1 Ko e Hā Hono ʻUhingá?

KO E kakai ʻi he anga-fakafonua mo e siasi kotoa pē takatakai ʻi he māmaní ʻoku nau lotu. ʻOku nau lotu ʻi he taimi ʻoku nau toko taha aí; pea ʻoku nau lotu ʻi ha ngaahi kulupu. ʻOku nau lotu ʻi he ngaahi siasí, temipalé, sinakoké, fale lotu Mosilemí, mo e ngaahi fale toputapú. Te nau ngāueʻaki nai ʻa e ngaahi laʻi ulaki lotu, kahoa losalio, ngaahi ukamea lotu ʻoku lava ʻo vilohi, ngaahi ʻīmisi, ngaahi tohi lotu pe ngaahi lotu ʻoku hiki ʻi he fanga kiʻi papa iiki ʻo tautau ki ʻolunga.

Ko e lotú ʻokú ne ʻai ʻa e faʻahinga ʻo e tangatá ke nau kehe ʻaupito mei ha toe meʻamoʻui ʻi he māmaní. Neongo ia, ʻoku lahi ʻa e meʻa ʻoku tau faitatau ai mo e fanga manú. ʻI he hangē ko e fanga manú, ʻoku tau fiemaʻu ʻa e meʻakai, ʻea mo e vai. ʻIkai ko ia pē, ʻoku fanauʻi foki mo kitautolu, ʻoku tau moʻui pea mate. (Tangata Malanga 3:​19) Ka ko e faʻahinga pē ʻo e tangatá ʻoku nau lotú. Ko e hā hono ʻuhingá?

Mahalo ko e tali faingofua taha ki aí he ʻoku fiemaʻu ke tau lotu. He ko ē, ko e lotú ʻoku faʻa vakai ki ai ʻa e kakaí ko ha founga ia ke nau fetuʻutaki ai ki he nofoʻanga laumālié, ko ha meʻa ʻoku nau vakai ki ai ʻoku māʻoniʻoni, toputapu mo taʻengata. ʻOku fakahaaʻi ʻi he Tohi Tapú naʻe ngaohi kitautolu mo e holi ki he ngaahi meʻa peheé. (Tangata Malanga 3:​11) ʻI ha taimi ʻe taha naʻe pehē ʻe Sīsū Kalaisi: “Fiefia ē ko kinautolu ʻoku nau lāuʻilo ki heʻenau fiemaʻu fakalaumālié.”​—Mātiu 5:3.

Ko e “fiemaʻu fakalaumālié”​—ʻa e ʻuhinga ʻoku ʻi ai ai ʻa e ngaahi fale lotú mo e ngaahi meʻa ʻoku nau ngāueʻaki ki he lotú pehē foki ki he ngaahi houa taʻefaʻalaua ʻoku fakamoleki ʻi he lotú. Ko e moʻoni, ko e kakai ʻe niʻihi ʻoku nau falala pē kiate kinautolu pe ki honau kaungā-faʻahinga ʻo e tangatá ke fakalato ʻenau ngaahi fiemaʻu fakalaumālié. Neongo ia, ʻikai nai ʻokú ke ongoʻi ʻoku ʻikai ke maʻu ʻe he faʻahinga ia ʻo e tangatá ʻa e malava ke fai ha tokoni ʻaonga? ʻOku tau fuʻu ngāvaivai, fuonounou mo ʻetau moʻuí pea ʻikai lava ke tau mahinoʻi ʻa e ngaahi meʻa lahi ʻi he moʻuí. Ko ha tokotaha pē ʻoku poto lahi ange, mālohi ange, mo kātaki lahi ange ʻiate kitautolú ʻe lava ke ne ʻomai ʻa e meʻa ʻoku tau fiemaʻú. Pea ko e hā ʻa e ngaahi fiemaʻu fakalaumālie ko eni ʻoku nau ueʻi kitautolu ke lotú?

Fakakaukau angé: Kuo ʻi ai nai ha taimi naʻá ke holi ai ki ha tataki, poto pe ha tali ki he ngaahi fehuʻi ʻoku hā ngali ʻikai lava ʻe he tangatá ʻo talí? Kuo ʻi ai nai ha taimi naʻá ke fiemaʻu ai ha fakafiemālie ke fekuki mo e mamahi he mole ha taha ʻi he maté, ko ha tataki ʻi he fehangahangai mo ha fili faingataʻa pe ha fakamolemole ʻi hono lōmekina koe ʻe he ongoʻi halaiá?

Fakatatau ki he Tohi Tapú, ko e ngaahi ʻuhinga lelei kotoa ia ke lotu. Ko e Tohi Tapú ʻa e tohi falalaʻanga taha ki he kaveinga ko ení, pea ʻoku hiki ai ha lēkooti ʻo e ngaahi lotu ʻa e kau tangata mo e kau fefine faitōnunga tokolahi. Naʻa nau lotu ki ha fakafiemālie, tataki, fakamolemole mo ha tali ki he ngaahi fehuʻi faingataʻa tahá.​—Saame 23:3; 71:21; Taniela 9:​4, 5, 19; Hapakuke 1:3.

Neongo naʻe kehekehe ʻa e ngaahi lotu ko ení, naʻe ʻi ai ʻa e meʻa naʻa nau faitatau ai. Ko e kau tangata mo e kau fefine naʻa nau fai ʻa e ngaahi lotu ko iá naʻa nau ʻiloʻi ha meʻa mahuʻinga fekauʻaki mo e lotú, ko ha meʻa kuo ngalo pe tukunoaʻi he māmaní ʻi he ʻahó ni. Naʻa nau ʻiloʻi ʻa e tokotaha ʻoku totonu ke fakahanga ki ai ʻa e lotú.