻena fānaú,+ hoko atu ʻia kinautolu ʻa Lia mo ʻene fānaú,+ pea muimui atu ʻia kinautolu ʻa Lesieli+ mo Siosifa. 3 Ko ia tonu naʻá ne ʻalu muʻomuʻa atu leva ʻia kinautolu ʻo ne punou tuʻo fitu ki he kelekelé ʻi heʻene fakaofi atu ki hono tokouá.

4 Ka naʻe lele mai ʻa ʻĪsoa ke fakafetaulaki kiate ia, pea naʻá ne fāʻofua ʻiate ia mo ʻuma kiate ia, pea naʻá na fetāngihi. 5 ʻI heʻene hanga hake ʻo sio ki he kau fefiné mo e fānaú, naʻá ne pehē: “Ko hai ʻa kinautolú ni ʻoku ʻiate koé?” Pea naʻá ne pehē ange ki ai: “Ko e fānau ia ʻa ia kuo anga-ʻofa ʻa e ʻOtuá ʻo foaki ki hoʻo sevānití.”+ 6 ʻI he meʻa ko iá, naʻe haʻu ki muʻa ʻa e ongo kaunangá mo ʻena fānaú pea nau punou, 7 pea naʻe haʻu foki ki muʻa ʻa Lia mo ʻene fānaú, ʻo nau punou. ʻI he hili iá, naʻe haʻu ki muʻa ʻa Siosifa mo Lesieli, pea naʻá na punou.+

8 Naʻe pehē ʻe ʻĪsoa: “Ko e hā ʻa e taumuʻa ʻo e fuʻu kau fononga kotoa ko eni kuó u fetaulaki mo iá?”+ Naʻá ne tali ange: “Koeʻuhí ke leleiʻia ʻiate au ʻa hoku ʻeikí.”+ 9 Naʻe pehē ange leva ʻe ʻĪsoa: “ʻOku ou maʻu ʻa e koloa lahi ʻaupito, ʻe hoku tokoua.+ Tuku pē maʻau ʻa hoʻo meʻá.” 10 Kae kehe, naʻe pehē ʻe Sēkope: “ʻOua muʻa. Kapau kuó ke leleiʻia ʻiate au, kuo pau ke ke toʻo ʻa ʻeku meʻaʻofá mei hoku nimá, koeʻuhí naʻá ku ʻomai ia ke u lava ai ʻo sio ki ho fofongá. Pea kuó u sio ki ho fofongá ʻo hangē pē kuó u sio ki he fofonga ʻo e ʻOtuá, ʻi hoʻo tali lelei aú.+ 11 Kātaki muʻa ʻo toʻo ʻa e meʻaʻofa naʻe ʻoatu kiate koe ʻa ia ʻoku fakahoko atu ai ʻa ʻeku tāpuakí,+ he kuo leleiʻia ʻa e ʻOtuá ʻiate au pea ʻoku ou maʻu ʻa e meʻa kotoa pē ʻoku ou fiemaʻú.”+ Pea naʻe hokohoko atu ʻene fakaʻaiʻai iá, ko ia naʻá ne toʻo ai ia.

12 Ki mui ai, naʻe pehē ange ʻe ʻĪsoa: “Ta hiki ʻo ō, pea tuku ke u ʻalu muʻomuʻa au ʻiate koe.” 13 Ka naʻá ne pehē kiate ia: “ʻOku lāuʻilo ʻe hoku ʻeikí ʻoku vaivai ʻa e fānaú+ pea ʻoku ou tokangaʻi ʻa e fanga sipi mo e fanga pulu toutamá. Kapau ʻe taki ʻo fuʻu vave kinautolu ʻi he ʻaho ʻe tahá, ʻe mate kotoa leva ʻa e tākangá. 14 Tuku ke muʻomuʻa atu muʻa ʻa hoku ʻeikí ʻi heʻene sevānití, ka te u hokohoko atu ʻa e fonongá ʻo māmālie ange ʻo fakatatau ki he vave ʻa e ʻalu ʻa ʻeku fanga manú pea mo e fānaú kae ʻoua kuó u aʻu atu ki hoku ʻeikí ki Seia.”+ 15 Naʻe pehē ange leva ʻe ʻĪsoa: “Kātaki muʻa, ka u tuku atu ʻa e niʻihi ʻo hoku kakaí ʻiate koe.” ʻI he meʻá ni, naʻá ne pehē: “Ko e hā ka fai ai ení? Tuku pē muʻa ke leleiʻia ʻiate au ʻa hoku ʻeikí.” 16 Ko ia naʻe foki ʻa ʻĪsoa ʻi he ʻaho ko iá ki Seia.

17 Pea naʻe fononga ʻa Sēkope ki Sūkote,+ pea naʻá ne langa ha fale maʻana pea naʻá ne ʻai ha ngaahi nofoʻanga ki heʻene tākangá. Ko e ʻuhinga ia naʻá ne ui ai ʻa e feituʻú ko Sūkoté.*

18 ʻI he hili ʻene fononga mei Petana-lamí,+ naʻe aʻu lelei ʻa Sēkope ki he kolo ko Sīkemi+ ʻi he fonua ko Kēnaní,+ pea naʻá ne fokotuʻu ʻa hono ʻapitangá ʻo ofi ki he koló. 19 Naʻá ne maʻu mai leva ha konga ʻo e kelekele ʻa ia naʻá ne fokotuʻu ai hono tēnití mei he ngaahi foha ʻo Hēmoa, ko e tamai ʻa Sīkemí, ʻaki ʻa e konga siliva ʻe 100.+ 20 Naʻá ne fokotuʻu ai ha ʻōlita pea ui ia ko e ʻOtua, ko e ʻOtua ʻo ʻIsilelí.+

34 Pea ko Taina, ʻa e ʻofefine ʻo Sēkope mo Liá,+ naʻá ne faʻa ʻalu atu ʻo feohi mo e* kau finemui ʻo e fonuá.+ 2 ʻI he taimi naʻe sio ai kiate ia ʻa Sīkemi, ko e foha ʻo Hēmoa ko e Heví,+ ko ha ʻeiki ʻo e fonuá, naʻá ne puke ia ʻo ne mohe* mo ia peá ne kākaaʻi ia. 3 Pea naʻá ne hoko ʻo mātuʻaki pīkitai kia Taina, ko e ʻofefine ʻo Sēkopé, pea naʻá ne ʻofa ʻi he finemuí ʻo ne lea fakaoloolo kiate ia.* 4 Faifai pē, naʻe pehē ʻe Sīkemi kia Hēmoa+ ko ʻene tamaí: “ʻOmi kiate au ʻa e finemui ko ení ke hoko ko hoku uaifi.”

5 ʻI he taimi naʻe fanongo ai ʻa Sēkope naʻá ne ʻuliʻi ʻa hono ʻofefine ko Tainá, naʻe ʻi he vaó ʻa hono ngaahi fohá ʻi heʻene tākangá. Ko ia naʻe hanganaki fakalongolongo pē ʻa Sēkope kae ʻoua ke nau foki mai. 6 Ki mui ai, naʻe ʻalu atu ʻa Hēmoa ko e tamai ʻa Sīkemí, ke talanoa mo Sēkope. 7 Ka naʻe fanongo ʻa e ngaahi foha ʻo Sēkopé ʻo fekauʻaki mo ia pea nau foki mai ʻi he taimi pē ko iá mei he vaó. Naʻa nau loto-mamahi mo ʻita lahi ʻaupito koeʻuhí he naʻá ne fakamaaʻi ʻa ʻIsileli ʻi heʻene mohe mo e ʻofefine ʻo Sēkopé,+ ko ha meʻa naʻe ʻikai totonu ke fai.+

8 Naʻe lea ʻa Hēmoa kiate kinautolu ʻo ne pehē: “Ko hoku foha ko Sīkemí ʻokú ne ʻunaloto mai ki hoʻomou taʻahiné. Kātaki muʻa kae ʻoange ia kiate ia ke ne hoko ko hono uaifi, 9 pea fai ha ngaahi aleapau fakaemali* mo kimautolu. ʻOmi kiate kimautolu homou ngaahi ʻofefiné, pea ke maʻu maʻamoutolu ʻa homau ngaahi ʻofefiné.+ 10 ʻE lava ke mou nofo mo kimautolu, pea ʻe hoko ʻo ʻatā ʻa e fonuá kiate kimoutolu. Mou nofo pea hokohoko atu ʻa e fefakatauʻaki ʻi aí pea nofo maʻu ai.” 11 Naʻe pehē ange leva ʻe Sīkemi ki he tamai ʻa e taʻahiné pea ki hono fanga tuongaʻané: “Tuku muʻa ke mou leleiʻia ʻiate au, pea ʻilonga ha meʻa te mou kole mai kiate au te u foaki atu ia kiate kimoutolu. 12 ʻE lava ke mou kounaʻi meiate au ha totongi mātuʻaki mamafa ʻaupito ʻo e taʻahine malí mo ha meʻaʻofa.+ ʻOku ou loto-lelei ke foaki atu ha meʻa pē te mou tala mai kiate au. Kehe pē ke foaki mai kiate au ʻa e finemuí ke hoko ko hoku uaifi.”

13 Pea naʻe tali ange ʻa e ngaahi foha ʻo Sēkopé kia Sīkemi mo ʻene tamai ko Hēmoá ʻi he kākā koeʻuhí he naʻá ne ʻuliʻi ʻa honau tuofefine ko Tainá. 14 Naʻa nau pehē ange kiate kinaua: “ʻE ʻikai lava ke mau fai ha meʻa pehē, ke foaki atu homau tuofefiné ki ha tangata ʻoku ʻikai ke kamu,+ he ko ha meʻa fakamā ia kiate kimautolu. 15 Ko e tuʻunga pē ko ení ʻe taha ʻe toki lava ai ke mau loto ki aí: Ke mou hoko ʻo hangē ko kimautolú pea kamu homou kakai tangata kotoa pē.+ 16 Te mau toki ʻoatu leva ai homau ngaahi ʻofefiné kiate kimoutolu, pea te mau maʻu homou ngaahi ʻofefiné maʻamautolu, pea te mau nofo mo kimoutolu pea hoko ko e kakai pē ʻe taha. 17 Ka ʻo kapau ʻe ʻikai te mou fanongo mai kiate kimautolu ʻo kamu, te mau toʻo leva ai ʻa homau tuofefiné pea mau ʻalu.”

18 Naʻe leleiʻia ʻa Hēmoa+ mo Sīkemi ko e foha ʻo Hēmoá,+ ʻi heʻenau leá. 19 Naʻe ʻikai toloi ʻe he talavoú ʻa hono fai ʻa e meʻa naʻa nau fiemaʻú,+ koeʻuhi he ko hono mamaná ʻa e ʻofefine ʻo Sēkopé, pea ko e talavoú ni ʻa e tokotaha lāngilangiʻia taha ʻi he fale kotoa ʻo ʻene tamaí.

20 Ko ia naʻe ʻalu ʻa Hēmoa mo hono foha ko Sīkemí ki he matapā ʻo e koló ʻo na lea ki he kau tangata ʻo hona koló,+ ʻo pehē: 21 “Ko e kau tangata ko ení ʻoku nau fakaʻamu ke nofo melino mo kitautolu. Tuku ke nau nofo ʻi he fonuá pea hokohoko atu ʻa e fefakatauʻaki ʻi aí, he ʻoku lahi feʻunga ʻa e fonuá ke nau nofo ai. Ko honau ngaahi ʻofefiné ʻe lava ke tau maʻu kinautolu ke nau hoko ko e ngaahi uaifi, pea ko hotau ngaahi ʻofefiné ʻe lava ke tau foaki kiate kinautolu.+ 22 Ko e tuʻunga pē ko ení ʻe taha ʻe loto ai ʻa e kau tangatá ke nofo mo kitautolu ke tau hoko ai ko e kakai pē ʻe tahá: Ke kamu ʻa e tangata kotoa pē ʻi hotau lotolotongá ʻo hangē pē ko ʻenau kamú.+ 23 ʻIkai ko ʻenau ngaahi meʻa leva ʻoku maʻú, ʻa ʻenau koloá, mo e kotoa ʻo ʻenau fanga manú ʻe ʻatautolu? Ko ia ke tau fakahaaʻi ange ʻoku tau loto ki ai kae lava ai ke nau nofo mo kitautolu.” 24 Ko e faʻahinga kotoa naʻe hū ki tuʻa ʻi he matapā ʻo hono koló naʻa nau fanongo kia Hēmoa pea ki hono foha ko Sīkemí, pea naʻe kamu kotoa ʻa e kakai tangatá, ʻa e faʻahinga kotoa naʻe hū ki tuʻa ʻi he matapā ʻo e koló.

25 Kae kehe, ʻi he ʻaho hono tolú, ʻi heʻenau kei mamahiʻiá, ko e ongo foha ʻo Sēkope ko Simione mo Līvaí, ʻa e ongo tuongaʻane ʻo Tainá,+ naʻá na taki taha toʻo ʻene heletā peá na hū ki he kolo ʻa ia naʻe ʻikai haʻanau mahamahalo maí ʻo na tāmateʻi ʻa e tangata kotoa pē.+ 26 Naʻá na tāmateʻi ʻa Hēmoa mo hono foha ko Sīkemí ʻaki ʻa e heletaá peá na toʻo leva ʻa Taina mei he fale ʻo Sīkemí ʻo na mavahe. 27 Naʻe haʻu ʻa e ngaahi foha kehe ʻo Sēkopé ki he kau tangata kuo tāmateʻí ʻo nau vete ʻa e koloa ʻa e koló koeʻuhí he naʻa nau ʻuliʻi ʻa honau tuofefiné.+ 28 Naʻa nau ʻave ʻenau fanga sipí, ko ʻenau ngaahi tākangá, ko ʻenau fanga ʻasí, pea mo ha meʻa pē naʻe ʻi he koló pea ʻi he vaó. 29 Naʻa nau ʻave foki mo ʻenau koloá kotoa, taki pōpula ʻa e kotoa ʻenau fānau īkí mo honau ngaahi uaifí, pea toʻo ʻa e meʻa kotoa pē ʻi he ngaahi falé.

30 ʻI he meʻá ni naʻe pehē ʻe Sēkope kia Simione pea kia Līvai:+ “Kuó mo ʻomi ʻa e faingataʻa lahi kiate au* ʻi hoʻomo ʻai au ke u namukū ki he kakai ʻo e fonuá, ki he kau Kēnaní mo e kau Pēlisí. ʻOku ou tokosiʻi pē, pea ko e moʻoni te nau fakatahataha ke ʻohofi au pea te u ʻauha ʻosi, ʻa au mo hoku falé.” 31 Ka naʻá na pehē ange: “He ʻoku totonu koā ke tōʻongafai ha taha ki homa tuofefiné ʻo ne hangē ha fefine feʻauakí?”

35 ʻI he hili iá, naʻe folofola ʻa e ʻOtuá kia Sēkope: “Tuʻu, ʻalu hake ki Pēteli+ ʻo nofo ai, pea ngaohi ha ʻōlita ai ki he ʻOtua moʻoní, ʻa ia naʻe hā kiate koe ʻi he taimi naʻá ke hola ai meia ʻĪsoa ko ho tokouá.”+

2 Naʻe pehē leva ʻe Sēkope ki hono fāmilí pea ki he faʻahinga kotoa naʻe ʻiate iá: “Liʻaki ʻa e ngaahi ʻotua muli ʻoku ʻi homou lotolotongá,+ pea fakamaʻa kimoutolu pea fetongi homou ngaahi kofú, 3 pea ke tau tuʻu ʻo ʻalu hake ki Pēteli. Te u ngaohi ai ha ʻōlita ki he ʻOtua moʻoní, ʻa ia naʻá ne fai ha tali kiate au ʻi he ʻaho ʻo hoku faingataʻaʻiá pea kuó ne ʻiate au ʻi ha feituʻu pē kuó u ʻalu ki ai.”*+ 4 Ko ia naʻa nau ʻoange kia Sēkope ʻa e ngaahi ʻotua muli kotoa naʻe ʻiate kinautolú pea mo e ngaahi hau naʻe ʻi honau telingá, pea naʻe tanu* ia ʻe Sēkope ʻi he fuʻu lalo ʻakau ʻa ia naʻe tuʻu ʻo ofi ki Sīkemi.

5 ʻI he hoko atu ʻenau fonongá, naʻe ʻai ʻe he ʻOtuá ke manavahē ʻa e ngaahi kolo takatakai ʻiate kinautolú, ko ia naʻe ʻikai ai te nau tulimui ʻi he ngaahi foha ʻo Sēkopé. 6 Faifai atu pē naʻe aʻu mai ʻa Sēkope ki Lusa,+ ʻa ia ko Pēteli ia, ʻi he fonua ko Kēnaní, ko ia pea mo e kakai kotoa naʻe ʻiate iá. 7 Naʻá ne fokotuʻu leva ai ha ʻōlita peá ne ui ʻa e feituʻú ko ʻEla-pēteli,* koeʻuhí naʻe fakahaaʻi ai ʻe he ʻOtua moʻoní ʻa ia tonu kiate ia ʻi he taimi naʻá ne hola ai mei hono tokouá.+ 8 Ki mui ai, ko Tēpola,+ ʻa e tauhi ʻo Lepeká, naʻá ne mate pea naʻe tanu ia ʻo ofi ki Pēteli ʻi ha lalo ʻoke. Ko ia naʻá ne ui ia ko ʻĀloni-pakuti.*

9 Naʻe toe hā ʻa e ʻOtuá kia Sēkope lolotonga ʻene haʻu mei Petana-lamí peá ne tāpuakiʻi ia. 10 Naʻe folofola ange ʻa e ʻOtuá kiate ia: “Ko Sēkope+ ho hingoá. Ko ho hingoá ʻe ʻikai ke kei ui ko Sēkope, ka ʻe ui ho hingoá ko ʻIsileli.” Pea naʻe kamata ke ne ui ia ko ʻIsileli.+ 11 Naʻe hoko atu ʻa e folofola ʻa e ʻOtuá kiate iá: “Ko au ko e ʻOtua Māfimafi-Aoniú.+ Fanafanau mo fakatokolahi. ʻE hoko mai meiate koe ha ngaahi puleʻanga mo ha fakatahaʻanga ʻo ha ngaahi puleʻanga,+ pea ʻe hoko mai ha ngaahi tuʻi meiate koe.+ 12 Pea ko e meʻa ki he fonua kuó u foaki kia ʻĒpalahame pea kia ʻAisaké, te u foaki ia kiate koe, pea te u foaki ʻa e fonuá ki ho hako ʻi he hili koé.”+ 13 Naʻe hāʻele hake leva ʻa e ʻOtuá meiate ia ʻi he feituʻu naʻá ne folofola ai kiate iá.

14 Ko ia naʻe fokotuʻu ʻe Sēkope ha pou ʻi he feituʻu naʻá ne folofola ai kiate iá, ko ha pou maka, pea naʻá ne lilingi ai ha feilaulau inu mo lilingi ai ha lolo.+ 15 Pea naʻe hokohoko atu hono ui ʻe Sēkope ʻa e feituʻu naʻe folofola ange ai ʻa e ʻOtuá kiate iá ko Pēteli.+

16 Naʻa nau mavahe leva mei Pēteli. Pea ʻi he lolotonga ʻenau kei mamaʻo mei ʻEfalatá, naʻe kamata ke fāʻele ʻa Lesieli, pea naʻe faingataʻa ʻaupito ʻa ʻene langaá. 17 Ka ʻi he lolotonga ʻene kei fāinga ke fāʻeleʻi ʻa e tamá, naʻe pehē ange ʻe he māʻulí kiate ia: “ʻOua te ke ilifia, he te ke maʻu foki mo e tama ko ení.”+ 18 ʻI he faai atu ke mole ʻene moʻuí (he naʻá ne mei mate), naʻá ne fakahingoa ia ko Peni-oni,* ka naʻe ui ia ʻe heʻene tamaí ko Penisimani.*+ 19 Ko ia naʻe mate ʻa Lesieli pea naʻe tanu ia ʻi he hala ki ʻEfalatá, ʻa ia, ko Pētelihema.+ 20 Naʻe fokotuʻu ʻe Sēkope ha pou ʻi hono faʻitoká; ko e pou ia ʻo e faʻitoka ʻo Lesielí ʻo aʻu mai ki he ʻahó ni.

21 ʻI he hili iá, naʻe mavahe ʻa ʻIsileli peá ne fokotuʻu hono tēnití ko hono mamaʻó naʻe fakalaka atu ʻi he taua ko ʻEtá. 22 ʻI he taimi ʻe taha, lolotonga ʻa e nofo ʻa ʻIsileli ʻi he fonua ko iá, naʻe ʻalu atu ʻa Lūpeni ʻo ne mohe* mo Pilā ko e sinifu ʻa ʻene tamaí, pea naʻe fanongo ʻa ʻIsileli ʻo fekauʻaki mo ia.+

Ko ia naʻe toko 12 ʻa e ngaahi foha ʻo Sēkopé. 23 Ko e ngaahi foha ʻia Liá, ko e ʻuluaki foha ʻo Sēkopé ko Lūpeni,+ pea hoko ai ʻa Simione, Līvai, Siuta, ʻĪsaka, mo Sepuloni. 24 Ko e ongo foha ʻia Lesielí ko Siosifa mo Penisimani. 25 Pea ko e ongo foha ʻia Pilaá, ʻa e kaunanga ʻa Lesielí, ko Tani mo Nafitalai. 26 Pea ko e ongo foha ʻia Silipá, ʻa e kaunanga ʻa Liá, ko Kata mo ʻĀseli. Ko e ngaahi foha eni ʻo Sēkopé, ʻa ia naʻe fanauʻi kiate ia ʻi Petana-lamí.

