‘Fiefia ʻi Hoku Akoʻí’
NAʻE moʻutāfuʻua ʻa kiʻi Kazuna ʻi he fokotuʻu ange ʻe heʻene faiakó ke ne hū ʻo kau ki ha feʻauhi lea faka-Pilitānia. Naʻe ʻatā ʻa e feʻauhí ki he ngaahi ʻapiako māʻolunga kotoa pē ʻi he motu tokelau lahi ʻo Siapani ko Hōkaitó, ka naʻe teʻeki ai ʻaupito ke fakahū ki ai ʻe hono ʻapiakó ha tokotaha ako ki muʻa. ʻI he ʻaho ʻo e feʻauhí, naʻe manavasiʻi ʻa Kazuna koeʻuhí naʻe pau ke ne feʻauhi mo e kau ako kehe ʻe toko 50 nai. Naʻá ne toe hoko ʻo manavasiʻi lahi ange ʻi heʻene fakatokangaʻi atu ʻa e ongo fakamaau ʻe toko ua ʻa ia ko ʻena lea tuʻufonuá ia ʻa e lea faka-Pilitāniá.
Naʻe fanongonongo mai ʻa e kau maʻu palé, ʻo kamata pē mei he tokotaha maʻu pale māʻulalo tahá. ʻI he taimi naʻe iku ʻo ui mai ai ʻa e hingoa ʻo Kazuna ko e tokotaha maʻu pale māʻolunga tahá iá, naʻá ne ʻohovale ʻaupito. Ko ia mo ʻene faiakó, ʻa ia naʻá ne tangutu hoko atu kiate iá, naʻá na fesiofaki ʻi he ʻohovalé. ʻI heʻene kei ʻohovalé, naʻe ʻalu ai ʻa Kazuna ki he siteisí ʻo maʻu mai ʻa ʻene ipu—ki he pale ʻuluakí!
“Naʻe malava pē ení koeʻuhi ko e ako naʻe tokonaki mai ʻe he kautaha ʻa Sihová fakafou ʻi he Ako Fakafaifekau Fakateokalatí,” ko e fakamatala fiefia ia ʻa Kazuna. “ʻOku ou fiefia ʻaupito ʻi heʻeku maʻu ʻa e ako ko ení.” Ko e ako ko iá, ʻa ia naʻe kau ki ai ʻa Kazuna talu mei heʻene kei siʻí, ko e taha ia ʻo e ngaahi fakataha ʻa e fakatahaʻanga ʻa e Kau Fakamoʻoni ʻa Sihová. ʻI he teuteu ki he feʻauhí, naʻe tokanga makehe ai ʻa Kazuna ki hono ngāueʻaki ʻo e maiká, leaʻaki ʻa e loto-māfana mo e faivelenga, ngāueʻaki ʻa e ngaue ʻa e sinó ke fakatātāʻí, fetuʻutaki mo e kau fanongó, pea mo e ngaahi kaveinga kehe naʻe akoʻi ʻi he Ako Fakafaifekau Fakateokalatí.
Kātaki ʻo tali ʻemau fakaafe ke haʻu ʻo mamata ʻi he ako ko ení, ʻa ia ʻoku fai fakauike ia ʻi ha Fale Fakatahaʻanga fakalotofonua ʻo e Kau Fakamoʻoni ʻa Sihová. Sio tonu ai ʻi he anga ʻo e maʻu ʻaonga fakatouʻosi mei ai ʻa e taʻu siʻi mo e taʻumotuʻa. ʻOku ʻatā ʻa e fakatahá ki he kakaí. Ki ha fakamatala lahi ange ki he ako ʻoku ofi taha ki ho ʻapí, kātaki ʻo fetuʻutaki ki he Kau Fakamoʻoni ʻa Sihova ʻi ho feituʻú.