Fakavaiaʻi ʻe he Anga-Leleí ʻa e Loto-Koná

NAʻE mātuʻaki taʻeangafakakaumeʻa moʻoni ha fefine taʻumotuʻa ʻi he taimi naʻe fakaofiofi atu ai ʻa George mo Manon, ko e toko ua ʻi he Kau Fakamoʻoni ʻi Netalení mo e ongoongo lelei ʻo e Puleʻangá. Naʻá na ʻilo kuo mole atu ʻa hono ongo husepāniti ʻe toko ua mo ha foha ʻi he maté pea naʻá ne tofanga ʻi ha langa hui lahi. Neongo naʻá ne nonga hifo ʻi ha ʻuhinga lolotonga ʻa e fetalanoaʻakí, naʻe ʻikai ʻaupito te ne anga-fakakaumeʻa moʻoni.

Kae kehe, naʻe fokotuʻu ange ʻe George kia Manon ke na foki mo ha haʻinga matalaʻiʻakau ki he fefiné koeʻuhí he ʻokú ne hā ngali fuʻu tuēnoa mo loto-kona. ʻI heʻena fai iá, ko e tokotaha-ʻapí, ʻa Rie, naʻá ne ʻohovale fiefia. Ka, ko ha taimi faingatāmaki ia kiate ia, ko ia naʻe fai ha fokotuʻutuʻu ki ha ʻaho ʻamui ange. ʻI he taimi naʻe foki atu ai ʻa George mo Manon ʻi he taimi naʻe fokotuʻutuʻú, naʻe ʻikai ke haʻu ha taha ki he matapaá. Neongo naʻá na feinga ʻi he ngaahi taimi kehekehe, naʻe ʻikai te na toe maʻu ia. Naʻe aʻu ʻo kamata ke na fakakaukau ʻo pehē naʻá ne fakaʻehiʻehi meia kinaua.

ʻI ha ʻaho ʻe taha, naʻe faifai pē ʻo maʻu atu ʻe George ʻa Rie ki hono ʻapí. Naʻe kole fakamolemole ange ʻa Rie ʻi he ʻikai ke ne fai ki heʻenau aleá peá ne fakamatala ange naʻá ne tokoto ʻi he falemahakí. “Ka ʻokú mo ʻilo ha meʻa, ʻi he hili hoʻomo mavahé,” ko ʻene leá ia. “Naʻá ku kamata lau ʻa e Tohi Tapú!” Naʻe hoko atu ai ha fetalanoaʻaki, pea naʻe kamata ha ako Tohi Tapu.

ʻI he ako ʻe Rie ʻa e Tohi Tapú, naʻá ne liliu ai mei ha tokotaha loto-kona ki ha fineʻeiki fiefia mo anga-lelei. Neongo ʻene nofo falé, naʻe vave ʻa e kamata ke ne vahevahe ʻa ʻene tui maʻu foʻoú ki ha taha pē ʻoku ʻaʻahi ange kiate ia. Ko ʻene tuʻunga moʻuí naʻe ʻikai fakaʻatā ai ia ke ne faʻa maʻu ʻa e ngaahi fakataha ʻa e fakatahaʻangá, ka naʻá ne fiefia ʻi he ʻaʻahi ange ʻa e fanga tokouá mo e fanga tuofāfiné. ʻI he ʻaho naʻá ne taʻu 82 aí, naʻá ne maʻu ha ʻasemipilī fakasēketi pea naʻe papitaiso ai ia ʻi he fakahāhaaʻi ʻene fakatapui ki he ʻOtuá.

Hili ʻene maté ʻi ha ngaahi māhina siʻi pē mei ai, naʻe maʻu hake ai ha foʻi maau ʻa ia kuó ne hiki. ʻI aí, naʻá ne fakamatalaʻi ai ʻa e mamahi ʻo e nofo tokotaha ʻi he taʻumotuʻá pea fakamamafaʻi ai ʻa e mahuʻinga ʻo e anga-leleí. “Ko hono lau ʻa e foʻi maau ko iá naʻe maongo moʻoni ia kiate au,” ko e lau ia ʻa Manon, “pea ʻoku ou fiefia lahi ʻi hono tokoniʻi kimaua ʻe Sihova ke ma fakahāhā ʻa e anga-lelei kiate ia.”

ʻIo, ko e faʻifaʻitakiʻanga tonu ʻa Sihová ʻoku ueʻi ai kitautolu ke tau fakahāhā ʻa e ʻofa mo e anga-lelei peheé. (ʻEf. 5:1, 2) Ko ʻetau ngāue fakafaifekaú ʻe fua lahi ʻi heʻetau ‘fakaongoongoleleiʻi kitautolu ʻi he tuʻunga ko e kau faifekau ʻa e ʻOtuá . . . ʻi he anga-lelei.”—2 Kol. 6:4, 6.