27 Faai atu pē naʻe haʻu ʻa Sēkope ki he feituʻu naʻe ʻi ai ʻa ʻAisake ko ʻene tamaí ʻi Māmili,+ ki Kiliate-ʻaapa, ʻa ia ko Hepeloni, ʻa ē naʻe nofo ai ʻa ʻĒpalahame pea pehē kia ʻAisake ko ha ongo mulí.+ 28 Naʻe moʻui ʻa ʻAisake ʻo feʻunga mo e taʻu ʻe 180.+ 29 Pea naʻe hokotaki ʻa ʻAisake peá ne mate pea naʻe fakatahaʻi ia ki hono kakaí,* ko e hili atu ia ha moʻui fuoloa mo fakafiemālie;* pea naʻe tanu ia+ ʻe ʻĪsoa mo Sēkope ko hono ongo fohá.

36 Ko e hisitōlia eni ʻo ʻĪsoá, ʻa ia ko ʻĪtomí.+

2 Naʻe maʻu ʻe ʻĪsoa ʻa hono ngaahi uaifí mei he ngaahi ʻofefine ʻo Kēnaní: Ko Ata+ ko e ʻofefine ʻo ʻĒloni ko e Hetí;+ mo ʻAholipama+ ko e ʻofefine ʻo Ana, pea ko e mokopuna fefine ia ʻo Sipione ko e Heví; 3 mo Pasimati,+ ko e ʻofefine ʻo ʻIsimeʻeli pea ko e tuofefine ʻo Nēpaioté.+

Ko e ngaahi foha eni ʻo ʻĪsoa, ʻa ia naʻe fanauʻi kiate ia ʻi he fonua ko Kēnaní. 6 ʻI he hili iá, naʻe ʻave ʻe ʻĪsoa ʻa hono ngaahi uaifí, ko hono ngaahi fohá, ko hono ngaahi ʻofefiné, mo e ngaahi mēmipa kotoa pē ʻo hono falé, ko ʻene tākangá mo ʻene fanga manu kehé kotoa, pea mo e koloa kotoa naʻá ne tānaki+ ʻi he fonua ko Kēnaní pea naʻá ne ʻalu ki ha fonua ʻe taha ʻo mamaʻo meia Sēkope ko hono tokouá.+ 7 He naʻe hoko ʻo fuʻu lahi ʻena koloá ke na nofo fakataha ai, pea ko e fonua naʻá na nofo aí* naʻe ʻikai lava ke nau hao ai koeʻuhi ko ʻena ngaahi tākangá. 8 Ko ia naʻe nofo ʻa ʻĪsoa ʻi he feituʻu moʻungaʻia ko Seiá.+ Ko ʻĪsoá ko ʻĪtomi ia.+

9 Pea ko e hisitōlia eni ʻo ʻĪsoa ko e tamai ʻa e kau ʻĪtomí ʻi he feituʻu moʻungaʻia ko Seiá.+

10 Ko e hingoa eni ʻo e ngaahi foha ʻo ʻĪsoá: Ko ʻElifasi ko e tama ia ʻa Ata, ko e uaifi ʻo ʻĪsoa; ko Liueli ko e tama ia ʻa Pasimati, ko e uaifi ʻo ʻĪsoa.+

11 Ko e ngaahi foha ʻo ʻElifasí ko Tīmani,+ ʻOma, Sefo, Katami, mo Kēnasi.+ 12 Naʻe hoko ʻa Tīmina ko e sinifu ʻa ʻElifasi, ʻa e foha ʻo ʻĪsoá. Naʻe faai atu pē ʻo ne fanauʻi kia ʻElifasi ʻa ʻAmaleki.+ Ko e fānau eni ʻa* Ata, ko e uaifi ʻo ʻĪsoá.

13 Ko e ngaahi foha eni ʻo Liuelí: Ko Nahati, Sala, Sama, mo Misa. Ko e fānau eni ʻa* Pasimati,+ ko e uaifi ʻo ʻĪsoá.

14 Ko e fānau eni ʻa ʻAholipama ko e ʻofefine ʻo Ana pea ko e mokopuna fefine ʻo Sipione, ʻa e uaifi ʻo ʻĪsoá, ʻa ia naʻá ne fanauʻi kia ʻĪsoá: Ko Seusi, Sialame, pea mo Kola.

15 Ko e ngaahi ʻeiki* eni ʻo e ngaahi foha ʻo ʻĪsoá:+ Ko e ngaahi foha ʻo ʻElifasi ko e ʻuluaki foha ʻo ʻĪsoá: Ko ʻEiki Tīmani, ʻEiki ʻOma, ʻEiki Sefo, ʻEiki Kēnasi,+ 16 ʻEiki Kola, ʻEiki Katami, mo ʻEiki ʻAmaleki. Ko e ngaahi ʻeiki eni ʻa ʻElifasi+ ʻi he fonua ko ʻĪtomí. Ko e fānau* eni ʻia Atá.

17 Ko e ngaahi foha eni ʻo Liueli, ʻa e foha ʻo ʻĪsoá: Ko ʻEiki Nahati, ʻEiki Sala, ʻEiki Sama, mo ʻEiki Misa. Ko e ngaahi ʻeiki eni ʻa Liueli ʻi he fonua ko ʻĪtomí.+ Ko e fānau* eni ʻia Pasimati, ko e uaifi ʻo ʻĪsoá.

18 Fakaʻosí, ko e fānau eni ʻa ʻAholipamá, ʻa e uaifi ʻo ʻĪsoá: Ko ʻEiki Seusi, ʻEiki Sialame, mo ʻEiki Kola. Ko e ngaahi ʻeiki eni ʻa ʻAholipama ko e ʻofefine ʻo Ana, ʻa e uaifi ʻo ʻĪsoá.

19 Ko e ngaahi foha eni ʻo ʻĪsoá, pea ko honau ngaahi ʻeikí eni. Ko ʻĪtomi ia.+

20 Ko e ngaahi foha eni ʻo Seia ko e Holí, ko e kakai ʻo e fonuá:+ Ko Lōtani, Sōpale, Sipione, Ana,+ 21 Tīsoni, ʻĒseli, mo Tīsani.+ Ko e ngaahi ʻeiki eni ʻo e kau Holí, ko e ngaahi foha ʻo Seia, ʻi he fonua ko ʻĪtomí.

22 Ko e ongo foha ʻo Lōtaní ko Holi mo Heimami, pea ko e tuofefine ʻo Lōtaní ko Tīmina.+

23 Ko e ngaahi foha eni ʻo Sōpalé: Ko ʻAlivani, Manahate, ʻĪpale, Sifo, pea mo ʻŌnama.

24 Ko e ongo foha eni ʻo Sipioné:+ Ko ʻAia, mo Ana. Ko Ana eni ʻa ia naʻá ne ʻilo ʻa e ngaahi matavai vela ʻi he toafá lolotonga ʻene tokangaʻi ʻa e fanga ʻasi ʻa Sipione ko ʻene tamaí.

25 Ko e fānau eni ʻa Aná: Ko Tīsoni mo ʻAholipama ʻa e ʻofefine ʻo Aná.

26 Ko e ngaahi foha eni ʻo Tīsoní: Ko Hemitani, ʻEsipani, ʻItilani, pea mo Kēlani.+

27 Ko e ngaahi foha eni ʻo ʻĒselí: Ko Pilani, Sāvani, pea mo ʻĒkani.

28 Ko e ongo foha eni ʻo Tīsaní: Ko ʻŪsai pea mo ʻĀlani.+

29 Ko e ngaahi ʻeiki eni ʻo e kau Holí: Ko ʻEiki Lōtani, ʻEiki Sōpale, ʻEiki Sipione, ʻEiki Ana, 30 ʻEiki Tīsoni, ʻEiki ʻĒseli, pea mo ʻEiki Tīsani.+ Ko e ngaahi ʻeiki eni ʻo e kau Holí ʻo fakatatau ki honau ngaahi ʻeiki ʻi he fonua ko Seiá.

31 Pea ko e ngaahi tuʻi eni naʻa nau pule ʻi he fonua ko ʻĪtomí+ ki muʻa ke pule ha tuʻi ki he kau ʻIsilelí.*+ 32 Ko Pela ko e foha ʻo Pioá naʻe pule ia ʻi ʻĪtomi, pea ko e hingoa ʻo hono koló ko Tinapa. 33 ʻI he mate ʻa Pelá, naʻe kamata ke pule ʻa Siopapi ko e foha ʻo Sala mei Pōsilá ʻo fetongi ia. 34 ʻI he mate ʻa Siopapí, naʻe kamata ke pule ʻa Hūsami mei he fonua ʻo e kau Tīmaní ʻo fetongi ia. 35 ʻI he mate ʻa Hūsamí, naʻe kamata ke pule ʻa Hētati ko e foha ʻo Pētatí, ʻa ia naʻá ne ikunaʻi ʻa e kau Mitianí+ ʻi he vahefonua* ʻo Mōapé ʻo fetongi ia, pea ko e hingoa ʻo hono koló ko ʻAviti. 36 ʻI he mate ʻa Hētatí, naʻe kamata ke pule ʻa Samila mei Masileká ʻo fetongi ia. 37 ʻI he mate ʻa Samilá, naʻe kamata ke pule ʻa Saulo mei Leopote ʻa ia ʻoku ʻi he veʻe Vaitafé ʻo fetongi ia. 38 ʻI he mate ʻa Sauló, naʻe kamata ke pule ʻa Pēali-henani ko e foha ʻo ʻAkepoá ʻo fetongi ia. 39 ʻI he mate ʻa Pēali-henani ko e foha ʻo ʻAkepoá, naʻe kamata ke pule ʻa Hētali ʻo fetongi ia. Ko e hingoa ʻo hono koló ko Pau, pea ko e hingoa ʻo hono uaifí ko Mehetapeli ko e tama ʻa Mateleti ko e ʻofefine ʻo Mesahapi.

40 Ko ia ko e ngaahi hingoa eni ʻo e ngaahi ʻeiki ʻa ʻĪsoá ʻo fakatatau ki honau ngaahi fāmilí, ʻo fakatatau ki honau ngaahi feituʻú, ʻi honau ngaahi hingoá: Ko ʻEiki Tīmina, ʻEiki ʻĀliva, ʻEiki Siteti,+ 41 ʻEiki ʻAholipama, ʻEiki ʻEla, ʻEiki Pinoni, 42 ʻEiki Kēnasi, ʻEiki Tīmani, ʻEiki Mipisali, 43 ʻEiki Makiteli, pea mo ʻEiki ʻIlami. Ko e ngaahi ʻeiki eni ʻa ʻĪtomí ʻo fakatatau ki honau ngaahi nofoʻangá ʻi he fonua naʻa nau maʻú.+ Ko ʻĪsoa eni ko e tamai ʻa e kau ʻĪtomí.+

37 Naʻe hokohoko atu ʻa e nofo ʻa Sēkope ʻi he fonua ko Kēnaní, ʻa ia naʻe nofo ai ko ha muli ʻa ʻene tamaí.+

2 Ko e hisitōlia eni ʻo Sēkopé.

ʻI he taimi naʻe taʻu 17 ai ʻa Siosifá,+ naʻe tokangaʻi ʻe he talavoú ni ʻa e tākangá+ mo e ongo tamaiki ʻa Pilaá+ mo e ongo tamaiki ʻa Silipá,+ ʻa e ongo uaifi ʻo ʻene tamaí. Pea naʻe ʻoatu ʻe Siosifa ha fakamatala kovi fekauʻaki mo kinautolu ki heʻenau tamaí. 3 Pea naʻe ʻofa ʻa ʻIsileli ʻia Siosifa ʻo lahi ange ia ʻi hono ngaahi foha kehé kotoa+ koeʻuhi ko e foha ia ʻi hono taʻumotuʻá, pea naʻá ne ngaohi maʻana ha kofu tōtōlofa makehe.* 4 ʻI he sio ʻa hono fanga tokouá ʻoku ʻofa lahi ange ʻiate ia ʻa ʻenau tamaí ʻi he kotoa ʻo kinautolú, naʻe kamata ke nau fehiʻa ʻiate ia, pea naʻe ʻikai malava ke nau lea lelei* kiate ia.

5 Ki mui ai, naʻe misi ʻa Siosifa peá ne tala ange ia ki hono fanga tokouá,+ pea naʻa nau toe maʻu ai ʻa e ʻuhinga lahi ange ke fehiʻa ʻiate ia. 6 Naʻá ne pehē ange kiate kinautolu: “Mou fanongo mai muʻa ki heʻeku misi ko ení. 7 Naʻe fai ʻetau haʻi uite ʻi he loto ngoué lolotonga ia naʻe mālanga hake ʻa ʻeku haʻingá ʻo tuʻu hangatonu pea naʻe takatakai ʻa hoʻomou ngaahi haʻingá ʻo punou hifo ki heʻeku haʻingá.”+ 8 Naʻe pehē ange ʻe hono fanga tokouá kiate ia: “Te ke ʻai moʻoni koā koe ko e tuʻi kiate kimautolu pea puleʻi kimautolu?”+ Ko ia naʻa nau maʻu ai ha toe ʻuhinga ke fehiʻa ʻiate ia, koeʻuhi ko ʻene ngaahi misí mo e meʻa naʻá ne leaʻakí.

9 ʻI he hili iá, naʻe toe ʻi ai ʻene misi, pea naʻá ne fakamatalaʻi ia ki hono fanga tokouá: “Naʻe toe ʻi ai ʻeku misi ʻe taha. ʻI he taimi ko ení naʻe punou mai kiate au+ ʻa e laʻaá mo e māhiná mo e ngaahi foʻi fetuʻu ʻe 11.” 10 Naʻá ne fakamatalaʻi leva ia ki heʻene tamaí pea pehē ki hono fanga tokouá, pea naʻe valokiʻi ia ʻe heʻene tamaí ʻo ne pehē kiate ia: “Ko e hā ʻa e ʻuhinga ʻo hoʻo misi ko ení? Te u haʻu moʻoni koā au pea pehē ki hoʻo faʻeé mo ho fanga tokouá ʻo punou hifo ki he kelekelé kiate koe?” 11 Pea naʻe hoko ʻo loto-kovi ʻa hono fanga tokouá kiate ia,+ ka naʻe hanganaki fakakaukau ʻa ʻene tamaí ki he leá ni.

12 Pea naʻe ʻalu ʻa hono fanga tokouá ke fakakaikai ʻa e tākanga ʻenau tamaí ʻo ofi ki Sīkemi.+ 13 Naʻe pehē ange ki mui ai ʻe ʻIsileli kia Siosifa: “Ko ho fanga tokouá ʻoku nau tokangaʻi ʻa e ngaahi tākangá ʻo ofi ki Sīkemi, ʻikai ko ia? Haʻu, pea tuku ke u fekauʻi atu koe kiate kinautolu.” ʻI he meʻá ni naʻá ne pehē kiate ia: “ʻOku ou maau!” 14 Ko ia naʻá ne pehē ange kiate ia: “Kātaki muʻa ʻo ʻalu ʻo vakai pe ʻoku sai pē ʻa ho fanga tokouá. Sio pe ʻoku fēfē ʻa e tākangá, pea tala mai kiate au.” ʻI he meʻa ko iá naʻá ne fekauʻi atu ia mei he teleʻa* ʻo Hepeloní,+ pea naʻá ne ʻalu atu ki Sīkemi. 15 Ki mui ai, naʻe ʻiloʻi ia ʻe ha tangata ʻi heʻene ʻalu fano holo ʻi he vaó. Naʻe ʻeke ange ʻe he tangatá kiate ia: “Ko e hā ʻokú ke kumí?” 16 ʻI he meʻá ni naʻá ne pehē ange: “Ko ʻeku kumi ʻa hoku fanga tokouá. Kātaki muʻa ʻo tala mai kiate au pe ʻoku nau tauhi ʻi fē ʻa e ngaahi tākangá?” 17 Naʻe hoko atu ʻa e tangatá: “Kuo nau mavahe mei heni, he naʻá ku fanongo ki heʻenau pehē, ‘Tau ō ki Tōtani.’” Ko ia naʻe muimui ʻa Siosifa ki hono fanga tokouá ʻo maʻu atu kinautolu ʻi Tōtani.

18 Pea naʻa nau fakatokangaʻi mai ia mei he mamaʻó, pea ki muʻa ke ne aʻu atu kiate kinautolú, naʻa nau kamata faʻufaʻu fekauʻaki mo ia ke tāmateʻi ia. 19 Ko ia naʻa nau fepehēʻaki: “Sio atu! Ko e tama misí+ ena ʻoku haʻú. 20 ʻĒ, tau tāmateʻi leva ia pea lī ia ki he taha ʻo e ngaahi lepá, pea te tau pehē naʻe keina ia ʻe ha manu fekai. Pea tuku angé ke tau sio pe ko e hā ʻe hoko ki heʻene ngaahi misí.” 21 ʻI he fanongo ʻa Lūpeni+ ki he meʻa ko ení, naʻá ne feinga ke fakahaofi ia meiate kinautolu. Ko ia naʻá ne pehē: “Ke ʻoua naʻa tau toʻo ʻene moʻuí.”+ 22 Naʻe pehē ange ʻe Lūpeni kiate kinautolu: “ʻOua ʻe lingitotó.+ Lī ia ki he lepa ko eni ʻi he toafá, kae ʻoua ʻe fai ha kovi* kiate ia.”+ Ko ʻene taumuʻá ke fakahaofi ia meiate kinautolu koeʻuhi ke fakafoki ia ki heʻene tamaí.

23 Ko ia ʻi he haʻu pē ʻa Siosifa ki hono fanga tokouá, naʻa nau hae meia Siosifa ʻa hono kofú, ʻa e kofu makehe ko ia naʻá ne tuí,+ 24 pea naʻa nau ʻave ia ʻo lī ki he lepá. ʻI he taimi ko iá naʻe maha ʻa e lepá; naʻe ʻikai ʻi ai ha vai.

25 Naʻa nau tangutu hifo leva ke kai. ʻI heʻenau hanga haké, naʻe ʻi ai ha fononga ko e kau ʻIsimeʻeli+ ko ʻenau haʻu mei Kiliati. Naʻe fakaheka ʻi heʻenau fanga kāmelí ʻa e puluʻi ʻakau namu-lelei, paʻame,* mo e kiliʻiʻakau ʻoku toʻi,+ pea ko ʻenau fononga hifo ki ʻIsipite. 26 ʻI he meʻá ni naʻe pehē ʻe Siuta ki hono fanga tokouá: “Ko e hā ha meʻa ʻe maʻu kapau naʻa tau tāmateʻi hotau tokouá pea fufū ʻa hono totó?+ 27 ʻĒ, tau fakatau atu ia+ ki he kau ʻIsimeʻelí, pea ʻoua naʻa tau ala kiate ia. He ko ē, ko hotau tokoua ia, ko hotau kakano.” Ko ia naʻa nau fanongo ki honau tokouá. 28 Pea ʻi he taimi naʻe ʻalu hifo ai ʻa e kau mēsianiti Mitianí,+ naʻa nau ʻohake ʻa Siosifa mei he lepá ʻo fakatau atu ia ki he kau ʻIsimeʻelí ki he konga siliva ʻe 20.+ Naʻe ʻave ʻe he kau tangatá ni ʻa Siosifa ki ʻIsipite.

29 Ki mui ai, ʻi he foki atu ʻa Lūpeni ki he lepá ʻo ne sio naʻe ʻikai ke ʻi he lepá ʻa Siosifá, naʻá ne hae hono ngaahi kofú. 30 ʻI heʻene foki ki hono fanga tokouá, naʻá ne kalanga: “Kuo pulia ʻa e tamasiʻí! Pea ko au—ko e hā ʻa e meʻa te u faí?”

31 Ko ia naʻa nau ʻave ʻa e kofu ʻo Siosifá pea tāmateʻi ha kosi tangata ʻo unu ʻa e kofú ʻi he totó. 32 ʻI he hili iá, naʻa nau fai ha fekau ke ʻoatu ʻa e kofu makehé ki heʻenau tamaí mo pehē: “Ko e meʻa eni naʻa mau maʻú. Vakaiʻi ange muʻa pe ko e kofu nai eni ʻo ho fohá pe ʻikai.”+ 33 Naʻá ne vakaiʻi leva ia peá ne kalanga: “Ko e kofu ia ʻo hoku fohá! ʻOku pau pē kuo keina ia ʻe ha manu fekai! Kuo haehae moʻoni ʻa Siosifa!” 34 ʻI he meʻa ko iá naʻe hae ʻe Sēkope ʻa hono ngaahi kofú pea ʻai tauangaʻa ʻi hono kongalotó ʻo ne tengihia ʻa hono fohá ʻi he ngaahi ʻaho lahi. 35 Pea ko e kotoa ʻo hono ngaahi fohá mo e kotoa ʻo hono ngaahi ʻofefiné naʻa nau hanganaki feinga ke fakafiemālieʻi ia, ka naʻá ne hanganaki fakafisi ke tali ʻa e fakafiemālié peá ne pehē: “Te u ʻalu hifo ki he Faʻitoká*+ ʻo tengihia hoku fohá!” Pea naʻe hokohoko atu ʻa e tangi ʻa ʻene tamaí koeʻuhi ko ia.

