TANGILĀULAU
א [ʻAlefi]*
1 ʻOi siʻene tangutu toko taha ʻi he taimi ko ení, ʻa e kolo naʻe fonu ʻi he kakaí!+
ʻOi siʻene hoko ʻo hangē ha uitoú, ʻa ia naʻe tokolahi fau ʻi he lotolotonga ʻo e ngaahi puleʻangá!+
ʻOi siʻono tuku atu ʻa ia naʻe hoko ko ha pilinisesi ʻi he lotolotonga ʻo e ngaahi vahefonuá* ki he ngāue fakapōpulá!+
ב [Peta]
2 ʻOkú ne tangi lahi ʻi he poʻulí+ pea ʻoku ʻufiʻufi ʻe hono loʻimatá ʻa hono kouʻahé.
ʻOku ʻikai ha taha ʻi he faʻahinga kotoa ʻokú ne ʻofa aí ʻokú ne ʻi ai ke fakafiemālie kiate ia.+
Ko e kotoa ʻo hono ngaahi kaungāmeʻá kuo nau lavakiʻi ia;+ kuo nau hoko ko hono ngaahi fili.
ג [Kimela]
3 Kuo ʻave fakamālohi ʻa Siuta+ pea ʻokú ne tofanga ʻi he ngaohikovia mo e ngāue fakapōpula kakaha.+
Kuo pau ke ne nofo ʻi he lotolotonga ʻo e ngaahi puleʻangá;+ ʻoku ʻikai te ne maʻu ha mālōlōʻanga.
Ko e kotoa ʻo hono kau fakatangá kuo nau aʻu mai kiate ia ʻi heʻene mamahí.
ד [Tāleta]
4 ʻOku tangi ʻa e ngaahi hala ki Saioné koeʻuhí ʻoku ʻikai ha taha ʻe haʻu ki he kātoangá.+
Ko hono ngaahi matapaá kotoa kuo maumau;+ ʻoku māpuhoi ʻa ʻene kau taulaʻeikí.
ʻOku mamahi ʻa ʻene kau fefine kei nofo anga-maʻá,* pea ʻokú ne mātuʻaki loto-mamahi.
ה [Hē]
5 Ko hono kau fakafepakí kuo nau hoko ko hono pule* he taimí ni; ʻoku fiemālie ʻa hono ngaahi filí.+
He kuo ʻomi ʻe Sihova kiate ia ʻa e mamahi koeʻuhi ko e lahi ʻa ʻene ngaahi laka halá.+
Kuo taki pōpula ʻa ʻene fānaú ʻe hono filí.+
ו [Vau]
6 Kuo mavahe ʻa e lāngilangí kotoa mei he ʻofefine ko Saioné.+
ʻOku hangē ʻene kau houʻeikí ha fanga tia tangata kuo ʻikai te nau maʻu ha kaikaiʻangá,
Pea ʻoku nau ʻalu ongosia ʻi he ʻao ʻo e tokotaha ʻokú ne tuli kinautolú.
ז [Saini]
7 ʻI he ngaahi ʻaho ʻo ʻene faingataʻaʻiá mo ʻene tukuhāusiá, ʻoku manatuʻi ʻe Selusalema
ʻA e ngaahi meʻa mahuʻinga kotoa naʻe ʻaʻana ʻi he ngaahi ʻaho ʻo e kuohilí.+
ʻI he tō ʻa hono kakaí ki he nima ʻo e filí pea ʻikai ke toe ʻi ai hano tokoní,+
Naʻe sio kiate ia ʻa hono ngaahi filí pea nau kata* ʻi heʻene toó.+
ח [Keta]
8 Kuo faiangahala lahi ʻa Selusalema.+
Ko e ʻuhinga ia kuó ne hoko ai ko ha meʻa ke fai ha fakaliliʻa ki ai.
Ko e faʻahinga kotoa naʻa nau faʻa fakalāngilangiʻi iá ʻoku nau fakafeangai kiate ia ʻi he taimi ko ení ko ha meʻa ke fehiʻanekinaʻi, he kuo nau sio ki heʻene telefuá.+
ʻOkú ne toʻe+ mo sītuʻa ʻi heʻene maá.
ט [Teta]
9 Ko ʻene taʻemaʻá ʻoku ʻi hono kofú.
Naʻe ʻikai te ne fakakaukau ki hono kahaʻú.+
Ko ʻene toó ko ha meʻa fakatupu moʻutāfuʻua; kuo ʻikai ha taha ke fakafiemālie kiate ia.
ʻE Sihova, sio mai muʻa ki heʻeku faingataʻaʻiá, he kuo fakahīkihikiʻi ʻe he filí ʻa ia tonu.+
י [Iota]
10 Kuo ala atu ʻa e nima ʻo e filí ki he kotoa ʻo ʻene ngaahi koloá.+
He kuó ne mamata ki he hū ʻa e ngaahi puleʻangá ki hono feituʻu toputapú,+
ʻA e faʻahinga naʻá ke tuʻutuʻuni heʻikai te nau hū ki hoʻo fakatahaʻangá.
כ [Kafa]
11 ʻOku māpuhoi ʻa hono kakaí kotoa; ʻoku nau kumi ki ha mā.+
Kuo nau foaki atu ʻenau ngaahi meʻa mahuʻingá ki ha meʻa ke nau kai, kehe pē ke nau moʻui.
Vakai mai ʻe Sihova, ʻo ke mamata ki heʻeku hoko ko ha fefine* taʻeʻaongá.
ל [Lameta]
12 Ko ha meʻa noa koā ia kiate kimoutolu kotoa ʻoku fononga ʻi he halá?
Vakai pea mou sio mai!
