Līpooti ʻa e Kau Fanongonongo ʻo e Puleʻangá
‘Ko e Folofola ʻa e ʻOtuá ko e Koto Malohi’
ʻI HE motu Kalipiane laʻalaʻā ko Samaiká, ʻoku maheni ai ʻa e kakai tokolahi tahá mo e Tohitapú. Ko hono moʻoní, ko e King James Version, ʻoku lava ke maʻu ia ʻi he meimei ʻapi kotoa pē, pea ko e kakai ʻe niʻihi kuo nau ʻiloʻi “ko e folofola ʻa e ʻOtua, ko e koto moʻui mo e koto malohi.” (Hepelu 4:12) Ko e mālohí ni ʻoku lava ke ne liliuʻi ʻa e moʻuí, ʻo hangē ko ia ʻoku fakatātaaʻi ʻe he meʻa naʻe hokosia ko ení.
Ko ha tangata ko Cleveland ko ʻene toki foki mai pē ia ki ʻapi mei he ngāué ʻi he uiui atu ha taha ʻo e Kau Fakamoʻoni ʻa Sihová kiate ia. ʻI he hili ʻa e vahevahe mo ia ha ngaahi poini mei he ngaahi Konga Tohitapú, naʻe tuku ai ʻe he Fakamoʻoní ʻa e tohi tokoni fakaeako Tohitapu ko e ʻIlo ʻA Ia ʻOku Taki Atu ki he Moʻui Taʻengatá. Naʻe ʻikai ke ʻilo ʻa Cleveland ki he lahi ʻe fakaivimālohiʻi ai ʻe he Folofola ʻa e ʻOtuá ʻa ʻene moʻuí.
Naʻe faʻa lotu tuʻo tolu ʻi he ʻaho ʻa Cleveland, ʻo kole ki he ʻOtuá ke tokoniʻi ia ke ne ʻilo ʻa e founga totonu ke lotu ai kiate Iá. Naʻe tui fakapapau ʻa Cleveland ko ʻene ongo mātuʻá naʻe ʻikai te na lotu ʻi he founga totonú, ka ʻi he hili hono sivisiviʻi ʻa e ngaahi lotu kehé, naʻe hoko ʻo tōnoa ʻa ʻene ʻamanakí. Neongo naʻá ne ʻosi fanongo fekauʻaki mo e Kau Fakamoʻoni ʻa Sihová, naʻá ne veiveiua pe naʻa nau maʻu ʻa e moʻoní. Neongo ʻa ʻene lotolotouá, naʻe loto-lelei ʻa Cleveland ke ne ako ʻa e Tohitapú mo e tokotaha Fakamoʻoni naʻe uiui atu ʻi hono matapaá. Ko e hā hono ʻuhingá? Koeʻuhi he naʻá ne loto ke fakamoʻoniʻi ʻoku hala ʻa e Kau Fakamoʻoní!
Naʻe vave hono ʻiloʻi ʻe Cleveland ko e vahaʻangatae taʻetaau naʻá ne lolotonga maʻu mo ha ongo fefine kehekehe ʻe ua naʻe taʻefakahōifua ia ki he ʻOtuá. (1 Kolinito 6:9, 10) ʻI he hili ʻa e foʻi ako pē ʻe ua, naʻá ne maʻu ʻa e loto-toʻa ke fakangata ʻa hono vā mo e ongo fefiné. Naʻá ne toe kamata maʻu mo e ngaahi fakataha faka-Kalisitiane ʻi he Fale Fakatahaʻangá. Ka naʻe hoko eni ko ha toe ʻahiʻahi ia ʻe taha.
Naʻe fuʻu longomoʻui ʻaupito ʻa Cleveland ʻi he timi soka ʻa hono koló, pea ko e ʻū vaʻingá naʻe taʻofi ai ʻa ʻene maʻu fakatahá. Ko e hā te ne faí? Neongo ʻa e tenge lahi mei hono ngaahi kaungāvaʻingá, faiakó mo e ngaahi kaungāmeʻá, naʻe fakapapauʻi ʻe Cleveland ke fakafisi mei he timi soká. ʻIo, naʻe kamata ke foaki mālohi ʻa e Folofola ʻa e ʻOtuá, ʻo tākiekina ia ki he leleí!
Ko e mālohi ʻo e Folofola ʻa e ʻOtuá naʻe kamata ke toe eʻa ia ʻi he kamata ke vahevahe ʻe Cleveland ʻa ʻene ʻilo faka-Tohitapú ki he niʻihi kehé. (Ngāue 1:8) Ko hono olá, ko e toko ua ʻi hono ngaahi kaungāvaʻinga ki muʻá naʻá na kamata maʻu ʻa e ngaahi fakataha ʻa e Kau Fakamoʻoni ʻa Sihová. ʻI he hili ʻa e taau ʻa Cleveland ke hoko ko ha tokotaha malanga ʻo e ongoongo leleí, naʻá ne maʻu ʻa e fiefia lahi ʻi he ngāue fakafaifekaú, ʻi hono ngāueʻaki ʻa e Folofola ʻa e ʻOtuá ke tokoniʻi ʻa e niʻihi kehé.
ʻI he hokohoko atu ʻa hono ueʻi ʻo Cleveland ʻe he mālohi ʻo e Folofola ʻa e ʻOtuá, naʻe faai atu pē ʻo ne fakahāhā ʻa ʻene fakatapui kia Sihová ʻaki ʻa e papitaiso ʻi he vaí pea ʻokú ne maʻu ʻa e monū ke ngāue ko ha faifekau taimi-kakato mo ha sevāniti fakafaifekau ʻi he fakatahaʻangá.
ʻI Samaika pea ʻi he māmaní takatakai, kuo hoko ai ʻo ʻiloʻi ʻe he kakai ʻe laui afe, ko e moʻoni, ko e Folofola ʻa e ʻOtuá “ko e koto moʻui mo e koto malohi.”
[Mape/Fakatātā ʻi he peesi 8]
(Ki he konga tohi kuo fokotuʻú, sio ki he tohí)
SAMAIKA
[Maʻuʻanga]
Mapé mo e kolopé: Mountain High Maps® Copyright © 1997 Digital Wisdom, Inc.