Ko e ʻOfá ʻOku ʻIkai ke Ala Liʻaki
TATAU ai pē pe ko e hā ʻa e taʻumotuʻá, tōʻonga fakafonuá, leá, pe matakalí, ʻoku maʻu ʻe he faʻahinga kotoa ʻo e tangatá ha holi lahi ki he ʻofá. Kapau ʻoku ʻikai fakatōliʻa ʻa e holi ko iá, ʻoku ʻikai te nau fiefia. Naʻe tohi ha tokotaha fakatotolo fakafaitoʻo: “Ko e ʻofá mo e fekoekoeʻí ʻoku ʻi he tefito ia ʻo e meʻa ʻokú ne ʻai ke tau puké pea mo e meʻa ʻokú ne ʻai ke tau saí, meʻa ʻokú ne fakatupunga ʻa e mamahí mo e meʻa ʻokú ne ʻomai ʻa e fiefiá, meʻa ʻokú ne ʻai ke tau faingataʻaʻiá pea mo e meʻa ʻoku taki atu ki he fakamoʻuí. Kapau naʻe maʻu ʻe ha faitoʻo foʻou ʻa e tuʻunga mālohi tatau, ʻe fakaongoongoleleiʻi ia ʻe he meimei toketā kotoa ʻi he fonuá ki heʻenau kau mahakí. ʻE hoko ko ha tōʻonga taʻetotonu ʻa e ʻikai fili ke ngāueʻaki iá.”
Neongo ia, ko e sōsaieti fakaeonopōní, tautefito ki hono mītiá mo e faʻahinga alafaʻifaʻitakiʻanga manakoá, ʻoku nau faʻa fakamamafa lahi ange ki he koloá, mafaí, ongoongó, mo e fehokotaki fakasinó ʻi he fiemaʻu fakaetangata ki ha ngaahi vahaʻangatae māfana mo ʻofá. Ko e kau faiako tokolahi ʻoku nau fakamamafaʻi ʻa e ngaahi taumuʻa mo e ngāue fakamāmaní ʻo fakafuofua ʻa e lavameʻá tautefito ʻi he ngaahi tuʻunga ko iá. Ko e moʻoni, ko e akó mo e fakatupulekina ʻo hoto ngaahi talēnití ʻoku mahuʻinga, ka ʻoku totonu ke tuli ki ai ʻi he fakapapauʻi pehē ʻo ʻikai ai hato taimi ki he fāmilí mo e ngaahi kaumeʻá? Ko ha tokotaha-tohi poto he kuonga muʻá ʻa ia ko ha tokotaha vakai fakapotopoto ki he natula fakaetangatá naʻá ne fakatatau ha tokotaha tāutaha talēnitiʻia kae taʻeʻofá ki ‘ha ukamea ongo, pe ko ha simipale tatangi.’ (1 Kolinito 13:1) Ko e kakai peheé ʻoku nau hoko nai ʻo koloaʻia, naʻa mo ongoongoa, kae ʻikai ʻaupito fiefia moʻoni.
Ko Sīsū Kalaisi, ʻa ia naʻá ne maʻu ha mahino loloto mo ha ongoʻi ʻofa makehe ki he tangatá, naʻá ne fokotuʻu ʻa e ʻofa ki he ʻOtuá mo e kaungāʻapí ko e meʻa tefito ia ʻo ʻene akonakí. Naʻá ne pehē: “Te ke ʻofa ki he ʻEiki ko ho ʻOtua, ʻo fai ʻaki ʻa e kotoa ʻo ho loto, mo e kotoa ʻo ho laumalie, mo e kotoa ʻo ho ʻatamai. . . . Te ke ʻofa ki ho kaungaʻapi ʻo hange ko hoʻo ʻofa kiate koe.” (Mātiu 22:37-39) Ko e faʻahinga pē ʻoku nau muimui ʻi he ngaahi leá ni te nau hoko moʻoni ko e kau muimui ʻo Sīsuú. Ko ia ai, naʻá ne pehē: “Ko e meʻa kó é ʻe ʻilo ai ʻe he kakai kotoa pē ko e kau ako kimoutolu aʻaku, ʻo kapau ʻe ai haʻamou feʻofaʻaki.”—Sione 13:35.
Ko ia, ʻoku anga-fēfē hono fakatupulekina ʻe ha taha ʻa e ʻofá ʻi he māmani ʻo e ʻaho ní? Pea ʻe lava fēfē ke akoʻi ʻe he ngaahi mātuʻá ʻa e ʻofá ki heʻenau fānaú? Ko e kupu hoko maí ʻe fakahanga ia ki he ongo fehuʻi ko ení.
[Fakatātā ʻi he peesi 3]
Ko ha pole ia ke fakatupulekina ʻa e ʻofá ʻi ha māmani ʻoku puleʻi ʻe he mānumanú