ʻOku ʻi ai ha langa mamahi ʻe hangē ko e langa mamahi naʻe hoko kiate aú,
ʻI hono ʻai au ʻe Sihova ke u faingataʻaʻia ʻi he ʻaho ʻo ʻene houhau kakahá?+
מ [Mema]
13 Kuó ne ʻohifo ha afi mei ʻolunga ke ne tutu ʻa e hui+ kotoa pē ʻiate au.
Kuó ne folahi ha kupenga ki hoku vaʻé; kuó ne fakamālohiʻi au ke u foki.
Kuó ne ʻai au ko ha fefine liʻekina.
ʻOku ou puke ʻi he ʻahó kotoa.
נ [Nuna]
14 ʻOku haʻi ʻeku ngaahi laka halá ʻo hangē ha ʻioké, ʻo fakamaʻu ʻe hono nimá.
Kuo hilifaki ia ki hoku kiá, pea kuo mole ʻa hoku iví.
Kuo tuku au ʻe Sihova ki he nima ʻo e faʻahinga ʻoku ʻikai lava ke u talitekeʻí.+
ס [Sameha]
15 Kuo lī ʻe Sihova ʻa ʻeku kau tangata mālohí kotoa ʻo mamaʻo meiate au.+
Kuó ne ui ha fuʻu fakataha ke tuʻu mai kiate au ke laiki ʻa ʻeku kau tangata kei talavoú.+
Kuo malaki ʻe Sihova ʻa e ʻofefine kei nofo anga-maʻa ʻo Siutá ʻi he tataʻoʻanga uainé.+
ע [ʻAini]
16 ʻOku ou tangi koeʻuhi ko e ngaahi meʻá ni;+ ʻoku tafe ʻa e loʻimatá ʻi hoku matá.
He ʻilonga ha taha ʻoku malava ke ne fakafiemālieʻi au pe fakaivifoʻou kiate au ʻoku mamaʻo ia meiate au.
ʻOku liʻekina ʻa hoku ngaahi fohá, he kuo ikuna ʻa e filí.
פ [Pē]
17 Kuo folahi atu ʻe Saione ʻa hono nimá;+ ʻoku ʻikai ha taha ke fakafiemālie kiate ia.
Kuo fai ʻe Sihova ha tuʻutuʻuni ke tuʻu kia Sēkope ʻa hono ngaahi fili kotoa ʻoku takatakai ʻiate iá.+
Kuo hoko ʻa Selusalema ko ha meʻa ke nau fakaliliʻa ki ai.+
צ [Sati]
18 ʻOku māʻoniʻoni ʻa Sihova,+ he ko ʻene ngaahi tuʻutuʻuní* kuó u angatuʻu ki aí.+
Fanongo, ʻa kimoutolu kotoa ngaahi kakai, pea mou sio ki heʻeku langa mamahí.
Ko ʻeku kau fefine kei nofo anga-maʻá* mo ʻeku kau talavoú kuo taki pōpula.+
ק [Kofi]
19 Kuó u ui ki he faʻahinga naʻá ku ʻofa aí, ka kuo nau lavakiʻi au.+
Kuo ʻauha ʻa ʻeku kau taulaʻeikí mo ʻeku kau mātuʻá ʻi he koló,
Lolotonga ʻenau kumi ki ha meʻakai koeʻuhí ke nau moʻui.+
ר [Lesa]
20 Vakai mai, ʻe Sihova, he ʻoku ou mamahi lahi.
ʻOku hoko ha taʻemanonga ʻi hoku fatú.*
ʻOku mamahi ʻa hoku lotó, he kuó u mātuʻaki angatuʻu.+
ʻI tuʻá ʻoku ʻave ʻe he heletaá ʻa ʻeku fānaú;+ ʻi loto ʻi he falé ʻoku toe ʻi ai pē ʻa e maté.
ש [Sini]
21 Kuo fanongo ʻa e kakaí ki heʻeku māpuhoí; ʻoku ʻikai ha taha ke ne fakafiemālieʻi au.
Ko e kotoa ʻo hoku ngaahi filí kuo nau fanongo ʻo fekauʻaki mo ʻeku tuʻutāmakí.
ʻOku nau fiefia, koeʻuhi naʻá ke fakahoko mai ia.+
Ka te ke ʻomi ʻa e ʻaho naʻá ke fanongonongó,+ ʻa ia te nau hoko ai ʻo hangē ko aú.+
ת [Tau]
22 ʻOfa ke aʻu atu ki ho ʻaó ʻa ʻenau koví kotoa, pea ʻofa ke ke fakafeangai anga-fefeka kiate kinautolu,+
Hangē pē ko hoʻo fakafeangai anga-fefeka kiate au koeʻuhi ko ʻeku ngaahi laka halá kotoa.
He ʻoku lahi ʻa ʻeku māpuhoí, pea ʻoku vaivai ʻa hoku lotó.
א [ʻAlefi]
2 ʻOi kuo ʻufiʻufi ʻe Sihova ʻi heʻene houhaú ʻa e ʻofefine ʻo Saioné ʻaki ha konga ʻao!
Kuó ne lī hifo ʻa e fakaʻofoʻofa ʻo ʻIsilelí mei he langí ki he māmaní.+
Kuo ʻikai te ne manatuʻi ʻa hono tuʻunga-vaʻé+ ʻi he ʻaho ʻo ʻene houhaú.
ב [Peta]
2 Kuo folofua ʻe Sihova ʻo ʻikai haʻane manavaʻofa ʻa e ngaahi nofoʻanga kotoa ʻo Sēkopé.
ʻI heʻene houhaú kuó ne holoki ʻa e ngaahi feituʻu fakakolotau ʻa e ʻofefine ʻo Siutá.+
Kuó ne ʻohifo ki he kelekelé pea taʻetokaʻi ʻa e puleʻangá+ mo ʻene kau houʻeikí.+
ג [Kimela]
3 ʻI he kakaha ʻa ʻene houhaú kuó ne tuʻusi hifo ai ʻa e mālohi* kotoa ʻo ʻIsilelí.
