Loto-Moʻoní​—Fakamānako, ka ʻOku Feʻunga Pē Ia?

ʻOKU fakamānako moʻoni ʻa e loto-moʻoní ʻi heʻetau moʻui fakaʻahó? ʻOku fakamatalaʻi ʻe ha tikisinale ʻa e “loto-moʻoní” ko e “hao mei he fakangalingalí pe mālualoí; faitotonu; loto-totonu; anga-moʻoni.” ʻOku hā mahino, ko e ʻulungāngá ni ʻoku ʻaonga ia ʻi hono pouaki ʻa e ngaahi vahaʻangatae lelei mo e niʻihi kehé. Naʻe naʻinaʻi ʻa e ʻapositolo ko Paulá: “Mou talangofua ki hoʻomou ngaahi ʻeiki fakasino ʻi he meʻa kotoa pe; ʻo ʻikai ʻi he fai fakamamata, ʻo hange ko ha kakai kimoutolu ʻoku fai ke malieʻia ʻa e tangata pe, ka mou fai lototō [“loto-moʻoni,” NW] pe, telia ʻa e ʻEiki.” (Kolose 3:22) Ko hai ia ʻe ʻikai ke fiefia ʻi hono maʻu ha tokotaha loto-moʻoni pehē ke ngāue ange ki ai? ʻI he ʻahó ni, ko e kakai loto-moʻoní te nau maʻu nai ʻa e faingamālie lelei ange ke maʻu mo tauhi ʻenau ngāué.

Kae kehe, ko e meʻa ʻokú ne ʻai ke fakamānako taha ʻa e loto-moʻoní ko e anga ko ia ʻo ʻene kaunga ki hotau vahaʻangatae mo e ʻOtuá. Ko e kau ʻIsileli ʻo e kuonga muʻá naʻa nau maʻu ʻa e tāpuaki ʻa e ʻOtuá ʻi he taimi naʻa nau tauhi fakamākukanga ai ʻa e ngaahi laó mo e ngaahi kātoangá. Lolotonga ʻa e lāulea ki he tuʻunga maʻa fakaefakatahaʻangá, naʻe fakaʻaiʻai ʻe Paula ʻa e kau Kalisitiané: “Ke tau fai ʻa e katoanga; kae ʻoua naʻa tau fai ʻaki ʻa e levani muʻa, ʻumaʻā ʻa e levani ko e loto kovi mo e ngaue pango; ka tau fai ʻaki ʻa e meʻa taʻelevani, ko e maʻa [“loto-moʻoni,” NW] mo e moʻoni.” (1 Kolinito 5:8) Ke ala tali ʻetau lotú ʻe he ʻOtuá, ko e loto-moʻoní ʻoku ʻikai ke ngata pē ʻi heʻene fakamānakó ka ʻoku toe fiemaʻu. Neongo ia, fakatokangaʻi ʻoku ʻikai ke feʻunga ʻa e loto-moʻoní ʻataʻatā pē. Kuo pau ke ʻalu fakataha ia mo e moʻoní.

Ko e kau foʻu mo e kau pāsese ʻo e Titanic naʻa nau tui loto-moʻoni nai ʻe ʻikai ke ala ngoto ʻa e fuʻu vaka pāsese ko ení. Kae kehe, ʻi heʻene fuofua folaú ʻi he 1912, naʻe tau ai ia ʻi ha konga ʻaisi pea ko e kakai ʻe toko 1,517 naʻe mole ai ʻenau moʻuí. Ko e kau Siu ʻe niʻihi ʻi he ʻuluaki senitulí naʻa nau tui loto-moʻoni nai ki he founga ʻo ʻenau lotu ki he ʻOtuá, ka ko ʻenau faivelengá naʻe “ʻikai fou ʻi he ʻilo totonu.” (Loma 10:2) Ke ala tali kitautolu ʻe he ʻOtuá, ko ʻetau ngaahi tui loto-moʻoní kuo pau ke makatuʻunga ia ʻi he fakamatala totonu. Ko e Kau Fakamoʻoni ʻa Sihova ʻi ho koló te nau fiefia ke tokoniʻi koe ʻi hono sivisiviʻi ʻa e meʻa ʻoku kau ki hono tauhi ʻa e ʻOtuá ʻi he loto-moʻoni mo e moʻoni.