Ko ha Taʻu Teau Tupu mo ha Taumuʻa ʻi he Moʻuí
KO Elin ko e taha ia ʻi he toko 60 ʻi Suēteni naʻe fakahokohoko ki muí ni mai ʻoku nau taʻu 105 pe lahi ange. ʻOkú ne taʻu 105. Neongo ʻoku tuku ia ʻi ha ʻapi ki he kau vaivaí, ʻoku fakaʻatā ia ʻe hono tuʻunga fakaemoʻuileleí ke ne hokohoko atu ʻene ngāue ko ha Fakamoʻoni longomoʻui ʻa Sihova, ʻa e ʻalunga moʻui naʻá ne fili ʻo laka hake he taʻu ʻe 60 kuohilí.
ʻI he malanga ki he niʻihi kehé, ʻoku muimui ʻa Elin ʻi he sīpinga naʻe fokotuʻu ʻe he ʻapositolo ko Paulá ʻi he taimi naʻe tukupōpula ai iá, ʻo nofo pē ʻi ha fale. Naʻe malanga ʻa Paula ki he kotoa ʻo ʻene kau ʻaʻahí. (Ngāue 28:16, 30, 31) ʻI he tuʻunga meimei tatau, ʻoku kumi ʻe Elin ʻa e faingamālie kotoa pē ke lea ai ki he kau fakamaʻa, kau toketā nifo, kau toketā, kau ngaahi ʻulu, kau neesi mo e niʻihi kehe ʻokú ne fetaulaki mo ia ʻi he ʻapí, ʻo vahevahe kia kinautolu ʻa e ongoongo lelei ʻoku maʻu ʻi he Tohi Tapú. Mei he taimi ki he taimi, naʻe aʻu ʻo fakaafeʻi ʻe he kaungātui ʻi he fakatahaʻanga ʻo Elin ʻa ʻenau kau ako Tohi Tapú ke nau ʻaʻahi kiate ia koeʻuhi ke nau lava ʻo maʻu ʻaonga mei heʻene ʻiló mo ʻene hokosiá.
Ko e ngaahi mēmipa ʻo e fakatahaʻanga ʻa Elin ʻoku nau saiʻia ʻi heʻene tōʻonga fiefia mo fieʻiló. ʻOku pehē ʻe ha kaungā Fakamoʻoni: “ʻOkú ne maʻu ha malava fakaofo ke hokohoko atu ai ʻi he ngaahi ngāue ʻa e fakatahaʻangá. ʻOkú ne manatuʻi ʻa e ngaahi hingoa ʻo e fānaú kotoa pea mo e faʻahinga kuo nau hiki mai ki muí ni ki he fakatahaʻangá.” ʻOku toe ʻiloa foki ʻa Elin ʻi heʻene anga-talitali kakaí, tōʻonga fakakatá mo ʻene fakakaukau papau ki he moʻuí.
Ko e hā ʻa e meʻa ʻokú ne tokoniʻi ʻa Elin ke ne tauhi maʻu ai ʻene fiefiá pea nofoʻaki tokangataha ki heʻene taumuʻa ʻi he moʻuí? ʻOkú ne lau ha konga Tohi Tapu ʻi he ʻaho taki taha mei he kiʻi tohi Ko Hono Vakaiʻi Fakaʻaho ʻa e Tohi Tapú, ko e pulusi ʻe he Kau Fakamoʻoni ʻa Sihová. Fakataha mo e tokoni ʻa ha lauʻi sioʻata fakaʻatalahi, ʻokú ne toe lau foki ha konga ʻo e Tohi Tapú ʻi he ʻaho kotoa. ʻOku teuteu ʻa Elin ki he ngaahi fakataha fakauike ʻa e Kau Fakamoʻoni ʻa Sihová, pea neongo ʻoku ʻikai te ne lava ʻo ʻalu ki ai, ʻokú ne fanongo ki he ngaahi hiki tepi ʻo e ngaahi fakataha ko ení. Ko hono lau tuʻumaʻu ʻa e Tohi Tapú mo e ngaahi tohi makatuʻunga Fakatohitapú pea ʻikai ke liʻaki ʻa e ngaahi fakataha faka-Kalisitiané ʻe lava ke tokoniʻi ai kitautolu ke tau moʻui ʻi ha moʻui fakafiemālie mo mohu ʻuhinga tatau ai pē pe ko e hā hotau taʻumotuʻá.—Sāme 1:2; Hepelu 10:24, 25.