Naʻá ne toʻo ʻa hono nima toʻomataʻú ʻi he taimi naʻe fakaofiofi mai ai ʻa e filí,+
Pea kia Sēkope naʻá ne hanganaki ulo kakaha ki ai ʻo hangē ha afi naʻá ne keina ʻa e meʻa kotoa pē takatakai ʻi aí.+
ד [Tāleta]
4 Kuó ne fusi* ʻa ʻene kaufaná ʻo hangē ha filí; ʻoku mateuteu ʻa hono nima toʻomataʻú ʻo hangē ha tokotaha fakafepakí;+
Naʻá ne hanganaki tāmateʻi ʻa e faʻahinga kotoa naʻe matamataleleí.+
Pea naʻá ne huaʻi atu ʻa ʻene houhaú ʻo hangē ha afí+ ki he tēniti ʻo e ʻofefine ʻo Saioné.+
ה [Hē]
5 Kuo hoko ʻa Sihova ʻo hangē ha filí;+
Kuó ne folofua ʻa ʻIsileli.
Kuó ne folofua ʻa hono ngaahi tauá kotoa;
Kuó ne fakaʻauha ʻa hono ngaahi feituʻu fakakolotaú kotoa.
Pea ʻokú ne ʻai ke lahi ʻa e tengihia mo e tangilāulau ʻa e ʻofefine ʻo Siutá.
ו [Vau]
6 ʻOkú ne holoki ʻa hono palepalé,+ ʻo hangē ha kiʻi fale ʻi he loto ngoué.
Kuó ne fakangata* ʻa ʻene kātoangá.+
Kuo ʻai ʻe Sihova ke ngalo ʻi Saione ʻa e kātoangá mo e Sāpaté,*
Pea ʻi heʻene houhau kakahá ʻoku ʻikai te ne tokaʻi ai ʻa e tuʻí mo e taulaʻeikí.+
ז [Saini]
7 Kuo siʻaki ʻe Sihova ʻa hono ʻōlitá;
Kuó ne fakaliliʻa ki hono feituʻu toputapú.+
Kuó ne tuku atu ʻa e ngaahi holisi ʻo e ngaahi taua fakakolotau ʻo Saioné ki he nima ʻo e filí.+
Kuo nau hiki hake honau leʻó ʻi he fale ʻo Sihová,+ ʻo hangē ko ia ʻi he ʻaho ʻo e kātoangá.
ח [Keta]
8 Kuo fakapapauʻi ʻe Sihova ke fakaʻauha ʻa e ʻā ʻo e ʻofefine ʻo Saioné.+
Kuó ne falō atu ʻa e afo fuá.+
Kuo ʻikai te ne taʻofi ʻa hono nimá mei hono ʻomi ʻa e fakaʻauhá.*
Pea kuó ne ʻai ke tangi ʻa e fakatafunga kelekelé mo e ʻaá.
Kuo ʻai kinaua fakatouʻosi ke na vaivai.
ט [Teta]
9 Kuo ngalo hifo ʻa hono ngaahi matapaá ʻi he kelekelé.+
Kuó ne fakaʻauha mo maumauʻi ʻa hono ngaahi meʻa fakamaʻú.
Ko hono tuʻí mo hono kau houʻeikí ʻoku nau ʻi he lotolotonga ʻo e ngaahi puleʻangá.+
ʻOku ʻikai ha lao;* naʻa mo ʻene kau palōfitá ʻoku ʻikai te nau maʻu ha vīsone meia Sihova.+
י [Iota]
10 Ko e kau mātuʻa ʻo e ʻofefine ʻo Saioné ʻoku nau tangutu ʻi he kelekelé ʻo fakalongo pē.+
ʻOku nau laku ʻa e efu ki honau ʻulú mo ʻai tauangaʻa.+
Ko e kau fefine kei nofo anga-maʻa ʻo Selusalemá kuo nau punou hifo honau ʻulú ki he kelekelé.
כ [Kafa]
11 ʻOku ongosia ʻa hoku matá tupu mei he tangi-ʻa-loʻimatá.+
ʻOku hoko ha taʻemanonga ʻi hoku loto fatú.*
Kuo malingi atu ʻa hoku ʻaté ki he kelekelé, koeʻuhi ko e tō ʻa e ʻofefine* ʻo hoku kakaí,+
Koeʻuhi ko e pongia ʻa e fānau mo e valevale ʻi he ngaahi malaʻe fakakoló.*+
ל [Lameta]
12 ʻOku nau hanganaki ʻeke ki heʻenau ngaahi faʻeé, “Ko fē ha uite mo ha uaine?”+
ʻI heʻenau pongia hangē ha tokotaha kuo kafó ʻi he ngaahi malaʻe fakakoló,
ʻI he faai hifo ʻenau moʻuí ʻi he nima ʻo ʻenau ngaahi faʻeé.
מ [Mema]
13 Ko e hā ʻe lava ke u ngāueʻaki ko ha fakamoʻoní,
Pe ko e hā ʻe lava ke u fakatatau koe ki aí, siʻi ʻofefine ko Selusalema?
Ko e hā ʻe lava ke u fakahoa koe ki aí, ke fakafiemālieʻi koe, siʻi ʻofefine kei nofo anga-maʻa ʻo Saione?