36 Pea naʻe fakatau atu ia ʻe he kau Mitianí ʻi ʻIsipite kia Pōtifa, ko ha ʻōfisa ʻo e lotoʻā ʻo Feló+ pea ko ia ʻa e pule kaʻaté.+

38 ʻI he taimi nai ko ení naʻe mavahe ʻa Siuta mei hono fanga tokouá ʻo ne fokotuʻu hono tēnití ʻo ofi ki ha tangata ʻAtulami ko hono hingoá ko Hila. 2 Naʻe sio ai ʻa Siuta ki he ʻofefine ʻo ha tangata Kēnani+ ʻe taha ko hono hingoá ko Sua. Ko ia naʻá ne ʻave ia ʻo ne mohe* mo ia, 3 peá ne hoko ʻo feitama. Ki mui ai, naʻá ne fanauʻi ha tama tangata pea naʻe fakahingoa ia ʻe Siuta ko ʻEa.+ 4 Naʻá ne toe hoko ʻo feitama ʻo ne fanauʻi ha tama tangata pea naʻe fakahingoa ia ko ʻŌnani. 5 Pea naʻá ne toe fanauʻi ha tama tangata pea naʻe fakahingoa ia ko Sila. Naʻe ʻi ʻAkesipi+ ʻa Siuta ʻi he taimi naʻá ne fanauʻi ai iá.

6 ʻI he faai mai ʻa e taimí, naʻe maʻu ʻe Siuta ha uaifi moʻo ʻEa ko hono ʻuluaki fohá, pea ko hono hingoá ko Tema.+ 7 Ka ko ʻEa, ʻa e ʻuluaki foha ʻo Siutá, naʻá ne fai ʻa e meʻa naʻe taʻefakahōifua kia Sihova; ko ia naʻe tāmateʻi ia ʻe Sihova. 8 ʻI he meʻa ko iá, naʻe pehē ai ʻe Siuta kia ʻŌnani: “Ke ke mohe mo e uaifi ho tokouá pea fakahoko mo ia ʻa e mali mo e tokoua ʻo e husepānití ʻo ʻohake ai ha hako maʻa ho tokouá.”+ 9 Ka naʻe ʻiloʻi ʻe ʻŌnani ʻe ʻikai lau ʻa e hako ia ko iá ko hano hako.+ Ko ia ʻi he taimi naʻá ne mohe ai mo e uaifi ʻo hono tokouá, naʻá ne tuku ange hono huhuʻá ʻi he kelekelé ke ʻoua naʻa maʻu ʻe hono tokouá ha hako.+ 10 Ko e meʻa naʻá ne faí naʻe kovi ia ʻi he vakai mai ʻa Sihová, ko ia naʻá ne tāmateʻi foki mo ia.+ 11 Naʻe pehē ange ʻe Siuta kia Tema ko e mali ʻo hono fohá: “Nofo fakauitou ʻi he fale ʻo hoʻo tamaí kae ʻoua ke fuʻu lahi ʻa hoku foha ko Silá,” he naʻá ne pehē pē kiate ia: ‘ʻE mate nai foki mo ia ʻo hangē ko hono ongo tokouá.’+ Ko ia naʻe ʻalu ʻa Tema ʻo ne nofo ʻi he fale ʻo ʻene tamai ʻaʻaná.

12 Naʻe mahili atu ha taimi, pea naʻe mate ʻa e uaifi ʻo Siutá, ʻa e ʻofefine ʻo Suá.+ Naʻe tauhi ʻe Siuta ʻa e vahaʻa taimi ʻo e tengihiá, pea naʻá ne ʻalu leva ki heʻene kau kosi sipí ʻi Timinā+ fakataha mo hono takanga ko Hila ko e ʻAtulamí.+ 13 Naʻe fakahā kia Tema: “Ko e tamai ena ho malí ʻoku ʻalu hake ki Timinā ke kosi ʻene fanga sipí.” 14 ʻI he meʻa ko iá, naʻá ne huʻi hono teunga fakauitoú peá ne ʻai hano pūlou mo hano pulupulu peá ne tangutu ʻi he hūʻanga ʻo ʻEnaimí, ʻa ia ʻoku ʻi he hala ki Timinaá, he naʻá ne sio kuo fuʻu lahi ʻa Sila pea kuo teʻeki ai ke ʻave ia kiate ia ke ne hoko ko hano uaifi.+

15 ʻI hono fakatokangaʻi atu ia ʻe Siutá, naʻá ne fakakaukau leva ko iá ko ha fefine feʻauaki, koeʻuhí he naʻá ne ʻufiʻufi hono matá. 16 Ko ia naʻá ne afe kiate ia ʻi he veʻehalá ʻo ne pehē: “Tuku muʻa ke u mohe mo koe,” he naʻe ʻikai te ne ʻiloʻi ko e mali ia hono fohá.+ Kae kehe, naʻá ne pehē ange: “Ko e hā te ke foaki mai maʻaku ka ke mohe mo aú?” 17 ʻI he meʻá ni naʻá ne pehē ange: “Te u fekau ke ʻomai ha kosi mui mei heʻeku tākangá.” Ka naʻe pehē ange ʻe ia: “Te ke ʻomai ha talifaki kae ʻoua ke ke ʻomai ia?” 18 Naʻá ne hoko atu leva: “Ko e hā ʻa e meʻa talifaki te u ʻoatu kiate koé?” Pea naʻá ne pehē ange ki ai: “Ko ho mama silá+ mo hono afó pea mo ho tokotoko ʻoku ʻi ho nimá.” Naʻá ne ʻoange leva ia kiate ia peá ne mohe mo ia, pea naʻá ne hoko ʻo feitama kiate ia. 19 ʻI he hili iá, naʻá ne tuʻu hake ʻo ne ʻalu peá ne toʻo ʻa hono pulupulú peá ne tui ʻa hono teunga fakauitoú.

20 Pea naʻe fekau atu ʻe Siuta ke ʻave ʻa e kosi muí ʻe hono takanga ko e ʻAtulamí,+ kae fakafoki mai ʻa e meʻa talifakí mei he nima ʻo e fefiné, ka naʻe ʻikai ʻaupito te ne ʻilo ia. 21 Naʻá ne fehuʻi ki he kau tangata ʻo e feituʻú, ʻo pehē: “Ko fē ʻa e fefine feʻauaki ʻo e temipalé ʻi ʻEnaimi naʻe ʻi he veʻehalá?” Ka naʻa nau pehē: “Kuo ʻikai ʻaupito ke ʻi ai ha fefine feʻauaki ʻo e temipalé ʻi he feituʻú ni.” 22 Faifai pē naʻá ne foki kia Siuta ʻo ne pehē: “Naʻe ʻikai ʻaupito te u ʻilo ia, pea tuku kehe ia, naʻe pehē ʻe he kau tangata ʻo e feituʻú, ‘Kuo ʻikai ʻaupito ke ʻi ai ha fefine feʻauaki ʻo e temipalé ʻi he feituʻú ni.’” 23 Ko ia naʻe pehē ange ʻe Siuta: “Tuku ke ne maʻu ā ʻe ia, ke ʻoua naʻa hoko ai ʻo taʻetokaʻi kitaua. Pe ko e hā pē ʻa e tuʻungá, kuó u fekau atu ke ʻave ʻa e kosi muí ni, ka naʻe ʻikai ʻaupito te ke ʻilo ia.”

24 Kae kehe, ʻi he hili ʻa e māhina nai ʻe tolu mei ai, naʻe fakahā kia Siuta: “Ko Tema ko e mali ho fohá kuó ne faifeʻauaki, pea ʻokú ne feitama foki ko e meʻa ʻi heʻene feʻauakí.” ʻI he meʻa ko iá naʻe pehē ʻe Siuta: “ʻOmi ia ki tuʻa pea tuku ke tutu ia.”+ 25 ʻI hono ʻomi ia ki tuʻá, naʻá ne ʻoatu ha fekau ki he tamai ʻa hono malí: “ʻOku ou feitama ki he tangata ʻoku ʻaʻana ʻa e ngaahi meʻá ni.” Naʻá ne hoko atu leva: “Vakaiʻi ange muʻa pe ko hai ʻoku ʻaʻana ʻa e ngaahi meʻá ni, ʻa e mama silá mo hono afó pea mo e tokotokó.”+ 26 Naʻe vakaiʻi leva ia ʻe Siuta peá ne pehē: “ʻOkú ne tonuhia ange ʻiate au, koeʻuhí naʻe ʻikai te u ʻave ia kia Sila ko hoku fohá.”+ Pea naʻe ʻikai te ne toe mohe mo e fefiné ʻi he hili iá.

27 ʻI he hoko mai ʻa e taimi kiate ia ke ne fāʻelé, naʻe ʻi hono manavá ha ongo māhanga. 28 ʻI he taimi naʻá ne fāʻele aí, naʻe mafao mai ʻa e nima ʻo e toko taha, pea naʻe toʻo leva ʻe he māʻulí ha afo kula ʻahoʻaho ʻo ne nonoʻo ia ʻi hono nimá, peá ne pehē: “Ko e tokotaha eni naʻe ʻuluaki haʻu ki tuʻá.” 29 Ka ʻi heʻene toʻo atu pē hono nimá, naʻe haʻu leva ki tuʻa ʻa hono tokouá, pea naʻe kalanga ʻa e māʻulí: “Vakai ange ki he motuhia ko eni kuó ke fakatupunga ʻe koé!” Ko ia naʻe fakahingoa ai ia ko Pēlesi.+ 30 ʻI he hili iá, naʻe haʻu ki tuʻa ʻa hono tokouá, ʻa ia ko hono nimá ē naʻe nonoʻo ai ʻa e afo kula ʻahoʻahó, pea naʻe fakahingoa ia ko Sala.+

39 Naʻe ʻohifo leva ʻa Siosifa ki ʻIsipite,+ pea ko Pōtifa+ ko ha tangata ʻIsipite, ko ha ʻōfisa ʻi he lotoʻā ʻo Feló pea ko e pule kaʻaté, naʻá ne fakatau mai ia mei he kau ʻIsimeʻeli+ ʻa ia naʻa nau ʻohifo ia ki aí. 2 Ka naʻe kau mo Siosifa+ ʻa Sihova. Ko hono olá, naʻá ne hoko ʻo lavameʻa pea naʻe tuku ki ai ʻa e fale ʻo hono ʻeikí, ʻa e ʻIsipité. 3 Pea naʻe sio ʻa hono ʻeikí naʻe kau mo ia ʻa Sihova pea naʻe ʻai ʻe Sihova ʻa e meʻa kotoa pē naʻá ne faí ke lavameʻa.

4 Naʻe hanganaki maʻu ʻe Siosifa ʻa e leleiʻia ʻi heʻene vakaí, pea naʻá ne hoko ko hono tauhi. Ko ia naʻá ne fakanofo ia ke pule ki hono falé, pea naʻá ne tuku ia ke ne tokangaʻi ʻa e meʻa kotoa naʻe ʻaʻaná. 5 Mei he taimi naʻá ne fakanofo ai ia ke ne pule ki hono falé pea tokangaʻi ʻa e meʻa kotoa naʻe ʻaʻaná, naʻe hanganaki tāpuakiʻi ʻe Sihova ʻa e fale ʻo e ʻIsipité koeʻuhi ko Siosifa, pea naʻe hoko ʻa e tāpuaki ʻa Sihová ki he meʻa kotoa naʻá ne maʻu ʻi he falé pea ʻi ʻuta.+ 6 Naʻe faifai atu peá ne tuku ange ʻa e meʻa kotoa naʻe ʻaʻaná ke tokangaʻi ʻe Siosifa, pea naʻe ʻikai te ne toe fakakaukau ki ha meʻa tuku kehe pē ʻa e meʻakai naʻá ne kaí. ʻIkai ngata aí, naʻe tupu ʻa Siosifa ʻo sino lelei mo matātangata.

7 Pea ʻi he hili ʻa e ngaahi meʻá ni, ko e uaifi ʻo hono ʻeikí naʻe kamata ke ne sio ʻo manako ʻia Siosifa peá ne pehē: “Ke ke mohe* mo au.” 8 Ka naʻá ne fakafisingaʻi peá ne pehē ki he uaifi ʻo hono ʻeikí: “Ko eni ʻoku ʻikai ke ʻiloʻi ʻe hoku ʻeikí ʻa e meʻa ʻoku ʻiate au ʻi he falé, pea ko e meʻa kotoa pē ʻoku ʻaʻaná kuó ne tuku mai ke u tokangaʻi. 9 ʻOku ʻikai ha taha ʻi he falé ni ʻe lahi ange ʻiate au, pea kuo ʻikai te ne taʻofi meiate au ha momoʻi meʻa ʻe taha tuku kehe pē koe, koeʻuhí ko hono uaifí koe. ʻE lava fēfē ke u fai ʻa e fuʻu koví ni ʻo u faiangahala moʻoni ai ki he ʻOtuá?”+

10 Ko ia ʻi he ʻaho ki he ʻaho naʻá ne lea ai kia Siosifa, ka naʻe ʻikai ʻaupito te ne loto ke mohe mo ia pe ke nofo atu mo ia. 11 Ka ʻi he taha ʻo e ngaahi ʻaho ʻa ia naʻá ne hū ai ki he falé ke fai ʻene ngāué, naʻe ʻikai ha taha ʻi he kau sevāniti ʻo e falé naʻe ʻi he falé. 12 Naʻe puke leva ia ʻe he fefiné ʻi hono kofú ʻo ne pehē: “Ke ke mohe mo au!” Ka naʻá ne liʻaki hono kofú ʻi he nima ʻo e fefiné peá ne hola ki tuʻa. 13 ʻI heʻene sio pē kuó ne liʻaki hono kofú ʻi hono nimá pea kuó ne hola ki tuʻá, 14 naʻá ne kamata kaikaila ki he kau tangata ʻo hono falé ʻo ne pehē kiate kinautolu: “Sio ange! Naʻá ne ʻomai kiate kitautolu ʻa e tangata Hepelū ko ení ke ne ʻai kitautolu ko ha meʻa fakakata. Naʻá ne haʻu kiate au ke ne mohe mo au, ka naʻá ku kamata kaikaila ʻaki ʻa e leʻo-lahi tahá. 15 Pea ʻi heʻene fanongo pē ki he hiki hake hoku leʻó ʻo kaikailá, naʻá ne liʻaki hono kofú ʻi hoku tafaʻakí peá ne hola ki tuʻa.” 16 ʻI he hili iá, naʻá ne tuku ʻa hono kofú ʻi hono tafaʻakí kae ʻoua ke haʻu ʻa e ʻeiki ʻo Siosifá ki hono falé.

17 Naʻá ne tala ange leva kiate ia ʻa e meʻa tatau, ʻo ne pehē: “Ko e sevāniti Hepelū ko ia naʻá ke ʻomai kiate kitautolú naʻá ne haʻu kiate au ke ʻai au ko ha meʻa fakakata. 18 Ka ʻi heʻeku hiki hake pē ʻa hoku leʻó ʻo kamata ke kaikailá, naʻá ne liʻaki hono kofú ʻi hoku tafaʻakí peá ne hola ki tuʻa.” 19 ʻI he fanongo pē ʻa hono ʻeikí ki he ngaahi lea naʻe leaʻaki ange kiate ia ʻe hono uaifí, ʻo pehē: “Ko e ngaahi meʻa eni naʻe fai ʻe hoʻo sevānití kiate aú,” naʻe kakaha ʻa ʻene ʻitá. 20 Ko ia naʻe hanga ʻe he ʻeiki ʻo Siosifá ʻo ʻave ia ʻo tuku ki he pilīsoné, ʻa e feituʻu naʻe tauhi pōpula ai ʻa e kau pōpula ʻa e tuʻí, pea naʻá ne nofo ai pē ʻi he pilīsoné.+

21 Ka naʻe hokohoko atu ʻa e ʻia Siosifa ʻa Sihová pea naʻá ne hanganaki fakahāhā ʻa e ʻofa mateaki kiate ia pea tuku ke leleiʻia ai ʻa e ʻōfisa pule ʻo e pilīsoné.+ 22 Ko ia naʻe ʻai ʻe he ʻōfisa pule ʻo e pilīsoné ʻa Siosifa ke ne tokangaʻi ʻa e kau pōpula kotoa pē ʻi he pilīsoné, pea ko e meʻa kotoa pē naʻa nau fai aí, ko ia ʻa e tokotaha naʻá ne fekauʻi ke fai iá.+ 23 Ko e ʻōfisa pule ʻo e pilīsoné naʻe ʻikai ʻaupito te ne tokangaʻi ha momoʻi meʻa ʻe taha naʻe tuku ange ke tokangaʻi ʻe Siosifa, he naʻe ʻia Siosifa ʻa Sihova pea naʻe ʻai ʻe Sihova ha meʻa pē naʻá ne fai ke lavameʻa.+

40 ʻI he hili ʻa e ngaahi meʻá ni, ko e pule tauhi-inu+ ʻa e tuʻi ʻo ʻIsipité mo e pule taʻo-maá naʻá na faiangahala ki hona ʻeikí, ʻa e tuʻi ʻo ʻIsipité. 2 Ko ia naʻe houhau ʻa Felo ʻi heʻene ongo ʻōfisá, ʻa e pule tauhi-inú pea mo e pule taʻo-maá,+ 3 pea naʻá ne tuku kinaua ki he pilīsone ʻi he fale ʻo e pule kaʻaté,+ ki he feituʻu ʻa ia naʻe tuku pōpula ai ʻa Siosifá.+ 4 Naʻe vaheʻi leva ʻe he pule kaʻaté ʻa Siosifa kiate kinaua pea ke ne tokangaʻi kinaua,+ pea naʻá na nofo ai pē ʻi ha vahaʻa taimi* ʻi he pilīsoné.

5 Ko e tokotaha tauhi-inú pea mo e tokotaha taʻo-mā ʻa e tuʻi ʻo ʻIsipité, ʻa ia naʻe tauhi pōpula ʻi he pilīsoné, naʻá na taki taha misi ʻi he pō tatau pē, pea ko e misi taki taha naʻe ʻi ai pē hono ʻuhinga. 6 ʻI he pongipongi hono hokó, ʻi he hū atu ʻa Siosifa ʻo ne sio kiate kinauá, naʻá na mata mamahi. 7 Ko ia naʻá ne ʻeke ange ki he ongo ʻōfisa ʻa Felo ʻa ia naʻe tauhi pōpula fakataha mo ia ʻi he fale ʻa hono ʻeikí: “Ko e hā ʻokú mo mata mamahi ai he ʻaho ní?” 8 ʻI he meʻá ni naʻá na pehē ange kiate ia: “Naʻá ma taki taha misi, ka ʻoku ʻikai ke ʻi ai ha tokotaha fakaʻuhinga misi ʻi heni mo kimaua.” Naʻe pehē ange ʻe Siosifa kiate kinaua: “ʻIkai ko e fakaʻuhingá ʻoku ʻa e ʻOtuá ia?+ Fakamatala mai muʻa ia kiate au.”

