Ngaahi Fehuʻi mei he Kau Lautohí
Kapau ʻoku fakahohaʻasi ha taha ʻe he kau tēmenioó, ko e hā ʻe lava ke ne fai ke maʻu ha nongá?
ʻOku fakahaaʻi mai ʻe he Folofola ʻa e ʻOtuá ko e faʻahinga ko ia ʻoku faingataʻaʻia mei hono ʻohofi ʻe he tēmenioó ʻoku lava ke nau ʻatā mei he fakahohaʻasi peheé. ʻOku fakahoko ʻe he lotú ha ngafa mātuʻaki mahuʻinga ʻi he fakatauʻatāina peheé. (Maake 9:25-29) Ka ko ha taha ʻoku fakamamahiʻi ʻe he kau tēmenioó ʻoku fiemaʻu nai ha toe ngaahi lākanga kehe ia ke ne fai. Ko e ngaahi meʻa naʻe hoko fekauʻaki mo e kau Kalisitiane ʻo e ʻuluaki senitulí ʻokú ne fakahāhaaʻi mai ʻa e toe meʻa kehe ʻoku fiemaʻu naí.
Ki muʻa ke nau hoko ko e kau muimui ʻo Kalaisí, naʻe ʻi ai ʻa e faʻahinga tāutaha ʻe niʻihi ʻi ʻEfesō ʻo e kuonga muʻá naʻa nau kau ʻi he ngaahi meʻa fakatēmeniō. Kae kehe, ʻi he hili ʻenau fakapapauʻi ke tauhi ʻa e ʻOtuá, ko e “faʻahinga naʻe ngaue fie mana naʻa nau haʻu mo kinautolu ʻenau ngaahi tohi, ʻo tutu ʻi he ʻao ʻo e kakai.” (Ngāue 19:19) ʻI hono fakaʻauha ʻenau ngaahi tohi ki he tongafisí, naʻe fokotuʻu ai ʻe he kau tui foʻou ko ia ʻi ʻEfesoó ha faʻifaʻitakiʻanga ki ha taha pē ʻokú ne fakaʻamu ke fakatauʻatāinaʻi kinautolu mei he ʻohofi ʻe he tēmenioó he ʻaho ní. ʻOku mātuʻaki fiemaʻu ki he faʻahinga peheé ke nau siʻaki ʻa e ngaahi meʻa kotoa pē ʻoku fekauʻaki mo e fakahaʻele faʻahikehé. ʻOku kau heni ʻa e ngaahi tohi, ngaahi makasini, ngaahi faiva, fakamatala mei he ngaahi maʻuʻanga fakaʻilekitulōniká, pea pehē ki he ngaahi meʻa ʻomi monū pe ngaahi meʻa kehe ʻoku tui koeʻuhi ko e “maluʻi” pe ʻoku fehokotaki mo e ngaahi tōʻonga fakahaʻele faʻahikehé.—Teutalonome 7:25, 26; 1 Kolinito 10:21.
ʻI he ngaahi taʻu siʻi hili hono fakaʻauha ʻe he kau Kalisitiane ʻi ʻEfesoó ʻenau ngaahi tohi fakafaimaná, naʻe tohi ʻa e ʻapositolo ko Paulá: “Ko ʻetau milimilisino ni . . . mo e ngaahi kongakau laumalie ʻa e kovi.” (Efeso 6:12) Naʻe naʻinaʻi ʻa Paula ki he kau Kalisitiané: “ʻAi kiate kimoutolu ʻa e mahafukotoa ʻa e ʻOtua, koeʻuhi ke mou lava ke tuʻu ki he ngaahi tuʻutuʻuni kākā [ngaahi ngāue olopoto] ʻa e Tevolo.” (Efeso 6:11) ʻOku kei ngāueʻaki pē ʻa e faleʻi ko iá. Kuo pau ke fakafefekaʻi ʻe he kau Kalisitiané ʻenau maluʻi fakalaumālié koeʻuhi ke ʻoua naʻa aʻu kiate kinautolu ʻa e ngaahi laumālie koví. “Kaeʻumaʻā,” ko e fakamamafaʻi ia ʻe Paulá, “kuo mou toʻo ʻa e pa ko e tui, ʻa ia te mou lava ʻaki ke tamateʻi ʻa e ngaahi ngahau vela kotoa pe ʻa e Fili.” (Efeso 6:16) ʻOku fakaivimālohiʻi ʻe ha taha ʻene tuí fakafou ʻi he ako Tohi Tapu. (Loma 10:17; Kolose 2:6, 7) Ko ia ai, ko e ako Tohi Tapu tuʻumaʻú ʻokú ne tokoniʻi kitautolu ke tau fakatupulekina ʻa e tui ʻoku ngāue hangē ha ʻā maluʻi mei he tākiekina ʻa e ngaahi laumālie koví.—Sāme 91:4; 1 Sione 5:5.
Ko e kau Kalisitiane ko ia ʻi ʻEfesoó naʻe fiemaʻu ke nau toe fai ʻa e foʻi lākanga mahuʻinga ʻe taha. Naʻe tala ʻe Paula kiate kinautolu: “ʻI he faingamalie kotoa pe . . . fai hoʻomou lotu ʻi he Laumalie ʻaki ʻa e faʻahinga hu kehekehe mo e kole.” (Efeso 6:18) ʻIo, ko e lotu tōtōivi ki he maluʻi ʻa Sihová, ko e moʻoni, ʻoku fiemaʻu ia ki he faʻahinga ʻoku nau loto ke tauʻatāina mei hono ʻohofi ʻe he tēmenioó he ʻaho ní. (Palovepi 18:10; Mātiu 6:13; 1 Sione 5:18, 19) ʻOku feʻungamālie ʻa e pehē ʻe he Tohi Tapú: “Mou fakavaivaiʻi kimoutolu ki he ʻOtua. Ka mou tali tekeʻi ʻa e Tevolo, pea te ne hola meiate kimoutolu.”—Semisi 4:7.
Neongo ko e tokotaha ʻoku tofanga ʻi he ʻohofi ʻe he tēmenioó ʻoku totonu ke ne lotu faivelenga ki ha nonga, ʻe toe lotu nai mo e kau Kalisitiane moʻoni kehé maʻá e tokotaha ko ia ʻokú ne holi moʻoni ke tauhi kia Sihová pea ʻokú ne feinga tōtōivi ke talitekeʻi ʻa e ngaahi laumālie koví. ʻE lava ke nau kole ki he ʻOtuá ke maʻu nai ʻe he tokotaha ʻoku fakafaingataʻaʻiaʻi ʻe he kau tēmenioó ʻa e mālohi fakalaumālie ke talitekeʻiʻaki ʻa e ngaahi ʻoho fakatēmenioó. Koeʻuhi ʻoku tala mai ʻe he Folofola ʻa e ʻOtuá “ko e lotu fakamātoato ʻa e tangata maʻoniʻoni ʻoku ʻaonga lahi,” ko e ngaahi lotu ʻoku leaʻaki ʻe he kau sevāniti ʻa e ʻOtuá ʻe ʻaonga moʻoni ia ki he faʻahinga ʻoku faingataʻaʻia ʻa ē ʻoku nau fai honau lelei tahá ke “tali tekeʻi ʻa e Tevolo.”—Semisi 5:16.
[Fakatātā ʻi he peesi 31]
Naʻe fakaʻauha ʻe he kau tui ʻi ʻEfesoó ʻenau ngaahi tohi fakafaimaná