“Kātaki ʻE Lava Ke Ke ʻAi Hama Laʻitā?”

Hili ʻa e ʻaho hono ua ʻo ha fakataha-lahi, ko Josué, ko ha tokotaha Pēteli ʻi Mekisikou, naʻá ne ʻaʻahi ki he kolo ko Querétaro. Ko e ongo mātuʻa folau ʻeveʻeva ko Javier mo Maru, naʻá na kole ange kia Josué ke ne ʻai ha laʻitā ʻo kinaua. Koeʻuhi ko ia mo hono ngaahi kaungāmeʻa Fakamoʻoní naʻa nau teunga lelei pea naʻa nau tui honau ngaahi kaati fakaʻilongá, naʻe ʻeke ange ai ʻe he ongo mātuʻá kia kinautolu pe naʻa nau haʻu mei ha maʻu tohi fakamoʻoni ako pe ko ha toe kātoanga makehe. Naʻe fakamatalaʻi ange ʻe Josué naʻa nau kau ki ha fakataha-lahi ʻa e Kau Fakamoʻoni ʻa Sihová pea fakaafeʻi ʻa e ongo mātuʻá ke na maʻu ʻa e konga ʻi he Sāpaté.

Naʻe ongoʻi ʻe he ongo mātuʻá ʻoku fuʻu fakamā ke na maʻu ia koeʻuhí he naʻe ʻikai ke ʻi ai haʻana vala taau ki ha fakataha pehē. Ka neongo ia, naʻe ʻoange ʻe Josué hono hingoá pea mo e fika telefoni ʻo e ʻōfisi vaʻa naʻá ne ngāue aí.

Naʻe ʻohovale ʻa Josué, ʻi he māhina ʻe fā ki mui aí naʻá ne fanongo meia Javier. Naʻe maʻu ʻe he ongo mātuʻá ʻa e fakataha-lahí pea ʻi he taimi ko ení naʻá na loto ke ʻaʻahi ange kiate kinaua ʻa e Kau Fakamoʻoni ʻa Sihova ʻi he Kolo Lahi ko Mekisikoú, ʻa e feituʻu naʻá na nofo ai he taimi ko iá. Naʻe kamata leva ha ako Tohi Tapu mo Javier mo Maru, pea naʻá na kamata leva ke maʻu ʻa e ngaahi fakatahá. ʻI he māhina ʻe hongofulu ki mui ai, naʻá na hoko ko e ongo malanga teʻeki papitaiso. Neongo naʻe pau ke hiki ʻa e ongo mātuʻá ki Toronto, Kānata, naʻá na hokohoko atu ʻena fakalakalaka fakalaumālié peá na papitaiso.

Ki mui ai, naʻe maʻu ʻe Josué ha tohi meia Javier ʻo fakamatalaʻi ai ʻa e meʻa naʻá ne ueʻi ia ke ne tali ʻa e moʻoní. “Ki muʻa ʻi hono maʻu ʻa e fakataha-lahí, naʻá ku talanoa mo hoku uaifí ki heʻema fiemaʻu ha tataki fakalaumālié. ʻI he taimi naʻá ma sio ai ki hoʻomou teunga leleí, naʻá ma fakakaukau naʻa mou ʻi ha fuʻu fakataha makehe. ʻI he fakataha-lahí, naʻe maongo ai kia kimaua ʻa e founga anga-ʻofa ʻo e taki atu kimaua ki homa nofoʻangá, mo tokoniʻi kimaua ke muimui fakataha ʻi he Tohi Tapú, pea mo e ʻulungaanga ʻo e kau maʻu fakatahá. Naʻe ʻikai ko ha fuʻu meʻa mahuʻinga ia ʻa ʻema teunga ʻo hangē ha ongo folau ʻeveʻevá.”

He fakamoʻoniʻi ē ʻe Josué ʻa e ngaahi lea ʻa e poto ko Tuʻi Solomoné! Naʻe tohi ʻe Solomone: “ʻI he pongipongi to hoʻo tenga, pea ʻi he efiafi ofi ʻa e poʻuli ʻoua taʻofi ho nima: He ʻoku ʻikai te ke ʻilo pe ko e fe ʻe tuʻumalie, ʻa é pe ko é; pea naʻa fakatou lelei.” (Koh. 11:6) ʻE lava ke ke tūtuuʻi ha tenga ʻaki hono ngāueʻaki ʻa e ngaahi faingamālié ke tala ai ki he niʻihi kehé fekauʻaki mo ha fakataha-lahi ʻoku ʻamanaki ke fai pe ko ha malanga maʻá e kakaí? ʻOku ngāueʻaki nai koe ʻe Sihova ke ke tohoakiʻi mai ha faʻahinga ʻoku fiekaia mo fieinua ki he tataki fakalaumālié, ʻo hangē ko ia ko Javier mo Maru.—ʻAi. 55:1.

[Fakatātā ʻi he peesi 32]

Toʻohema ki toʻomataʻu: Alejandro Voeguelin, Maru Pineda, Alejandro Pineda, Javier Pineda, mo Josué Ramírez ʻi he vaʻa ʻi Mekisikoú