He ko hoʻo maumaú ʻoku hulu fau ʻo hangē ko e tahí.+ Ko hai ʻe lava ke ne faitoʻo koé?+
נ [Nuna]
14 Ko e ngaahi vīsone naʻe mātā ʻe hoʻo kau palōfitá maʻaú ko e loi mo e koto ngeʻesi,+
Pea naʻe ʻikai te nau fakahā hoʻo faihalá koeʻuhi ke fakafoki ai hoʻo nofo pōpulá,+
Ka naʻa nau hanganaki mata vīsone loi maʻau mo fai ʻa e ngaahi fakamatala fakatupu takihalaʻi.+
ס [Sameha]
15 Ko e faʻahinga kotoa ʻoku fononga ʻi he halá ʻoku nau pasipasi ʻi he manuki kiate koe.+
ʻOku nau mapumapu ʻi he fakatumutumu+ mo kalokalo honau ʻulú ki he ʻofefine ko Selusalemá mo pehē:
“ʻIkai ko e kolo eni ʻa ia naʻa nau pehē, ‘ʻOku haohaoa ʻi he fakaʻofoʻofá, ko e fiefiaʻanga ʻo e māmaní kotoa’?”+
פ [Pē]
16 Kuo ava atu ʻa e ngutu ʻo ho ngaahi filí kotoa kiate koe.
ʻOku nau mapumapu mo ʻūʻūnifo mo pehē: “Kuo tau folofua ia.+
Ko e ʻaho eni naʻa tau tatali ki aí!+ Kuo aʻu mai ia, pea kuo tau mātā ia!”+
ע [ʻAini]
17 Kuo fai ʻe Sihova ʻa e meʻa naʻá ne taumuʻa ki aí;+ kuó ne fakahoko ʻa ʻene leá,+
ʻA e meʻa naʻá ne tuʻutuʻuni ʻi he kuohilí.+
Kuó ne holoki hifo koe ʻo ʻikai ha manavaʻofa.+
Kuó ne tuku ʻa e filí ke fiefia ʻiate koe; kuó ne hakeakiʻi ʻa e mālohi* ʻo ho ngaahi filí.
צ [Sati]
18 ʻOku tangi honau lotó kia Sihova, siʻi ʻā ʻo e ʻofefine ʻo Saioné.
Tuku ke tafe hifo ʻa e loʻimatá ʻo hangē ha vaitafé ʻi he ʻaho mo e pō.
ʻOua naʻá ke mālōlō, ʻoua naʻa tuku ho matá* ke mālōlō.
ק [Kofi]
19 Tuʻu hake! Tangi ʻi he lolotonga ʻa e poʻulí, ʻi he kamata ʻo e ngaahi houa leʻó.
Huaʻi atu ho lotó ʻo hangē ha vaí ʻi he ʻao ʻo e fofonga ʻo Sihová.
Hiki hake ho nimá kiate ia koeʻuhi ko e moʻui ʻa hoʻo fānaú,
ʻA ia ʻoku nau pongia ʻi he tuliki hala kotoa pē* koeʻuhi ko e hongé.+
ר [Lesa]
20 Vakai mai, ʻe Sihova, pea hanga mai ki he tokotaha ko ia kuó ke fakafeangai mātuʻaki anga-kakaha ki aí.
ʻE kei kai ai pē koā ʻe he kakai fefiné ʻenau fānaú*+ tonu, ʻenau fānau moʻui leleí,
Pe ʻe tāmateʻi koā ʻa e kau taulaʻeikí mo e kau palōfitá ʻi he feituʻu toputapu ʻo Sihová?+
ש [Sini]
21 ʻOku tokoto kuo mate ʻa e tamasiʻi kei talavoú mo e tangata taʻumotuʻá ʻi he kelekele ʻi he ngaahi halá.+
Ko ʻeku kau fefine kei nofo anga-maʻá* mo ʻeku kau talavoú kuo nau tō ʻi he heletaá.+
Kuó ke tāmate ʻi he ʻaho ʻo hoʻo houhaú; kuó ke tāmate ʻo ʻikai ha manavaʻofa.+
ת [Tau]
22 Hangē hano ui ki ha ʻaho kātoangá,+ ʻokú ke ui ʻa e manavaheé mei he tapa kotoa pē.
ʻI he ʻaho ʻo e houhau ʻa Sihová, ʻoku ʻikai ha taha ʻe hola pe hao;+
Ko e faʻahinga naʻá ku fāʻeleʻi* mo tauhi haké, kuo tāmateʻi kinautolu ʻe hoku filí.+
א [ʻAlefi]
3 Ko au ʻa e tangata kuó u mātā ʻa e faingataʻá koeʻuhi ko e tokotoko ʻo ʻene houhaú.
2 Kuó ne kapusi au pea ʻai au ke u ʻalu ʻi he fakapoʻulí, ʻo ʻikai ʻi he māmá.+
3 Ko e moʻoni, ʻokú ne toutou taaʻi au ʻaki hono nimá ʻi he ʻahó kotoa.+
ב [Peta]
4 Kuó ne ʻai ke vaivai ʻa hoku sinó mo mamulumulu ʻa hoku kilí;
Kuó ne fesi ʻa hoku ngaahi huí.
5 Kuó ne ʻākoloʻi au; kuó ne ʻātakaiʻi au ʻaki ʻa e kona tamala+ mo e faingataʻa.
6 Kuó ne fakamālohiʻi au ke u nofo ʻi he ngaahi feituʻu fakapoʻulí, ʻo hangē ha kau tangata kuo fuoloa ʻenau maté.
ג [Kimela]
7 Kuó ne ʻaaʻi au, koeʻuhí ke ʻoua naʻa lava ke u hola;
Kuó ne haʻi au ʻaki ʻa e ngaahi meʻa-haʻi kopa mamafa.+
8 Pea ʻi heʻeku mātuʻaki tangi ki ha tokoní, ʻoku ʻikai te ne tali* ʻa ʻeku lotú.+
9 Kuó ne taʻofi ʻa hoku halá ʻaki ha ngaahi maka kuo tā;
Kuó ne ʻai ʻa hoku ʻalungá ke pikopiko.+
ד [Tāleta]
10 ʻOkú ne toka malumu kiate au ʻo hangē ha peá, hangē ha laione ʻoku toí.+
12 Kuó ne fusi* ʻa ʻene kaufaná, pea ʻokú ne fokotuʻu au ko e tāketi ki he ngahaú.
ה [Hē]
13 Kuó ne fanaʻi ʻa hoku kofuuá ʻaki ʻa e ngaahi ngahau* mei heʻene faʻoʻanga ngahaú.
14 Kuó u hoko ko ha meʻa fakakata ʻa e ngaahi kakaí kotoa, ʻo nau hivakavaʻaki ʻi he ʻahó kotoa.
15 Kuó ne fakafonu au ʻaki ʻa e ngaahi meʻa tamala pea hanganaki fakainu au ʻaki ʻa e ʻakau ifo kona.+
ו [Vau]
17 ʻOkú ke ʻave ʻa e melinó meiate au; kuo ngalo ʻiate au ʻa e meʻa ʻoku leleí.
