Ko e Kau Fakaʻauha ʻo e ʻUluʻakaú
ʻI HE ngaahi taimi ʻo e Tohitapú, naʻe fai ai ʻa e vakai ki he ʻuluʻakaú ko ha ngaahi koloa mahuʻinga. Ko e fakatātaá, ʻi he taimi naʻe fakatau ai ʻe ʻĒpalahame ha konga malaʻe maʻa hono uaifi ʻofaʻanga ko Selá, naʻe hiki ʻa e ʻuluʻakaú ʻi he aleapau ki he fakatau ʻo e konga kelekelé.—Senesi 23:15-18.
ʻOku pehē pē ʻi he ʻahó ni, ʻoku fakamahuʻingaʻi māʻolunga ʻa e ʻuluʻakaú, pea ʻoku fakahanga ʻa e tokanga lahi fakavahaʻapuleʻanga ki hono fakahaofi ʻo e ngaahi vaotaá. ʻOku pehē ʻe he tohi ko e State of the World 1998: “Neongo ʻa e tokanga ʻa e kakai tokolahi ʻi he ngaahi fonua fakatokelaú ki he vaotaá, ʻoku ʻikai nai ke nau fakatokangaʻi ko e ngaahi vaotā ʻea lelei ʻi honau ngaahi fonuá tonu ko ia ia ʻoku mole mo maumauʻi lahi taha ʻi he kotoa ʻo e ngaahi vaotaá.” Ko e hā ʻokú ne fakamanamanaʻi ʻa e moʻuilelei ʻa e ngaahi vaotā ʻi he ngaahi fonua fakatokelau ko ia ʻo ʻIulope mo ʻAmelika Tongá? ʻOku tuhu ʻa e kakai tokolahi ki he fakaʻauha ʻo e vaotaá, ka ʻoku ʻi ai ʻa e ongo mālohi kehe ʻoku pulia ʻena fakaʻauha ʻa e ʻuluʻakaú, ʻo fai mei he lauʻiʻakau ki he lauʻiʻakau, hangē ko e laú. Ko e hā kinaua? Ko e ʻuliʻi ʻo e ʻeá mo e ʻuha ʻēsití. Ko e ongo meʻa fakaʻuliʻi ko ʻení ʻoku lava ke ne fakangāvaivaiʻi māmālie ʻa e ʻuluʻakaú, ʻo ʻai ai kinautolu ke nau tōngofua ki he ʻohofi ʻe he fanga kiʻi manu maumaú mo e mahakí.
ʻI ha ngaahi hongofuluʻi taʻu, kuo fakatokanga ai ʻa e kau ako ki he ʻātakaí mo ha tokanga makehe ha kakai fekauʻaki mo e fiemaʻu ke maluʻi ʻa e fevilotakaiʻaki ʻi natula ʻa e māmaní. ʻI he 1980 tupú, hili ʻa e ako ʻa ha kau faisaienisi ʻi Siamane ki he ngaahi nunuʻa ʻo e ʻuliʻi ʻo e ʻeá mo e ʻuha ʻēsiti ʻi he ʻātakaí, naʻa nau fakaʻosiʻaki: ‘Kapau heʻikai fai ha meʻa, ʻi he taʻu 2000 nai, ko e malava ʻa e kakaí ke fakaʻofoʻofaʻia ʻi he ngaahi vaotaá ʻe fai pē ia ʻi he ngaahi tā motuʻá pea ʻi he ngaahi faivá.’ ʻOku fakafiefiá, he ko e mālohi fakatupufoʻou ʻo e māmaní ʻoku fuʻu mālohi ia he ʻi he aʻu mai ki he taimi ní ʻokú ne lava ke matuʻuekina ʻa e lahi taha ʻo e maumau naʻe tala ki muʻá.
Neongo ia, ʻi he lele lōloá, ko e ʻOtuá te ne fai ha meʻa lahi ʻaupito ke maluʻi hotau ʻekosisitemá. “Oku ne fakaviviku ae gaahi foi mouga mei hono fale afioaga” pea “fakatubu eia ae mohuku ma ae faga manu, moe akau ke aoga ki he tagata.” Pea naʻá ne talaʻofa “ke fakaʻauha ʻakinautolu ʻoku fakaʻauha ʻa e fonua.” (Sāme 104:13, 14, PM; Fakahā 11:18) Ko ha meʻa fakaofo ē ʻe hokó ʻi he taimi ʻe malava ai ʻa e kau nofo ʻi he māmaní ʻo fiefia ʻi ha māmani ʻatā mei hono ʻuliʻí ʻo taʻengata!—Sāme 37:9-11.