Ngaahi Fehuʻi mei he Kau Lautohí

Ko e hā ʻa e ngaahi tuʻunga naʻá ne fakatupunga ʻa Siuta ke ne fehokotaki fakasino ai mo ha fefine naʻá ne fakakaukau ko ha paʻumutú, hangē ko ia ʻoku fakamatalaʻi ʻi he Senesi 38:​15, 16?

Lolotonga naʻe fehokotaki fakasino moʻoni ʻa Siuta mo ha fefine naʻá ne fakakaukau ko ha paʻumutu, ko hono moʻoní, naʻe ʻikai ko ha paʻumutu ia. Fakatatau ki he Senesi vahe 38, ko e meʻa eni naʻe hokó.

Ki muʻa ke ʻi ai ha ngaahi foha ʻo e ʻuluaki foha ʻo Siutá mei hono uaifi ko Temá, naʻe tāmateʻi ia koeʻuhí “ko e tangata kovi ia ʻi he ʻafio ʻa Sihova.” (Senesi 38:7) ʻI he taimi ko iá, naʻe fai ai ʻa e tōʻonga ʻo e mali mo e tuongaʻane-ʻi-he-fonó. ʻI he meʻá ni naʻe fiemaʻu ai ʻi he taimi ʻoku mate ai ha tangata ʻo ʻikai ha ʻeá, ke mali ʻa hono tokouá mo e uitoú ko ha makatuʻunga ia ke ʻi ai ha ʻea. Ka ko e foha hono ua ʻo Siutá, ʻa ʻŌnani, naʻe fakafisi ia ke fakahoko ʻa hono fatongiá. Ko ia ai, naʻá ne mate ko e tupu mei he fakamaau fakaʻotuá. Naʻe fekauʻi leva ai ʻe Siuta ʻa hono ʻofefine-ʻi-he-fonó ke foki ki he ʻapi ʻo ʻene tamaí kae ʻoua kuo aʻu ki he taimi ko ia ʻe motuʻa feʻunga ai ʻa e foha hono tolu ʻo Siuta ko Selá ke mali ai mo iá. Kae kehe, ʻi he faai atu ʻa e ngaahi taʻú, naʻe ʻikai ke ʻoange ʻe Siuta ia ʻa Sela ke mali mo Tema. Ko ia ʻi he mole atu ʻi he maté ʻa e uaifi ʻo Siutá, naʻe faʻufaʻu ai ʻe Tema ha palani ke maʻu ai ha ʻea ʻia Siuta, ʻa e ʻIsileli ʻa ia ko ʻene tamai-ʻi-he-fonó. Naʻá ne fai ʻa e meʻá ni ʻaki ʻene fakapuli ʻa ia tonu ko ha paʻumutu he temipalé pea naʻá ne nofo ʻi he veʻe hala ʻa ia naʻá ne ʻiloʻi ʻe haʻu ai ʻa Siutá.

ʻI he ʻikai ʻiloʻi pe ko hai ʻa Temá, naʻe mohe ʻa Siuta mo ia. ʻI he meʻa naʻá ne faí, naʻá ne maʻu ai meiate ia ʻi he fakapotopoto ha ngaahi meʻa ko e maluʻi, pea ʻi he ngaahi meʻá ni naʻá ne fakamoʻoniʻi ai ki mui kuó ne feitama kiate ia. ʻI hono fakahaaʻi ʻa e moʻoniʻi meʻa ko iá, naʻe ʻikai ke tukuakiʻi ia ʻe Siuta ka naʻá ne pehē anga-fakatōkilalo: “ʻOku ne tonuhia ange ʻiate au, koeʻuhiā naʻe ʻikai te u ʻange ia ki hoku foha ko Sela.” Pea naʻe mātuʻaki feʻungamālie ʻa e “ʻikai te ne toe feʻiloaki mo ia.”—Senesi 38:26.

Naʻe faihala ʻa Siuta ʻi he ʻikai te ne ʻave ʻa Tema ki hono foha ko Selá ʻo hangē ko ia naʻá ne palōmesí. Naʻá ne toe mohe foki mo ha fefine naʻá ne fakakaukau ko ha paʻumutu ʻi he temipalé. Naʻe fepaki eni mo e taumuʻa ʻa e ʻOtuá, ʻa ia naʻe pau ki ha tangata ke fehokotaki fakasino pē ʻi he fokotuʻutuʻu ʻo e nofo malí. (Senesi 2:​24) Ko ia ai, ko hono moʻoní, naʻe ʻikai ke mohe ʻa Siuta mo ha paʻumutu. ʻI hono kehé, naʻá ne fetongi ʻi he taʻeʻilo ʻa hono foha ko Selá ʻi hono fakahoko ʻa e nofo mali ʻa e tuongaʻane-ʻi-he-fonó peá ne hoko ai ko ha tamai ʻa ha fānau taʻefakalao.

Kia Temá, ko hono ʻalungá naʻe ʻikai ko ha ʻulungāanga taʻetaau ia. Ko hono ongo foha māhangá naʻe ʻikai vakai ki ai ko ha ongo foha ʻi ha feʻauaki. ʻI he taimi naʻe maʻu ai ʻe Pōasi ʻo Pētelihemá ʻa e fefine Mōape ko Luté ʻi he nofo mali ʻa e tuongaʻane-ʻi-he-fonó, ko e kau mātuʻa ʻo Pētelihemá naʻa nau lea lelei ki he foha ʻo Tema ko Felesí, ʻi heʻenau pehē kia Pōasi: “Ke hoko ho fale ke hange ko e fale ʻo Felesi, ʻa ia naʻe faʻeleʻi ʻe Tema kia Siuta, ʻi ha hako ʻe ʻatu kiate koe ʻe Sihova ʻi he taʻahine ni.” (Lute 4:12) Ko Felesí ʻoku toe fakahokohoko ia ʻi he lotolotonga ʻo e fanga kui ʻa Sīsū Kalaisí.​—Mātiu 1:​1-3; Luke 3:​23-​33.