ʻOkú Ke Manavahē ki he Kahaʻú?
ʻOKU lahi ʻa e ngaahi ʻuhinga ʻoku hoko ai ʻa e manavaheé. Hangē ko ení, ʻoku ilifia ʻa e kakai ʻe niʻihi ki he meʻa ʻe hoko ki he foʻi māmaní ʻi he kahaʻú. ʻOku pehē ʻe he makasini Time ʻo ʻEpeleli 3, 2006: “Ko e meʻa kehekehe hangē ko e vela fakaʻulia ʻa e ʻeá, ngaahi afaá, ngaahi tāfeá, ngaahi vela mo e vaia ʻa e ngaahi fuʻu konga ʻaisi lalahí ʻoku fakahaaʻi ai ko e tuʻunga ʻo e ʻea ʻi he māmaní ʻoku faikehe lahi.”
ʻI Mē 2002, naʻe tukuange mai ai ʻe he Polokalama ʻĀtakai ʻa e Ngaahi Puleʻanga Fakatahatahá ha līpooti ʻoku fakakaveinga ko e “Vakai ki he ʻĀtakai Fakaemāmanilahi-3.” Naʻe teuteuʻi ia fakataha mo ngāue fāitaha ʻa e kakai laka hake he toko 1,000. Fakatatau ki ha līpooti ongoongo, naʻe fakahaaʻi ai: “Ko e foʻi palanité ʻoku ʻi ha tuʻunga ʻa ia kuo pau ke fai ai ha fili, pea ko e ngaahi fili ʻoku fai he ʻaho ní ʻoku uesia lahi ai ʻa e ngaahi vaotaá, ʻōsení, ngaahi vaitafé, ngaahi moʻungá, meʻamoʻui kaivaó mo e ngaahi felāveʻiʻaki fakaeʻātakai ʻa ia ʻoku fakatuʻunga ai ʻa e moʻui ʻa e toʻutangata lolotongá pea mo e kahaʻú.”
Ko e tuʻunga lolotonga ʻo e ʻātakai ʻi māmani lahí ko ha tupuʻanga pē ia ʻe taha ʻo e loto-moʻuá. Ko e kakai ʻi he kotoa ʻo e māmaní ʻoku nau nofo ilifia he taimí ni ki he ngaahi ʻohofi fakaetautoitoí. Ko e tokoni talēkita ʻo e ngaahi ngāue ʻa e potungāue polisi fufū tuʻu-ki-muʻa ʻa Kānatá naʻá ne pehē: “ʻOku ʻikai te mau mamohe koeʻuhi ko e hohaʻa fekauʻaki mo e ngaahi fakamanamana ʻoku ʻikai nai haʻamau ʻilo ki ai.” Ko hono moʻoní, ko e sio pē ʻi he ongoongo he televīsone he efiafí ʻoku lava ke ne fakatupu ʻa e loto-moʻua!
Ko e kakai lalahi ngāue mālohi tokolahi ʻoku nau ilifia naʻa mole ʻenau ngāué. Ko e fakatokosiʻi ʻo e kau ngāué, tāpuni ʻa e ngaahi ngāueʻangá, feʻauʻauhi ʻi he ngāueʻangá mo e ngaahi fiemaʻu tōtuʻa ʻa e kau pule ngāué ʻoku lava ke ne fakatupunga ha ongoʻi taʻepauʻia ʻi he ngāué. ʻOku fehangahangai ʻa e kau taʻu hongofulu tupú mo e manavasiʻi ʻi hano talitekeʻi kinautolu ʻe honau ngaahi toʻumeʻá. ʻOku ilifia nai ʻa e fānaú ʻi he pehē ʻoku ʻikai ʻofa moʻoni ʻenau ngaahi mātuʻá ʻia kinautolu. Kae fēfē ʻa e ngaahi tuʻunga ʻi he māmani takatakai ʻia kinautolú? “Ki he fānaú mo e kau taʻetaukeí, ko e māmani ʻi tuʻa mei honau ʻapí ʻoku pau ʻoku hā ngali hangē ko ha fuʻu feituʻu fakailifiá ʻi he taimi ʻe niʻihi,” ko e lau ia ʻa ha faʻē hohaʻa ʻe taha. Pea ʻoku loto-moʻua ʻa e ngaahi mātuʻa tokolahi fekauʻaki mo hono uesia ʻe he māmani hōloa fakaeʻulungāangá ʻa e faʻahinga ʻoku nau ʻofa aí, tautefito ki heʻenau fānaú.
ʻOku faʻa manavahē ʻa e kau taʻumotuʻá naʻa nau tō mei ha sitepu pe ʻohofi kinautolu ʻi he halá. ʻIo, “ʻoku nau manavahe foki ki he meʻa ʻoku maʻolunga, pea ʻoku ʻi hala na ha koto fakailifia.” (Koheleti 12:5) ʻOku ʻi ai ʻa e ilifia ki he hoko ʻo puke lahí. Ko e ngaahi līpooti ʻo e ngaahi vailasi fulū, ngaahi kanisā mo e ngaahi mahaki pipihi fakatupu maté ʻoku lava ke ne ʻai ke tau ilifia ʻi hano maʻu ha mahaki foʻou mo anga-kehe ʻa ia ʻe lava ke ne fakafaingataʻaʻiaʻi pe tāmateʻi kitautolu mo hotau fāmilí. Ko hono moʻoní, ʻi heʻetau sio ki he puke mo ngāvaivai ʻa e kakai moʻui lelei mo longomoʻuí, ʻoku faingataʻa ke ʻikai hohaʻa naʻa hoko ʻa e meʻa tatau kia kitautolu pe ki he faʻahinga ʻoku tau ʻofa aí. Pea he meʻa fakamamahi moʻoni ke sio ki he mata ʻo ha tokotaha puke ʻo ʻiloʻi ʻoku halaʻatā haʻane ʻamanaki!
ʻI hono uesia kitautolu ʻe he ngaahi tupuʻanga lahi ʻoku hoko ai ʻa e manavaheé, ʻoku ʻi ai ha ʻuhinga lelei ke tau fakatuʻamelie ai fekauʻaki mo e kahaʻú? ʻOku ʻi ai ha meʻa ʻe lava ke ne tokoniʻi kitautolu ke tauhi maʻu ha fakakaukau pau? ʻE tali ʻe he kupu hokó ʻa e ongo fehuʻi ko ení.
[Maʻuʻanga tā ʻi he peesi 3]
© Jeroen Oerlemans/Panos Pictures