‘Te U Malava Fēfē ke Malanga?’

ʻI he māmaní kotoa, ʻoku tau maʻu ai e ngaahi faʻifaʻitakiʻanga tuʻu-ki-muʻa ʻo e fanga tokoua mo e fanga tuofāfine ʻoku nau kau faitōnunga ʻi he ngāue fakamalangá neongo ʻa e fekuki mo e mahamahaki lahi. Ko e fakatātaá, ko Dalia, ʻoku nofo ʻi Vilnius, ʻa e kolomuʻa ʻo Lituēnia.

Ko Dalia ko ha tuofefine ia ʻoku taʻu 30 tupu. Talu mei hono fāʻeleʻí, mo ʻene puke ko e uesia ʻe he pā-kālava ʻi he ʻutó. Ko e mahaki ko iá kuó ne hoko ai ʻo mamatea pea heheu lahi ʻene leá. Ko hono olá, ko e ngaahi mēmipa pē ʻi he fāmilí ʻoku malava ke nau mahinoʻi lelei iá. ʻOku nofo ʻa Dalia mo ʻene faʻeé, ʻa Galina, ʻo ne tokangaʻi ʻene ngaahi fiemaʻú. Neongo ko e moʻui ʻa Dalia kuo fonu faingataʻa mo e loto-moʻua, ʻokú ne tauhi maʻu ha fakakaukau lelei. ʻOku malava fēfē ia?

ʻOku fakamatala ʻa Galina: “ʻI he 1999, ko Apolonija ʻa ia ʻoku ou tokouaʻakí naʻá ne haʻu ʻo ʻaʻahi mai kia kimaua. Naʻá ma fakatokangaʻi ko Apolonija, ko e taha ia ʻo e Kau Fakamoʻoni ʻa Sihová, naʻá ne ʻiloʻi lelei ʻene Tohi Tapú, pea naʻe kamata ke ʻeke ʻe Dalia kiate ia ha ngaahi fehuʻi lahi. ʻIkai fuoloa, naʻe kamata ha ako Tohi Tapu mo Dalia. Naʻá ku kau fakataha mo kinaua ʻi he akó he taimi ki he taimi ke tokoni ki hono fakamatalaʻi e lea ʻa Dalia. Kae kehe, naʻá ku fakatokangaʻi, ko e meʻa kotoa pē naʻá ne akó naʻá ne maʻu ʻaonga moʻoni mei ai. Naʻe vave ʻeku kole foki ha ako Tohi Tapu.”

ʻI he kamata mahinoʻi ʻe Dalia ʻa e ngaahi moʻoni Fakatohitapú, ko e foʻi fehuʻi ʻe taha naʻe kamata ke ne fakahohaʻasi lahi ia. Naʻe faifai pē ʻo ne lea hake ʻo ʻeke kia Apolonija: “ʻE malava fēfē ha taha hangē ko aú—ʻoku mamatea—ke malanga?’ (Māt. 28:19, 20) Naʻe fakapapauʻi anga-mokomoko ange ʻe Apolonija kia Dalia: “ʻOua ʻe ilifia. ʻE tokoniʻi koe ʻe Sihova.” Pea ko e moʻoni, ʻoku tokoniʻi ia ʻe Sihova.

ʻOku fēfē leva ʻa e malanga ʻa Dalia? ʻI he ngaahi founga kehekehe. ʻOku tokoniʻi ia ʻe he fanga tuofāfine Kalisitiané ke teuteu ha ngaahi tohi fakataha mo ha pōpoaki Fakatohitapu. ʻUluakí, ʻoku fakahaaʻi ʻe Dalia ʻene fakakaukaú ki he fanga tuofāfiné. ʻOku nau faʻu leva ha tohi ʻoku ʻi ai ʻene ngaahi fakakaukaú. ʻOku toe faifakamoʻoni ʻa Dalia ʻaki ʻene ʻave pōpoaki heʻene telefoni toʻotoʻó. Pea ʻi he sai ʻa e ʻeá, ʻoku ʻave ia ʻe he ngaahi mēmipa ʻo e fakatahaʻangá ki tuʻa ke ne fakalea ki he kakai ʻoku nau fetaulaki ʻi he ngaahi paʻake he feituʻú pea ʻi he halá.

Kuo hokohoko atu ʻa Dalia mo ʻene faʻeé ʻi hono fai ʻa e fakalakalaka fakalaumālie. Naʻá na fakatou fakatapui kinaua kia Sihova peá na papitaiso ʻi Nōvema 2004. ʻI Sepitema 2008, naʻe fokotuʻu ai ha kulupu lea faka-Pōlani ʻi Vilnius. Koeʻuhi naʻe fiemaʻu ʻe he kulupú ha kau malanga tokolahi ange ʻo e Puleʻangá, naʻe kau ki ai ʻa Dalia mo ʻene faʻeé. ʻOku pehē ʻe Dalia: “ʻI he ngaahi māhina ʻe niʻihi ʻoku ou hohaʻa ʻi he teʻeki ai ke u ʻalu ʻi he malangá. Ka ʻi he hili e lotu kia Sihova fekauʻaki mo iá, ʻoku vave hono ʻai ʻe ha taha ha ʻapoinimeni ke ʻalu mo au ʻi he ngāue fakafaifekaú.” ʻOku fēfē ongoʻi ʻa siʻotau tuofefine ko Dalia fekauʻaki mo hono tuʻungá? ʻOkú ne pehē: “Kuo fakamamateaʻi ʻe he mahakí hoku sinó, ka kuo ʻikai te ne fakamamateaʻi hoku ʻatamaí. ʻOku ou fiefia ʻaupito ʻi he malava ke talanoa mo e niʻihi kehé fekauʻaki mo Sihová!”