“Kuo ʻOsi”
ʻI HE taʻu 2002, naʻe fai ai ʻe he Kau Fakamoʻoni ʻa Sihová ha fakataha-lahi fakavahe ʻi he kolo ko Mbandaka, ʻi he tafaʻaki tokelau-hihifo ʻo e Lepupilika Temokalati ʻo Kongó. ʻI he taimi naʻe tukuange mai ai ʻi he fakataha-lahí ʻa e New World Translation of the Christian Greek Scriptures ʻi he faka-Lingalá, ko e kau fanongó naʻa nau punopuna moʻoni ʻi heʻenau fiefiá, pea naʻe fakatō loʻimata ʻa e niʻihi. Ki mui ai, naʻe fakavave ʻa e kakaí ki he peletifōmú ke sio ofi ange ai ki he Tohi Tapu foʻoú, mo kalanga: “Basuki, Basambwe,” ʻa ia ʻoku ʻuhingá: “Kuo ʻosi! Kuo fakamaaʻi kinautolu!”
Ko e hā naʻe mātuʻaki loto-māfana ai ʻa e kau fanongó, pea ko e hā naʻa nau ʻuhinga ki ai ʻi he ngaahi lea ko iá? ʻI he ngaahi tafaʻaki ʻe niʻihi ʻo Mbandaka, naʻe ʻikai malava ai ʻa e Kau Fakamoʻoni ʻa Sihová ke maʻu ʻa e ngaahi Tohi Tapu faka-Lingalá. Ko e hā hono ʻuhingá? Koeʻuhi naʻe fakafisi ʻa e ngaahi siasí ke fakatau atu ia ki he Kau Fakamoʻoni ʻa Sihová. Naʻe pau ke kole ai ʻa e Kau Fakamoʻoní ki ha tokotaha ʻikai ko ha Fakamoʻoni ke maʻu ʻa e ngaahi tataú. Naʻa nau fiefia lahi fakaʻulia he taimi ko ení koeʻuhi naʻe ʻikai kei lava ʻa e ngaahi siasí ke taʻofi kinautolu mei hono maʻu ʻa e Tohi Tapú.
Ko e liliu foʻoú ʻe maʻu ʻaonga mei ai ʻo ʻikai ngata pē ʻi he Kau Fakamoʻoni ʻa Sihová kae toe pehē foki ki he kakaí fakalūkufua. Ko ha tangata ʻa ia naʻe lava ke ne fanongo ki he polokalamá ʻi hono ʻapí ʻi heʻene ongo atu mei ha meʻa fakaongo leʻo-lahi mei he faiʻanga ʻasemipilií, naʻá ne tohi ki he ʻōfisi vaʻa ʻo e Kau Fakamoʻoni ʻa Sihová: “ʻOku ou fiefia ʻaupito fekauʻaki mo hono tukuange mai ʻo e Tohi Tapu ko ení. Te ne fakamāmaʻi kimautolu fekauʻaki mo e ngaahi meʻa lahi. ʻOku ʻikai ko e taha au ʻo e Kau Fakamoʻoni ʻa Sihová, ka ʻoku ou tatali vēkeveke ki he Tohi Tapu ko eni kuo mou toki ʻosi pulusí.”
Ko e New World Translation of the Holy Scriptures ʻoku ala maʻu ia he taimí ni ʻi hono fakakātoá ʻi he lea ʻe 33, pea ko e Christian Greek Scriptures, ʻi he toe lea lahi ange ʻe 19, ʻo kau ai ʻa e faka-Lingalá. Ko e hā ʻoku ʻikai te ke ʻeke ai ki ha taha ʻo e Kau Fakamoʻoni ʻa Sihová ʻa e founga ʻe lava ke ke maʻu ai ha tatau ʻo e liliu lelei ʻaupito ko ení?