Fakafāʻūtahaʻi ʻe he Lotu Moʻoní ha Fāmili

NAʻE taʻu 13 ʻa Maria ʻi he taimi naʻá ne fanongo ai mo hono tehina ko Lucy, ʻo fekauʻaki mo Sihova mei ha kāinga. Naʻá ne toe fakamatalaʻi ai mo e ʻamanaki ki he Palataisi ʻi he māmaní. ʻI he fieʻiló, naʻá na ʻalu ai mo ia ki he Fale Fakatahaʻanga ʻo e Kau Fakamoʻoni ʻa Sihová. Naʻe maongo kia Maria ʻa e fakahinohino mahino naʻe fai aí. Naʻe kehe ʻaupito ia mei he siasí, ʻa ia naʻe siʻi ai ʻenau toe fai ha meʻa kehe ka ko e hiva pē! Naʻe vave ai ʻa e ako Tohitapu ʻa e ongo tamaikí mo e taha ʻo e Kau Fakamoʻoni ʻa Sihová.

Ko hona tuongaʻane lahí, ko Hugo, naʻá ne mahuʻingaʻia ʻi he filōsofiá mo e ʻevalūsioó. Naʻá ne taukaveʻi ia ko ha tokotaha fakaʻikaiʻi-ʻOtua. Ka ʻi he lolotonga ʻene fai ʻa e ngāue fakakautaú, naʻá ne lau ai ʻa e tohi Life​—How Did It Get Here? By Evolution or by Creation? a Naʻá ne maʻu ai ʻa e ngaahi tali ki he ngaahi fehuʻi ʻa ia naʻe ʻikai lava ke ʻomai ʻe ha toe lotu kehe. ʻI he fakakakato ʻene ngāue fakakautaú, naʻá ne kamata fakaivimālohiʻi ʻa ʻene tui toki ʻilo foʻou ki he ʻOtuá ʻaki hono ako ʻa e Tohitapú mo hono maʻu ʻa e ngaahi fakatahá, fakataha mo hono ongo tuofāfiné. Naʻe papitaiso ʻa Maria mo Lucy ʻi he 1992, ʻi he taʻu ʻe ua hili ʻena ʻuluaki fanongo ki he moʻoní, pea ko hona tuongaʻané, ʻi he taʻu ʻe ua ki mui ai.

Lolotonga ení ko ʻenau ongo mātuʻá, ʻa ia naʻá na līʻoa ki he ngaahi talatukufakaholo faka-Katoliká, naʻe siʻi ʻena fakahaaʻi ha mahuʻingaʻia ʻi he moʻoní. Naʻá na vakai ki he Kau Fakamoʻoni ʻa Sihová ʻoku nau fakahohaʻa, neongo naʻá na leleiʻia ʻi he ʻulungaanga lelei mo e teunga fakanānā ʻa e fānau Fakamoʻoni ʻa ia naʻe fakaafeʻi ʻe heʻena fānaú ki honau ʻapí. Pehē foki, ʻi he taimi kaí, ʻi hono vahevahe ʻe he fānaú ʻa e ngaahi meʻa naʻa nau ako ʻi he ngaahi fakatahá, naʻe langaʻi ai ʻa e fieʻilo ʻa ʻenau ongo mātuʻá.

Kae kehe, naʻe mahuʻingaʻia fakatouʻosi ʻa e ongo mātuʻá ʻi he tōʻonga fakafaimaná. Ko e tamaí ko ha tokotaha faʻa konā ʻa ia naʻá ne tā ʻa e faʻeé. Ko e fāmilí naʻe ʻi ha tuʻunga tuʻunuku ia ke movete. Naʻe fakamoleki leva ʻe he tamaí ʻa e uike ʻe ua ʻi pilīsone ʻi he ʻulungaanga maveuveu tupu mei he konaá. Lolotonga ʻene ʻi he pilīsoné, naʻá ne kamata ai ke lau ʻa e Tohitapú. ʻI heʻene laú, naʻá ne fakatokangaʻi ai ʻa e ngaahi lea ʻa Sīsū ʻo fekauʻaki mo e fakaʻilonga ʻo e ngaahi ʻaho fakaʻosí. ʻI he puputuʻú, naʻe ʻalu fakatouʻosi ai ʻa e tamaí mo e faʻeé ki he Fale Fakatahaʻangá peá na tali ha ako Tohitapu ʻi ʻapi. ʻI hono ʻiloʻi ʻa e moʻoní, naʻá na fakaʻauha ʻena ʻū tohi kotoa pē ʻi he tōʻonga fakafaimaná pea maʻu ʻa e fakanonga mei he ngaahi ʻohofi fakatēmenioó ʻaki ʻena ui ki he huafa ʻo Sihová. Naʻá na kamata ke fai ʻa e ngaahi liliu lahi ʻi hona ʻulungāngá.

ʻE lava ke ke fakaʻuta atu ki he maongo naʻe hoko kia Maria mo Lucy ʻi heʻena sio ki hono papitaiso ʻa ʻena ongo mātuʻá ʻe Hugo ʻi he taha ʻo e ngaahi fakataha-lahi fakavahé ʻi Polivia ʻi he 1999? Ko e taʻu nai ia ʻe hiva hili ʻa e ʻuluaki fanongo ʻa Maria mo Lucy ʻo fekauʻaki mo Sihova pea mo ʻene ngaahi talaʻofá. Fakataha mo Hugo, ʻoku nau ʻi he ngāue fakafaifekau taimi-kakató he taimí ni. He fiefia ē ka ko kinautolu ʻi hono fakafāʻūtahaʻi ʻe he lotu moʻoní ʻa honau fāmilí!

[Fakamatala ʻi lalo]