18 Ko ia ʻoku ou pehē ai: “Kuo mole ʻa hoku lāngilangí, pea pehē ki heʻeku ʻamanaki kia Sihová.”
ז [Saini]
19 Manatuʻi muʻa ʻa ʻeku faingataʻaʻiá mo ʻeku tukuhāusiá,+ ʻa e ʻakau ifo koná mo e kona tamalá.+
20 Ko e moʻoni te ke manatuʻi au peá ke punou hifo koeʻuhi ko au.+
21 ʻOku ou manatu loto ki he meʻá ni; ko e ʻuhinga ia te u fakahaaʻi ai ha fakakaukau faʻa tatalí.+
ח [Keta]
22 Koeʻuhi ko e ʻofa mateaki ʻa Sihová kuo ʻikai ke tau ʻauha ai,+
He ko ʻene faimēsí ʻe ʻikai ʻaupito ke toe ʻosi.+
23 ʻOku foʻou ia ʻi he pongipongi taki taha;+ ʻoku lahi ʻa hoʻo faitōnungá.+
24 “Ko Sihova ʻa hoku ʻinasí,”+ kuó u pehē, “ko e ʻuhinga ia te u fakahaaʻi ai ha fakakaukau faʻa tatali kiate iá.”+
ט [Teta]
25 ʻOku lelei ʻa Sihova ki he tokotaha ʻoku ʻamanaki kiate iá,+ ki he tokotaha ʻoku hanganaki kumi kiate iá.+
26 ʻOku lelei ke tatali fakalongolongo*+ ki he fakamoʻui ʻa Sihová.+
27 ʻOku lelei ki ha tangata ke ne fua ʻa e ʻioké lolotonga ʻene kei talavoú.+
י [Iota]
28 Tuku ke ne tangutu toko taha pea hanganaki fakalongolongo ʻi Heʻene hilifaki ʻa e meʻá ni kiate iá.+
29 Tuku ke ne ʻai hono ngutú ki he efú tonu;+ naʻa ʻi ai nai ai ha ʻamanaki.+
30 Tuku ke ne fulihi atu ʻa hono kouʻahé ki he tokotaha ʻokú ne sipiʻi iá; tuku ke ne maʻu kakato ʻa e luma ʻoku fai kiate iá.
כ [Kafa]
31 He ko Sihová heʻikai te ne siʻaki kitautolu ʻo taʻengata.+
32 Neongo kuó ne fakatupunga ʻa e mamahi, te ne fakahaaʻi foki ʻa e meesi ʻo fakatatau ki he lahi ʻo ʻene ʻofa mateakí.+
33 He ʻoku ʻikai ko hono lotó ia ke ʻai ke faingataʻaʻia pe mamahi ʻa e ngaahi foha ʻo e tangatá.+
ל [Lameta]
34 Ko hono laiki ʻe ha taha ʻi hono lalo vaʻé ʻa e kau pōpula kotoa ʻo e māmaní,+
35 Ko hono ʻikai fai ʻa e fakamaau totonú ki ha tangata ʻi he ʻao ʻo e Fungani Māʻolungá,+
36 Ko hono kākaaʻi ha tangata ʻi heʻene meʻa fakalaó
—ʻOku ʻikai ke makātakiʻi ʻe Sihova ʻa e ngaahi meʻa peheé.
מ [Mema]
37 Ko hai leva ia ʻe lava ke lea peá ne ʻai ia ke hoko ka ne ʻikai ko ha tuʻutuʻuni ia ʻa Sihova?
38 Mei he fofonga ʻo e Fungani Māʻolungá,
ʻOku ʻikai ke haʻu fakatouʻosi mei ai ʻa e ngaahi meʻa ʻoku koví mo e ngaahi meʻa ʻoku leleí.
39 Ko e hā ke lāunga ai ha tokotaha moʻui ʻo fekauʻaki mo e ngaahi nunuʻa ʻo ʻene angahalá?+
נ [Nuna]
40 Tuku ke tau vakaiʻi mo sivisiviʻi hotau ngaahi ʻalungá,+ pea ke tau foki kia Sihova.+
41 Tuku ke tau hiki hake hotau lotó fakataha mo hotau nimá ki he ʻOtua ʻi he langí:+
42 “Kuo mau laka hala mo angatuʻu,+ pea kuo ʻikai te ke fakamolemoleʻi.+
ס [Sameha]
