ʻI he Fekumi ki he Ngaahi Talí

“ʻOku meimei ko e tokotaha kotoa ʻoku ʻi ai ʻene fakakaukau fekauʻaki mo [Sīsū]. Tatau ai pē pe ko e hā ʻa e tuʻunga ʻoku ʻi ai ʻetau tuí pe ko ʻetau veiveiuá, ko kitautolu kotoa ʻoku tau fifili, ‘Ko hai ʻa e tangata ko ení?’”—FAʻUTOHI KO STAN GUTHRIE.

ʻOKU fieʻilo ʻa e kakaí ʻo fekauʻaki mo Sīsū. Ko e ngaahi tohi fekauʻaki mo iá kuo hoko ia ʻo fakataua lahi. Kuo hoko ʻa e ngaahi faiva fekauʻaki mo iá ʻo manakoa ʻaupito. Neongo ia, ʻoku kei tuʻu pē ʻa e ngaahi fehuʻi fekauʻaki mo Sīsuú. ʻOku maʻu ʻe he kakaí ʻa e ngaahi fakakaukau kehekehe fekauʻaki mo Sīsū pe ko hai moʻoni ia.

ʻI he ngaahi taʻu siʻi kuo maliu atú, naʻe fai ai ʻe ha ongo faiongoongo ha fakaafe ki he kakaí ke nau tali mai ʻi he ʻinitanetí ʻa e foʻi fehuʻi, “Ko hai ʻa Sīsū?” Ko e ngaahi talí naʻe kau ai ʻa e ngaahi meʻa ko ení:

● “Ko ha lāpai (faiako) nai ia ʻa ia naʻá ne ʻai ʻene moʻuí ko ha faʻifaʻitakiʻanga ia ʻo e manavaʻofá.”

● “Ko ha tangata anga-maheni pē ia naʻá ne moʻui ʻi ha moʻui naʻe makehe atu.”

● “ʻOku ʻikai ke ʻi ai ha fakamoʻoni ia naʻe ʻi ai ha tokotaha ko Sīsū.”

● “Ko Sīsū ko e ʻAlo ia ʻo e ʻOtuá ʻa ia naʻe ʻaloʻi mai, pekia, pea fokotuʻu hake mei he maté ke fakahaofi kitautolu mei heʻetau ngaahi angahalá. ʻOkú ne lolotonga moʻui he ʻahó ni, pea Te Ne toe haʻu ki he māmaní.”

● “ʻOku ou tui ko Sīsū Kalaisí ko e ʻalo pē ia ʻe taha ʻo e ʻOtuá, ko ha tangata kakato pea ko ha ʻotua kakato, fakatouʻosi ʻi he taimi tatau pē.”

● “Ko Sīsuú ko ha foʻi talanoa fananga pē ia ki he fānau lalahí.”

ʻOku hā mahino, ko e ngaahi fakakaukau kehekehe lahi ko ení ʻe ʻikai lava ke tonu kotoa pē ia. ʻOku ʻi ai ha maʻuʻanga fakamatala falalaʻanga ʻe taha ʻa ia ʻe lava ke ne ʻomai ha tali ʻoku ʻi ai hano mafai ki heʻetau ngaahi fehuʻi fekauʻaki mo Sīsuú? Ko e kau faipulusi ʻo e makasini ko ení ʻoku nau tui ko e Tohi Tapú ko e Folofola ia ʻa e ʻOtuá pea ko ia pē taha ʻokú ne tala mai kia kitautolu ʻa e moʻoni kakato ʻo fekauʻaki mo Sīsuú.a—2 Tīmote 3:16.

ʻI he kupu hokó, te tau vakai ai ki he tali ʻa e Tohi Tapú ki he ngaahi fehuʻi anga-maheni ʻe niʻihi fekauʻaki mo Sīsū. Ko ia tonu naʻá ne pehē ko e hala ki he fakamoʻuí ʻoku ʻatā ia ki he “tokotaha kotoa pē ʻokú ne ngāueʻi ʻa e tui kiate iá.” (Sione 3:16) ʻOku mau fakaafeʻi atu koe ke ke sivisiviʻi ʻa e ngaahi talí peá ke fai haʻo fili pe ʻoku fiemaʻu kiate koe ke ke ako lahi ange fekauʻaki mo Sīsū pea mo e founga ke ngāueʻi ai ʻa e tui kiate iá.

[Fakamatala ʻi lalo]