Ko ha Feingangāue Palani Lelei ʻOku ʻOmai Ai ʻa e Fua

Ko María Isabel ko ha kiʻi tokotaha malanga faivelenga ʻi ha kolo lahi ko San Bernardo ʻi he fonua ʻAmelika Tonga ʻo Silí. Ko ia mo hono fāmilí ʻa e kau mēmipa ʻo e kakai tuʻufonua ʻo Mapuche. Ko e fāmilí fakalūkufua kuo nau poupouʻi faivelenga ʻa e ngaahi feinga ke fokotuʻu ha fakatahaʻanga foʻou ʻi he lea Mapuche, ʻa ia ʻoku toe ui ko e Mapudungun.

ʻI he taimi naʻe fanongonongo ai ʻe toe fai ʻa e Fakamanatu ʻo e pekia ʻa Kalaisí ʻi he Mapudungun pea ʻoku ala maʻu ʻa e ngaahi tohi fakaafe Fakamanatu ʻosi pulusi ʻe 2,000 ke tufaki ʻi he lea ko iá, naʻe ʻai ai ke fakakaukau ʻa María Isabel. Ko e hā ʻe lava ke ne fai ke tokoní? Naʻá ne manatu ki he ngaahi hokosia ʻa e kau toʻutupu Fakamoʻoni kehe naʻa nau maʻu e lavameʻa lolotonga ʻa e malanga ki he ngaahi kaungākalasí mo e kau faiakó. Naʻá ne talanoa ki heʻene ongo mātuʻá fekauʻaki mo ia, pea nau fakapapauʻi fakataha ke feinga ʻa María Isabel ke fakakaukau fekauʻaki mo ha palani ke tufaki ʻa e ngaahi tohi fakaafé ʻi ʻapiako. Ko e hā ʻa e palani naʻá ne fakakaukau ki aí?

ʻUluakí, naʻe kole ʻe María Isabel ha ngofua ki he kau maʻu mafai ʻi he ʻapiakó ke ne fakapipiki ha tohi fakaafe ʻi he hūʻanga tefito pē ʻo e ʻapiakó. Naʻa nau tali ʻene kolé pea fakahīkihikiʻi ia ʻi heʻene tamuʻomuʻá. ʻI he ʻaho ʻe taha he taliui pongipongí, naʻe aʻu ʻo fanongonongo ai ʻe he pule akó ʻi he meʻa fakaleʻolahí fekauʻaki mo e tohi fakaafé!

Naʻe kole leva ʻe María Isabel ke ne ʻaʻahi ki he ngaahi loki akó kotoa. Hili ʻene maʻu e ngofua mei he kau faiakó, naʻá ne ʻeke ai ki he kalasi ako taki taha pe ʻoku ʻi ai ha faʻahinga ko e kau Mapuche. “Naʻá ku fakakaukau ʻe ʻi ai nai ha toko 10 pe toko 15 ʻo e kau ako mei he ngaahi fāmili Mapuche ʻi he ʻapiakó kotoa,” ko ʻene laú ia, “ka naʻe ʻi ai ʻa e tokolahi ange—naʻe iku leva ʻou tufaki ʻa e tohi fakaafe ʻe 150!”

“NAʻÁ NE ʻAMANEKINA HA TOKOTAHA TAʻUMOTUʻA ANGE”

Ko ha fefine ʻe taha naʻá ne sio ki he tohi fakaafé ʻi he hūʻanga ʻo e ʻapiakó naʻá ne ʻeke pe ko hai ʻoku totonu ke ne lea ki ai fekauʻaki mo e meʻa ʻe hokó. Fakaʻuta atu ki heʻene ʻohovalé he taimi naʻe tataki atu ia ki ha taʻahine taʻu hongofulu! “Naʻá ne ʻamanekina ha tokotaha taʻumotuʻa ange,” ko e lea ia ʻa María Isabel ʻi heʻene malimali lahí. Hili hono ʻoange kiate ia ha tohi fakaafe mo ha fakamatala nounoú, naʻe kole ange ʻe María Isabel ki he fefiné hono tuʻasilá koeʻuhí ke ne malava mo ʻene ongo mātuʻá ʻo ʻaʻahi atu kiate ia ke talanoa lahi ange fekauʻaki mo e Puleʻanga ʻo e ʻOtuá. He fiefia ē ko e kau malanga ʻe toko 20 ʻoku ngāue ʻi he malaʻe lea Mapudungun ke sio ki he fefiné fakataha mo e toko 26 kehe ʻo e kau mahuʻingaʻia ʻi he kakai Mapuche ʻoku nau ʻi he Fakamanatú. Ko e kulupu ko iá ko ha fakatahaʻanga lakalakaimonū ia he taimí ni!

Tatau ai pē pe ko e hā ho taʻumotuʻá, ʻe lava ke ke tamuʻomuʻa pehē ke fakaafeʻi ʻa e kaungāakó pe kaungāngāué ki he Fakamanatú, ko ha malanga maʻá e kakaí, pe ko ha fakataha-lahi fakavahé? Ko e hā ʻoku ʻikai ke fai ai ha fekumi ʻi heʻetau ʻū tohí ke maʻu ha ngaahi hokosia ʻe ʻoatu ai ha ngaahi fakakaukau ki he founga ke lavameʻa ai ha poloseki pehē? Pehē foki, lotu ʻo kole e tokoni ʻa e laumālie ʻo Sihová ke ke tātānaki ʻa e loto-toʻa ke lea ai fekauʻaki mo ia. (Luke 11:13) Kapau te ke fai pehē, te ke toe ʻohovale fiefia nai mo koe pea loto-toʻa lahi ʻi he ngaahi ola ʻo hoʻo feinga palani leleí.