43 ʻI hoʻo houhaú kuó ke taʻofi ai ʻa ʻemau fakaofiofi atú;+
Kuó ke tuli mo tāmateʻi kimautolu ʻo ʻikai ha manavaʻofa.+
44 Kuó ke taʻofi ʻa e fakaofiofi atu kiate koé ʻaki ha konga ʻao, ke ʻoua naʻa aʻu atu ʻa ʻemau lotú.+
45 Kuó ke ʻai kimautolu ko ha kinohaʻa mo ha veve ʻi he lotolotonga ʻo e ngaahi kakaí.”
פ [Pē]
46 ʻOku ava mai ʻa e ngutu ʻo homau filí kotoa kiate kimautolu.+
47 Kuo hoko ʻa e manavaheé mo e tauhelé ko homau ʻinasi,+ ʻa e liʻekiná pea mo e ʻauhá.+
48 ʻOku tafe noa pē ʻa e vaí ʻi hoku matá koeʻuhi ko e maumau ʻoku hoko ki he ʻofefine ʻo hoku kakaí.+
ע [ʻAini]
49 ʻOku ou tangi taʻetuku, ʻo ʻikai ke toe ʻosi,+
50 Kae ʻoua kuo ʻafio hifo ʻa Sihova ʻo ne vakai mai mei he langí.+
51 ʻOku ou mamahi ʻi heʻeku sio ki he meʻa kuo hoko ki he ngaahi ʻofefine ʻo hoku koló.+
צ [Sati]
52 Kuo tuli tuʻungaʻa pē au ʻe hoku ngaahi filí ʻo hangē ha manupuná.
53 Kuo nau fakasīlongoʻi ʻa ʻeku moʻuí ʻi he luó; ʻoku nau hanganaki tolomakaʻi au.
54 Naʻe fakalaka ʻa e vaí ʻi hoku ʻulú, pea naʻá ku pehē: “Ko ʻeku ʻosí ia!”
ק [Kofi]
55 Naʻá ku ui ki ho huafá, ʻe Sihova, mei he takele ʻo e luó.+
56 Fanongo mai muʻa ki hoku leʻó; ʻoua naʻá ke tāpuni ho telingá ki heʻeku tangi ki ha tokoní, ki ha fakafiemālié.
57 Naʻá ke ʻunuʻunu ofi mai ʻi he ʻaho naʻá ku ui atu ai kiate koé. Naʻá ke pehē: “ʻOua ʻe ilifia.”
ר [Lesa]
58 Kuó ke taukapoʻi ʻa ʻeku meʻa fakalaó, ʻe Sihova, kuó ke huhuʻi ʻa ʻeku moʻuí.+
59 Kuó ke vakai mai ʻe Sihova, ki he kovi kuo fai mai kiate aú; fai mai muʻa ha fakamaau totonu+ kiate au.
60 Kuó ke vakai mai ki he kotoa ʻo ʻenau faisāuní, ki he kotoa ʻo ʻenau faʻufaʻu kiate aú.
ש [Sini]
61 Kuó ke fanongo ki heʻenau lumá, ʻe Sihova, ki heʻenau faʻufaʻu kotoa ʻoku fai kiate aú,+
62 Ki he lea ʻa e loungutu ʻa hoku kau fakafepakí pea mo ʻenau fefanafanahi ʻoku fai kiate au ʻi he ʻahó kotoa.
63 Vakai mai kiate kinautolu; pe ʻoku nau tangutu pe tuʻu, ʻoku nau manukiʻi au ʻi heʻenau ngaahi hivá!
ת [Tau]
64 Te ke totongi fakafoki kiate kinautolu, ʻe Sihova, ʻo fakatatau ki heʻenau ngaahi ngāué.
65 Te ke ʻai kinautolu ke nau loto-fefeka, ko hoʻo mala ia ke tō kiate kinautolú.
66 Te ke tuli kinautolu ʻi hoʻo houhaú pea fakaʻauha ʻosi kinautolu mei he lalo langi ʻo Sihová.
א [ʻAlefi]
4 ʻOi kuo fakaʻau ke nenefu ʻa e ngingila ʻo e koulá, ʻa e koula leleí!+
ʻOi kuo laku ʻo movete atu ʻa e ngaahi maka ʻo e feituʻu toputapú+ ʻi he ngaahi tuliki hala kotoa pē!*+
ב [Peta]
2 Ko e meʻa ki he ngaahi foha mahuʻinga ʻo Saioné, ʻa ia naʻe fua ʻo fakatatau ki he* koula kuo siví,
ʻOi kuo lau kinautolu ko e ngaahi siā ʻumea,
Ko e ngāue pē ʻa e nima ʻo ha tokotaha tufunga-ʻumea!
ג [Kimela]
3 Naʻa mo e fanga siakalí ʻoku nau fakahuhu honau ʻuhikí,
Ka ko e ʻofefine ʻo hoku kakaí kuó ne hoko ʻo anga-fakamamahi,+ ʻo hangē ko e fanga ʻositalesi ʻi he toafá.+
ד [Tāleta]
4 Ko e ʻelelo ʻo e valevale kei huhú ʻoku pipiki ki hono ʻaoʻingutú koeʻuhí ko ʻene fieinuá.
ʻOku kōlenga ʻa e fānaú ki ha mā,+ ka ʻoku ʻikai ha tokotaha te ne ʻoange kiate kinautolu ha meʻa.+
ה [Hē]
5 Ko e faʻahinga naʻa nau faʻa kai ʻa e ngaahi meʻakai vovó ʻoku nau tākoto ʻaungalua* ʻi he ngaahi halá.+
Ko e faʻahinga naʻa nau tupu hake ʻo tui ʻa e vala kula ʻahoʻahó+ kuo nau tākoto ʻi he fokotuʻunga efuefu.
ו [Vau]
6 Ko e tautea ʻo e* ʻofefine ʻo hoku kakaí ʻoku lahi ange ia ʻi he tautea ʻo e angahala ʻa Sōtomá,+
ʻA ia naʻe liua ia ʻi ha lau mōmeniti pē, pea naʻe ʻikai ha nima ʻe tokoni kiate ia.+
ז [Saini]
7 Ko ʻene kau Nāsilí+ naʻa nau maʻa ange ʻi he sinoú, ʻo hinehina ange ʻi he huʻakaú.
Naʻa nau kulokula ange ʻi he maka feó; naʻa nau hangē ha sāfaia kuo fakangingilá.
ח [Keta]
8 Ko honau fōtungá kuo hoko ʻo ʻuliʻuli ange ʻi he malala;*
ʻOku ʻikai ai ke fakatokangaʻi kinautolu ʻi he ngaahi halá.
Ko honau kilí kuo pipiki ki honau huí;+ kuo hoko ia ʻo hangē ha vaʻakau mōmoá.
