Ko ha Foʻi Vitiō ke Maongo ki he Loto ʻo e Toʻutupú

NAʻE fakalototoʻaʻi ʻa e toʻutupu tokolahi ke nau fakakaukau fakamātoato ki honau ʻulungāngá ʻi he taimi naʻa nau sio ai ʻi he foʻi vitiō Young People Ask​—How Can I Make Real Friends?a ʻOku ʻi he foʻi vitioó ʻa e akonaki fakatohitapu lelei, ngaahi fakamatala fakafoʻituitui naʻe fai ʻe ha toʻutupu Kalisitiane, pea mo ha tulama fakaeonopooni makatuʻunga ʻi he fakamatala faka-Tohitapu fekauʻaki mo Tainá. (Senesi, vahe 34) Ko e ngaahi fakamatala hoko hake fekauʻaki mo e foʻi vitioó ko e haʻu ia mei Mekisikou.

ʻOku fakamatala ʻa Martha: “Naʻe maongo loloto ʻa e foʻi vitioó ki hoku lotó. ʻOku hā ngali hangē naʻe faʻu tonu pē ia kiate aú. Naʻá ku fakakaukau au naʻe ʻosi feʻunga pē ʻa hono ʻiloʻi ʻe heʻeku kau faiakó mo e kaungāakó ko e taha au ʻo e Kau Fakamoʻoni ʻa Sihová. Naʻe ʻikai malava ke u fakamoʻoniʻi ia ʻaki ʻa e faifakamoʻoni kia kinautolu. ʻOku ou houngaʻia ʻi he fakamatala kotoa ʻoku tokonaki mai ʻe Sihová, tautefito ʻi he taimi ʻoku maongo loloto ai kia kitautolu ʻo hangē ko ia ʻoku fakahoko ʻe he foʻi vitiō ko ení.”

ʻOku pehē ʻe Juan Carlos: “ʻOku ʻai moʻoni koe ʻe he foʻi vitiō ko ení ke ke fakakaukau. ʻI he tuʻunga ko ha talavoú, kuó u fai ha ngaahi fehālaaki pea ʻoku lava ke fakafehokotaki ia mo e faʻahinga ʻe niʻihi ʻi he tulamá. ʻI he ngaahi taʻu kuo maliu atú, naʻá ku tataki ai ha moʻui lōua, ka naʻá ku ʻiloʻi ko ha moʻui pehē ʻe lava ke ne ʻomai ha ngaahi nunuʻa kovi. Hili ʻa e sio ʻi he foʻi vitioó, ʻoku ou fakapapauʻi ke faitōnunga kia Sihova.”

ʻOku fakahaaʻi ʻe Sulem: “ʻI he taimi naʻá ku sio ai he foʻi vitioó, naʻe maongo lahi ia ki hoku lotó. Ki muʻa ange, naʻe tuku ai ʻa ʻeku lau Tohitapú, pea naʻe ʻikai ke u loko lotu kia Sihova. ʻI heʻeku fanongo ki he ngaahi fakamatala naʻe fai ʻe he toʻutupu ʻi he foʻi vitioó, naʻe ueʻi ai au ke toe kamata ako ʻa e Tohitapú pea ke lotu kia Sihova.”

ʻOku fehangahangai ʻa e toʻutupu ʻi he ʻaho ní mo e ngaahi pole lahi, pea ko ʻenau fili ʻo e ngaahi kaumeʻá ʻoku faʻa lava ke ne tākiekina mālohi ʻa e founga ʻo ʻenau ngāueʻaki ʻenau moʻuí. (Sāme 26:4; Palovepi 13:20) Ko e foʻi vitiō Young People Ask​—How Can I Make Real Friends? ʻokú ne tokoniʻi ʻa e tokolahi ke nau fai ʻa e ngaahi fili lelei ʻi he fekauʻaki mo e meʻá ni.

[Fakamatala ʻi lalo]