9 Ko ia naʻe fakamatala ʻe he pule tauhi-inú ʻene misí kia Siosifa, ʻo ne pehē kiate ia: “ʻI heʻeku misí, naʻe ʻi ai ha fuʻu kālepi ʻi hoku ʻaó. 10 Pea ko e fuʻu kālepí, naʻe ʻi ai ha vaʻa ʻe tolu, pea ʻi heʻene hulí, naʻe fisi pea ko hono ngaahi fuhí naʻe momoho ai ʻa e kālepí. 11 Pea ko e ipu ʻa Feló naʻe ʻi hoku nimá, pea naʻá ku toʻo ʻa e kālepí ʻo tatau ia ki he ipu ʻa Feló. ʻI he hili iá, naʻá ku ʻoange ʻa e ipú ki he nima ʻo Feló.” 12 Naʻe pehē ange leva ʻe Siosifa kiate ia: “Ko hono fakaʻuhingá eni: Ko e vaʻa ʻe tolú ko e ʻaho ia ʻe tolu. 13 ʻI he ʻaho ʻe tolu mei heni, ʻe hanga ʻe Felo ʻo tuku ange koe,* ʻo toe fakafoki koe ki ho lakangá,+ pea te ke ʻoange ʻa e ipu ʻa Feló ki hono nimá ʻo hangē ko ia naʻá ke fai ki muʻa ʻi he taimi naʻá ke hoko ai ko ʻene tokotaha tauhi-inú.+ 14 Kae kehe, kuo pau ke ke manatuʻi au ʻi he taimi te ke hoko ai ʻo lakalakaimonuú. Ke ke fakahaaʻi mai muʻa kiate au ʻa e ʻofa mateakí peá ke fakahaaʻi au kia Felo, koeʻuhí ke tuku ai au ki tuʻa mei he potú ni. 15 Ko hono moʻoní, naʻe ʻomi fakamālohi au mei he fonua ʻo e kau Hepeluú,+ pea kuo ʻikai te u fai ha meʻa ʻe taha heni ke totonu ai ʻenau tuku au ʻi he pilīsoné.”*+

16 ʻI he sio ʻa e pule taʻo-maá kuo fakaʻuhingaʻi ʻe Siosifa ha meʻa ʻoku leleí, naʻá ne pehē ange kiate ia: “Naʻá ku misi foki mo au, pea naʻe ʻi ai ʻa e kato ʻe tolu ʻo e mā hinehina naʻe ʻi hoku ʻulú, 17 pea ʻi he kato taupotu ki ʻolungá, naʻe ʻi ai ʻa e faʻahinga kehekehe ʻo e meʻa naʻe taʻo maʻa Felo, pea naʻe ʻi ai ʻa e fanga manupuna naʻa nau kai mei he kato naʻe ʻi hoku funga ʻulú.” 18 Naʻe tali ange leva ʻe Siosifa, “Ko hono fakaʻuhingá eni: Ko e kato ʻe tolú ko e ʻaho ia ʻe tolu. 19 ʻI he ʻaho ʻe tolu mei heni, ʻe tuʻusi ho ʻulú* ʻe Felo pea ʻe tautau koe ʻi ha ʻakau, pea ʻe kai ʻe he fanga manupuná ho kakanó.”+

20 Pea ko e ʻaho hono tolú ko e ʻaho ʻaloʻi+ ia ʻo Feló, pea naʻá ne fai ha kātoanga maʻa ʻene kau sevānití kotoa, peá ne ʻomi fakatouʻosi ʻa e* pule tauhi-inú pea mo e pule taʻo-maá ki he ʻao ʻo ʻene kau sevānití. 21 Pea naʻá ne fakafoki ʻa e pule tauhi-inú ki hono lakanga ko e tokotaha tauhi-inú, pea naʻe hokohoko atu ʻene ʻoange ʻa e ipú kia Feló. 22 Ka naʻá ne tautau ʻa e pule taʻo-maá, ʻo hangē tofu pē ko hono fakaʻuhinga ʻe Siosifa kiate kinauá.+ 23 Kae kehe, ko e pule tauhi-inú naʻe ʻikai te ne manatuʻi ʻa Siosifa; naʻe ngalo ai pē ia ʻiate ia.+

41 ʻI he ngataʻanga ʻo e taʻu kakato ʻe ua, naʻe misi+ ʻa Felo naʻá ne tuʻu ʻi he veʻe Vaitafe Nailá. 2 Pea naʻe ʻalu hake mei he vaitafé, ha fanga pulu matamatalelei mo sisino ʻe toko fitu, pea naʻa nau kaikai ʻi he mohuku ʻo Nailá.+ 3 ʻI he hili kinautolú, naʻe toe ʻi ai mo e fanga pulu kehe ʻe toko fitu naʻa nau ʻalu hake mei Naila ʻa ia naʻa nau hā palakū mo tutue, pea naʻa nau tuʻu ʻi he tafaʻaki ʻo e fanga pulu sisinó ʻi he veʻe vai ʻo Nailá. 4 Pea naʻe kamata ke keina ʻe he fanga pulu palakū mo tutué ʻa e fanga pulu ʻe toko fitu naʻe matamatalelei mo sisinó. Pea naʻe ʻā hake leva ai ʻa Felo.

5 Pea naʻá ne toe mohe peá ne misi ko hono tuʻo uá ia. Naʻe ʻi ai ha ngaahi vaʻa uite ʻe fitu naʻe ʻalu hake ʻi he kau pē ʻe taha, ʻa ia naʻe fō moʻui mo lelei.+ 6 Pea ʻi he hili kinautolú, naʻe ʻi ai mo e ngaahi vaʻa uite ʻe fitu ʻa ia naʻe tupu hake, naʻe fō mate mo māngia tupu mei he matangi hahaké. 7 Pea ko e ngaahi vaʻa uite fō mate ʻe fitú naʻe kamata ke nau folo ʻa e ngaahi vaʻa uite ʻe fitu naʻe fō moʻui mo leleí. Pea naʻe ʻā hake leva ai ʻa Felo ʻo ne ʻiloʻi tā ko ha misi ia.

8 Ka ʻi he pongipongí, naʻe hoko ʻo hohaʻa hono laumālié. Ko ia naʻá ne fai ha fekau ke ui mai ʻa e kau taulaʻeiki faimana kotoa pē ʻo ʻIsipité pea mo hono kau tangata poto kotoa pē. Naʻe fakamatala ange ʻe Felo ʻa ʻene ongo misí kiate kinautolu, ka naʻe ʻikai ha taha naʻe lava ke ne fakaʻuhingaʻi ia kia Felo.

9 Ko ia ai, naʻe lea ange kia Felo ʻa e pule tauhi-inú, ʻo ne pehē: “ʻOku ou vete atu ʻeku ngaahi angahalá he ʻahó ni. 10 Naʻe houhau ʻa Felo ʻi heʻene kau sevānití. Ko ia naʻá ne tuku ai au ki he pilīsone ʻi he fale ʻo e pule kaʻaté, ʻa au pea mo e pule taʻo-maá.+ 11 ʻI he hili iá, naʻá ma taki taha misi ʻi he pō tatau pē. Ko au mo ia naʻá ma taki taha misi pea naʻe ʻi ai hona taki taha ʻuhinga.+ 12 Pea naʻe ʻi ai fakataha mo kimaua ha talavou Hepelū, ko ha sevāniti ʻa e pule kaʻaté.+ ʻI he taimi naʻá ma fakamatala ai ia kiate iá,+ naʻá ne fakaʻuhingaʻi kiate kimaua ʻa e ʻuhinga ʻo e misi taki taha. 13 Naʻe hoko ʻo hangē tofu pē ko ia ko ʻene fakaʻuhingaʻi kiate kimauá. Naʻe fakafoki au ki hoku lakangá, ka naʻe tautau+ ʻa e tangata ia ʻe tahá.”

14 Ko ia naʻe fai ʻe Felo ha fekau ke ui mai ʻa Siosifa,+ pea naʻa nau ʻomi fakavave ia mei he pilīsoné.*+ Naʻá ne tele pea fetongi hono ngaahi teungá peá ne hū atu kia Felo. 15 Naʻe pehē ange leva ʻe Felo kia Siosifa: “Naʻá ku misi, ka ʻoku ʻikai ha taha ke ne fakaʻuhingaʻi ia. Ko eni kuó u fanongo ki hano leaʻaki ʻo fekauʻaki mo koe ʻoku lava ke ke fanongo ki ha misi pea fakaʻuhingaʻi ia.”+ 16 ʻI he meʻá ni naʻe tali ange ʻe Siosifa kia Felo: “Ke ʻoua naʻa pehē ko au ia! ʻE folofola ʻa e ʻOtuá ʻo fekauʻaki mo ha lelei kia Felo.”+

17 Naʻe hoko atu ʻa Felo ʻo ne pehē kia Siosifa: “ʻI heʻeku misí, naʻá ku tuʻu ʻi he veʻe Vaitafe Nailá. 18 Pea naʻe ʻalu hake mei Naila ha fanga pulu matamatalelei mo sisino ʻe toko fitu, pea naʻe kamata ke nau kaikai ʻi he mohuku ʻo Nailá.+ 19 Pea ʻi he hili kinautolú, naʻe ʻi ai ha fanga pulu kehe ʻe toko fitu naʻa nau ʻalu hake ʻa ia naʻe hā palakū, mo matamatakovi ʻaupito pea mo tutue. Kuo teʻeki ai ʻaupito ke u mamata ʻi ha fanga pulu matamatakovi pehē ʻi he fonua kotoa ʻo ʻIsipité. 20 Pea ko e fanga pulu ʻūhui mo koví naʻe kamata ke nau keina ʻa e ʻuluaki fanga pulu sisino ʻe toko fitú. 21 Ka ʻi he ʻosi ange ʻenau keina kinautolú, naʻe ʻikai lava ʻe ha taha ke ne ʻiloʻi naʻa nau fai pehē, koeʻuhí he ko honau fōtungá naʻe kei kovi tatau pē ʻo hangē ko ia ki muʻá. Pea naʻá ku ʻā hake leva.

22 “ʻI he hili iá, naʻá ku sio ʻi heʻeku misí ki ha vaʻa uite ʻe fitu naʻe ʻalu hake ʻi he kau pē ʻe taha, ʻa ia naʻe fō moʻui mo lelei.+ 23 ʻI he hili kinautolú, naʻe tupu hake ʻa e vaʻa uite ʻe fitu naʻe mae, pea fō mate mo māngia tupu mei he matangi hahaké. 24 Naʻe kamata leva ke folo ʻe he ngaahi vaʻa uite fō maté ʻa e ngaahi vaʻa uite lelei ʻe fitú. Ko ia naʻá ku fakahā ia ki he kau taulaʻeiki faimaná,+ ka naʻe ʻikai ha taha ʻe lava ke ne fakamatalaʻi mai ia kiate au.”+

25 Naʻe pehē ange leva ʻe Siosifa kia Felo: “Ko e ongo misi ʻa Feló ʻokú na taha pē. Kuo fakahā ʻe he ʻOtua moʻoní kia Felo ʻa e meʻa te Ne faí.+ 26 Ko e fanga pulu lelei ʻe toko fitú ko e taʻu ia ʻe fitu. Pehē foki, ko e ngaahi vaʻa uite lelei ʻe fitú ko e taʻu ia ʻe fitu. Ko e ongo misí ʻokú na taha pē. 27 Ko e fanga pulu ʻūhui mo kovi ʻe fitu naʻe ʻalu hake ʻi he hili kinautolú ko e taʻu ia ʻe fitu, pea ko e ngaahi vaʻa uite fō mate ʻe fitu ʻa ia naʻe māngia tupu mei he matangi hahaké, ko e taʻu honge ia ʻe fitu. 28 Ko e meʻa tofu pē eni kuó u tala kia Feló: Kuo ʻai ʻe he ʻOtua moʻoní ʻa Felo ke ne ʻilo ʻa e meʻa te Ne faí.

29 “ʻE hoko mai ha taʻu mahu lahi ʻe fitu ʻi he fonua kotoa ko ʻIsipité. 30 Ka ʻe hoko moʻoni mai ʻi he hili iá ha taʻu honge ʻe fitu, pea ko e moʻoni ʻe ngalo ʻa e mahu kotoa ʻi he fonua ko ʻIsipité, pea ko e hongé te ne fakakaʻanga ʻa e fonuá.+ 31 Pea ko e mahu ki muʻa ʻi he fonuá ʻe ʻikai ke toe manatua koeʻuhí ko e honge ʻi he hili iá, he ʻe mafatukituki ʻaupito ia. 32 Ko e misí naʻe ʻoange tuʻo ua ia kia Felo koeʻuhí kuo fakapapauʻi ʻe he ʻOtua moʻoní ʻe pau ʻa e meʻá ni, pea ko e ʻOtua moʻoní kuo vavé ni ke ne fakahoko ia.

33 “Ko ia ke fakasio leva ʻe Felo ha tangata ʻoku fakapotopoto mo potó pea fokotuʻu ia ke ne pule ki he fonua ko ʻIsipité. 34 Tuku ke fai leva ʻe Felo ha meʻa pea fakanofo ha kau tauhi ʻi he fonuá, pea ke ne tānaki ha vahe nima ʻe taha ʻo e fua ʻo ʻIsipité lolotonga ʻa e taʻu mahu ʻe fitú.+ 35 Pea ke nau tānaki ʻa e kotoa ʻo e meʻakai lolotonga ʻa e ngaahi taʻu lelei ko eni ka hoko maí, pea ke nau faʻoaki uite ʻi he malumalu ʻo e mafai ʻo Feló ko ha meʻakai ia ke tauhi ʻi he ngaahi koló pea tokangaʻi ai.+ 36 Ko e meʻakaí ni ʻe hoko ia ko ha tokonaki ki he fonuá ʻi he taʻu honge ʻe fitu ʻe hoko ʻi he fonua ko ʻIsipité, ke ʻoua naʻa ʻauha ʻa e fonuá ʻi he hongé.”+

37 Naʻe hā lelei ʻa e fokotuʻu ko ení kia Felo pea mo ʻene kau sevānití kotoa. 38 Ko ia naʻe pehē ange ʻe Felo ki heʻene kau sevānití: “ʻE lava koā ke maʻu ha toe tangata ʻo hangē ko e tokotahá ni ʻa ia ʻoku ʻiate ia ʻa e laumālie ʻo e ʻOtuá?” 39 Naʻe pehē ange leva ʻe Felo kia Siosifa: “Koeʻuhi kuo ʻai ʻe he ʻOtuá ke ke ʻilo ʻa e meʻa kotoa ko ení, ʻoku ʻikai ha taha ʻe fakapotopoto mo poto ʻo hangē ko koé. 40 Te ke pule koe ki hoku falé, pea ko e kotoa ʻo hoku kakaí te nau talangofua kakato+ kiate koe. Ko hoku tuʻunga pē ko e tuʻí* te u māʻolunga ange ai ʻiate koé.” 41 Pea naʻe hoko atu ʻa Felo ʻo ne pehē kia Siosifa: “Vakai, ʻoku ou fokotuʻu koe ke ke pule ki he fonua kotoa ko ʻIsipité.”+ 42 Naʻe toʻo leva ʻe Felo ʻa hono mama silá mei hono nima ʻoʻoná ʻo ne ʻai ia ki he nima ʻo Siosifá pea fakakofu ia ʻaki ʻa e ngaahi teunga tupenu lelei pea fakatui ha kahoa koula ʻi hono kiá. 43 ʻIkai ko ia pē, naʻá ne ʻai ia ke ne heka ki he saliote fakalāngilangi hono ua ʻaʻaná, pea naʻa nau kalanga ʻi muʻa ʻiate ia, “ʻAvaleki!”* Ko ia naʻá ne fokotuʻu ia ke ne pule ki he fonua kotoa ko ʻIsipité.

44 Naʻe toe pehē ʻe Felo kia Siosifa: “Ko Felo au, ʻe ʻikai ha tangata te ne lava ke fai ha momoʻi meʻa ʻe taha* ʻi he fonua kotoa ko ʻIsipité,+ ʻo ka ʻikai te ke fakamafaiʻi.” 45 ʻI he hili iá, naʻe ʻoange ʻe Felo kia Siosifa ʻa e hingoa ko e Safinati-peanea pea ʻoange kiate ia ʻa ʻAsinate+ ko e ʻofefine ʻo Potifela ko e taulaʻeiki ʻo ʻOní* ke ne hoko ko hono uaifi. Pea naʻe kamata ke vakaiʻi ʻe Siosifa ʻa e* fonua ko ʻIsipité.+ 46 Naʻe taʻu 30+ ʻa Siosifa ʻi he taimi naʻá ne tuʻu ai ʻi he ʻao ʻo* Felo ko e tuʻi ʻo ʻIsipité.

Naʻe ʻalu atu leva ʻa Siosifa mei he ʻao ʻo Feló ʻo ne fononga atu ʻi he fonua kotoa ko ʻIsipité. 47 Pea ʻi he lolotonga ʻa e taʻu mahu ʻe fitú, naʻe hokohoko atu ʻa e fua lahi ʻa e fonuá. 48 Pea naʻá ne hanganaki tānaki ʻa e meʻakai kotoa ʻo e taʻu ʻe fitú mei he fonua ko ʻIsipité, pea naʻá ne faʻoaki ʻa e meʻakaí ʻi he ngaahi koló. ʻI he kolo taki taha naʻá ne tauhi ai ʻa e meʻakai mei he ngaahi ngoue takatakai ʻi aí. 49 Naʻe hokohoko atu ʻa Siosifa ʻi hono faʻoaki ʻa e uité ʻo mātuʻaki lahi ʻaupito, ʻo hangē ko e ʻoneʻone ʻo e tahí, faifai pē ʻo aʻu ki heʻenau tuku hono fua iá koeʻuhí he naʻe ʻikai kei lava ke fua ia.

50 Ki muʻa ke aʻu ki he taʻu ʻo e hongé, naʻe fanauʻi kia Siosifa ha ongo foha,+ ʻa ia naʻe fanauʻi kiate ia ʻe ʻAsinate ko e ʻofefine ʻo Potifela ko e taulaʻeiki ʻo ʻOní.* 51 Naʻe fakahingoa ʻe Siosifa ʻa e ʻuluaki fohá ko Manase,*+ he naʻá ne pehē, “Kuo ʻai ʻe he ʻOtuá ke ngalo ʻiate au hoku faingataʻaʻiá kotoa pea mo e fale kotoa ʻo ʻeku tamaí.” 52 Pea naʻá ne fakahingoa ʻa e fika uá ko ʻIfalemi,*+ he naʻá ne pehē, “Kuo ʻai ʻe he ʻOtuá ke u fanafanau* ʻi he fonua ʻo ʻeku mamahí.”+

53 Pea naʻe ngata ʻa e taʻu mahu ʻe fitu ʻi he fonua ko ʻIsipité,+ 54 pea naʻe kamata ʻa e taʻu ʻe fitu ʻo e hongé, ʻo hangē tofu pē ko ia naʻe leaʻaki ʻe Siosifá.+ Naʻe tō ʻa e hongé ʻi he kotoa ʻo e ngaahi fonuá, ka naʻe ʻi ai ʻa e mā*+ ʻi he fonua kotoa ko ʻIsipité. 55 Faifai pē, naʻe faingataʻaʻia ʻa e fonua kotoa ko ʻIsipité mei he hongé, pea naʻe kamata ke tangi ʻa e kakaí kia Felo ki ha mā.+ Naʻe pehē leva ʻe Felo ki he kau ʻIsipité kotoa: “Mou ō kia Siosifa, pea fai ha meʻa pē te ne tala atu kiate kimoutolu.”+ 56 Naʻe hokohoko atu ʻa e hongé ʻi he funga ʻo māmaní kotoa.+ Pea naʻe kamata ke fakaava ʻe Siosifa ʻa e ngaahi feleoko kotoa pē naʻe ʻi honau lotolotongá pea ke fakatau atu ki he kau ʻIsipité,+ he naʻe mamafa ʻa e hongé ʻi he fonua ko ʻIsipité. 57 ʻIkai ko ia pē, naʻe haʻu ʻa e kakai ʻo e māmaní kotoa ki ʻIsipite ke fakatau meia Siosifa, koeʻuhí he naʻe mamafa ʻa e hongé ʻi he kotoa ʻo e māmaní.+

42 ʻI he ʻiloʻi ʻe Sēkope ʻoku ʻi ai ʻa e uite ʻi ʻIsipité,+ naʻá ne pehē ange ki hono ngaahi fohá: “Ko e hā ʻoku mou fesiofaki ai peé?” 2 Naʻá ne hoko atu: “Kuó u fanongo ʻoku ʻi ai ʻa e uite ʻi ʻIsipite. Mou ō hifo ki ai ʻo fakatau mai ha meʻa maʻatautolu, koeʻuhí ke hokohoko atu ʻetau moʻuí ʻo ʻikai te tau mate.”+ 3 Ko ia naʻe ō hifo ai ʻa e fanga tokoua+ ʻe toko hongofulu ʻo Siosifá ke fakatau uite mei ʻIsipite. 4 Ka naʻe ʻikai ke ʻave ʻe Sēkope ʻa Penisimani,+ ko e tokoua ʻo Siosifá, ke ō mo hono fanga tokoua kehé, he naʻá ne pehē: “Naʻa tō kiate ia ha fakatuʻutāmaki ʻo ne mate ai.”+

5 Ko ia naʻe haʻu ʻa e ngaahi foha ʻo ʻIsilelí fakataha mo e niʻihi kehe naʻa nau omi ke fakataú, koeʻuhi naʻe aʻu atu ʻa e hongé ki he fonua ko Kēnaní.+ 6 Ko Siosifa ʻa e tangata naʻe pule ki he fonuá,+ pea ko ia ʻa e tokotaha naʻá ne fakatau atu ʻa e uité ki he kakai kotoa ʻo e māmaní.+ Ko ia naʻe haʻu ʻa e fanga tokoua ʻo Siosifá ʻo nau punou hifo kiate ia mo hanga honau matá ki he kelekelé.+ 7 ʻI he sio ʻa Siosifa ki hono fanga tokouá, naʻá ne ʻiloʻi leva kinautolu, ka naʻá ne fufū ia meiate kinautolu ke ʻoua te nau ʻiloʻi ia.+ Ko ia naʻá ne lea fefeka kiate kinautolu ʻo ne pehē: “Ko hoʻomou haʻú mei fē?” Pea naʻa nau pehē ange ki ai: “Mei he fonua ko Kēnaní ke fakatau meʻakai.”+

8 Ko ia naʻe ʻiloʻi ʻe Siosifa ʻa hono fanga tokouá, ka naʻe ʻikai te nau ʻiloʻi ia. 9 Naʻe manatuʻi ʻi he taimi pē ko iá ʻe Siosifa ʻa ʻene ngaahi misi ʻo fekauʻaki mo kinautolú,+ pea naʻá ne pehē kiate kinautolu: “Ko kimoutolú ko e kau asiasi! Kuo mou haʻu ke siofi ʻa e ngaahi feituʻu ʻoku ʻikai malu* ʻo e fonuá!” 10 Naʻa nau pehē ange leva kiate ia: “ʻIkai, ʻe homau ʻeiki, ka kuo haʻu hoʻo kau sevānití ke fakatau meʻakai. 11 Ko e ngaahi foha kotoa kimautolu ʻo e tangata pē ʻe taha. Ko e kau tangata faitotonu kimautolu. Ko hoʻo kau sevānití ʻoku ʻikai te nau ngāue ko ha kau asiasi.” 12 Ka naʻá ne pehē kiate kinautolu: “ʻOku ʻikai! Kuo mou haʻu ke siofi ʻa e ngaahi feituʻu ʻoku ʻikai malu ʻo e fonuá!” 13 ʻI he meʻá ni naʻa nau pehē: “Ko hoʻo kau sevānití ko e kau tautehina ʻe toko 12.+ Ko kimautolú ko e ngaahi foha ʻo e tangata pē ʻe taha+ ʻi he fonua ko Kēnaní, pea ko e siʻisiʻi tahá ʻoku ʻi heʻemau tamaí,+ lolotonga ia ko e tokotaha ʻe tahá ʻoku ʻikai ke kei ʻi ai.”+

14 Kae kehe, naʻe pehē ʻe Siosifa kiate kinautolu: “Hangē tofu pē ko ia naʻá ku leaʻaki kiate kimoutolú—‘Ko kimoutolú ko e kau asiasi!’ 15 Ko e meʻa eni ʻe siviʻi ai kimoutolú: ʻOku ou fuakava ʻi he moʻui ʻa Feló, ʻe ʻikai te mou mavahe mei he feituʻú ni kae ʻoua ke haʻu ki heni+ ʻa homou tokoua siʻisiʻi tahá. 16 Fekauʻi atu ha taha ʻo kimoutolu ke ne ʻomai ʻa homou tokouá lolotonga iá te mou nofo pōpula ʻi heni. ʻI he foungá ni, ʻe siviʻi ai hoʻomou leá ke ʻilo pe ʻoku mou tala ʻa e moʻoní. Pea kapau leva ʻe ʻikai, ʻoku ou fuakava ʻi he moʻui ʻa Feló, ko kimoutolú ko e kau asiasi.” 17 ʻI he meʻa ko iá naʻá ne tuku pōpula fakataha kinautolu ʻi he ʻaho ʻe tolu.

