Fehuʻi mei he Kau Lautohí

Te tau mahinoʻi fēfē ʻa e ngaahi fika ʻi he līpooti ngāue fakataʻú?

Ko e taʻu taki taha, ʻoku tau fakatuʻotuʻa atu ki he līpooti ngāue ʻoku pulusi ʻi he Yearbook pea ʻi he ʻīsiu ʻo e Ko ʻEtau Ngāue Fakafaifekau ʻo Fepuelí. ʻOku fakafiefia ke sio ki he meʻa kuo lavaʻi ʻe he kakai ʻa Sihová ʻi he tuʻunga ko ha kulupu ʻi he ngāue fakamalanga mo fakafaiako ʻo e Puleʻangá ʻi māmani lahí. Ka ke maʻu ʻa e ʻaonga lahi tahá mei he līpōtí, ʻoku tau fiemaʻu hano mahinoʻi totonu ʻo e ngaahi meʻa ʻoku fakahuú pea pehē ki ha vakai mafamafatatau fekauʻaki mo e ngaahi fiká. Fakakaukau ki ha ngaahi fakatātā ʻe niʻihi.

Taʻu fakangāue. ʻOku lele eni mei Sepitema ʻo e taʻu ʻe tahá ki ʻAokosi ʻo e taʻu hokó. Ko e līpōtí ʻoku maʻá e taʻu fakangāue maʻu pē ia ki muʻá. Ko ia, Ko ʻEtau Ngāue Fakafaifekau ʻo Fepueli 2011 ʻoku ʻi ai ʻa e līpooti ki he taʻu fakangāue ʻo e 2010, ʻa ia ʻoku lele mei Sepitema 1, 2009, ki ʻAokosi 31, 2010.

Tumutumu kau malanga mo e ʻavalisi kau malanga. Ko e “Kau Malanga” ʻoku fakakau ki ai ʻa e Kau Fakamoʻoni ʻa Sihova kuo ʻosi papitaisó pea pehē ki he faʻahinga teʻeki papitaiso ʻoku taau ke hoko ko e kau malanga ʻo e Puleʻangá. Ko e “Tumutumu kau malanga” ko e fika māʻolunga taha ia ʻoku līpooti ki ha faʻahinga māhina ʻe taha ʻo e taʻu fakangāué pea ʻe fakakau nai ki ai ʻa e ngaahi līpooti tōmui naʻe ʻikai tānaki ki he līpooti ʻo e māhina ki muʻá. ʻI he foungá ni ko e kau malanga ʻe niʻihi ʻe lau tuʻo ua nai. Kae kehe, ko e tumutumu ʻo e fiká ʻoku ʻikai fakakau ai ʻa e tokolahi ʻo e kau malanga naʻa nau kau moʻoni atu ʻi he ngāue fakafaifekaú kae ngalo ke līpōtí. ʻOku fakamamafaʻi heni ʻa e mahuʻinga ʻo e līpooti leva ʻe he tokotaha malanga taki taha ʻi he māhina taki taha. Ko e “ʻavalisi kau malanga” ko e fika anga-maheni ia ʻo e faʻahinga kehekehe ʻoku nau līpooti ʻa e taimi ʻi he ngāue fakafaifekaú ʻi he māhina taki taha.

Ngaahi houa kātoa. Fakatatau ki he līpooti naʻe pulusi ʻi he 2011, naʻe fakamoleki ʻe he Kau Fakamoʻoni ʻa Sihová laka hake he houa ʻe 1.6 piliona ʻi he malaʻe fakafaifekaú. Kae kehe, ko e kātoa ko ení, ʻoku ʻikai fakafofongaʻi ai ʻa e ngaahi houa kotoa ʻoku tau fakamoleki ʻi heʻetau lotú, he ʻoku ʻikai kau ai ʻa e taimi ʻoku tau līʻoa tuʻumaʻu ki he ngaahi ngāue hangē ko e tauhi-sipí, maʻu ʻa e ngaahi fakatahá, mo e kau atu ʻi he ako Tohi Tapu fakafoʻituitui mo e fakalaulauloto.

Paʻanga naʻe fakamolekí. Lolotonga e taʻu fakangāue 2010, naʻe fakamoleki ʻe he Kau Fakamoʻoni ʻa Sihová ʻo laka hake ʻi he $155 miliona ʻi hono tokangaʻi ʻo e kau tāimuʻa makehe, kau misinale, mo e kau ʻovasia fefonongaʻakí ʻi heʻenau vāhenga-ngāue fakamalangá. Kae kehe, ko e fika ko ení ʻoku ʻikai, kau ai ʻa e fakamole ki hono paaki ʻa e ngaahi tohi makatuʻunga ʻi he Tohi Tapú ʻoku tau ngaohí; pea ʻikai foki kau ai ʻa e paʻanga ʻoku fakamoleki ʻi hono tokangaʻi ʻo e kau Pēteli pole laka hake ʻi he 20,000 ʻoku nau ngāue ʻi he ngaahi ʻapi vaʻa takatakai ʻi he māmaní.

Kau maʻu ʻinasi ʻi he fakamanatú. Ko e fika eni ʻo e niʻihi taautaha kuo papitaiso ʻoku nau maʻu ʻinasi ʻi he maá mo e uainé ʻi he Fakamanatú ʻi māmani lahi. ʻOku fakafofongaʻi ʻe he fakakātoa ko ení ʻa e fika ʻo e kau pani ʻi he māmaní? ʻIkai ʻaupito. ʻE fakatupunga nai ʻe ha ngaahi moʻoniʻi meʻa lahi—kau ai ʻa e ngaahi tui fakalotu ʻi he kuohilí pe naʻa mo e mahei fakaʻatamai pe fakaeongo—ha niʻihi ke nau maʻuhala ʻoku nau maʻu ʻa e ui fakahēvaní. ʻOku ʻikai ai ha founga te tau ʻilo ʻa e fika totonu ʻo e kau pani ʻi he māmaní; pea ʻikai foki ha fiemaʻu ke tau ʻilo ki ai. ʻOku ʻikai ke tauhi ʻe he Kulupu Pulé ia ha lisi ʻo e ngaahi hingoa ʻo e tokotaha kotoa ʻoku maʻu ʻinasi ʻi he maá mo e uainé ʻi he Fakamanatú.a

Ko e meʻa pē ʻoku tau ʻiló ʻe ʻi ai ʻa e niʻihi ʻo e “kau tamaioʻeiki [pani] ʻa hotau ʻOtua” ʻi he māmaní ʻi he taimi ʻe tukuange mai ai ʻa e ngaahi matangi fakaefakaʻauha ʻo e mamahi lahí. (Fkh. 7:1-3) ʻO ka toki aʻu ki ai, ko e kau paní te nau takimuʻa ʻi ha meʻa kuo lēkooti fakaikiiki lelei ia ʻe heʻetau līpooti ngāue fakataʻú—ko e ngāue fakamalanga mo fakafaiako lahi taha ʻi he hisitōlia ʻo e faʻahinga ʻo e tangatá.

[Fakamatala ʻi lalo]