ט [Teta]
9 Ko e faʻahinga naʻe tāmateʻi ʻaki ʻa e heletaá ʻoku nau lelei ange kinautolu ʻi he faʻahinga naʻe tāmateʻi ʻi he hongé,+
ʻA e faʻahinga ʻoku fakaʻauʻausino, ʻo hangē naʻe hokaʻi ʻaki ha heletaá, ʻi he siʻi ʻa e meʻakai mei he ngoué.
י [Iota]
10 Ko e nima ʻo e kau fefine manavaʻofá kuo nau haka ʻenau fānaú tonu.+
Kuo hoko ia ko ʻenau meʻakai ʻo e mamahi he lolotonga ʻa e maumau naʻe hoko ki he ʻofefine ʻo hoku kakaí.+
כ [Kafa]
11 Kuo fakahaaʻi ʻe Sihova ʻa ʻene houhaú;
Kuó ne huaʻi atu ʻa ʻene houhau kakahá.+
Pea ʻokú ne tutu ha afi ʻi Saione ʻo ne keina ʻa hono ngaahi fakavaʻé.+
ל [Lameta]
12 Ko e ngaahi tuʻi ʻo e māmaní pea mo e kotoa ʻo e kakai ʻoku nofo ʻi he fonua mahú naʻe ʻikai te nau tui
ʻE hū atu ʻi he ngaahi matapā ʻo Selusalemá+ ʻa e tokotaha fakafepakí pea mo e filí.
מ [Mema]
13 Koeʻuhi ko e ngaahi angahala ʻa ʻene kau palōfitá, mo e ngaahi faihala ʻa ʻene kau taulaʻeikí,+
ʻA ia naʻa nau lilingi ʻa e toto ʻo e faʻahinga māʻoniʻoni ʻi hono lotolotongá.+
נ [Nuna]
14 Kuo nau ʻalu hē holo hangē ha kuí+ ʻi he ngaahi halá.
Kuo nau ʻuliʻi kinautolu ʻi he totó,+
Ko ia ʻoku ʻikai malava ai ha taha ke ala ki honau kofú.
ס [Sameha]
15 “ʻAlu ki mamaʻo! Taʻemaʻa!” Ko ʻenau kalanga atu ia kiate kinautolú. “ʻAlu ki mamaʻo! ʻAlu ki mamaʻo! ʻOua ʻe ala mai kiate kimautolu!”
He kuo nau tukuhāusia mo hē holo.
Kuo pehē ʻe he kakaí ʻi he lotolotonga ʻo e ngaahi puleʻangá: “ʻE ʻikai lava ke nau nofo heni mo kitautolu.*+
פ [Pē]
16 Ko e fofonga ʻo Sihová kuó ne fakamovetevete atu kinautolu;+
Heʻikai te ne toe hōifua kiate kinautolu.
Ko e kau tangatá heʻikai te nau fakahāhā ha fakaʻapaʻapa ki he kau taulaʻeikí,+ mo ha leleiʻia ʻi he kau mātuʻá.”+
ע [ʻAini]
17 Naʻa mo e taimí ni kuo vaivai homau matá tupu mei he kumi ki ha tokoni kae kulanoa pē.+
Naʻa mau toutou kumi ki ha tokoni mei ha puleʻanga naʻe ʻikai lava ke ne fakahaofi kimautolu.+
צ [Sati]
18 Kuo nau tuli kiate kimautolu ʻi heʻemau laka kotoa pē+ koeʻuhi ke ʻoua ʻe lava ʻo mau ʻalu ʻi homau ngaahi malaʻe fakakoló.*
Kuo ofi mai ʻa homau ngataʻangá; kuo ʻosi homau ngaahi ʻahó, he kuo hoko mai homau ngataʻangá.
ק [Kofi]
19 Naʻe veʻe-vave ange homau kau tulí ʻi he fanga ʻīkale ʻo e ʻataá.+
Naʻa nau tuli kimautolu ʻi he ngaahi moʻungá; naʻa nau toka malumu kiate kimautolu ʻi he toafá.
ר [Lesa]
20 Ko e mānava ʻi homau avaʻi ihú, ʻa e tokotaha pani ʻa Sihová,+ kuo maʻu ia ʻi heʻenau fuʻu luó,+
ʻA e tokotaha ʻa ia naʻa mau pehē: “Ko hono malumalú te mau moʻui ai ʻi he lotolotonga ʻo e ngaahi puleʻangá.”
ש [Sini]
21 Mavava mo fiefia, ʻe ʻofefine ʻo ʻĪtomi,+ hangē ko hoʻo nofo ʻi he fonua ko ʻUsá.
Ka ʻe ʻoatu foki kiate koe ʻa e ipú,+ pea te ke hoko ʻo konā pea fakaeʻa atu ʻa hoʻo telefuá.+
ת [Tau]
22 Ko e tautea ki hoʻo faihalá, ʻe ʻofefine ʻo Saione, kuo aʻu ki hono ngataʻangá.
Heʻikai te ne toe ʻave fakamālohi koe.+
Ka te ne fai ha tokanga ki hoʻo faihalá, ʻe ʻofefine ʻo ʻĪtomi.
Te ne fakaeʻa ʻa hoʻo ngaahi angahalá.+
5 Manatuʻi ange, ʻe Sihova, ʻa e meʻa kuo hoko kiate kimautolú.
Vakai mai ʻo ke mamata ki homau fakamāʻí.+
2 Ko homau tofiʻá kuo tuku ia ki he kau solá, mo homau ngaahi falé ki he kau mulí.+
3 Kuo mau hoko ko e kau paea taʻeʻiai ha tamai; ko ʻemau ngaahi faʻeé ʻoku hangē ha kau uitoú.+
4 Kuo pau ke mau fai ha totongi ka mau inu ʻemau vai pē ʻamautolú,+ pea ʻoku totongi ʻa hono ʻomi ʻa ʻemau fefié tonu.
5 Ko e faʻahinga ʻoku nau tuli kimautolú ʻoku nau panaki mai ki homau kiá;
ʻOku mau ongosia, ka ʻoku ʻikai ʻomi kiate kimautolu ha mālōlō.+
6 ʻOku mau hapai atu homau nimá ki ʻIsipite+ pea ki ʻAsīlia,+ ke maʻu mai ha mā feʻunga ke mau kai.
