Naʻe ʻi Ai ha Tohi Tapu ʻa Sīsū?

ʻIKAI, naʻe ʻikai ke ʻi ai ha Tohi Tapu ʻa Sīsū. Ko e hā hono ʻuhingá? Koeʻuhi ko e Tohi Tapú kātoa hangē ko ia ʻoku tau maʻu ʻi he ʻaho ní naʻe ʻikai maʻu ia ʻi he taimi ʻo Sīsuú. Neongo ia, naʻe tauhi ʻi he ngaahi sinakoké ʻa e ngaahi takainga tohi naʻe hiki ai ʻa e ngaahi konga tohi ʻa ia kuo hoko ia talu mei ai ko e konga ʻo e Tohi Tapú hangē ko ia ʻoku tau ʻilo ki aí. Naʻe lau ʻe Sīsū mei he takainga tohi ʻa Aiseá ʻi he sinakoké ʻi Nasaleti. (Luke 4:​16, 17) Naʻe fanongo ʻa e ʻapositolo ko Paulá ʻi hono “lau mai ʻo e Tohi Lao mo e Tohi Palofita” ʻi ʻAniteoke ʻi Pisitia. (Ngāue 13:​14, 15) Naʻe pehē ʻe he ākonga ko Sēmisí naʻe ‘lau ʻa e tohi ʻa Mosesé ʻi he ngaahi falelotú ʻi he sapate hokohoko.’—Ngāue 15:21.

Naʻe maʻu ʻe he faʻahinga tāutaha ʻi he ʻuluaki senitulí haʻanau ngaahi takainga tohi ʻo e Tohi Tapu Māʻoniʻoní? Ko e ʻIunoke ʻItiopea mei he lotoʻā ʻo Kuini Kanetaké ʻoku hā mahino naʻe ʻi ai ʻene takainga tohi, he naʻá ne “nofo ʻi heʻene saliote ʻo lau ʻa e tohi ʻa e Palofita ko Aisea” ʻi he fakafetaulaki atu ʻa Filipe kiate ia ʻi he hala ki Kesá. (Ngāue 8:​26-30) Naʻe kole ʻe he ʻapositolo ko Paulá kia Tīmote ke ʻomai ʻa e “ngaahi tohi kaeʻumaʻā ʻa e ngaahi tohi kiliʻimanu.” (2 Timote 4:13) Neongo naʻe ʻikai ke leaʻaki ʻe Paula pe ko e hā ʻa e ngaahi takainga tohí ni, ka ʻoku pau pē ko e konga eni ʻo e Ngaahi Konga Tohi Tapu Faka-Hepeluú.

Fakatatau kia Alan Millard, ko e palōfesa ʻi he ngaahi lea faka-Siú, ʻi he lotolotonga ʻo e kakai Siú, ko hono maʻu ʻe ha taha ʻa e takainga tohi ʻo e Tohi Tapú ko e meʻa pē ia ki he “kau tangata māʻolunga ʻo Pālesitaine, kiate kinautolu ʻoku nau taku ko e kakai ako, ko e niʻihi ʻo e kau Fālesí mo e kau faiako hangē ko Nikotīmasí.” Ko e ʻuhinga ʻe taha, ko hono totongí. Naʻe fakafuofua ʻe Millard “ko e mahuʻingá ko e tēnali ʻe ono ki he hongofulu ki he tatau ʻo e tohi Aiseá” peá ne pehē ko e kātoa ʻo e Tohi Tapu Faka-Hepeluú “ko e takainga tohi ia ʻe 15 ki he 20,” pe ko e ʻai mahinó ko hono mahuʻingá ko e vahe nai ia ki he vaeua taʻu ʻe taha.

ʻOku ʻikai ke fakahā ʻe he Tohi Tapú ia pe naʻe ʻi ai ha ngaahi takainga tohi ʻo e Tohi Tapú ʻa Sīsū pe ko ʻene kau ākongá. Neongo ia, ʻoku ʻikai toe fehuʻia ʻa e alāanga ʻa Sīsū mo e ngaahi veesi ʻo e Tohi Tapú, ʻi heʻene malava ke lave ki ai pe ngāueʻaki pē ia mei heʻene manatú. (Mātiu 4:​4, 7, 10; 19:​4, 5) ʻIkai ʻoku totonu ki he meʻá ni ke ne ueʻi kitautolu he ʻaho ní ke tau feinga ke alāanga mo e Tohi Tapú, koeʻuhi ko e maʻamaʻa hono totongí pea toe maʻungofuá?