Ko e Kau Ifi Kofe Mālie ʻo e ʻOtu Motu Solomoné

Mei he tokotaha-tohi ʻĀ Hake! ʻi he ʻOtu Motu Solomoné

KUÓ KE ʻahiʻahi ifiʻi tuʻo taha ha paipa-mimiha? Ko e founga mimihi ʻoku fiemaʻú ʻoku lava ke ne ʻai ai koe ke ke ongoʻi ninimo. Kae fakaʻuta atu ki hano ifiʻi ha ngaahi foʻi paipa ʻoku mita ʻe ua lōloa pea senitimita ʻe nima hono taiamitá pea ʻoku fiemaʻu ai koe ke ngaue ho sinó kotoa ke ne ʻomai ha foʻi ongo. Fakatahaʻi angé ha meʻaifi peheni ʻe 40, pea te ke maʻu ai ʻa e taha ʻo e kau ifi kofe mālie ʻo e ʻOtu Motu Solomoné. ʻIo, ko e meʻalea kotoa pē ʻi he kau ifí ni ko e ngaohi ia mei he kofé! Ko e ngaahi kalasi kehekehe lahi ʻo e kofé ʻi he ngaahi vaotā matolu fakatalopiki ʻo e ʻOtu Motu Solomoné ʻokú ne tokonaki mai ʻa e ngaahi foʻi kofe ʻokú ne ʻomi ʻa e foʻi ongo mei he solo māʻolunga tahá ki he leʻo laulalo ʻaupitó.

Tau ʻaʻahi angé ki ha fale tukuʻanga koloa ʻi Honiala, ʻa ia ʻoku teuteuʻi ai ʻe he Kau Ifi Kofe Narasirato ʻenau ngaahi meʻaleá pea ʻahiʻahiʻi ki muʻa ke nau folau atu ʻi ha koniseti ki Taiuani. Ko e ngaahi meʻalea ʻe niʻihi ʻoku ʻi ai ʻa e haʻinga kofe ʻe tolu ʻa ia ʻoku fakatonutonu ia ke ne ʻomi ʻa e foʻi ongo lōtolu, pe foʻi afo. ʻOku puke fakataha ʻe he kau ifí ʻa e foʻi kofé ʻe tolu pea tātaaʻi kinautolu ʻi ha lauʻi maka lafalafa ke fakapapauʻi ʻoku feongoongoi ʻa e ngaahi ongó. Kapau ʻoku ʻikai, ʻoku tuʻusi leva ha kiʻi konga mei he muiʻi kofe ʻoku ʻikai ke feongoongoí. ʻOku ʻikai ke ifiʻi ʻa e ngaahi foʻi kofe ko ʻení. ʻOku haʻi ʻaki ha leta ʻa e muiʻi kofe taki taha, pea ʻoku tātaaʻi kotoa ʻi he kelekelé. Ko ha foʻi ongo leʻo-lahi ē ʻoku paʻulu haké!a

ʻOku faingataʻa ke fakamatalaʻi ʻa e ongó ʻi he taimi ʻoku kamata ai ke “lea” ʻa e ngaahi foʻi kofé. Ko e taimi ʻe niʻihi ʻoku ongo leʻo-siʻi; ko e taimi ʻe taha ʻoku meimei ongo fakatutuli. Ko e taʻanga taki taha ʻoku ʻi ai pē hono haka, pea ʻoku fehūʻaki holo ʻa e kau ifí ʻiate kinautolu ʻi heʻenau ifí. ʻI he taimi ʻe niʻihi ko e fasí ʻoku ongo fakailifia, ka ko e lahi tahá ko ha ongo fiefia ʻo e patopatō ʻa e vaʻé. Mahalo pē ʻi ha ʻaho te ke lava ai ke ʻaʻahi mai kiate kimautolu peá ke fanongo tonu ai ki ha taha ʻo e kau ifi kofe mālie ʻo e ʻOtu Motu Solomoné!

[Fakamatala ʻi lalo]