7 Ko ʻemau fanga kuí ʻa ia naʻa nau faiangahalá ʻoku ʻikai te nau kei ʻi aí ni, ka kuo pau ke mau fua ʻenau ngaahi faihalá.
8 ʻOku pule kiate kimautolu he taimí ni ha kau sevāniti; ʻoku ʻikai ha taha ke ne hamusi kimautolu mei honau nimá.
9 ʻOku mau ʻomi ʻemau maá ʻi he tuʻunga fakatuʻutāmaki ʻo ʻemau moʻuí,+ koeʻuhi ko e heletā ʻo e toafá.
10 Kuo hoko homau kilí ʻo vela ʻo hangē ha fōnisé, koeʻuhi ko e langa mamahi ʻa e fiekaiá.+
11 Kuo nau pāʻusiʻi* ʻa e ngaahi uaifí ʻi Saione, mo e kau fefine kei nofo anga-maʻá ʻi he ngaahi kolo ʻo Siutá.+
12 Ko e kau houʻeikí naʻe haʻi ʻo tautau fakanimataha,+ pea naʻe ʻikai ke fakaʻapaʻapaʻi ʻa e kau mātuʻá.+
13 ʻOku fua ʻe he kau talavoú ʻa e maka momosi-nimá, pea ʻoku humu ʻa e tamaiki tangatá mo ʻenau ngaahi haʻinga fefié.
14 Kuo mavahe ʻa e kau mātuʻá mei he matapā ʻo e koló;+ ʻoku ʻikai ke tā ʻe he kau talavoú ʻenau ngaahi fasí.+
15 Kuo mole atu ʻa e fiefiá mei homau lotó; kuo hoko ʻemau meʻé ko e mamahi.+
16 Kuo tō ʻa e kalauní mei homau ʻulú. ʻOiauē ka ko kimautolu, koeʻuhi kuo mau faiangahala!
17 Koeʻuhi ko e meʻá ni ʻoku mahamahaki ai homau lotó,+
Pea koeʻuhi ko e ngaahi meʻá ni kuo nenefu ai ʻemau sió,+
18 Koeʻuhi ko Moʻunga Saione, ʻa ia kuo lalá;+ ʻoku ʻalu holo ai he taimí ni ʻa e fanga fōkisí.
19 Ka ko koe, ʻe Sihova, ʻokú ke ʻafio ʻi ho taloní ʻo taʻengata.
Ko ho taloní ʻoku mei he toʻutangata ki he toʻutangata.+
20 Ko e hā ʻokú ke fakangaloʻi ai kimautolu ʻo taʻengatá pea siʻaki kimautolu ʻi ha fuʻu taimi lōloá?+
21 Fakafoki kimautolu kiate koe, ʻe Sihova, pea te mau foki loto-lelei kiate koe.+
Fakafoʻou homau ngaahi ʻahó ke hangē ko ia ʻi he kuohilí.+
22 Kae kehe, kuó ke mātuʻaki siʻaki kimautolu.
ʻOkú ke kei houhau lahi ʻiate kimautolu.+
Ko e vahe 1-4 ko e ngaahi taʻanga tangi ʻi he faʻunga ʻo e ʻalafapeti faka-Hepeluú.
Pe “ngaahi vahefonua fakapuleʻangá.”
Pe “kau finemuí.”
Fakafoʻilea, “ʻulu.”
Pe “fiefia.”
ʻOku ʻai ko ha tokotaha ʻo ʻuhingá ki Selusalema.
Fakafoʻilea, “ko hono fofongá.”
Pe “kau finemuí.”
Fakafoʻilea, “ngākaú.”
Fakafoʻilea, “meʻatui.”
Fakafoʻilea, “malaki.”
Pe “fakaʻauha.”
Sio ki he Lea mo Hono ʻUhinga.
Fakafoʻilea, “fai ʻa e folofuá.”
Pe “fakahinohino.”
Fakafoʻilea, “ngākaú.”
Ko hono fakalea fakaemaau ʻi he tuʻunga ko ha tokotahá, ʻoku fakahaaʻi nai ai ʻa e fakaʻofaʻia pe kaungāongoʻi.
ʻA ia, ko ha feituʻu faiʻanga meʻa tefito ia ʻo e koló ki he kakaí.
Fakafoʻilea, “meʻatui.”
Fakafoʻilea, “ʻa e ʻofefine ʻo ho matá.”
Fakafoʻilea, “ʻi he ʻulu ʻo e ngaahi halá kotoa.”
Pe “honau fuá.”
Pe “kau finemuí.”
Pe “fāʻeleʻi moʻui lelei mai.”
Pe “ʻokú ne taʻofi; ʻokú ne talitekeʻi.”
Pe ngalingali, “ʻai au ke u tokoto noa pē.”
Fakafoʻilea, “malaki.”
Fakafoʻilea, “ngaahi foha.”
Pe “tatali anga-kātaki.”
Fakafoʻilea, “ʻi he ʻulu ʻo e ngaahi halá kotoa.”
Pe “hangē hono mahuʻingá ko e.”
Fakafoʻilea, “liʻekina.”
Fakafoʻilea, “faihala ʻa e.”
Fakafoʻilea, “ʻuliʻulí.”
Pe “nofo heni ko e kau muli.”
ʻA ia, ko ha feituʻu faiʻanga meʻa tefito ia ʻo e koló ki he kakaí.
Pe “tohotohoʻi.”