Ngaahi Maongo Tuʻuloa

ʻI HE taʻu taki taha, ko e Kau Fakamoʻoni ʻa Sihová ʻoku nau fakatahataha ʻi honau ngaahi fonua taki taha ʻi he ngaahi ʻasemipilī mo e ngaahi fakataha-lahi faka-Kalisitiané. ʻOku nau fai eni ke nau maʻu ai ʻa e fakahinohino mo e feohi fakatupu langa hake fakalaumālie. Ka ko e ngaahi tafaʻaki kehe ʻi heʻenau ngaahi fakatahatahá ʻoku toe malava ke hoko ʻo maongo tuʻuloa ia ki he kau ʻaʻahí.

Ko e fakatātaá, ʻi Siulai 1999, naʻe fakatahataha ai ʻa e laui afe ʻo e Kau Fakamoʻoni ʻi Mosemipīkí ʻo feʻunga mo ha ʻaho fakakoloa ʻe tolu ʻi he Fakataha-Lahi Fakavahe ko e “Folofola Fakaekikite ʻa e ʻOtuá.” Ko e tokolahi ʻo e faʻahinga naʻe ʻi aí ko ʻenau toki fuofua kau pē ia ki ha fakataha-lahi. Naʻe maongo kiate kinautolu ʻo ʻikai ngata pē ʻi he ngaahi lea naʻa nau fanongo ki ai ʻi he peletifōmú kae toe pehē foki ki he meʻa naʻa nau sio takatakai ki aí.

Naʻe pehē ʻe ha fakamatala ʻe taha naʻe fai ʻi he Holo ʻAsemipilī Maputo: “Kuo teʻeki ʻaupito te u sio ʻi ha feituʻu fakaʻofoʻofa pehē hangē ko ení ʻi he kotoa ʻo ʻeku moʻuí! Ko e ngaahi loki kaukaú naʻe ʻi ai ʻa e koa mo e sioʻata, pea toe foʻou foki hono nanamú. Naʻe nonga ʻa e ʻātakaí ʻo ʻikai ha longoaʻa ʻi he kē ʻa e fānaú. Pea hala ha feteketekeʻi! Naʻá ku sio ki ha toʻutupu fiefia ʻoku nau kau ʻi ha ngaahi fetalanoaʻaki fakalototoʻa. Naʻe toe maongo foki kiate au ʻa e founga naʻe teuteu lelei ʻaupito ai ʻa e tokotaha kotoa pē. ʻI he taimi hoko maí, te u ʻomai ai ʻeku fānaú pea fakalotoʻi mo hoku husepānití kuo pau ke mau maʻu ʻa e fakataha-lahi ko ení.”

ʻIo, ko e faitotonu, anga-tonu mo e maʻa fakaesino ʻa e Kau Fakamoʻoni ʻa Sihová ʻoku ʻikai taʻefakatokangaʻi ia. Ko e hā ʻoku kehe ai ʻa e Kau Fakamoʻoní? Koeʻuhi ʻoku nau feinga moʻoni ke ngāueʻaki ʻa e meʻa ʻoku nau ako mei he Tohitapú. Ko e hā ʻoku ʻikai kau fakataha ai mo kinautolu he taʻú ni ʻi heʻenau ngaahi fakataha-lahi fakafonuá pe ʻi heʻenau ngaahi fakataha fakauiké ʻi ha Fale Fakatahaʻanga fakalotofonua peá ke vakaiʻi tonu ia?

[Fakatātā ʻi he peesi 32]

SEMIPIA

[Fakatātā ʻi he peesi 32]

KENIĀ

[Fakatātā ʻi he peesi 32]

MOSEMIPĪKI