18 Naʻe pehē ange ʻe Siosifa kiate kinautolu ʻi he ʻaho hono tolú: “Mou fai eni pea te mou moʻui, he ʻoku ou manavahē ki he ʻOtuá. 19 Kapau ʻoku mou faitotonu, tuku ke nofo pōpula ʻa e taha ʻo homou fanga tokouá ʻi he fale naʻe tuku pōpula ai kimoutolú, ka ko e toenga ʻo kimoutolú ʻe lava ke mou ō pea ʻave ʻa e uité ke fakamaʻamaʻa ʻaki ʻa e honge ʻi homou ngaahi fāmilí.+ 20 Pea ʻomai homou tokoua siʻisiʻi tahá kiate au, koeʻuhí ʻe ʻiloʻi ai ʻoku alafalalaʻanga ʻa hoʻomou ngaahi leá pea ʻe ʻikai te mou mate.” Pea naʻa nau fai ia.

21 Pea naʻa nau fepehēʻaki: “ʻOku tauteaʻi moʻoni kitautolu koeʻuhí ko hotau tokouá,+ koeʻuhi naʻa tau sio ki heʻene mamahí ʻi he taimi naʻá ne kōlenga mai ai kiate kitautolu ke fakahaaʻi ange ha manavaʻofá, ka naʻe ʻikai ke tau fanongo. Ko e ʻuhinga ia kuo hoko mai ai kiate kitautolu ʻa e mamahi ko ení.” 22 Naʻe tali ange leva ʻe Lūpeni kiate kinautolu: “ʻIkai naʻá ku ʻosi pehē atu kiate kimoutolu, ‘ʻOua ʻe fai ha angahala ki he tamá,’ ka naʻe ʻikai te mou fanongo?+ Ko eni kuo ʻekeʻi moʻoni mai ʻa hono totó.”+ 23 Ka naʻe ʻikai te nau ʻiloʻi naʻe mahinoʻi ia ʻe Siosifa, he naʻe ʻi ai ha tokotaha fakatonulea ʻi honau vahaʻá. 24 Ko ia naʻá ne tafoki meiate kinautolu ʻo kamata ke ne tangi.+ ʻI heʻene foki mai ʻo ne toe lea kiate kinautolú, naʻá ne ʻave ʻa Simione+ meiate kinautolu ʻo ne haʻi ia ʻi honau ʻaó.+ 25 Naʻe fai leva ʻe Siosifa ʻa e tuʻutuʻuni ke fakafonu ʻenau ngaahi tangaí* ʻaki ʻa e uité pea ke fakafoki ʻa e paʻanga ʻa e tangata taki taha ki heʻene tangai ʻaʻana pea ke ʻoange kiate kinautolu ha ʻoho ki heʻenau fonongá. Ko e meʻa eni naʻe fai maʻanautolú.

26 Ko ia naʻa nau fakaheka ʻenau uité ki heʻenau fanga ʻasí pea nau mavahe mei ai. 27 ʻI he taimi naʻe fakaava hake ai ʻe he toko taha ʻo kinautolu ʻa ʻene tangaí ke ʻoange ha meʻakai ki heʻene ʻasí ʻi he fale tali fonongá, naʻá ne sio ai ki heʻene paʻangá ʻi he ngutu ʻo ʻene tangaí. 28 ʻI he meʻa ko iá naʻá ne pehē ange ki hono fanga tokouá: “Kuo toe fakafoki mai ʻeku paʻangá, pea ko eni ʻoku ʻi heni ia ʻi heʻeku tangaí!” Naʻe tō hifo leva ʻa honau lotó, pea ʻi he teteteté, naʻa nau fesiofaki mo pehē: “Ko e hā ʻa e meʻa ko eni kuo fai ʻe he ʻOtuá kiate kitautolú?”

29 ʻI heʻenau aʻu atu kia Sēkope ko ʻenau tamaí ʻi he fonua ko Kēnaní, naʻa nau tala ange kiate ia ʻa e meʻa kotoa pē naʻe hoko kiate kinautolú, ʻo pehē: 30 “Ko e tangata ʻa ia ko e ʻeiki ʻo e fonuá naʻá ne lea fefeka mai kiate kimautolu+ ʻo ne tukuakiʻi kimautolu ʻoku mau asiasi ʻi he fonuá. 31 Ka naʻa mau tala ange kiate ia, ‘Ko kimautolú ko e kau tangata faitotonu. ʻOku ʻikai ko ha kau asiasi+ kimautolu. 32 Ko e kau tautehina kimautolu ʻe toko 12,+ ko e ngaahi foha ʻo ʻemau tamaí. Ko e toko taha kuo ʻikai ke kei ʻi ai,+ pea ko e siʻisiʻi tahá ʻoku ʻi heʻemau tamaí ʻi he fonua ko Kēnaní.’+ 33 Ka ko e tangata ʻa ia ko e ʻeiki ʻo e fonuá naʻá ne pehē mai kiate kimautolu, ‘Ko e meʻa eni te u ʻiloʻi ai ʻoku mou faitotonú: Tuku mai ha taha ʻo homou fanga tokouá ʻiate au.+ Pea mou ʻave leva ha meʻa ke fakamaʻamaʻa ʻaki ʻa e honge ʻi homou ngaahi fāmilí pea mou ō.+ 34 Pea ʻomai homou tokoua siʻisiʻi tahá kiate au, koeʻuhí ke u ʻiloʻi ai ʻoku ʻikai ko e kau asiasi kimoutolu ka ko e kau tangata faitotonu. Te u toki fakafoki atu leva ʻa homou tokouá kiate kimoutolu, pea ʻe lava ke hokohoko atu ʻa hoʻomou fefakatauʻaki ʻi he fonuá.’”

35 ʻI heʻenau huaʻi ʻenau ngaahi tangaí, tā ko e tangai paʻanga ē ʻa e tokotaha taki taha naʻe ʻi heʻene tangaí. ʻI heʻenau sio mo ʻenau tamaí ki heʻenau ngaahi tangai paʻangá, naʻa nau hoko ai ʻo ilifia. 36 Naʻe lea mālohi ʻa Sēkope ko ʻenau tamaí kiate kinautolu: “Ko au ia kuo mou fakamasivaʻí!+ Ko Siosifa ʻoku ʻikai ke kei ʻi ai,+ pea ko Simione ʻoku ʻikai ke kei ʻi ai,+ pea te mou ʻave ʻa Penisimani! Ko au ia kuo hoko mai ki ai ʻa e ngaahi meʻa kotoa ko ení!” 37 Ka naʻe pehē ange ʻe Lūpeni ki heʻene tamaí: “Ke ke tāmateʻi ʻa hoku ongo fohá tonu kapau ʻe ʻikai te u fakafoki mai ia kiate koe.+ ʻOmai ia kiate au ke u tokangaʻi, pea te u fakafoki mai ia kiate koe.”+ 38 Kae kehe, naʻá ne pehē ange: “ʻE ʻikai ʻalu hifo mo kimoutolu ʻa hoku fohá, koeʻuhi kuo mate ʻa hono tokouá pea kuó ne toe toko taha pē.+ Kapau ʻe tō kiate ia ha fakatuʻutāmaki ke mate ai ʻi he fononga te mou faí, pea ko e moʻoni te mou ʻohifo ai ʻa hoku ʻulu hinaá ʻi he mamahi+ ki he Faʻitoká.”*+

43 Pea naʻe mafatukituki ʻa e hongé ʻi he fonuá.+ 2 Ko ia ʻi he ʻosi ʻenau kai ʻa e uite naʻa nau ʻomai mei ʻIsipité,+ naʻe pehē ange ʻe heʻenau tamaí kiate kinautolu: “Mou foki ʻo fakatau mai ha kiʻi meʻakai maʻatautolu.” 3 Naʻe pehē ange leva ʻe Siuta kiate ia: “Naʻe fakatokanga mahino mai ʻa e tangatá kiate kimautolu, ‘Kuo pau heʻikai ke mou toe sio ki hoku matá kae ʻoua kuo mou haʻu mo homou tehiná.’+ 4 Kapau te ke tuku mai ke mau ʻalu mo homau tehiná, te mau ʻalu hifo ʻo fakatau mai ha meʻakai maʻau. 5 Ka ʻo kapau heʻikai te ke tuku mai ia, heʻikai te mau ʻalu hifo, he naʻe tala mai ʻe he tangatá kiate kimautolu, ‘Kuo pau heʻikai ke mou toe sio ki hoku matá kae ʻoua kuo mou haʻu mo homou tehiná.’”+ 6 Pea naʻe ʻeke ʻe ʻIsileli:+ “Ko e hā kuo mou ʻomai ai ʻa e faingataʻá ni kiate au ʻaki hono tala ki he tangatá ʻoku toe ʻi ai hamou tokouá?” 7 Naʻa nau tali ange: “Naʻe ʻeke fakahangatonu mai ʻe he tangatá ʻo fekauʻaki mo kimautolu mo homau ngaahi kāingá, ʻo pehē, ‘ʻOku kei moʻui hoʻomou tamaí? ʻOku toe ʻi ai hamou tokoua?’ pea naʻa mau tala kiate ia ʻa e ngaahi moʻoniʻi meʻá ni.+ Naʻe mei lava fēfē nai ke mau ʻilo te ne pehē mai, ‘ʻOmai homou tokouá’?”+

8 Naʻe pehē ange leva ʻe Siuta kia ʻIsileli ko ʻene tamaí: “Tuku mai ʻa e tamasiʻí ke u ʻalu mo ia,+ pea tuku ke mau ō koeʻuhi ka tau moʻui ʻo ʻikai mate+—ʻa kimautolu mo koe pea mo ʻemau fānaú.+ 9 Te u fakapapauʻi atu ʻe haofakiʻi ia.*+ Te ke ʻeke ia kiate au. Kapau heʻikai te u lava ke fakafoki mai ia kiate koe pea ʻoatu ia kiate koe, tā te u angahala ai kiate koe ʻo taʻengata. 10 Ka ʻo kapau naʻe ʻikai ke tau fakatuotuai, ne mei pehení kuo tuʻo ua ʻemau ʻi ai mo ʻemau foki mai.”

11 Ko ia naʻe pehē ange ʻe ʻIsileli ko ʻenau tamaí kiate kinautolu: “Kapau ko ia, peʻi fai leva ʻeni: ʻAve ʻa e ngaahi fua lelei taha ʻo e fonuá ʻi hoʻomou ngaahi tangaí* pea mou ʻalu hifo mo ia ki he tangatá ko ha meʻaʻofa:+ Ko ha meʻi paʻame,*+ ko ha meʻi hone, ko ha puluʻi ʻakau namu-lelei, ko ha kiliʻiʻakau ʻoku toʻi,+ ko ha ngaahi foʻi nati pisitāsio,* pea mo e ʻalimoni. 12 Mou ʻave ke liunga ua ʻa e paʻangá; pea toe fakafoki ʻa e paʻanga ko ia naʻe fakafoki mai ʻi hoʻomou ngaahi ngutuʻi tangaí.+ Mahalo pē ko ha fehālaaki. 13 ʻAve homou tokouá pea mou ō, ʻo mou foki ki he tangatá. 14 Fakatauange ki he ʻOtua Māfimafi-Aoniú ke ne ʻai ke ʻofa kiate kimoutolu ʻa e tangatá, koeʻuhí ke ne tuku ange atu kiate kimoutolu ʻa homou tokoua ʻe tahá pea mo Penisimani. Ka ko e meʻa kiate aú, kapau kuo pau ke hoko ia ko e fakamasiva kiate au, tuku ke hoko ʻa e fakamasiva+ ko iá kiate au!”

15 Ko ia naʻe toʻo ʻe he kau tangatá ʻa e meʻaʻofá ni, pea naʻa nau toʻo ʻo liunga ua ʻa e paʻangá ʻi honau nimá pea mo Penisimani. Naʻa nau mālanga hake leva ʻo nau ʻalu hifo ki ʻIsipite pea nau toe tutuʻu ʻi he ʻao ʻo Siosifá.+ 16 ʻI he sio atu ʻa Siosifa ʻoku ʻiate kinautolu ʻa Penisimaní, naʻá ne pehē ange leva ki he tangata naʻá ne tokangaʻi hono falé: “ʻAve ʻa e kau tangatá ki he falé pea tāmateʻi ha fanga manu ʻo teuteu ʻa e meʻatokoní, he te u kai fakataha mo e kau tangatá ʻa hoʻatā.” 17 ʻI he taimi pē ko iá, naʻe fai ʻe he tangatá ʻo hangē tofu pē ko ia naʻe leaʻaki ʻe Siosifá,+ peá ne ʻave kinautolu ki he fale ʻo Siosifá. 18 Ka naʻe hoko ʻa e kau tangatá ʻo ilifia ʻi hono ʻave kinautolu ki he fale ʻo Siosifá, pea naʻe kamata ke nau pehē: “ʻOku ʻomai kitautolu ki hení koeʻuhi ko e paʻanga ko ia naʻe fakafoki mai ʻi heʻetau ngaahi tangaí ʻi heʻetau haʻu fakamuimuí. Pea ko eni te nau ʻohofi kitautolu pea ʻai kitautolu ko e kau pōpula pea ʻave mo ʻetau fanga ʻasí!”+

19 Ko ia naʻa nau fakaofi atu ki he tangata ko ia naʻá ne tokangaʻi ʻa e fale ʻo Siosifá pea nau lea kiate ia ʻi he hūʻanga ʻo e falé. 20 Naʻa nau pehē: “Fakamolemoleʻi ange muʻa kimautolu, ʻe homau ʻeiki! Naʻa mau haʻu ʻi he ʻuluaki taimí ke fakatau meʻakai.+ 21 Ka ʻi heʻemau aʻu ki he fale tali fonongá pea mau kamata fakaava ʻemau ngaahi tangaí, tā ko e paʻanga ʻeni ia ʻa e tokotaha taki taha naʻe ʻi heʻene ngutuʻi tangaí, ʻa ʻemau paʻangá ʻi hono fua kakató.+ Ko ia kuo mau loto ke mau haʻu tonu ʻo fakafoki mai ia. 22 Pea kuo mau ʻomai mo ha toe paʻanga ke fakatau meʻakai ʻaki. ʻOku ʻikai te mau ʻilo pe ko hai naʻá ne faʻo ʻemau paʻangá ʻi heʻemau ngaahi tangaí.”+ 23 Naʻá ne pehē ange leva: “ʻOku sai pē ia. ʻOua ʻe ilifia. Ko homou ʻOtuá pea mo e ʻOtua ʻo hoʻomou tamaí kuó ne tuku koloa ʻi hoʻomou ngaahi tangaí. Naʻe ʻuluaki haʻu hoʻomou paʻangá kiate au.” ʻI he hili iá, naʻá ne ʻomi ʻa Simione ki tuʻa kiate kinautolu.+

24 Naʻe ʻave leva ʻe he tangatá kinautolu ki he fale ʻo Siosifá pea ʻoange kiate kinautolu ha vai ke fufulu ʻaki honau vaʻé, peá ne ʻoange ha meʻakai ki heʻenau fanga ʻasí. 25 Pea naʻa nau teuteu ʻa e meʻaʻofá+ ki he haʻu ʻa Siosifa he hoʻataá, he naʻa nau fanongo te nau kai meʻakai ʻi ai.+ 26 ʻI he hū ʻa Siosifa ki he falé, naʻa nau ʻomai ʻenau meʻaʻofá kiate ia ki he falé pea nau fakatōmapeʻe hifo kiate ia ki he kelekelé.+ 27 ʻI he hili ʻa e meʻá ni, naʻá ne ʻeke ange kiate kinautolu pe ʻoku nau sai pē mo ne pehē: “ʻOku fēfē hoʻomou tamai kuo taʻumotuʻá, ʻa ē naʻa mou fakamatala ʻo kau ki aí? ʻOkú ne kei moʻui?”+ 28 ʻI he meʻá ni naʻa nau pehē: “Ko hoʻo sevāniti ko ʻemau tamaí ʻokú ne sai pē. ʻOkú ne kei moʻui.” Naʻa nau punou hifo leva ʻo nau fakatōmapeʻe.+

29 ʻI heʻene hanga hake ʻo sio kia Penisimani ko hono tokouá, ko e tama ʻa ʻene faʻeé,+ naʻá ne pehē: “Ko homou tokouá eni, ʻa e tokotaha siʻisiʻi taha ko ia naʻa mou tala mai kiate aú?”+ Naʻá ne tānaki atu: “Fakatauange ke hōifua atu ʻa e ʻOtuá kiate koe, ʻe hoku foha.” 30 Naʻe fakavave atu leva ʻa Siosifa ki tuʻa, koeʻuhí naʻe ʻikai ke ne kei mapukepuke ʻene ongoʻi ki hono tokouá, peá ne kumi ha feituʻu ke ne tangi ai. Ko ia naʻá ne hū ki ha loki mavahe ʻo ne kamata tangi ai.+ 31 ʻI he hili iá, naʻá ne tafitafi hono matá ʻo ne hū ki tuʻa, kuó ne mapuleʻi ia, peá ne pehē: “Mou ʻomi ʻa e meʻakaí.” 32 Naʻa nau ʻoatu mavahe ia kiate ia pē pea kiate kinautolu fakaekinautolu pē, pea ko e kau ʻIsipite naʻe ʻiate iá naʻa nau kai fakaekinautolu pē, he naʻe ʻikai lava ke kai meʻakai fakataha ʻa e kau ʻIsipité mo e kau Hepeluú, he ko ha meʻa fakalielia ia ki he kau ʻIsipité.+

33 Naʻe fakatangutu ʻa hono fanga tokouá* ʻi hono ʻaó, ko e ʻuluaki fohá ʻo fakatatau ki heʻene totonu ko e ʻuluaki fohá+ pea ko e siʻisiʻi tahá ʻo fakatatau ki hono tuʻunga talavoú, pea naʻa nau toutou fesiofaki ʻi he ʻohovale. 34 Naʻá ne toutou ʻoatu ha ngaahi ʻinasi meʻakai mei heʻene tēpilé ki heʻenau tēpilé, ka naʻá ne fakalahi ʻa e ʻinasi ʻo Penisimaní ʻo liunga nima ia ʻi he lahi ʻo e ngaahi ʻinasi ʻo e niʻihi kotoa ko eé.+ Ko ia naʻe hokohoko atu ʻenau kai mo inu fakataha mo iá ʻo aʻu ki heʻenau mākona.

