Founga ki ha Moʻui Fuoloa mo Fiefia
“ʻOKU loto ʻa e tokotaha kotoa ke hokohoko atu ʻene moʻuí; ka ʻoku ʻikai ha taha ʻe loto ke hoko ʻo motuʻa.” Ko e anga ia ʻa e laú. Ko e kakai tokolahi ʻoku nau fakaofiofi ki he taʻu mālōlō mei he ngāué ʻoku nau fakatuʻotuʻa atu ki hono maʻu ʻa e taimi lahi ange pea mo e ngaahi fatongia siʻi ange. Neongo ia, ʻoku nau ilifia fekauʻaki mo e hoko ʻo ʻikai ha taumuʻa pea taʻeʻaongá. ʻOku nau toe manavahē foki ki he nofo tokotahá, ʻikai fiefia mo e hōloa ʻa e tuʻunga moʻui leleí.
Ko e hā leva ʻa e fakapulipuli ʻo ha moʻui fiefia? Ko e tokoni ʻa e ngaahi kaumeʻa leleí mo ha fāmili ʻofa ke ʻomai ʻa e fiefiá ʻo tatau pē ki he fānau īkí mo e kau taʻumotuʻá. Ka ko e meʻa ʻoku tokoni ʻaki ʻe he niʻihi kehé ki ha moʻui ʻa ha tokotaha taʻumotuʻá ʻoku ʻikai ko ia pē ʻoku laú. Ko e meʻa ʻoku toe mahuʻinga angé ko e meʻa ʻoku lava ke fai ʻe ha tokotaha taʻumotuʻa maʻá e niʻihi kehé.
Ko ha ako taimi lōloa ki ha ngaahi hoa mali ʻe 423 naʻe fakahaaʻi ai “ko hono fai ha tokoni ki he moʻui ʻa e kakai kehé ʻe tokoni nai ia ke fakalōloa ai ʻetau moʻuí.” Ko Stephanie Brown, ʻa ia naʻá ne fai ʻa e akó, ʻokú ne fakamatala: “Ko e ngaahi ola ko eni ʻo e akó ʻoku pehē ai ʻoku ʻikai ko e meʻa ʻoku tau maʻu mei he ngaahi vahaʻangataé ʻa ia ʻokú ne ʻai ke mātuʻaki ʻaonga ʻa e fetuʻutaki mo e niʻihi kehé; ko e meʻa ko ia ʻoku tau foaki atú.” Ko e foaki peheé ʻoku kau nai ki ai ʻa hono tokoniʻi ʻa e niʻihi kehé ʻi he ngāue fakaʻapí, tokangaʻi ʻo e fānaú, fai ʻo e ngaahi fekaú, tokonaki ʻo ha meʻalele, pe fanongo ki ha taha ʻa ia ʻokú ne fiemaʻu ke fai ha talanoa mo ia.
ʻI he taʻu nai ʻe 2,000 kuo maliu atú, naʻe pehē ai ʻe Sīsū Kalaisi: “ʻOku lahi ange ʻa e fiefiá ʻi he foaki atú ʻi he maʻu maí.” (Ngāue 20:35, NW) Ko e founga ki ha moʻui fuoloa mo fiefiá ʻoku ʻikai ke kau ki ai ha fuʻu ʻakauni lahi pe ko e ngaahi faitoʻo fakafepakiʻi ʻo e taʻumotuʻá mo e meʻakai ʻoku kaí. ʻI hono kehé, ʻoku kau ki ai ʻa e nofoʻaki longomoʻui mo e foaki atu ʻa hoto taimí, iví mo e mālohí ke fakakoloaʻaki ʻa e moʻui ʻa e niʻihi kehé.
Ka neongo ia, ʻe fiemaʻu ʻa e meʻa lahi ange ʻi he foakí ke ne fakahaofi kitautolu mei he taʻumotuʻá, puké pea mo e maté. Ko e Puleʻanga pē ʻo e ʻOtuá te ne toʻo ʻosi ʻa e ngaahi meʻa ko iá. ʻI he malumalu ʻo ʻene pulé, ʻe mole atu ai ʻa e puké pea naʻa mo e ‘maté ʻe ʻikai toe ʻi ai.’ (Fakahā 21:3, 4; Aisea 33:24) Ko hono moʻoní, ko e faʻahinga talangofua ʻo e tangatá te nau moʻui taʻengata ʻi he fiefia ʻi ha māmani palataisi. (Luke 23:43) ʻOku fiefia ʻa e Kau Fakamoʻoni ʻa Sihová ke nau malava ʻo foaki ki he niʻihi kehé ʻa e founga ʻoku makatuʻunga ʻi he Tohi tapú ki ha moʻui fuoloa mo fiefia.