Veiveiua kae Kei Fekumi Pē

ʻI HA tohi ki he ʻōfisi vaʻa ʻo e Kau Fakamoʻoni ʻa Sihova ʻi Solovēniá, naʻe kole ai ʻe ha tangata ʻa ia naʻá ne pehē ko ha tokotaha ʻosi papitaiso Katolika Loma ia: “Kātaki muʻa ʻo ʻomai kiate au ha tatau ʻo e polosiua Ko e Hā ʻOku Fiemaʻu ʻe he ʻOtuá Meiate Kitautolú? ʻOku ou toe fiemaʻu foki ha fakahinohino ki he founga ʻe lava ke u maʻu tuʻumaʻu ai ʻi hoku ʻapí ʻa e makasini ʻĀ Hake!”

Naʻe fakamatala ʻa e tangatá: “Kātaki ʻoua ʻe maʻuhala fekauʻaki mo aú. ʻOku ou kiʻi veiveiua ʻi he fekauʻaki mo e lotú, ka naʻá ku meimei moʻutāfuʻua ʻi he taimi naʻá ku lau ai ʻa e ʻĀ Hake! ʻi heʻene ʻikai ʻaupito ke fakatokāteline ka ʻokú ne fakamatalaʻi ʻa e ngaahi meʻá ʻi ha founga mātuʻaki fakahangatonu mo fakatupu-ʻilo.” Naʻá ne lave leva ki ha makasini fakalotu ʻiloa peá ne pehē ʻokú ne mātuʻaki fakamālohiʻi ʻa e fakakaukau ʻa e kakaí.

Naʻe fakamatala ʻa e tangatá ki he ʻuhinga naʻe ʻikai te ne fakafonu ai ʻa e kūponi ʻi mui ʻi he ʻĀ Hake! ke kole ai ʻa e polosiua Fiemaʻu ka ne fili ʻe ia ke fai ha tohi fakafoʻituituí. “Naʻe ʻikai te u loto ke maumauʻi ʻa e makasini ʻĀ Hake!,” ko ʻene laú ia. “Naʻá ku loto ke tauhi kakato pē ia!”

Ko e polosiua peesi 32 Ko e Hā ʻOku Fiemaʻu ʻe he ʻOtuá Meiate Kitautolú? ʻoku ʻi ai ʻa e ngaahi lēsoni ʻe 16. ʻI he ngaahi lēsoni ko ení ʻoku fakahaaʻi ai ʻa e ngaahi akonaki tefito ʻa e Tohitapú pea ʻoku fakahoko ʻa e fakamatalá mei he Tohitapú ke fakahaaʻi ʻa e meʻa ʻoku fiemaʻu ke tau fai ke maʻu ai ʻa e hōifua ʻa e ʻOtuá. Kapau ʻokú ke saiʻia mo koe foki ke kole ha tatau ʻo e polosiuá ni, fakafonu ʻa e kūponi ʻoku ʻi aí pea lī ia ki he tuʻasila ʻoku fakahaaʻi ʻi he kūponí pe ki ha tuʻasila feʻungamālie ʻoku fakahokohoko ʻi he peesi 5 ʻo e makasini ko ení.

□ ʻOmai kiate au ha tatau ʻo e polosiua Ko e Hā ʻOku Fiemaʻu ʻe he ʻOtuá Meiate Kitautolú?

□ Kātaki ʻo fetuʻutaki mai kiate au fekauʻaki mo ha ako Tohitapu taʻetotongi ʻi ʻapi.

[Fakatātā ʻi he peesi 32]

Ngaahi tatau ʻe 113 miliona ʻi he lea ʻe 240