44 Ki mui ai, naʻá ne fai ha tuʻutuʻuni ki he tangata naʻá ne tokangaʻi hono falé: “Fakafonu ʻa e ngaahi tangai ʻa e kau tangatá ʻaki ʻa e lahi ʻo e meʻakai ʻe lava ke nau ʻavé, pea faʻo ʻa e paʻanga ʻa e tokotaha taki taha ʻi heʻene ngutuʻi tangaí.+ 2 Ka kuo pau ke ke faʻo ʻa ʻeku ipú, ʻa e ipu silivá, ʻi he ngutuʻi tangai ʻa e siʻisiʻi tahá, fakataha mo e paʻanga ki heʻene uité.” Ko ia naʻá ne fai ʻo hangē pē ko ia ko e fakahinohino ʻa Siosifá.

3 ʻI he pongipongí ʻi heʻene maama haké, naʻe fekauʻi atu ʻa e kau tangatá ke nau ō mo ʻenau fanga ʻasí. 4 Naʻe teʻeki ai ke nau mamaʻo atu mei he koló kuo pehē ʻe Siosifa ki he tangata naʻá ne tokangaʻi ʻa hono falé: “Tuʻu hake! Tulimui atu ki he kau tangatá! ʻI hoʻo maʻu atu kinautolú, te ke pehē kiate kinautolu, ‘Ko e hā kuo mou totongi ai ʻa e leleí ʻaki ʻa e koví? 5 ʻIkai ko e meʻa eni ʻoku inu mei ai ʻa hoku ʻeikí mo ngāueʻaki ki hono tala totonu ʻa e ngaahi fakaʻilongá? Ko ha meʻa fulikivanu eni kuo mou faí.’”

6 Ko ia naʻá ne maʻu atu kinautolu peá ne leaʻaki ʻa e ngaahi leá ni kiate kinautolu. 7 Ka naʻa nau pehē kiate ia: “Ko e hā ʻoku lea pehē ai ʻa homau ʻeikí? Mole ke mamaʻo ha fakakaukau atu ʻe fai ʻe hoʻo kau sevānití ha meʻa peheni. 8 Ko ē, ko e paʻanga naʻa mau maʻu ʻi heʻemau ngaahi ngutuʻi tangaí naʻa mau fakafoki mai ia kiate koe mei he fonua ko Kēnaní.+ ʻE lava fēfē leva ke mau kaihaʻasi ha siliva pe koula mei he fale ʻa ho ʻeikí? 9 Kapau ʻe maʻu ia ʻi ha taha ʻo hoʻo kau tamaioʻeikí, tuku ke ne mate, pea ko e toenga ʻo kimautolú te mau hoko foki ko e kau tamaioʻeiki ki homau ʻeikí.” 10 Ko ia naʻá ne pehē: “Tuku ke hoko ʻo hangē ko hoʻomou leá: Ko e tokotaha ʻe maʻu aí ʻe hoko ia ko ʻeku tamaioʻeiki, ka ko e toenga ʻo kimoutolú ʻe tonuhia.” 11 ʻI he meʻa ko iá naʻe tuku hifo fakavave ʻe he tokotaha taki taha ʻa ʻene tangaí ki he kelekelé pea fakaava ia. 12 Naʻá ne kumi fakalelei, ʻo kamata ʻi he lahi tahá pea fakaʻosi ki he siʻisiʻi tahá. Faifai atu pē naʻe maʻu ʻa e ipú ʻi he tangai+ ʻa Penisimaní.

13 Naʻa nau haehae leva honau ngaahi kofú, pea naʻa nau taki taha hiki hake ʻene uta ʻo fakafoki ki heʻene ʻasí pea nau toe foki ki he koló. 14 ʻI he hū ʻa Siuta+ mo hono fanga tokouá ki he fale ʻo Siosifá, naʻá ne kei ʻi ai pē; pea naʻa nau tō hifo ki he kelekelé ʻi hono ʻaó.+ 15 Naʻe pehē ange ʻe Siosifa kiate kinautolu: “Ko e hā ʻa e tōʻonga ko eni kuo mou faí? ʻOku ʻikai koā ke mou ʻilo ko ha tangata hangē ko aú ʻoku lava ke u tala totonu ʻa e ngaahi fakaʻilongá?”+ 16 ʻI he meʻá ni naʻe tali ange ʻe Siuta: “Ko e hā ʻe lava ke mau fakahaaʻi ki homau ʻeikí? Ko e hā ʻe lava ke mau leaʻakí? Pea ʻe lava fēfē ke mau fakatonuhiaʻi kimautolu? Kuo ʻafioʻi ʻe he ʻOtua moʻoní ʻa e fehālaaki ʻa hoʻo kau tamaioʻeikí.+ Kuo mau hoko he taimí ni ko e kau tamaioʻeiki ʻa homau ʻeikí, fakatouʻosi ʻa kimautolu pea mo e tokotaha ʻa ia naʻe ʻilo ʻa e ipú ʻi hono nimá!” 17 Kae kehe, naʻá ne pehē: “Mole ke mamaʻo ha fakakaukau atu te u fai ha meʻa peheni! Ko e tangata ʻa ia naʻe ʻilo ʻa e ipú ʻi hono nimá ko e tokotaha ia ʻe hoko ko e tamaioʻeiki kiate aú.+ Ko e meʻa ki he toenga ʻo kimoutolú, mou ʻalu atu ʻi he fiemālie ki hoʻomou tamaí.”

18 Naʻe ʻunuʻunu atu leva ʻa Siuta kiate ia ʻo ne pehē: “ʻOku ou kōlenga atu kiate koe, ʻe hoku ʻeiki, tuku muʻa ke leaʻaki ha meʻa ʻe hoʻo tamaioʻeikí ke fanongo ki ai ʻa hoku ʻeikí, pea ʻoua muʻa te ke ʻita ki hoʻo tamaioʻeikí, he ʻokú ke hangē pē ko Feló tonu.+ 19 Naʻe ʻeke mai ʻe homau ʻeikí ki heʻene kau tamaioʻeikí, ‘ʻOku ʻi ai haʻamou tamai pe ko hamou tokoua?’ 20 Ko ia naʻa mau pehē ki homau ʻeikí, ‘ʻOku ʻi ai ʻemau tamai kuo toulekeleka mo ha tama ʻi heʻene taʻumotuʻá, ko e siʻisiʻi tahá ia.+ Ka ko hono tokouá ʻoku ʻosi mate,+ ko ia ʻa e tama pē ʻe taha ʻa ʻene faʻeé ʻoku kei toé,+ pea ʻoku ʻofa ʻiate ia ʻa ʻene tamaí.’ 21 ʻI he hili iá, naʻá ke pehē ki hoʻo kau tamaioʻeikí, ‘ʻOmi ia kiate au koeʻuhí ke u sio kiate ia.’+ 22 Ka naʻa mau pehē ki homau ʻeikí, ‘Ko e tamasiʻí ʻoku ʻikai lava ke mavahe mei heʻene tamaí. Kapau te ne mavahe meiate ia, ko e moʻoni ʻe mate+ ʻa ʻene tamaí.’ 23 Naʻá ke pehē leva ki hoʻo kau tamaioʻeikí, ‘Ka ʻikai ke haʻu ʻa homou tokoua siʻisiʻi tahá mo kimoutolu, ʻe ʻikai te mou toe sio ki hoku matá.’+

24 “Ko ia naʻa mau ʻalu atu ki hoʻo sevāniti ko ʻeku tamaí ʻo fakahā kiate ia ʻa e ngaahi lea ʻa homau ʻeikí. 25 Ki mui ai, naʻe pehē ʻe heʻemau tamaí, ‘Mou foki ʻo fakatau mai ha kiʻi meʻakai maʻatautolu.’+ 26 Ka naʻa mau pehē, ‘ʻOku ʻikai lava ke mau ʻalu hifo. Kapau ʻe ʻiate kimautolu ʻa homau tokoua siʻisiʻi tahá te mau ʻalu hifo, koeʻuhí heʻikai lava ke mau sio ki he mata ʻo e tangatá kae ʻoua ke mau ō mo homau tokoua siʻisiʻi tahá.’+ 27 Naʻe pehē mai leva ʻe hoʻo tamaioʻeiki ko ʻeku tamaí kiate kimautolu, ‘ʻOku mou ʻiloʻi lelei naʻe fanauʻi ʻe hoku uaifí ha foha ʻe toko ua pē kiate au.+ 28 Ka naʻe mavahe meiate au ʻa e taha ʻiate kinaua pea naʻá ku pehē: “Kuo pau moʻoni naʻe haehae ia!”+ Pea kuo ʻikai ke u sio kiate ia ʻo aʻu mai ki he taimí ni. 29 Kapau te mou toe ʻave mo e tokotaha ko ení mei hoku ʻaó pea tō kiate ia ha fakatuʻutāmaki ke mate ai, ko e moʻoni te mou ʻohifo ai ʻa hoku ʻulu hinaá ʻi he mamahi+ ki he Faʻitoká.’*+

30 “Pea ko eni kapau te u foki ki hoʻo tamaioʻeiki ko ʻeku tamaí ʻo ʻikai te mau ʻalu fakataha mo e tamasiʻí, he ko ʻene moʻuí ʻoku piki ua ia mo e moʻui ʻa e tokotaha ko ení, 31 pea ʻi heʻene sio pē ʻoku puli ʻa e tamasiʻí te ne mate, pea ko hoʻo kau tamaioʻeikí ko e moʻoni te nau ʻohifo ʻa e ʻulu hinā ʻa hoʻo tamaioʻeiki ko ʻemau tamaí ʻi he mamahi ki he Faʻitoká.* 32 Ko hoʻo tamaioʻeikí naʻá ne fai ha fakapapau ki heʻeku tamaí koeʻuhi ko e tamasiʻí, ʻo pehē, ‘Ka ʻikai ke u fakafoki mai ia kiate koe, tā te u angahala ki heʻeku tamaí ʻo taʻengata.’+ 33 Ko ia leva, tuku muʻa ke nofo ʻa hoʻo tamaioʻeikí kae ʻikai ko e tamasiʻí ʻo hoko ko e tamaioʻeiki ʻa hoku ʻeikí, kae lava ʻo foki ʻa e tamasiʻí mo hono fanga tokouá. 34 ʻE lava fēfē ke u foki ki heʻeku tamaí ʻo ʻikai te u ʻalu mo e tamasiʻí? Heʻikai lava ke u makātakiʻi ʻa e sio atu ki he tō ʻa e mamahi ko ení ki heʻeku tamaí!”

45 ʻI he meʻá ni naʻe ʻikai ke kei lava ke mapuleʻi ʻe Siosifa ʻa ia tonu ʻi he ʻao ʻo hono kau tauhí+ kotoa. Ko ia naʻá ne kalanga: “ʻAi ke mavahe ʻa e tokotaha kotoa pē meiate au!” Naʻe ʻikai ke nofo ha taha kehe mo ia lolotonga hono ʻai ʻe Siosifa ke ʻiloʻi ia ʻe hono fanga tokouá.+

2 Naʻe kamata leva ke ne tangi leʻo-lahi ʻaupito ʻo fanongo ki ai ʻa e kau ʻIsipité pea naʻe fanongo ki ai ʻa e fale ʻo Feló. 3 Faifai pē naʻe pehē ʻe Siosifa ki hono fanga tokouá: “Ko Siosifa au. ʻOku kei moʻui ʻa ʻeku tamaí?” Ka naʻe ʻikai momoʻi lava ke fai ha tali kiate ia ʻe hono fanga tokouá, he naʻa nau ʻohovale koeʻuhí ko ia. 4 Ko ia naʻe pehē ʻe Siosifa ki hono fanga tokouá: “Mou haʻu muʻa ke ofi mai kiate au.” Ko ia naʻa nau ʻalu atu leva ʻo ofi kiate ia.

Naʻá ne pehē ange leva: “Ko Siosifa au ko homou tokouá, ʻa ē naʻa mou fakatau atu ki ʻIsipité.+ 5 Ka ko eni, ʻoua ʻe loto-mamahi pea ʻoua te mou fetūkuaki koeʻuhí ko hoʻomou fakatau mai au ki hení; koeʻuhí kuo fekau mai au ʻe he ʻOtuá ke u muʻomuʻa ʻiate kimoutolu ke fakahaofi ʻa e moʻuí.+ 6 Ko e taʻu eni hono ua ʻo e honge ʻi he fonuá,+ pea ʻoku kei toe ʻa e taʻu ʻe nima ʻa ia ʻe ʻikai fai ai ha palau pe utu-taʻu. 7 Ka kuo fekauʻi mai au ʻe he ʻOtuá ke u muʻomuʻa ʻiate kimoutolu koeʻuhí ke fakahaofi maʻamoutolu ha toenga+ ʻi he māmaní* pea ke tauhi kimoutolu ke mou moʻui ʻaki ha fuʻu fakahaofi. 8 Pea ko ia, naʻe ʻikai ko kimoutolu ia naʻa mou ʻomai au ki hení, ka ko e ʻOtua moʻoní ia, koeʻuhí ke fakanofo au ko ha tokotaha faleʻi tefito* kia Felo mo e ʻeiki ki he kotoa ʻo hono falé pea ko ha pule ki he fonua kotoa ko ʻIsipité.+

9 “Mou foki vave ki heʻeku tamaí, pea kuo pau ke mou pehē kiate ia, ‘Ko e meʻa eni naʻe leaʻaki ʻe ho foha ko Siosifá: “Kuo fakanofo au ʻe he ʻOtuá ko e ʻeiki ʻi ʻIsipite+ kotoa. Haʻu kiate au. ʻOua ʻe tautoloi.+ 10 Kuo pau ke ke nofo ʻi he fonua ko Kōsení,+ ʻa ia te ke ofi mai ai kiate au—ʻa koe, ko ho ngaahi fohá, ko ho fanga makapuná, ko hoʻo fanga sipí, ko hoʻo fanga pulú, mo e meʻa kotoa ʻokú ke maʻú. 11 Te u tokonaki atu kiate koe ʻa e meʻakai ʻi ai, he ʻoku kei toe ʻa e taʻu ʻe nima ʻo e hongé.+ He ka ʻikai, ko koe mo ho falé mo e meʻa kotoa ʻokú ke maʻú ʻe hoko ki ai ʻa e masiva ʻangoʻango.”’ 12 ʻOku lava ke mou sio tonu mo hoku tokoua ko Penisimaní ko au moʻoni ia ʻa e tokotaha ʻoku lea atu kiate kimoutolú.+ 13 Ko ia kuo pau ke mou tala ki heʻeku tamaí ʻa hoku lāngilangi kotoa ʻi ʻIsipité mo e meʻa kotoa kuo mou mamata ki aí. Ko eni ke mou fakavave ʻo ʻomai ki heni ʻa ʻeku tamaí.”

14 Naʻá ne fāʻofua leva ʻia* Penisimani ko hono tokouá peá ne tangi, pea naʻe tangi ʻa Penisimani mo ne tāupe ʻi hono kiá.+ 15 Pea naʻá ne ʻuma ki hono fanga tokouá kotoa mo ne tangi koeʻuhi ko kinautolu, pea ʻi he hili iá naʻe talanoa mo ia ʻa hono fanga tokouá.

16 Naʻe aʻu ʻa e ongoongó ki he fale ʻo Feló: “Kuo haʻu ʻa e fanga tokoua ʻo Siosifá!” Naʻe lelei ia ʻi he vakai ʻa Felo mo ʻene kau sevānití. 17 Ko ia naʻe folofola ʻa Felo kia Siosifa: “Tala ki ho fanga tokouá, ‘Mou fai eni: Fakaheka hoʻomou fanga monumanu ngāué pea mou ō ki he fonua ko Kēnaní, 18 pea ʻomi hoʻomou tamaí mo homou ngaahi fāmilí pea mou haʻu ki heni kiate au. Te u ʻoatu kiate kimoutolu ʻa e ngaahi meʻa lelei ʻo e fonua ko ʻIsipité, pea te mou kai* mei he konga mahu taha* ʻo e fonuá.’+ 19 Pea ʻoku fekauʻi atu koe ke ke tala kiate kinautolu:+ ‘Mou fai eni: Mou ʻave ʻa e ngaahi saliote+ mei he fonua ko ʻIsipité ki hoʻomou fānaú mo homou ngaahi uaifí, pea kuo pau ke mou ʻomai hoʻomou tamaí ʻi ha saliote ʻe taha pea mou haʻu ki heni.+ 20 ʻOua ʻe hohaʻa fekauʻaki mo hoʻomou ngaahi ngaʻotoʻotá,+ he ko e lelei taha ʻo e fonua kotoa ko ʻIsipité ʻoku ʻamoutolu ia.’”

21 Pea naʻe fai pehē ʻa e ngaahi foha ʻo ʻIsilelí, pea naʻe ʻoange ʻe Siosifa kiate kinautolu ʻa e ngaahi saliote ʻo fakatatau ki he ngaahi tuʻutuʻuni ʻa Feló, pea naʻá ne ʻoange kiate kinautolu ha ʻoho ki he fonongá. 22 Naʻá ne ʻoange kiate kinautolu taki taha ha vala fetongi, ka naʻá ne ʻoange kia Penisimani ʻa e konga siliva ʻe 300 mo e ngaahi vala fetongi ʻe nima.+ 23 Pea naʻá ne ʻave ki heʻene tamaí ʻa e ngaahi meʻa ko ení: Ko e fanga ʻasi ʻe toko hongofulu ʻoku uta ai ʻa e ngaahi meʻa lelei ʻo ʻIsipité mo e fanga ʻasi fefine ʻe hongofulu ʻoku uta ai ʻa e uite mo e mā mo e meʻakai maʻa ʻene tamaí ki he fonongá. 24 Ko ia naʻá ne fekauʻi ʻa hono fanga tokouá ke nau ō, pea ʻi heʻenau mavahé, naʻá ne pehē ange kiate kinautolu: “ʻOua te mou hoko ʻo femamahiʻaki ʻi he fonongá.”+

25 Naʻa nau ʻalu hake leva mei ʻIsipite ʻo nau aʻu ki he fonua ko Kēnaní kia Sēkope ko ʻenau tamaí. 26 Naʻa nau fakamatala leva kiate ia ʻo pehē: “ʻOku kei moʻui ʻa Siosifa, pea ko ia ʻa e pule ʻi he fonua kotoa ko ʻIsipité!”+ Ka naʻá ne moʻulongoa koeʻuhí naʻe ʻikai te ne tui kiate kinautolu.+ 27 ʻI he hoko atu ʻenau tala ange kiate ia ʻa e ngaahi lea kotoa naʻe leaʻaki ʻe Siosifa kiate kinautolú pea ʻi heʻene sio ki he ngaahi saliote naʻe ʻomai ʻe Siosifa ke ʻoange ai iá, naʻe kamata ke toe ake ʻa e laumālie ʻo Sēkope ko ʻenau tamaí. 28 Naʻe kalanga ʻa ʻIsileli: “Kuo feʻunga! Ko Siosifa ko hoku fohá ʻoku kei moʻui! Kuo pau ke u ʻalu ʻo sio kiate ia ki muʻa ke u maté!”+

46 Ko ia naʻe toʻo ʻe ʻIsileli ʻa e meʻa kotoa naʻá ne maʻú* ʻo ne mavahe. ʻI heʻene aʻu ki Pea-sipá,+ naʻá ne fai ha ngaahi feilaulau ki he ʻOtua ʻo ʻene tamai ko ʻAisaké.+ 2 Naʻe folofola leva ʻa e ʻOtuá kia ʻIsileli ʻi ha vīsone ʻi he poʻulí ʻo ne pehē: “ʻE Sēkope, ʻe Sēkope,” ʻa ia naʻá ne pehē ki ai: “Ko au eni!” 3 Naʻá ne folofola ange: “Ko au ʻa e ʻOtua moʻoní, ʻa e ʻOtua ʻo hoʻo tamaí.+ ʻOua te ke ilifia ke ʻalu hifo ki ʻIsipité, he te u ngaohi koe ai ko ha puleʻanga lahi.+ 4 Ko au tonu te u ʻalu hifo fakataha mo koe ki ʻIsipite, pea ko au tonu te u toe fakafoki mai koe mei ai,+ pea ʻe ʻai ʻe Siosifa hono nimá ki ho matá.”*+

5 ʻI he hili iá, naʻe mavahe ʻa Sēkope mei Pea-sipa, pea naʻe ʻave ʻe he ngaahi foha ʻo ʻIsilelí ʻa Sēkope ko ʻenau tamaí pea mo ʻenau fānaú mo honau ngaahi uaifí ʻi he ngaahi saliote naʻe ʻomi ʻe Felo ke ʻoange ai iá. 6 Naʻa nau ʻalu mo kinautolu ʻa ʻenau ngaahi tākangá mo ʻenau ngaahi koloá, ʻa ia naʻa nau tānaki ʻi he fonua ko Kēnaní. Pea ko ia naʻa nau aʻu ki ʻIsipite, ʻa Sēkope mo e kotoa ʻo hono hako naʻe ʻiate iá. 7 Naʻá ne haʻu mo ia ki ʻIsipite ʻa hono ngaahi fohá mo hono fanga makapuna tangatá, ko hono ngaahi ʻofefiné mo hono fanga makapuna fefiné—ʻa hono hakó kotoa.

