Ngaahi Lepa ʻOku ʻIkai Lava ke Matānaki Ai ha Vai
ʻI HE taimi ʻo e Tohitapú, ko e ngaahi lepá ko e ngaahi luo ngaohi ia ʻe he tangatá ʻi lolofonua, naʻe ngāueʻaki tefito ki hono tauhi ʻo e vaí. Lolotonga ha ngaahi vahaʻa taimi, ʻi he Fonua ʻo e Talaʻofá, ko e ngaahi founga pē eni ki hono tauhi maʻu ʻo e tokonaki vai mātuʻaki mahuʻingá.
ʻI hono lēkooti ha fanongonongo ʻa e ʻOtuá, naʻe lave ai ʻa e palōfita ko Selemaiá ki he ngaahi lepá ʻi ha ʻuhinga fakaefakatātā, ʻo pehē: “ʻOku lōua ʻa e kovi ʻoku fai ʻe hoku kakai; kuo nau liʻaki au ko e fauniteni ʻo e vai moʻui, kae foa lepa maʻanautolu; ko e ngaahi lepa maumau, ʻa ia ʻe ʻikai te nau matanaki ha vai.”—Selemaia 2:13.
ʻI hono liʻaki honau ʻOtuá, ʻa Sihova—“ko e fauniteni ʻo e vai moʻui”—ne hanga ai e kau ʻIsilelí ki he ngaahi faʻahi fakakautau ʻikai alafalalaʻanga mo e ngaahi puleʻanga panganí pea ki he lotu ki he ngaahi ʻotua loi, taʻelava ha meʻá. Ko e ʻamanaki pehē ki he ngaahi feituʻu ʻo e hūfangaʻangá naʻe iku ai ki hono ngāueʻaki ʻe Selemaia ʻa e fakafehoanaki ki ha ngaahi lepa ʻoku mama, ʻa ia naʻe halaʻatā mo ha mālohi fakaefakahaofi.—Teutalonome 28:20.
ʻOku ʻi ai ha lēsoni ʻi he fakatātā fakahisitōlia ko ení kia kitautolu he ʻaho ní? Hangē ko e tuʻunga ko ia ʻi he ʻaho ʻo Selemaiá, ko e ʻOtua taʻengatá, ʻa Sihova, ʻoku hokohoko atu ʻa ʻene hoko ko e Matavai pē ia ʻe taha ʻo e ngaahi vai foaki-moʻuí. (Sāme 36:9; Fakahā 4:11) ʻOku meiate ia pē taha, fakafou ʻi hono ʻAló, ʻa Sīsū Kalaisi, ʻe lava ke maʻu ai ʻe he tangatá ʻa e moʻui taʻengatá. (Sione 4:14; 17:3) Neongo ia, ʻi he hangē ko e ngaahi toʻumeʻa ʻo Selemaiá, ko e tokolahi ʻo e faʻahinga ʻo e tangatá he ʻahó ní ʻoku nau fili ke siʻaki pea aʻu ʻo fakavaivaiʻi ʻa e folofola ʻa e ʻOtuá ʻo hangē ko ia ʻoku fakamatalaʻi ʻi he Tohitapú. ʻI hono kehé, ʻoku tuku ʻenau falalá ki he ngaahi fakaleleiʻanga ʻoku fakahaaʻi fakapolitikalé, ngaahi fakaʻuhinga ngeʻesi fakaetangatá, mo e ngaahi fakakaukau mo e filōsofia ʻikai fakalāngilangiʻi ʻOtua launoá. (1 Kolinito 3:18-20; Kolose 2:8) ʻOku mahino ʻa e filí. Ko fē ʻe tuku ai hoʻo falalá? ʻE ʻi he “fauniteni ʻo e vai moʻui,” ʻa Sihova, pe ʻi he “ngaahi lepa maumau, ʻa ia ʻe ʻikai te nau matanaki ha vai”?
[Fakatātā ʻi he peesi 32]
Tā tongitongi Terra-cotta ʻo ha ʻotua fefine naʻe maʻu ʻi ha faʻitoka ʻIsileli
[Maʻuʻanga ʻo e Tā]
Photograph taken by courtesy of the British Museum