Ko e Fakaʻamu ʻa Adryana
KO Adryana ko ha kiʻi taʻahine taʻu ono ia ʻi Tulsa, Oklahoma, ʻAmelika, naʻe ʻi ai ʻene fakaʻamu. Naʻe fehoanaki ia mo e fakaʻamu ʻa e tokotaha-tohi-saame ko Tēvitá, ʻa ia naʻá ne hiva: “Kuo u kole meia Sihova ha meʻa pe taha, ko ia pe te u kumi ki ai; ke u nofo ʻi he fale ʻo Sihova ʻi he ʻaho kotoa o ʻeku moʻui, ke siofi ʻa e fakaʻofoʻofa ʻo e ʻEiki, mo fakalaulauloto ʻi hono palasi.”—Sāme 27:4.
ʻI he māhina ono pē ʻo Adryana, naʻe ʻiloʻi ai naʻá ne maʻu ʻa e niulopalasitomá, ko ha ngungu fakatupu mate ʻoku tupu ʻi he ngaahi konga ʻo e halanga neavé. Ko e mahaki fakamanamana ko eni ki he moʻuí naʻá ne ʻai ia ke mamatea fakatouʻosi ʻa hono ongo vaʻé. Naʻe faitoʻo ia ʻe he kau toketaá ʻi hono fai kiate ia ʻa e ngaahi tafa lahi mo ha faitoʻo kemikale naʻe feʻunga mo e taʻu ʻe taha hono lōloá.
Ko e tamai ʻa Adryana, ʻa ia ʻoku ʻikai kau ʻi he ngaahi tui fakalotu ʻa Adryana mo ʻene faʻeé, naʻá ne fetuʻutaki ki ha kautaha ʻe taha ʻo kole ke ʻaʻahi ʻa hono ʻofefiné ki ha paʻake vaʻinga ʻiloa ʻi he māmaní. Ki muʻa ke fakahoko ʻa e fakaʻamu ko ení, naʻe fakaʻekeʻeke ʻe he kautahá ʻa Adryana. Naʻá ne fakahaaʻi ʻa ʻene houngaʻia ʻi hono fakakaukauʻi ange iá ka naʻá ne tala ange kia kinautolu te ne saiʻia ange ke ʻaʻahi ki he Pētelí, ko e senitā ʻo e ngāue ʻi māmani lahi ʻa e Kau Fakamoʻoni ʻa Sihová ʻi Niu ʻIoke. Hili ʻene ʻilo fekauʻaki mo e kole ʻa ʻene tamaí, naʻe lotu ʻa Adryana kia Sihova ke ʻoange kiate ia ha faingamālie ke ne ʻaʻahi ai ki Pēteli. Neongo ʻa e ʻuluaki hohaʻa naʻa ʻikai fakamānako ki he fānau hangē ko Adryana ʻa e Pētelí, naʻe tali ʻe he kautahá ʻa ʻene fakaʻamú ʻi he ʻikai ke fakakikihiʻi ʻe heʻene tamaí ʻa ʻene filí.
Naʻe fononga ʻa Adryana fakataha mo ʻene faʻeé, ko hono tokoua lahí, mo hono kaumeʻa ki Niu ʻIoke, ko e ʻuluaki taimi ia ke ne ʻaʻahi ai ki he Pētelí. “Naʻe tali ʻe Sihova ʻeku lotú,” ko e lea ia ʻa Adryana. “Naʻá ku ʻiloʻi te ne talitali lelei kimautolu ʻi he Pētelí. Naʻá ku sio ai ki he anga hono ngaohi ʻo e ʻū tohí, makasiní mo e Tohi Tapú. ʻOku lelei ange ia ʻi ha paʻake vaʻinga.”
Naʻe “siofi [ʻe Adryana] ʻa e fakaʻofoʻofa ʻo e ʻEiki” ʻo ne houngaʻia ki he ngāue ʻa e senitā ʻo e ngaahi ngāue ʻa e kakai ʻa Sihová he ʻaho ní. ʻOku talitali lelei mo koe foki ke ke ʻaʻahi ki Pēteli. Tānaki atu ki he ʻuluʻi ʻapitanga ʻi māmani ʻo e Kau Fakamoʻoni ʻa Sihova ʻi Niu ʻIoké, ʻoku ʻi ai mo e ngaahi ʻōfisi vaʻa ʻi he ngaahi tapa kehekehe ʻo e māmaní.