8 Pea ko e ngaahi hingoa eni ʻo e ngaahi foha ʻo ʻIsileli naʻe omi ki ʻIsipité,+ ʻa Sēkope mo hono ngaahi fohá: Ko e ʻuluaki foha ʻo Sēkopé ko Lūpeni.+

9 Ko e ngaahi foha ʻo Lūpení ko Hēnoke, Palu, Hesiloni, pea mo Kalimi.+

10 Ko e ngaahi foha ʻo Simioné+ ko Semueli, Siamini, ʻŌhati, Siakini, Sohā, mo Saulo+ ko e foha ʻo ha fefine Kēnani.

11 Ko e ngaahi foha ʻo Līvaí+ ko Kēsoni, Kōhate, pea mo Mēlali.+

12 Ko e ngaahi foha ʻo Siutá+ ko ʻEa, ʻŌnani, Sila,+ Pēlesi,+ mo Sala.+ Kae kehe, naʻe mate ʻa ʻEa mo ʻŌnani ʻi he fonua ko Kēnaní.+

Ko e ongo foha ʻo Pēlesí ko Hesiloni mo Hamuli.+

13 Ko e ngaahi foha ʻo ʻĪsaká ko Tola, Puva, ʻIope, mo Similoni.+

14 Ko e ngaahi foha ʻo Sepuloní+ ko Seleti, ʻĒloni, mo Salili.+

15 Ko e fānau eni ʻa Lia, ʻa ia naʻá ne fanauʻi kia Sēkope ʻi Petana-lamí, fakataha mo hono ʻofefine ko Tainá.+ Ko e kotoa ʻo e ngaahi foha mo e ngaahi ʻofefine mo e fanga makapuna ʻo Sēkopé naʻe toko 33.

16 Ko e ngaahi foha ʻo Katá+ ko Sifioni, Haki, Suni, ʻEsiponi, ʻEli, ʻĀloti, mo ʻĀleli.+

17 Ko e ngaahi foha ʻo ʻĀselí+ ko ʻIminā, ʻĪsiva, ʻĪsivi, pea mo Peliʻa, pea ko honau tuofefiné ko Selā.

Ko e ongo foha ʻo Peliʻá ko Hepa mo Malakieli.+

18 Ko e hako eni ʻo Silipá,+ ʻa ia naʻe ʻoange ʻe Lēpani ki hono ʻofefine ko Liá. Naʻá ne fanauʻi ʻa kinautolú ni kia Sēkope: Ko e toko 16 fakakātoa.

19 Ko e ongo tamaiki ʻa Lesieli ko e uaifi ʻo Sēkopé ko Siosifa+ mo Penisimani.+

20 Naʻe fanauʻi kia Siosifa ʻi he fonua ko ʻIsipité ʻa Manase+ mo ʻIfalemi,+ ʻa ia naʻe fanauʻi kiate ia ʻe ʻAsinate+ ko e ʻofefine ʻo Potifela ko e taulaʻeiki ʻo ʻOní.*

21 Ko e ngaahi foha ʻo Penisimaní+ ko Pela, Pēkeli, ʻAsipeli, Kela,+ Neamani, ʻEhi, Losi, Mūpimi, Hūpimi,+ mo ʻAliti.+

22 Ko e hako eni ʻo Lesieli ʻa ia naʻe fanauʻi kia Sēkopé: Ko e toko 14 fakakātoa.

23 Ko e foha* ʻo Taní+ ko Hūsimi.+

24 Ko e ngaahi foha ʻo Nafitalaí+ ko Saseile, Kuni, Siseli, pea mo Silemi.+

25 Ko e hako eni ʻo Pilaá, ʻa ia naʻe ʻoange ʻe Lēpani ki hono ʻofefine ko Lesielí. Naʻá ne fanauʻi ʻa kinautolú ni kia Sēkope: Ko e toko fitu fakakātoa.

26 Ko e kotoa ʻo e faʻahinga naʻe tukuʻau mai meia Sēkope pea nau ō ki ʻIsipite fakataha mo iá, tuku kehe ʻa e ngaahi uaifi ʻo e ngaahi foha ʻo Sēkopé, naʻe toko 66.+ 27 Ko e foha ʻo Siosifa ʻa ia naʻe fanauʻi kiate ia ʻi ʻIsipité naʻe toko ua. Ko e kotoa ʻo e kakai ʻi he fale ʻo Sēkopé ʻa ia naʻe omi ki ʻIsipité naʻe toko 70.+

28 Naʻe fekauʻi ʻe Sēkope ʻa Siuta+ ke ne muʻomuʻa atu ʻo fakahā kia Siosifa ko ia ē ʻokú ne ʻalu atu ki Kōseni. ʻI heʻenau aʻu ki he fonua ko Kōsení,+ 29 naʻe ʻai ʻe Siosifa ke teuteu ʻene salioté peá ne ʻalu hake ke fakafetaulaki kia ʻIsileli ko ʻene tamaí ʻi Kōseni. ʻI heʻene ʻasi atu kiate iá, naʻá ne fāʻofua leva ʻiate ia* peá ne tangi lahi.* 30 Naʻe pehē ange leva ʻe ʻIsileli kia Siosifa: “Ko eni kuó u mateuteu ke u mate; kuó u sio ki ho matá peá u ʻiloʻi ʻokú ke kei moʻui.”

31 Naʻe pehē ange leva ʻe Siosifa ki hono fanga tokouá pea ki he fāmili ʻo ʻene tamaí: “Tuku ke u ʻalu hake ʻo fakahā kia Felo+ pea tala ange kiate ia, ‘Ko hoku fanga tokouá mo e fāmili ʻo ʻeku tamaí ʻa ia naʻa nau ʻi he fonua ko Kēnaní kuo nau omi ki heni kiate au.+ 32 Ko e kau tangatá ko e kau tauhi-sipi,+ pea ʻoku nau tauhi monumanu,+ pea kuo nau ʻomai ʻenau fanga sipí mo ʻenau fanga pulú pea mo e meʻa kotoa ʻoku nau maʻú.’+ 33 ʻI he taimi ʻe ui ai kimoutolu ʻe Felo peá ne ʻeke atu, ‘Ko e hā hoʻomou ngāué?’ 34 Kuo pau ke mou pehē, ‘Kuo tauhi monumanu hoʻo kau sevānití mei heʻemau kei siʻí ʻo aʻu mai ki he taimí ni, ʻa kimautolu mo ʻemau fanga kuí,’+ koeʻuhí ke mou nofo ai ʻi he fonua ko Kōsení,+ he ko e tokotaha tauhi-sipi kotoa pē ʻoku fakalielia ia ki he kau ʻIsipité.”+

47 Ko ia naʻe ʻalu ʻa Siosifa ʻo fakahā kia Felo:+ “Ko ʻeku tamaí mo hoku fanga tokouá kuo nau omi mo ʻenau fanga sipí mo ʻenau fanga pulú mo e meʻa kotoa pē ʻoku nau maʻú mei he fonua ko Kēnaní, pea ʻoku nau ʻi he fonua ko Kōsení.”+ 2 Naʻá ne ʻave ha toko nima ʻo hono fanga tokouá ʻo ne fakafeʻiloaki kinautolu kia Felo.+

3 Naʻe pehē ange ʻe Felo ki hono fanga tokouá: “Ko e hā hoʻomou ngāué?” Naʻa nau tali ange kia Felo: “Ko hoʻo kau sevānití ko e kau tauhi-sipi, ʻa kimautolu mo ʻemau fanga kuí.”+ 4 Pea naʻa nau pehē ange kia Felo: “Kuo mau omi ke nofo ko ha kau muli ʻi he fonuá+ koeʻuhí ʻoku ʻikai ha ngaahi kaikaiʻanga ki he tākanga ʻa hoʻo kau sevānití, he ʻoku mafatukituki ʻa e hongé ʻi he fonua ko Kēnaní.+ Ko ia kātaki muʻa kae tuku ke nofo ʻa hoʻo kau sevānití ʻi he fonua ko Kōsení.”+ 5 Naʻe pehē ange leva ʻe Felo kia Siosifa: “Ko hoʻo tamaí mo ho fanga tokouá kuo nau omi ki heni kiate koe. 6 Ko e fonua ko ʻIsipité ʻokú ke faʻiteliha ki ai. ʻAi hoʻo tamaí mo ho fanga tokouá ke nau nofo ʻi he feituʻu mātuʻaki lelei taha ʻo e fonuá.+ Tuku ke nau nofo ʻi he fonua ko Kōsení, pea kapau ʻokú ke ʻiloʻi ha kau tangata pōtoʻi ngāue ʻi honau lotolotongá, ke ke tuku kinautolu ke nau tokangaʻi ʻeku fanga manú.”

7 Naʻe ʻomi leva ʻe Siosifa ʻa Sēkope ko ʻene tamaí pea ʻoatu ia kia Felo, pea naʻe fai ʻe Sēkope ha talamonū kia Felo. 8 Naʻe ʻeke ange ʻe Felo kia Sēkope: “ʻOkú ke taʻu fiha?” 9 Naʻe pehē ange ʻe Sēkope kia Felo: “Ko e ngaahi taʻu ʻo ʻeku hikihiki holó* ko e taʻu ʻe 130. Kuo siʻi mo fakamamahi ʻa e ngaahi taʻu ʻo ʻeku moʻuí,+ pea ʻoku ʻikai ke hangē hono fuoloá ko e ngaahi taʻu ʻo e moʻui ʻa ʻeku fanga kuí lolotonga ʻa ʻenau hikihiki holó.”*+ 10 Ko ia naʻe fai ʻe Sēkope ha talamonū kia Felo peá ne ʻalu atu mei hono ʻaó.

11 Ko ia naʻe ʻai ʻe Siosifa ha nofoʻanga ki heʻene tamaí mo hono fanga tokouá, peá ne ʻoange kiate kinautolu ha tofiʻa ʻi he fonua ko ʻIsipité, ʻi he feituʻu mātuʻaki lelei taha ʻo e fonuá, ʻi he fonua ko Lamesisí,+ ʻo hangē pē ko ia ko e tuʻutuʻuni ʻa Feló. 12 Pea naʻe hanganaki tokonaki ʻa Siosifa ki heʻene tamaí mo hono fanga tokouá pea mo e fāmili kotoa ʻo ʻene tamaí ʻaki ʻa e meʻakai* ʻo fakatatau ki he tokolahi ʻo ʻenau fānaú.

13 Ko ia naʻe ʻikai ha meʻakai* ʻi he fonuá kotoa, koeʻuhi naʻe mafatukituki ʻaupito ʻa e hongé, pea naʻe hoko ʻo tāvaivaia ʻa e fonua ko ʻIsipité mo e fonua ko Kēnaní tupu mei he hongé.+ 14 Naʻe tānaki ʻe Siosifa ʻa e paʻanga kotoa naʻe pau ke maʻu ʻi he fonua ko ʻIsipité pea ʻi he fonua ko Kēnaní koeʻuhi ko e uite naʻe fakatau ʻe he kakaí,+ pea naʻe hanganaki ʻomai ʻe Siosifa ʻa e paʻangá ki he fale ʻo Feló. 15 ʻI he faai atu ʻa e taimí, naʻe ʻosi ʻa e paʻanga mei he fonua ko ʻIsipité mo e fonua ko Kēnaní, pea naʻe kamata ke haʻu ʻa e kau ʻIsipité kotoa kia Siosifa, ʻo nau pehē: “ʻOmai haʻamau meʻakai! Ko e hā ke mau mate ai ʻi ho ʻaó tonu koeʻuhí ko e ʻosi ʻa ʻemau paʻangá?” 16 Naʻe pehē ange leva ʻe Siosifa: “Kapau kuo ʻosi hoʻomou paʻangá, tuku mai hoʻomou fanga manú, pea te u ʻoatu kiate kimoutolu ha meʻakai ke fetongiʻaki hoʻomou fanga manú.” 17 Ko ia naʻa nau kamata ʻomai ʻenau fanga manú kia Siosifa, pea naʻe hanganaki ʻoange ʻe Siosifa kiate kinautolu ha meʻakai ʻo fetongiʻaki ʻenau fanga hōsí, ko e fanga sipí mo e fanga pulú, mo e fanga ʻasí, pea naʻá ne hanganaki tokonaki kiate kinautolu ha meʻakai ʻo fetongiʻaki ʻa e kotoa ʻo ʻenau fanga manú lolotonga ʻa e taʻu ko iá.

18 ʻI he ʻosi ʻa e taʻu ko iá, naʻa nau kamata haʻu kiate ia ʻi he taʻu hono hokó pea nau pehē ange: “ʻE ʻikai te mau fufū mei homau ʻeikí, ko e paʻanga mo e tākanga ʻo e fanga manu lalatá kuo ʻosi ʻoatu ia ki homau ʻeikí. ʻOku ʻikai haʻamau meʻa ʻe toe ki homau ʻeikí ka ko homau sinó pē mo homau kelekelé. 19 Ko e hā ke mau mate ai ʻi ho ʻaó, pea liʻaki ʻo maumau ʻa homau kelekelé? Fakatau kimautolu mo homau kelekelé ʻo fetongiʻaki ha meʻakai, pea ko kimautolu fakataha mo homau kelekelé te mau hoko ko e kau tamaioʻeiki kia Felo. ʻOmai haʻamau tengaʻi ʻakau koeʻuhí ke mau moʻui ʻo ʻikai mate pea ʻikai hoko ai ʻo lala ʻa homau kelekelé.” 20 Naʻe fakatau leva ʻe Siosifa ʻa e kelekele kotoa ʻo e kau ʻIsipité maʻa Felo koeʻuhí naʻe fakatau atu ʻe he ʻIsipite kotoa pē ʻa hono kelekelé, he naʻe mafatukituki ʻaupito ʻa e hongé; pea naʻe hoko ʻa e kelekelé ko e meʻa ʻa Felo.

21 Naʻá ne ʻai leva ke hiki ʻa e kakaí ki he ngaahi koló, mei he ngataʻanga ʻe taha ʻo e feituʻu ʻo ʻIsipité ki hono ngataʻanga ʻe tahá.+ 22 Ko e kelekele pē ʻo e kau taulaʻeikí naʻe ʻikai te ne fakataú,+ koeʻuhí ko e ngaahi ʻinasi maʻá e kau taulaʻeikí naʻe meia Felo ia pea naʻa nau moʻui mei honau ngaahi ʻinasi naʻe ʻoange ʻe Felo kiate kinautolú. Ko e ʻuhinga ia naʻe ʻikai ai te nau fakatau atu ʻa honau kelekelé. 23 Naʻe pehē ange leva ʻe Siosifa ki he kakaí: “Vakai, kuó u fakatau kimoutolu mo homou kelekelé he ʻahó ni maʻa Felo. Ko e tengaʻi ʻakau ena maʻamoutolu, pea kuo pau ke mou tūtuuʻi ia ʻi he kelekelé. 24 ʻI he taimi ʻe fua aí, te mou ʻoange ha vahe nima ʻe taha kia Felo,+ ka ʻe ʻamoutolu ʻa e konga ʻe fā ko e tengaʻi ʻakau ia ki he kelekelé pea ko e meʻakai maʻamoutolu mo e faʻahinga ʻi homou ngaahi falé pea ki hoʻomou fānaú ke nau kai.” 25 Ko ia naʻa nau pehē: “Kuó ke fakahaofi ʻa ʻemau moʻuí.+ Tuku ke leleiʻia ʻiate kimautolu ʻa homau ʻeikí, pea te mau hoko ko e kau tamaioʻeiki kia Felo.”+ 26 Naʻe ʻai leva ia ʻe Siosifa ko ha lao, ʻa ia ʻoku kei ngāueʻaki ʻo aʻu mai ki he ʻahó ni ʻi he fonua ko ʻIsipité, ʻa ia ko ha vahe nima ʻe taha ʻoku ʻa Felo ia. Ko e kelekele pē ʻo e kau taulaʻeikí naʻe ʻikai hoko ko e meʻa ʻa Feló.+

27 Naʻe hokohoko atu ʻa e nofo ʻa ʻIsileli ʻi Kōseni,+ ʻi he fonua ko ʻIsipité, pea naʻa nau nofo ai pea nau fanafanau pea tupu ʻo tokolahi.+ 28 Pea naʻe nofo atu ʻa Sēkope ʻi he fonua ko ʻIsipité ʻi he taʻu ʻe 17, ko ia ko e ngaahi ʻaho ʻo e moʻui ʻa Sēkopé naʻe feʻunga mo e taʻu ʻe 147.+

29 Naʻe tuʻunuku mai ʻa e taimi ke mate+ ai ʻa ʻIsilelí, ko ia naʻá ne ui ʻa hono foha ko Siosifá peá ne pehē ange: “Kapau leva kuó ke leleiʻia ʻiate au, kātaki muʻa ʻo ʻai mai ho nimá ki hoku lalo alangá, peá ke fakahaaʻi ʻa e ʻofa mateaki mo e faitōnunga kiate au. ʻOua muʻa naʻá ke tanu au ʻi ʻIsipite.+ 30 ʻI he taimi te u mate aí,* kuo pau ke ke ʻave au mei ʻIsipite pea tanu au ʻi he faʻitoka ʻo ʻeku fanga kuí.”+ Ko ia ai, naʻá ne pehē ange: “Te u fai ʻo hangē tofu pē ko hoʻo leá.” 31 Naʻá ne pehē ange leva: “Fai mai ha fakapapau kiate au.” Ko ia naʻá ne fai ha fakapapau kiate ia.+ ʻI he meʻa ko iá naʻe punou hifo ʻa ʻIsileli ʻi he ʻulu ʻo hono mohengá.+

48 ʻI he hili ʻa e ngaahi meʻá ni, naʻe tala kia Siosifa: “Vakai, ʻoku fakaʻau ke vaivai ʻa hoʻo tamaí.” ʻI he meʻa ko iá naʻá ne ʻave ʻa hono ongo fohá ʻa Manase mo ʻIfalemi ʻo ne ʻalu mo ia.+ 2 Naʻe fakahā leva kia Sēkope: “Ko eni ko ho foha ko Siosifá ʻokú ne haʻu kiate koe.” Ko ia naʻe tānaki ivi ʻa ʻIsileli peá ne tangutu hake ʻi hono mohengá. 3 Pea naʻe pehē ʻe Sēkope kia Siosifa:

“Ko e ʻOtua Māfimafi-Aoniú naʻá ne hā mai kiate au ʻi Lusa ʻi he fonua ko Kēnaní ʻo ne tāpuakiʻi au.+ 4 Pea naʻá ne folofola mai kiate au, ‘ʻOku ou ʻai koe ke ke fanafanau, pea te u ʻai koe ke ke tokolahi pea te u liliu koe ke ke hoko ko ha fakatahaʻanga ʻo e ngaahi kakai,+ pea te u foaki ʻa e fonuá ni ki ho hako ʻi he hili koé ko ha tofiʻa taʻengata.’+ 5 Ko eni ko ho ongo foha naʻe fanauʻi kiate koe ʻi he fonua ko ʻIsipité ki muʻa ke u haʻu kiate koe ʻi ʻIsipité ʻoku ʻaʻaku kinaua.+ ʻE hoko ʻa ʻIfalemi mo Manase ʻo ʻaʻaku ʻo hangē pē ko e ʻaʻaku ʻa Lūpeni mo Simioné.+ 6 Ka ko e fānau ʻe fanauʻi kiate koe ʻi he hili kinauá ʻe hoko ʻo ʻaʻau ia. ʻE uiʻaki kinautolu ʻa e hingoa ʻo honau ongo tokouá ʻi honau tofiʻá.+ 7 Ka ko au, ʻi he taimi naʻá ku haʻu ai mei Petaná, naʻe mate ʻa Lesieli+ ʻi hoku tafaʻakí ʻi he fonua ko Kēnaní, lolotonga ia naʻe kei toe ha vāʻihala lahi pea mau toki aʻu ki ʻEfalatá.+ Ko ia naʻá ku tanu ia ai ʻi he hala ki ʻEfalatá, ʻa ia, ko Pētelihema.”+

8 Naʻe sio leva ʻa ʻIsileli ki he ongo foha ʻo Siosifá peá ne ʻeke ange: “Ko hai eni?” 9 Ko ia naʻe pehē ʻe Siosifa ki heʻene tamaí: “Ko hoku ongo foha kinaua ʻa ia kuo ʻomai ʻe he ʻOtuá maʻaku ʻi he feituʻu ko ení.”+ Naʻá ne pehē ange leva: “ʻOmai muʻa kinaua kiate au, koeʻuhí ke u tāpuakiʻi kinaua.”+ 10 ʻI he taimi ko ení naʻe ʻikai sai ʻa e vakai ʻa ʻIsilelí ko ʻene taʻumotuʻá, pea naʻe ʻikai malava ke ne sio. Ko ia naʻe ʻomai kinaua ʻe Siosifa ke na ofi kiate ia, pea naʻá ne ʻuma kiate kinaua mo fāʻofua ʻiate kinaua. 11 Naʻe pehē ange ʻe ʻIsileli kia Siosifa: “Naʻe ʻikai ʻaupito haʻaku fakakaukau atu te u sio ki ho matá,+ ka ko eni kuo toe tuku foki ʻe he ʻOtuá ke u sio ki ho hakó.” 12 Naʻe ʻomai leva kinaua ʻe Siosifa mei he tui ʻo ʻIsilelí, pea naʻá ne punou hifo ʻo hanga ki he kelekelé.

