Ngaahi Mātuʻa—Fakatōliʻa ʻa e Fiemaʻu ʻa Hoʻomou Fānaú!
ʻOKU fiemaʻu ʻe he fānaú ʻa e tataki mo e akonekina anga-ʻofa, tautefito mei heʻenau ngaahi mātuʻá. ʻI he fekauʻaki mo e meʻá ni, ʻoku pehē ʻe ha tokotaha faiako Pelēsila, ko Tania Zagury: “Ko e hehema ʻa e kiʻi tama kotoa pē ke kumi ki he mālié. ʻOku fiemaʻu ke fokotuʻu ʻa e ngaahi fakangatangata. Ko e ngaahi mātuʻá kuo pau ke nau fai ʻa e meʻa ko ení. Kapau heʻikai, ʻe hoko ai ʻa e fānaú ʻo taʻemapuleʻi.”
Kae kehe, ʻi he ngaahi fonua lahi ko e tākiekina ʻa ha sōsaieti fakangofua tavale ʻa ia ʻoku hakeakiʻi ai ʻa e tauʻatāina fakafoʻituituí ʻe lava ke ne ʻai ʻo faingataʻa ke muimui ʻi he fakahinohino ʻi ʻolungá. Ko fē leva, ʻe lava ke hanga ki ai ʻa e ngaahi mātuʻá ki ha tokoní? Ko e ngaahi mātuʻa manavahē-ʻOtuá ʻoku nau ʻiloʻi ko ʻenau fānaú “koe tofia mei a Jihova.” (Sāme 127:3, PM) Ko ia ai, ʻoku nau hanga ki he Folofola ʻa e ʻOtuá, ʻa e Tohitapú, ki ha tataki ki hono ʻohake kinautolú. Ko e fakatātaá, ʻoku pehē ʻe he Palovepi 13:24: “Ko ia ʻoku ne angakoviʻi ʻa e meʻa kinisi ʻoku ne fehiʻa ki heʻene tamasiʻi: ka ko ia ʻoku ne ʻofa ki ai ʻoku ne tautea kei siʻi.”
Ko e ngāueʻaki ʻe he Tohitapú ʻa e foʻi lea “meʻa kinisi” ʻoku ʻikai fiemaʻu ke mahinoʻi ʻoku ʻuhingá ko e tautea fakaesino pē; ʻokú ne fakatātaaʻi ʻa e ngaahi founga ʻo e fakatonutonú, pe ko e hā pē ʻa e founga ʻoku fakahoko ʻaki nai iá. Ko e moʻoni, ʻi he taimi lahi ko e ngaahi foʻi leá pē nai ʻa e meʻa ʻoku fiemaʻu ke fakatonutonuʻaki ha ʻalunga talangataʻa ʻo ha kiʻi tama. ʻOku pehē ʻe he Palovepi 29:17: “Tautea ho foha, pea te ne hoko ko ho nongaʻanga; ʻio, te ne taufetuku fiemalie ki hoʻo moʻui.”
ʻOku fiemaʻu ʻe he fānaú ʻa e akonekina anga-ʻofa ke fakangataʻaki ʻa e ngaahi tōʻonga ʻoku ʻikai ke fiemaʻú. Ko e fakatonutonu fefeka mo anga-ʻofa peheé ʻoku ʻomai ai ʻa e fakamoʻoni ʻoku tokanga ha mātuʻa ki he kiʻi tamá. (Palovepi 22:6) Ko ia ngaahi mātuʻa, loto-toʻa! ʻI he muimui ki he akonaki fakapotopoto mo ʻaonga ʻa e Tohitapú, te mou fakahōifuaʻi ai ʻa Sihova ko e ʻOtuá pea maʻu ai ʻa e ʻapasia ʻa hoʻomou fānaú.