ʻOkú Ke Manatuʻi?
Kuó ke lau fakalelei ʻa e ngaahi ʻīsiu fakamuimui ʻo e Taua Leʻo? Sio angé pe ʻe lava ke ke tali ʻa e ngaahi fehuʻi ko ení:
Naʻe ʻoange ʻe he louʻulu ʻo Samisoní kiate ia ha ivi?
Ko e louʻulu ʻo Samisoní ʻiate ia tonu naʻe ʻikai te ne ʻoange kiate ia ha ivi. Ko hono louʻulú naʻe tuʻu ia ʻo ʻuhinga ki he vahaʻangatae makehe naʻá ne maʻu mo e ʻOtuá ʻi hono tuʻunga ko ha Nāsilí. Ko e vahaʻangatae ko iá naʻe uesia ia ʻi he taimi naʻe ʻai ai ʻe Tilila ʻo kosi hono louʻulú.—4/15, peesi 9.
ʻI hono fakafehoanaki mo hotau mafú, ko e hā ʻa e meʻa ʻe tolu ʻe lava ke kaunga lelei ki hotau lotó?
(1) Meʻakai. Hangē ko e fiemaʻu ki hotau mafú ha meʻakai fakatupu moʻuileleí, ʻoku tau fiemaʻu ʻa e meʻakai fakalaumālie lelei lahi feʻunga. (2) Ngāueʻi. Ko e kau faivelenga ʻi he ngāue fakafaifekaú ʻe lava ke tauhi ai hotau loto fakalaumālié ʻi ha tuʻunga lelei. (3) ʻĀtakai. ʻE lava ke tau fakasiʻisiʻi ʻa e mafasiá ʻaki ʻa e feohi mo e ngaahi kaungātui, ʻoku nau tokanga mai kiate kitautolú.—4/15, peesi 16.
Ko e hā ʻoku totonu ai ke ʻoua ʻe ngāueʻaki ʻe ha tokotaha-malanga putu ʻa e Saame 116:15 ki he tokotaha maté?
ʻOku pehē ʻe he konga tohí: “ʻOku mahuʻinga ʻi he ʻao ʻo Sihova ʻa e pekia ʻa hono ʻofaʻanga [“kau mateakí,” NW].” ʻOku ʻuhinga ení ʻoku lau ʻe he ʻOtuá ʻa e mate ʻa ʻene kau mateakí kotoa ko e fuʻu mole lahi ʻaupito ia ke tuku ke hoko. ʻE ʻikai te ne fakaʻatā ʻene kau sevānití ʻi he tuʻunga ko ha kulupú ke toʻo atu mei he māmaní.—5/15, peesi 22.
Ko hai ʻa e kau kolopotá?
Ki muʻa ʻi he 1931, ko e foʻi lea “kau kolopota” naʻe ngāueʻaki ia ki he faʻahinga ʻoku ui he taimí ni ko e kau tāimuʻá.—5/15, peesi 31.
Ko hai ʻoku faʻuʻaki ʻa e “ngaahi puleʻanga ko ia” ʻoku lave ki ai ʻi he Taniela 2:44?
ʻOku lave ia ki he ngaahi puleʻanga, pe ngaahi founga-pule, ʻoku fakatātaaʻi ʻe he ngaahi konga kehekehe ʻo e ʻīmisi ukamea naʻe fakamatalaʻi ʻe Tanielá.—6/15, peesi 17.
Ko fē taimi naʻe hoko ai ʻa e Hau ʻi Māmani ʻo Pilitānia-ʻAmeliká ko e hau ʻi māmani hono fitú ʻi he kikite ʻa e Tohi Tapú?
Ko e hau ʻi māmani fakatahaʻi ko ení naʻe ʻi ai ia ʻi he taimi naʻe ngāue fakataha ai ʻa Pilitānia pea mo e ʻIunaite Seteté ʻi ha founga mātuʻaki mahuʻinga lolotonga ʻa e Tau I ʻa Māmaní.—6/15, peesi 19.
Ko e hā ʻa e ngaahi meʻa ʻe taki fakahangatonu atu ki ʻĀmaketoné?
Ko e ngaahi puleʻangá te nau fai ha talaki fakahāhā ʻo ha “melino mo e malu!” (1 Tes. 5:3) ʻE ngaʻunu atu ʻa e ngaahi puleʻangá ʻo fakafepakiʻi ʻa e lotu loí. (Fkh. 17:15-18) ʻE ʻi ai hano ngaohikoviʻi ʻa e kau lotu moʻoní. ʻE toki hoko mai leva ʻa e ngataʻangá.—7/1, peesi 9.