13 Naʻe ʻave leva kinaua ʻe Siosifa, ko ʻIfalemi+ ʻaki hono nima toʻomataʻú ki he toʻohema ʻo ʻIsilelí pea ko Manase+ ʻaki hono nima toʻohemá ki he toʻomataʻu ʻo ʻIsilelí, pea ʻomi kinaua ke ofi kiate ia. 14 Kae kehe, naʻe mafao atu ʻe ʻIsileli hono nima toʻomataʻú ʻo hili ʻi he ʻulu ʻo ʻIfalemí, neongo ko ia naʻe siʻisiʻí, pea naʻá ne hili ʻa hono nima toʻohemá ʻi he ʻulu ʻo Manasé. Naʻá ne hilifaki ʻiloʻilo pau ʻa hono ongo nimá ʻi he founga ko ení, neongo ko Manase ʻa e ʻuluaki fohá.+ 15 Naʻá ne tāpuakiʻi leva ʻa Siosifa ʻo ne pehē:+

17 ʻI he sio ʻa Siosifa naʻe hili ai pē ʻe heʻene tamaí ʻa hono nima toʻomataʻú ʻi he ʻulu ʻo ʻIfalemí, naʻe ʻikai te ne leleiʻia ai, ko ia naʻá ne feinga ke puke ʻa e nima ʻo ʻene tamaí ke toʻo ia mei he ʻulu ʻo ʻIfalemí ʻo ʻai ki he ʻulu ʻo Manasé. 18 Naʻe pehē ʻe Siosifa ki heʻene tamaí: “ʻOua ʻe fai pehē, ʻa ʻeku tamai, koeʻuhí ko e ʻuluaki fohá eni.+ ʻAi ho nima toʻomataʻú ki hono ʻulú.” 19 Ka naʻe hanganaki fakafisi ʻa ʻene tamaí ʻo ne pehē: “ʻOku ou ʻilo ia, ʻe hoku foha, ʻoku ou ʻilo ia. Ko ia foki te ne hoko ko ha kakai, pea ko ia foki te ne hoko ʻo lahi. Kae kehe, ko hono tokoua siʻisiʻí ʻe hoko ia ʻo lahi ange ʻiate ia,+ pea ko hono hakó ʻe tokolahi feʻunga ke faʻuʻaki ha ngaahi puleʻanga.”+ 20 Ko ia naʻe hokohoko atu ʻene tāpuakiʻi kinaua ʻi he ʻaho ko iá,+ ʻo pehē:

Ko ia naʻá ne hanganaki fakamuʻomuʻa ʻa ʻIfalemi ʻia Manase.

21 Naʻe pehē ange leva ʻe ʻIsileli kia Siosifa: “Vakai, ʻoku ou tei mate,+ ka ko e moʻoni ʻe hokohoko atu ʻa e ʻiate kimoutolu ʻa e ʻOtuá pea fakafoki kimoutolu ki he fonua ʻa hoʻomou fanga kuí.+ 22 Ka ko au, ʻoku ou foaki kiate koe ha konga fonua ʻe taha ʻo lahi hake ia ʻi he meʻa ʻoku ʻoange ki ho fanga tokouá, ʻa ia naʻá ku toʻo mei he nima ʻo e kau ʻĀmolí ʻaki ʻeku heletaá mo ʻeku kaufaná.”

49 Pea naʻe ui mai ʻe Sēkope ʻa hono ngaahi fohá peá ne pehē: “Mou fakatahataha mai ka u tala atu kiate kimoutolu ʻa e meʻa ʻe hoko kiate kimoutolu ʻi he ngaahi ʻaho ʻamuí. 2 Mou fakatahataha mai ʻo fanongo, ʻa kimoutolu ngaahi foha ʻo Sēkope, ʻio, fanongo kia ʻIsileli ko hoʻomou tamaí.

3 “Lūpeni,+ ko koe ʻa hoku ʻuluaki fohá,+ ko hoku mālohi mo e kamataʻanga ʻo hoku ivi fakafanaú, ko e fungani ʻo e ngeia pea ko e fungani ʻo e mālohi. 4 ʻI he anga-taʻefakamaʻumaʻu ʻo hangē ha ngaahi vai ʻoku houtuʻú, ʻe ʻikai te ke fungani hake, koeʻuhi naʻá ke ʻalu hake ki he mohenga ʻo hoʻo tamaí.+ ʻI he taimi ko iá naʻá ke ʻuliʻi* ʻa hoku mohengá. Naʻá ne ʻalu moʻoni ki ai!

5 “Ko Simione mo Līvaí ko e ongo tautehina.+ Ko e ongo meʻatau ʻo e fakamālohi ʻa ʻena heletā tāmaté.+ 6 ʻOua naʻa ʻalu atu ke kau fakataha mo kinaua, siʻeku moʻui. ʻOua naʻa kau ki heʻena fakatahá, ʻe hoku lāngilangi,* koeʻuhí ʻi heʻena ʻitá naʻá na tāmateʻi ai ʻa e kau tangata,+ pea naʻe maʻu ʻena fiefiá heʻena tuʻusi ʻa e uoua ʻi he vaʻe ʻo e fanga pulú. 7 Ke malaʻia ʻena ʻitá, koeʻuhi ʻoku anga-fakamālohi, pea mo ʻena tōlilí, koeʻuhi ʻoku kakaha.+ Tuku ke u fakamovetevete kinaua ʻi he fonua ʻo Sēkopé, pea tuku ke u ʻai ke na mafola atu ʻi ʻIsileli.+

8 “Ko e meʻa kiate koé, ʻe Siuta,+ ʻe fakahīkihikiʻi koe+ ʻe ho fanga tokouá. Ko ho nimá ʻe ʻi he kia ʻo ho ngaahi filí.+ Ko e ngaahi foha ʻo hoʻo tamaí te nau punou atu ʻi ho ʻaó.+ 9 Ko Siutá ko ha laione mui.+ Ko e moʻoni te ke tuʻu hake, ʻe hoku foha, mei he manu kuó ke poó. Kuó ne tokoto hifo peá ne fao atu hangē ha laioné, pea ʻi he hangē ha laioné, ko hai ia ʻe fakatoʻotoʻa ke ne ueʻi hake ia? 10 Ko e sēpitá ʻe ʻikai mavahe ia meia Siuta,+ pe ko e tokotoko ʻa e pulé mei he vahaʻa ʻo hono ongo vaʻé, kae ʻoua ke haʻu ʻa Sailo,*+ pea ʻe talangofua kiate ia ʻa e ngaahi kakaí.+ 11 ʻI hono haʻihaʻi ʻene ʻasí ki ha fuʻu kālepi pea mo e ʻuhiki tangata ʻo ʻene ʻasí ki ha fuʻu kālepi funganí, te ne fō hono valá ʻi he uaine pea ko hono kofú ʻi he huhuʻa* ʻo e kālepí. 12 ʻOku kulokula mālohi hono matá mei he uainé, pea ʻoku hinehina hono nifó mei he huʻakaú.

13 “Ko Sepuloni+ te ne nofo ʻi he matātahí, ʻi he matātahi ko ia ʻoku lī taula ai ʻa e ngaahi vaká,+ pea ko hono kauʻāfonua mamaʻó ʻe huʻu atu ki Saitoni.+

14 “Ko ʻĪsaká+ ko ha ʻasi hui mālohi, ʻoku tokoto ʻo ne tauloto ʻa e ongo kavenga ʻe ua. 15 Pea te ne sio ko e feituʻu mālōlōʻangá ʻoku lelei pea ko e fonuá ʻoku fakaʻofoʻofa. Te ne ʻai hifo hono umá ke fua ʻa e kavengá pea te ne moʻulaloa ki he ngāue fakapōpula.

16 “Ko Tani+ te ne fakamāuʻi hono kakaí ʻi he tuʻunga ko e taha ʻo e ngaahi matakali ʻo ʻIsilelí.+ 17 Tuku ke hoko ʻa Tani ko ha ngata ʻi he veʻehalá, ko ha ngata meʻatui ʻi he veʻe ʻaluʻangá, ʻa ia ʻokú ne uʻu ʻa e ongo muivaʻe ʻo e hōsí koeʻuhi ke tō foʻohake ʻa e tokotaha ʻoku heka aí.+ 18 Te u tatali ki ha fakamoʻui meiate koe, ʻe Sihova.

19 “Ko e meʻa kia Katá,+ ʻe ʻohofi ia ʻe ha kau kaihaʻa fakamālohi, ka te ne ʻoho atu ʻi honau muivaʻé.+

20 “Ko e mā* ʻa ʻĀselí+ ʻe hulu fau,* pea te ne tokonaki meʻakai ke feʻunga ki ha tuʻi.+

21 “Ko Nafitalaí+ ko ha tia fefine pahauhau. ʻOkú ne leaʻaki ʻa e ngaahi lea fungani.+

22 “Ko Siosifá+ ko e huli ʻo ha fuʻu ʻakau fua, ko ha fuʻu ʻakau fua ʻi ha veʻe vai, ʻa ia ko hono ngaahi vaʻá ʻoku kaka ʻo hope atu ʻi he funga ʻaá. 23 Ka ko e kau fana ngahaú naʻa nau hanganaki ʻohofia ia mo fanaʻi ia pea hanganaki tukulotoa ʻa e tāufehiʻa kiate ia.+ 24 Pea neongo ia naʻe kei tuʻu maʻu pē ʻene kaufaná,+ pea ko hono ongo nimá naʻe mālohi ai pē mo longomoʻui.+ Naʻe tupu eni mei he ongo nima ʻo e tokotaha mālohi ʻo Sēkopé, mei he tauhi-sipí, ko e maka ʻo ʻIsilelí. 25 Ko iá* ʻoku mei he ʻOtua ʻo hoʻo tamaí, pea te ne tokoniʻi koe, pea ʻokú ne kau mo e Māfimafi-Aoniú, pea te ne tāpuakiʻi koe ʻaki ʻa e ngaahi tāpuaki ʻo e langí ʻi ʻolunga, ʻaki ʻa e ngaahi tāpuaki ʻo e lolotó ʻi lalo,+ ʻaki ʻa e ngaahi tāpuaki ʻo e ongo huhú mo e manavá. 26 Ko e ngaahi tāpuaki ʻo hoʻo tamaí ʻe māʻolunga ange ia ʻi he ngaahi tāpuaki ʻo e ngaahi moʻunga taʻengatá, pea ʻi he ngaahi meʻa manakoa ʻo e ngaahi foʻi māʻolunga tuʻuloá.+ ʻE hokohoko atu ʻenau ʻi he ʻulu ʻo Siosifá, ʻi he tumuʻaki ʻo e ʻulu ʻo e tokotaha naʻe fakamavaheʻi mei hono fanga tokouá.+

27 “Ko Penisimani+ ʻe hokohoko atu ʻene halú hangē ha ulofí.+ ʻI he pongipongí te ne kai ʻa e manu naʻá ne poó, pea ʻi he efiafí te ne vahevahe atu ʻa e meʻa naʻá ne maʻu fakamālohí.”+

28 Ko e faʻahingá ni kotoa ko e ngaahi matakali ia ʻe 12 ʻo ʻIsilelí, pea ko e meʻa ʻeni naʻe leaʻaki ʻe heʻenau tamaí kiate kinautolu ʻi he taimi naʻá ne tāpuakiʻi ai kinautolú. Naʻá ne ʻoange ki he tokotaha taki taha ʻo kinautolu ha tāpuaki+ feʻungamālie.

29 ʻI he hili iá, naʻá ne ʻoange ʻa e ngaahi fekau ko ʻení kiate kinautolu: “Ko aú ʻe fakatahaʻi ki hoku kakaí.*+ Tanu fakataha au mo ʻeku ngaahi tamaí ʻi he ʻana ko ia ʻi he kelekele ʻo ʻEfiloni ko e Hetí,+ 30 ʻa e ʻana ʻi he kelekele ko Makipilá ʻa ia ʻoku ofi ki Māmili ʻi he fonua ko Kēnaní, ʻa e kelekele naʻe fakatau mai ʻe ʻĒpalahame meia ʻEfiloni ko e Hetí ke hoko ko ha konga ʻapi ia ki ha tanuʻanga. 31 Ko ia naʻa nau tanu ai ʻa ʻĒpalahame mo Sela+ ko hono uaifí. Ko ia naʻa nau tanu ai ʻa ʻAisake+ mo Lepeka ko hono uaifí, pea ko ia naʻá ku tanu ai ʻa Liá. 32 Ko e konga kelekelé pea mo e ʻana ʻoku ʻi aí naʻe fakatau ia mei he ngaahi foha ʻo Hetí.”+

33 Ko ia ai, ko e ʻosi ia hono ʻoange ʻe Sēkope ʻa e ngaahi fakahinohino ko ení ki hono ngaahi fohá. Naʻá ne ʻohake leva hono ongo vaʻé ki he funga mohengá peá ne hokotaki pea naʻe fakatahaʻi ia ki hono kakaí.*+

50 Naʻe fakatōmapeʻe hifo leva ʻa Siosifa ʻi heʻene tamaí+ ʻo ne tangi ʻiate ia mo ʻuma kiate ia. 2 ʻI he hili iá, naʻe tuʻutuʻuni ʻe Siosifa ki heʻene kau sevānití, ʻa ʻene kau ngāue fakafaitoʻó, ke nau fakatolonga+ ʻene tamaí. Ko ia naʻe fakatolonga ʻe he kau ngāue fakafaitoʻó ʻa ʻIsileli, 3 pea naʻa nau fakakakato ʻa e ʻaho ʻe 40 kiate ia, he ko e vahaʻa taimi kakato eni ki he fakatolongá, pea naʻe hokohoko atu ʻa e tengihia ia ʻe he kau ʻIsipité ʻi he ʻaho ʻe 70.

4 ʻI he ʻosi ʻa e ngaahi ʻaho ʻo hono tengihia iá, naʻe lea ʻa Siosifa ki he lotoʻā* ʻo Feló, ʻo pehē: “Kapau kuo mou leleiʻia ʻiate au, fakahoko atu ʻa e pōpoakí ni kia Felo: 5 ‘Naʻe ʻai au ʻe heʻeku tamaí ke u fai ange ha fakapapau,+ ʻo pehē: “Ko eni! ʻOku ou mei mate.+ Te ke tanu au ʻi hoku feituʻu tanuʻangá,+ ʻa ia kuó u foa ʻi he fonua ko Kēnaní.”+ Kātaki muʻa kae tuku au ke u ʻalu hake ʻo tanu ʻa ʻeku tamaí, ʻi he hili iá te u toki foki mai.’” 6 Naʻe tali ange ʻe Felo: “ʻAlu ʻo tanu ʻa hoʻo tamaí ʻo hangē tofu pē ko e fakapapau naʻá ne ʻai koe ke ke fai angé.”+

7 Ko ia naʻe ʻalu hake ʻa Siosifa ke tanu ʻa ʻene tamaí, pea naʻe ʻalu mo ia ʻa e kotoa ʻo e kau sevāniti ʻa Feló, mo e kau mātuʻa+ ʻi hono lotoʻaá pea mo e kotoa ʻo e kau mātuʻa ʻo e fonua ko ʻIsipité 8 pea mo e kotoa ʻo e fale ʻo Siosifá mo hono fanga tokouá pea mo e fale ʻo ʻene tamaí.+ Ko ʻenau fānau īkí pē mo ʻenau fanga sipí mo ʻenau fanga pulú naʻa nau tuku ʻi he fonua ko Kōsení. 9 Naʻe ʻalu hake foki mo ia ʻa e ngaahi saliote+ mo e kau heka hoosi, pea naʻe tokolahi ʻaupito ʻa e kau fonongá. 10 Naʻa nau aʻu atu leva ki he ʻauʻauʻanga uite ʻo ʻAtatí, ʻa ia ʻoku ʻi he feituʻu ʻo Sioataní, pea naʻa nau hokohoko atu ai ha fuʻu tengihia lahi mo fakamamahi, pea naʻá ne tengihia ai pē ʻa ʻene tamaí ʻi he ʻaho ʻe fitu. 11 Ko e kakai ʻo e fonuá, ʻa e kau Kēnaní, naʻa nau sio kiate kinautolu ʻi heʻenau tengihia ʻi he ʻauʻauʻanga uite ʻo ʻAtatí, pea naʻa nau kalanga: “Ko ha fuʻu tengihia lahi eni ki he kau ʻIsipité!” Ko e ʻuhinga ia naʻe ui ai ia ko ʻĒpeli-misilemí,* ʻa ia ʻoku ʻi he feituʻu ʻo Sioataní.

12 Ko ia naʻe fai ʻe hono ngaahi fohá kiate ia ʻo hangē tofu pē ko e meʻa naʻá ne fakahinohino kiate kinautolú.+ 13 Naʻe fata ia ʻe hono ngaahi fohá ki he fonua ko Kēnaní pea tanu ia ʻi he ʻana ʻo e kelekele ko Makipilá, ʻa e kelekele naʻe ofi ki Māmili ʻa ia naʻe fakatau ʻe ʻĒpalahame meia ʻEfiloni ko e Hetí ke hoko ko ha konga ʻapi ki ha tanuʻanga.+ 14 ʻI he hili ʻene tanu ʻa ʻene tamaí, naʻe foki ʻa Siosifa ki ʻIsipite mo hono fanga tokouá pea mo e faʻahinga kotoa naʻe ō mo ia ke tanu ʻa ʻene tamaí.

15 ʻI he sio ʻa e fanga tokoua ʻo Siosifá kuo mate ʻenau tamaí, naʻa nau pehē: “ʻOku kei tukulotoa pē nai ʻe Siosifa ha tāufehiʻa kiate kitautolu pea te ne sāuni mai kiate kitautolu ʻa e kovi kotoa pē naʻa tau fai kiate iá.”+ 16 Ko ia naʻa nau ʻoatu ha pōpoaki kia Siosifa ʻi he ngaahi leá ni: “Naʻe ʻomai ʻe hoʻo tamaí ʻa e fekaú ni ki muʻa ke ne maté: 17 ‘Ko e meʻa eni te mou leaʻaki kia Siosifá: “ʻOku ou kōlenga atu, ke ke fakamolemoleʻi muʻa ʻa e laka hala ʻa ho fanga tokouá pea mo e angahala naʻa nau fai ʻi hono ʻomai ha kovi pehē kiate koé.”’ Ko eni ke ke fakamolemoleʻi ange muʻa ʻa e laka hala ʻa e kau sevāniti ʻa e ʻOtua ʻo hoʻo tamaí.” Pea naʻe tangi ʻa Siosifa ʻi heʻenau lea ange kiate iá. 18 Pea naʻe haʻu foki hono fanga tokouá ʻo fakatōmapeʻe ʻi muʻa ʻiate ia mo nau pehē: “Ko eni ko kimautolú ʻoku mau hoko ko e kau tamaioʻeiki kiate koe!”+ 19 Naʻe pehē ange ʻe Siosifa kiate kinautolu: “ʻOua ʻe ilifiá. ʻOku ou fetongi koā ʻe au ʻa e ʻOtuá? 20 Neongo naʻa mou taumuʻá ke fai ha kovi kiate au,+ naʻe fakataumuʻa ia ʻe he ʻOtuá ke iku ʻo lelei pea ke fakahaofi moʻui ai ha kakai tokolahi, ʻo hangē ko ia ʻokú ne fai ʻi he ʻaho ní.+ 21 Ko eni ʻoua ʻe ilifia. Te u tokonaki maʻu pē maʻamoutolu mo hoʻomou fānau īkí ha meʻakai.”+ Ko ia naʻá ne fakafiemālieʻi ai kinautolu mo lea fakanonga kiate kinautolu.

22 Pea naʻe hokohoko atu ʻa e nofo ʻa Siosifa ʻi ʻIsipité, ʻa ia mo e fale ʻo ʻene tamaí, pea naʻe moʻui ʻa Siosifa ʻo feʻunga mo e taʻu ʻe 110. 23 Naʻe sio ʻa Siosifa ki he toʻutangata hono tolu ʻo e ngaahi foha ʻo ʻIfalemí,+ pehē foki ki he ngaahi foha ʻo Mākili,+ ko e foha ʻo Manasé. Naʻe fanauʻi kinautolu ʻi he funga tui ʻo Siosifá.* 24 Faifai atu pē naʻe pehē ʻe Siosifa ki hono fanga tokouá: “Ko eni te u mate, ka ko e ʻOtuá te ne fakahanga moʻoni ʻene tokangá kiate kimoutolu,+ pea ko e moʻoni te ne ʻohake kimoutolu mei he fonuá ni ki he fonua ʻa ia naʻá ne fuakava fekauʻaki mo ia kia ʻĒpalahame, kia ʻAisake, pea kia Sēkopé.”+ 25 Ko ia naʻe ʻai ʻe Siosifa ʻa e ngaahi foha ʻo ʻIsilelí ke nau fai ha fakapapau ʻo ne pehē: “Ko e ʻOtuá te ne fakahanga moʻoni ʻene tokangá kiate kimoutolu. Kuo pau ke mou ʻave ʻa hoku ngaahi huí mei heni.”+ 26 Pea naʻe mate ʻa Siosifa ʻi hono taʻu 110, pea naʻa nau fakatolonga ia,+ pea naʻe tuku ia ʻi ha puha mate ʻi ʻIsipite.