ʻOkú Ke Ngāueʻaki ʻa e Ngaahi Faingamālié ke Vahevahe Atu Ai Hoʻo Tuí?

“ʻOKU ʻi ai ha meʻa ko e moʻoni haohaoa?” Ko e kaveinga ia ʻo ha feʻauhi faʻu ʻēsei fakafonua ʻi Pōlani. Ko e ngaahi fakahinohino ki he ʻēseí naʻe pehē ai: “ʻOku ʻikai te tau fiemaʻu ʻa e moʻoni haohaoá. ʻOku ʻikai fiemaʻu ia ʻe ha taha. Ko hono moʻoní ʻoku ʻikai ha moʻoni haohaoa ia.” Ko Agata, ko ha tokotaha ako taʻu 15 ia ʻi he kolisí pea ko e taha ʻo e Kau Fakamoʻoni ʻa Sihová, naʻá ne fili ke ngāueʻaki ʻa e faingamālie ko ení ke vahevahe atu ai ʻa ʻene ngaahi tui fakalotú ki he niʻihi kehé.

Ke teuteu ki he ʻēseí, naʻe ʻuluaki kole ʻa Agata kia Sihova ki heʻene tatakí pea toki kamata leva ʻene tātānaki ʻa e fakamatala fekauʻaki mo e kaveingá. Naʻá ne maʻu ʻa e fakamatala felāveʻi mo ia ʻi he Watchtower ʻo Siulai 1, 1995. Naʻá ne hiki hangatonu ʻa e fehuʻi naʻe ʻeke ʻe Ponitō Pailato kia Sīsuú: “Ko e ha tū ʻa e moʻoni?” (Sione 18:38) Ko e foʻi fehuʻi ko ia naʻá ne hikí, naʻe tapua atu ai ha fakakaukau taʻefalala, ʻo hangē ia ha pehē: ‘Moʻoni? Ko e hā ia? ʻOku ʻikai ha meʻa pehē!’ “Ko e fehuʻi ʻa Pailató,” ko e tohi ia ʻa Agata, “ʻokú ne fakamanatu mai kiate au ʻa e ngaahi fakahinohino ki he ʻēseí.”

Naʻá ne hoko atu leva ʻo lāulea ki he tupulekina ʻa e tui fai fakatuʻungá—ʻa e foʻi fakakaukau ko ia ko e meʻa ʻoku moʻoni ki he tokotahá ʻoku taʻemoʻoni nai ia ki he tokotaha ʻe tahá pea ʻokú na fakatou “moʻoni” nai. Naʻá ne ʻeke ʻa e ngaahi fehuʻi hangē ko ení, “Ko hai ia ʻia kitautolu ʻe fakatoʻotoʻa ke heka ʻi ha vakapuna kapau naʻe ʻikai te tau fakakaukau ko e ngaahi lao ʻo e ʻalu ʻi he ʻataá ko e ngaahi foʻi moʻoni haohaoa?” Naʻá ne tuhu leva ki he Tohi Tapú, ʻo ne pehē: “Ko e falala ki he Folofola ʻa e ʻOtuá ʻoku fokotuʻu maʻu ia ʻi he ngaahi moʻoni ʻoku ala fakapapauʻi.” Naʻá ne fakahaaʻi ʻa ʻene ʻamanaki ko e faʻahinga ʻoku nau fekumi loto-moʻoni ki he moʻoni haohaoá te nau maʻu ʻa e kātaki feʻunga ke kumi ki ai.

Naʻe maʻu ʻe Agata ha sila fakalāngilangi makehe, pea naʻá ne maʻu ʻa e faingamālie ke lau ia ʻi he ʻao ʻo e kalasí kotoa. Ko e niʻihi ʻo hono kaungāakó naʻa nau tali ʻa ʻene tuʻuaki ke ako Tohi Tapu mo kinautolú. ʻOku houngaʻia ʻa Agata ʻi heʻene ngāueʻaki ʻa e faingamālie ko ení ke vahevahe atu ai ʻene tuí ki he tokolahi kehé. ʻIo, ʻi he tokanga ki ha faingamālie ke lea ai fekauʻaki mo hoʻo tuí ʻe lava ke fakatupu fua. Ko e hā ʻa e ngaahi faingamālie ʻe lava ke ke ngāueʻakí?