Tataki ki Hono Filifili ʻa e Ngaahi Feohi Leleí

ʻOKU sio ʻa e kau talavoú ki honau ngaahi toʻumeʻá kae ʻikai ki heʻenau ngaahi mātuʻá ki ha tataki ki he valá mo e fasí, ko e lau ia ʻa ha līpooti ʻi he Reader’s Digest. Ko ia ai, ʻoku mātuʻaki mahuʻinga ki he ngaahi mātuʻá ke nau ʻiloʻi pe ko hai ʻoku feohi mo ʻenau fānaú pea ʻi fē.

“Ko homou fatongiá ia ke ʻeke,” ko e lau ia ʻa Esmé van Rensburg, ko e tokotaha faleʻi taukei ʻi he potungāue ʻo e saienisi ʻo e sinó ʻi ha ʻunivēsiti ʻi ʻAfilika Tonga. Naʻá ne toe pehē: “Ko e meʻa ia ʻe ngali hokó ʻe loto-mamahi ʻa hoʻomou kiʻi tamá ʻiate kimoutolu, ka te nau mokomoko hifo.” Naʻá ne ʻoange leva ha fanga kiʻi faleʻi ki he ngaahi mātuʻá. ʻOku totonu ke ʻuhinga lelei ʻa e ngaahi tuʻutuʻuní pea ʻi ai mo e ngaahi tefitoʻi moʻoni papau ʻi mui aí; fanongo ki hoʻomou kiʻi tamá; ʻoua ʻe fuʻu anga-fefeka, kae hanganaki anga-mokomoko, pea ʻilo ʻa e meʻa ʻokú ke fiemaʻu ke leaʻakí. Kapau kuo ʻosi fakatupulekina ʻe hoʻo tamá ha feohi mo ha kaungāmeʻa ʻoku ʻikai ke taau, fakahangataha ki he ʻulungaanga ʻoku ʻikai ke ala tali kuo poupouʻi hake ʻe he kaungāmeʻá kae ʻikai ko hono taʻofi pē ʻo e toe feohí.

Ko e faleʻi fakapotopoto ki he ngaahi mātuʻá kuo fuoloa ʻene ala maʻu ia ʻi he Folofola ʻa e ʻOtuá, ʻa e Tohitapú. Hangē ko ʻení, ʻoku pehē ai: “Ke vave ʻa e tangata fuape he fanongo, kae fakatotoka ki he lea, pea fakatotoka ki he ʻita.” (Semisi 1:19) ʻOku toe ʻomai ʻe he ngaahi Konga Tohitapú ʻa e faleʻi lelei ko ʻení ʻi hono filifili ʻo e feohí: “Ko ia ʻoku fafale ki he kau poto, te ne hoko ko e poto: ka ko ia ʻoku kaumeʻa mo e sesele ʻe hoko ko e lusa.” (Palovepi 13:20) Ko e ngaahi fakatātaá ni ʻokú ne fakatātaaʻi ʻa e poto ʻoku ala maʻu ʻe he faʻahinga ʻoku nau lau ʻa e Tohitapú fakataha mo e houngaʻia pea ngāueʻaki ʻa e meʻa ʻokú ne tala maí ʻi he moʻui fakaʻahó.